TIMIRTTE 32
Xoossaa Kawotettay Haariiddi Deꞌees!
Xoossaa Kawotettay 1914n saluwan haariyoogaa doommiis. Asaa haaruwaa wurssetta gallassaykka he wode doommiis. Hegaa aybin eriyoo? Geeshsha Maxaafay kasetidi yootidobaa, qassi 1914ppe doommidi alamiyan hanidabaanne asay haniyoobaa nuuni beꞌana.
1. Geeshsha Maxaafay kasetidi yootidobay aybee?
Geeshsha Maxaafan Daaneela maxaafay ‘laappun laytta’ geetettida wodee wurin Xoossaa Kawotettay haariyoogaa doommanaagaa yootees. (Daaneela 4:16, 17) Yesuusi daro layttay aadhdhi simmin he wodiyaa ‘Ayhuda gidenna asaa wodiyaa’ giis, qassi he wodee wuribeennaagaa tamaarissiis. (Luqaasa 21:24) He laappun layttay 1914n wuridoogaa nuuni beꞌana.
2. Ha alamiyan 1914ppe doommidi hanidabaynne asay haniyoobay ay malee?
Yesuusa kaalliyaageeti, “Ne yuussaayyoonne wodiyaa wurssettaayyo malaatai aiba gidanee?” yaagidi A oychchidosona. (Maatiyoosa 24:3) Yesuusi, I saluwan Xoossaa Kawotettaa Kawo gididi haariyoogaa doommi simmin hanana darobata kasetidi yootiyoogan eta oyshaa zaariis. Hegeetuppe amaridaageeti olaa, koshaanne biittaa qaattaa. (Maatiyoosa 24:7 nabbaba.) Asay haniyoobaa gaasuwan “wurssetta gallassi” deꞌoy keehi ‘wayssanaagaakka’ Geeshsha Maxaafay kasetidi yootiis. (2 Ximootiyoosa 3:1-5) Ha ubbabay 1914ppe doommidi keehi qoncciis.
3. Xoossaa Kawotettay haariyoogaa doommoosappe alamiyaa hanotay keehi iitidoy aybissee?
Yesuusi Xoossaa Kawotettaa Kawo gididi takkennan, Seexaanaaranne daydanttatuura saluwan olettiis. He olan Seexaanay xoonettiis. Geeshsha Maxaafay “I ba kiitanchchatuura issippe duge sa7au [olettidoogaa]” yootees. (Ajjuutaa 12:9,10, 12) Seexaanay xayanaagaa eriyo gishshawu keehi hanqqettiis. Hegaa gishshawu I kumetta saꞌan asay metootanaadaaninne waayettanaadan oottiis. Alamiyaa hanotay keehi iitidoy aybissakko nuuni akeekanaadan hegee maaddees. Xoossaa Kawotettay he meto ubbaa xayssana.
LOYTTA AKEEKA
Xoossaa Kawotettay 1914n haariyoogaa doommidoogaa nuuni aybin eriyaakko, qassi hegaa erido gishshawu nuuni waanana koshshiyaakko akeeka.
4. Geeshsha Maxaafay yootido wodiyaa qooday Xoossaa Kawotettay 1914n haaruwaa doommidoogaa bessees
Baabiloone Kawoy Naabukadanaxoori sinttappe hananabaa aymuwan beꞌanaadan Xoossay oottiis. He aymoynne Daaneeli birshshidobay Xoossay Naabukadanaxoora bessidobay A haaruwaaranne Xoossaa Kawotettaara gayttidaba gidiyoogaa bessees.—Daaneela 4:17 nabbabite. a
Daaneela 4:20-26 nabbabite; yaatidi misiliyaa goꞌettidi kaallidi deꞌiya oyshata zaarite:
-
(A) Naabukadanaxoori aymuwan beꞌidobay aybee?—Paydo 20nne 21 xeella.
-
(B) Mittay waananee?—Paydo 23 xeella.
-
(C) “Laappun laittai” wuriyo wode aybi hananee?—Paydo 26 xeella.
Aymuwan qonccida mittay Xoossaa Kawotettaara Aybin Gayttii?
HIRAAGAA (Daaneela 4:20-36)
Haaruwaa
(A) Wogga mittaa
Haaroy attiis
(B) ‘Mittay qanxxettin laappun layttay aadhdho’
Haaroy simmiis
(C) ‘Ne kawotettay neeyyo simmana’
Koyro polettido wode
-
(D) Aymuwan qonccida mittay oossi leemisoo?—Paydo 22 xeella.
-
(E) I haariyoogaa aggidoy awudee?—Daaneela 4:29-33 nabbabite.
-
(F) “Laappun laittai” wuriyo wode Naabukadanaxoori waanidee?—Daaneela 4:34-36 nabbabite.
KOYRO POLETTIDO WODE
Haaruwaa
(D) Baabiloona Kawuwaa Naabukadanaxoora
Haaroy attiis
(E) Naabukadanaxoori 606 K.K. doommidi laappun layttawu gooyidi haarana danddayibeenna
Haaroy simmiis
(F) Naabukadanaxoori ba wozanay simmin zaarettidi haariyoogaa doommiis
Naaꞌꞌantto polettido wode
-
(G) Aymuwan qonccida mittay oossi leemisoo?—1 Hanidabaa Odiya 29:23 nabbabite.
-
(H) Eti haariyoogaa aggidoy awudee? Yesuusi saꞌan deꞌiyo wode eti haarennaagaa aybin eriyoo?—Luqaasa 21:24 nabbabite.
