TIMIRTTE 26
Iitabay Ayssi Gakkii, Qassi Asay Ayssi Waayettii?
Keehi iitabay haniyo wode, “Hagee aybissi hanidee?” giidi oychchiyoogee wottin deꞌiyaaba. Geeshsha Maxaafay ha oyshaa zaariyo gishshawu nuuni keehi ufayttoos!
1. Seexaanay alamiyan iitabay doommanaadan ay oottidee?
Seexaanaa Dabloosi Xoossaa bolli makkaliis. Seexaanay harata haaranawu koyido gishshawu, koyro asati Addaameenne Hewaanakka Xoossaa bolli makkalanaadan denttettiis. Seexaanay Hewaaniyyo wordduwaa yootiyoogan hegaadan oottiis. (Doomettaabaa 3:1-5) A bana Yihooway loꞌꞌobaa diggiis gaada qoppanaadan oottiis. I giidobay asay Xoossawu azazettana xayikko ufayttana giyoogaa mala. Seexaanay Hewaana hayqqennaagaa yootiyoogan koyro wordduwaa odiis. Yaatiyo gishshawu, Geeshsha Maxaafay Seexaanaa, “worddanchchanne qassi wordduwaukka aawa” yaagees.—Yohaannisa 8:44.
2. Addaameenne Hewaana ay oottanawu dooridonaa?
Yihooway Addaamessinne Hewaanissi daro keha. Eti Edene Gannatiyan deꞌiya mittaappe issuwaa aggidi hara ubbaa teeraa maana danddayiyoogaa I yootiis. (Doomettaabaa 2:15-17) SHin eti he mittaa teeraa maanawu kuuyidosona. Hewaana “he mittaa teeraappe ekkada maasu.” Guyyeppe, Addaameekka ‘hegaappe miis.’ (Doomettaabaa 3:6) Eti naaꞌꞌaykka Xoossawu azazettibookkona. Yaatiyoogan, eti nagaraa oottidosona; qassi oottanabaanne oottennan agganabaa etawu yootanawu maatay deꞌiyo Yihoowawu azazettibookkona. Eti hegaadan kuuyido gishshawu keehi waayettidosona.—Doomettaabaa 3:16-19.
3. Addaameenne Hewaana kuuyidobay nuna waati qohidee?
Addaameenne Hewaana nagaranchcha gidiyo gishshawu, bantta zeretta ubbaa nagaraa laatissidosona. Geeshsha Maxaafay, “Nagarai ha sa7aa issi asa baggaara geliis; he nagarai banaara haiquwaa ehiis; hegaa gaasuwan, . . . haiqoi asa zare ubbaa gakkiis” yaagidi Addaamebaa yootees.—Roome 5:12.
Dumma dummabay nuuni waayettanaadan oottees. Issi issitoo nuuni woy hara asay kuuyido iitabaa gaasuwan waayettoos. Qassi issi issitoo qoppennan gakkiyaabay nuuni waayetanaadan oottees.—Eranchchaa 9:11 nabbaba.
LOYTTA AKEEKA
Ha wodiyan alamiyan deꞌiya iitabawunne waayiyawu gaasoy Xoossaa gidennay aybissakko, qassi nuuni waayettiyo wode awu aybi siyettiyaakko akeeka.
4. Nuuni waayettanaadan oottiyaagaa
Daro asay kumetta saꞌaa haariyay Xoossaa giidi ammanees. SHin hegee tumee? BIIDUWAA beꞌite.
Yaaqooba 1:13nne 1 Yohaannisa 5:19 nabbabite; yaatidi ha oyshaa tobbite:
-
Waayiyawunne iitabawu gaasoy Xoossay?
5. Seexaanay haariyoogaa doommoosappe aybi hanidee?
Doomettaabaa 3:1-6 nabbabite; yaatidi ha oyshata tobbite:
-
Seexaanay woygi worddotidee?—Paydo 4nne 5 xeella.
-
Seexaanay waatidi Yihooway loꞌꞌobaa asaa diggidoba milatissidee?
-
Seexaanay asay ufayttanawu Yihoowawu haarettana koshshenna giyoogaa waati bessidee?
Eranchchaa 8:9 nabbabite; yaatidi ha oyshaa tobbite:
-
Ha alamiyaa haariyay Yihoowa gidenna wodiyan aybi hanidee?
-
Addaameenne Hewaana wottiyoobi baynna asa; qassi eti Gannatiyan deꞌidosona. SHin eti Seexaanay yootidobaa siyidi Yihoowa bolli makkalidosona
-
He makkalaappe simmin nagaray, waayeenne hayqoy ha alamiyan dariis
-
Yihooway nagaraa, waayiyaanne hayquwaa xayssana. Asay wottiyoobi baynnageeta gididi Gannatiyan deꞌana
6. Nu waayettiyo wode Yihooway nuussi qoppees
Nuuni waayettiyo wode Xoossay nuussi qoppii? Kawuwaa Daawitinne kiitettida PHeexiroosi xaafidobaa akeeka. Mazamure 31:7nne 1 PHeexiroosa 5:7 nabbabite; yaatidi ha oyshaa tobbite:
-
Yihooway nuuni waayettiyoogaa akeekiyoogaanne nuussi qoppiyoogaa erido gishshawu neeyyo aybi siyettii?
7. Asaa gakkiya waayiyaa ubbaa Xoossay xayssana
Isiyaasa 65:17nne Ajjuutaa 21:3, 4 nabbabite; yaatidi ha oyshaa tobbite:
-
Asaa gakkida iitabaa ubbaa Yihooway xayssanaagaa eriyoogee minttettiyaaba gidiyoy aybissee?
Hagaa eray?
Seexaanay koyro wordduwaa yootido wode Yihoowa sunttaa mooriis. I Yihoowa haaroy suurenne siiquwaa bessiyaaba gidenna giidi asay abaa iitabaa qoppanaadan oottiis. Yihooway asaa bolli gakkiya waayiyaa mata wode xayssidi ba sunttaa geeshshana. I ba haaroy ubbaappe aaruwan loꞌꞌo gidiyoogaa bessana. Yihoowa sunttay geeyiyoogee saluwaaninne saꞌan aybippenne aaruwan koshshiyaaba.—Maatiyoosa 6:9, 10.
ISSI ISSI ASAY HAGAADAN GEES: “Waayettanaadan oottidi Xoossay nuna paaccees.”
-
Woygada zaaruutee?
AY AKEEKADII?
Seexaanaa Dabloosinne koyro asati naaꞌꞌati ha alamiyan deꞌiya iitabawu gaaso. Nu waayettiyo wode Yihooway nuussi keehi qoppees; qassi I matan waayiyaa xayssana.
Zaaretuwaa
-
Seexaanaa Dabloosi Hewaanissi yootido worddobay aybee?
-
Addaameenne Hewaana makkalidoogee nuna ubbaa waati qohidee?
-
Nu waayettiyo wode Yihooway nuussi qoppiyoogaa aybin eriyoo?
PILGGA
Geeshsha Maxaafay nagaraa woygi birshshiyaakko beꞌa.
Seexaanaa Dabloosi Edene gannatiyan denttidobaa xeelliyaagan gujjada nabbaba.
“Xoossay Tuggaa Aybissi Coꞌꞌu Giidi Xeellii?” (Wochchiyo Keelaa, Hosppune 1, 2014)
Deexo oyshawu zaarido minttettiyaabaa akeeka.
“Jarmanen Asaa Aybissi Buttidonaa? Xoossay Hegaa Teqqibeennay Aybissee?” (Nu websaytiyan deꞌiyaaba)
Issi bitanee ba yuushuwan gakkiya waayiyaabaa ay eridaakko beꞌa.
Hageeta Beꞌadii?
ASAY DAROTOO OYCHIYO OYSHATA
Yihoowa Markkati Geeshsha Maxaafaa Xannaꞌissiyoy Ayba Ogiyaanee?
Yihoowa Markkati miishsha qanxxissennan xannaꞌissiyo prograamiyan, Geeshsha Maxaafaa birshshettaa awugaakka goꞌettana danddayaasa. Ne so asa ubbaynne ne laggetikka nenaara xannaꞌanaadan shoobbana danddayaasa.