-
(I) He haaroy zaarettidi doommidoy awudee, qassi awaanee?
NAAꞌꞌANTTO POLETTIDO WODE
Haaruwaa
(G) Xoossay eta baggaara haarido Israaꞌeela kawota
Haaroy attiis
(H) Yerusalaamee xayin, Israaꞌeela kawoti 2,520 layttawu haaribookkona
Haaroy simmiis
(I) Yesuusi Xoossaa Kawotettaa Kawo gididi saluwan haariyoogaa doommiis
Laappun wodeti [layttati] ay keena wodee?
Geeshsha Maxaafan deꞌiya issi qofay hara qofaa akeekanaadan maaddees. Leemisuwawu, Geeshsha Maxaafan Ajjuutaa maxaafay heezzu wodenne [layttanne] baggay 1,260 gallassa gees. (Ajjuutaa 12:6, 14) Hegee Geeshsha Maxaafaa hiraagan issi layttay 360 gallassa gidiyoogaa bessees. Yaatiyo gishshawu “laappun laittai” 2,520 gallassa. Geeshsha Maxaafan ‘gallassaa’ giya qaalay issi issitoo issi layttaa bessees. (Hizqqeela 4:6) Hegaa gishshawu, Daaneela maxaafan laappun laytta geetettida wodee 2,520 laytta.
5. Alamee 1914ppe doommidi laamettiis
Yesuusi I Kawo gidi simmin alamee waananaakko kasetidi yootiis. Luqaasa 21:9-11 nabbabite; yaatidi ha oyshaa tobbite:
-
Hegeetuppe awugeeta beꞌadii, woy siyadii?
Kiitettida PHawuloosi asaa haaruwaa wurssetta gallassi asaa eeshshay ay mala gidanaakko qonccissiis. Naaꞌꞌantto Ximootiyoosa 3:1-5 nabbabite; yaatidi ha oyshaa tobbite:
-
Ha wodiyan asay hegaadan haniyoogaa beꞌadii?
6. Xoossaa Kawotettay haariyoogee nuna minttettana bessees
Maatiyoosa 24:3, 14 nabbabite; yaatidi ha oyshata tobbite:
-
Xoossaa Kawotettay haariiddi deꞌiyoogaa bessiya gita oosoy aybee?
-
Neeni he oosuwaa oottanawu waatana danddayay?
Xoossaa Kawotettay haariiddi deꞌees, qassi saꞌaa wurssi haariyo wodee matattiis. Ibraawe 10:24, 25 nabbabite; yaatidi ha oyshaa tobbite:
-
Nuuni ubbay ‘Godaa gallassay matattiyoogaa beꞌiyo’ wode ay oottana koshshii?
Neeni harata maaddiyaabaanne eta shemppuwaa ashshiyaabaa eriyaakko waatuutii?
ISSI URI HAGAADAN OYCHCHANA DANDDAYEES: “Yihoowa Markkati 1914 dumma laytta giyoy aybissee?”
-
Woygada zaaruutee?
AY AKEEKADII?
Geeshsha Maxaafaa hiraagay, wodiyaa qoodaynne alamiyaa hanotay Xoossaa Kawotettay haariiddi deꞌiyoogaa bessoosona. He Kawotettaabaa markkattiyoogaaninne galchchaa shiiqota shiiqiyoogan hegaa ammaniyoogaa bessoos.
Zaaretuwaa
-
Daaneela maxaafan kasetidi odettida laappun layttay wuriyo wode aybi hanidee?
-
Xoossaa Kawotettay 1914n haariyoogaa doommidoogaa neeni ammananaadan oottiyaabay aybee?
-
Xoossaa Kawotettay haariiddi deꞌiyoogaa neeni ammaniyoogaa waata bessana danddayay?
PILGGA
Taarikiyaa xaafidaageetinne hara asati 1914ppe doommidi alamiyan laamettidabaa woygidaakko akeeka.
“Asaa Kanddoy SHoraa Xayiyoogaa Doommido Wodiyaa” (Beegottite! huuphe yohuwaa)
Maatiyoosa 24:14n odettida hiraagay issi bitaniyaa waati maaddidaakko nabbaba.
“Bezbol Giyo Kaassaa Aybippenne Aaruwan Dosays!” (Wochchiyo Keelaa Paydo 5 2017)
Daaneela shemppo 4n odettida hiraagay Xoossaa Kawotettaabaa qonccissiyaabaa gidiyoogaa aybin eriyoo?
“Xoossaa Kawotettay Haariyoogaa Doommidoy Awudee? (SHaaho 1)” (Wochchiyo Keelaa, Xiqimita 1, 2014)
Daaneela shemppo 4n odettida “laappun laittai” 1914n wuridoogaa bessiyaabay aybee?
“Xoossaa Kawotettay Haariyoogaa Doommidoy Awudee? (SHaaho 2)” (Wochchiyo Keelaa, Ichchashe 1, 2015)
a Ha timirttiyan Pilgga giyaagan wurssetta naaꞌꞌu huuphe yohota xeella.
Hageeta Beꞌadii?
ASAY DAROTOO OYCHIYO OYSHATA
Yihoowa Markkati Geeshsha Maxaafaa Xannaꞌissiyoy Ayba Ogiyaanee?
Yihoowa Markkati miishsha qanxxissennan xannaꞌissiyo prograamiyan, Geeshsha Maxaafaa birshshettaa awugaakka goꞌettana danddayaasa. Ne so asa ubbaynne ne laggetikka nenaara xannaꞌanaadan shoobbana danddayaasa.
