TIMIRTTE 34
Yihoowa Siiqiyoogaa Bessanawu Waatana Danddayiyoo?
Geeshsha Maxaafaa xannaꞌiyoogaa doommido wodeegaappe aaruwan Xoossaa siiqay? Aara dabbotaa mintta mintta baanawu koyay? Yaanikko, Yihooway neeni A keehi siiqiyoogaa beꞌiyo wode, kaseppe aaruwan nena siiqiyoogaanne neessi qoppiyoogaa hassaya. Neeni A siiqiyoogaa waata bessana danddayay?
1. Nuuni Yihoowa siiqiyoogaa waati bessana danddayiyoo?
Yihoowawu azazettiyoogan A siiqiyoogaa bessoos. (1 Yohaannisa 5:3 nabbaba.) I bawu azazettanaadan oonanne giddenna. SHin, I nuuni azazettanaakko woy agganaakko dooranaadan koyees. Aybissi? Yihooway nuuni ‘kumetta wozanaappe azazettanaadan’ koyees. (Roome 6:17) Hegee neeni azazettana bessees gaada gidennan, A siiqiyo gishshawu azazettanaadan koyees giyoogaa. Ha maxaafan shaaho 3ynne 4y neeni Yihoowa ufayssennabaa aggada A ufayssiyaabaa oottiyoogan A siiqiyoogaa bessanaadan maaddanawu giigiis.
2. Yihoowa siiqiyoogaa bessiyoogee metana danddayiyoy aybissee?
“Xillo asa metoi daro.” (Mazamure 34:19) Nagaray nuna ubbaa baaxeyees. Qassi miishshaa metoy, naaqoy woy hara metoy nuna gakkana danddayees. Nuna metoy gakkiyo wode, Yihooway nuuppe koyiyoobaa oottanawu metootana danddayoos. Ayssi giikko, Yihoowawu azazettennan aggiyoogee wayssennaba gidana danddayees. SHin neeni Yihooway yootidobaa ammanettada oottiyo wode, A aybippenne aaruwan siiqiyoogaanne awu ammanettiyoogaa bessaasa. Ikka neeyyo ammanettiyaagaa gidana. I nena mule aggenna.—2 Sameela 22:26 nabbaba.
LOYTTA AKEEKA
Neeni Yihoowawu azazettiyo wode I ufayttiyoy aybissakko, qassi hegawu nena aybi maaddana danddayiyaakko akeeka.
3. Nenakka xeelliya yohuwaa
Geeshsha Maxaafan Iyyooba maxaafay Seexaanay Iyyooba giyo bitaniyaanne Yihoowawu haggaazanawu koyiya asa ubbaa mootidoogaa yootees. Iyyooba 1:1, 6–2:10 nabbabite; yaatidi ha oyshata tobbite:
-
Seexaanay Iyyoobi Yihoowawu azazettidoy aybissa giidee?—Iyyooba 1:9-11 xeella.
-
Seexaanay nenanne hara asaa ubbaa woygi mootidee?—Iyyooba 2:4 xeella.
Iyyooba 27:5b nabbabite; yaatidi ha oyshaa tobbite:
-
Iyyoobi wozanappe Yihoowa siiqiyoogaa waati bessidee?
Iyyoobi Yihoowawu ammanettidi deꞌiyoogan A siiqiyoogaa bessiis
Nuuni Yihoowawu ammanettidi deꞌiyoogan A siiqiyoogaa bessoos
4. Yihoowa ufayssiyaabaa ootta
Leemiso 27:11 nabbabite; yaatidi ha oyshata tobbite:
-
Neeni akeekanchcha gidada awu azazettiyo wode Yihoowawu aybi siyettii? Aybissi?
5. Yihoowawu ammanettana danddayaasa
Nuuni Yihoowa siiqiyoogee haratussi abaa yootanaadan denttettees. Nuuni awu ammanettiyoogee yootanawu injjetenna wodekka abaa yootanaadan denttettees. BIIDUWAA beꞌite; yaatidi kaallidi deꞌiya oyshata tobbite.
-
Yihoowabaa asawu yootanawu metoota eray?
-
Ha biiduwaappe, Grayseni yayyiyoogaa agganaadan maaddidabaa ay akeekadii?
Nuuni Yihooway dosiyoobaa dosiyo wodenne I ixxiyoobaa ixxiyo wode awu ammanettanawu metootokko. Amoxa 5:15 nabbabite; yaatidi ha oyshata tobbite:
-
Neeni tamaaridoogaadan, Yihooway dosiyo amaridabati aybee? I ixxiyoobatuppe amaridaageeti aybee?
-
Loꞌꞌobaa dosiyoogaanne iitabaa ixxiyoogaa waata meezetana danddayay?
6. Yihoowawu azazettiyoogee nuna maaddees
Yihoowawu azazettiyoogee awudekka keehi loꞌꞌo. Isiyaasa 48:17, 18 nabbabite; yaatidi ha oyshata tobbite:
-
Yihooway nuussi aybi loꞌꞌokko awudekka eriyoogaa ammanettana danddayiyoo? Aybissi?
-
Neeni tumu Xoossaa Yihoowabaanne Geeshsha Maxaafaabaa tamaaridobay hanno gakkanawu nena waati maaddidee?
ISSI ISSI ASAY HAGAADAN GEES: “Taani ay oottinkka Xoossaa maaddenna woy qohenna.”
-
Nuuni oottiyooban Yihooway ufayttana woy azzanana danddayiyoogaa qonccissanawu ay xiqisiyaa goꞌettana danddayay?
AY AKEEKADII?
Yihoowawu azazettidi I yootiyoobaa ammanettidi oottiyoogee deexxishinkka nuuni hegaa oottiyo wode, A siiqiyoogaa bessoos.
Zaaretuwaa
-
Iyyoobappe ay tamaaradii?
-
Yihoowa siiqiyoogaa aybin bessuutee?
-
Neeni Yihoowawu ammanettada deꞌanaadan aybi maaddanee?
PILGGA
Neeni Yihoowawunne galchchawu waana ammanettana danddayiyaakko akeeka.
Seexaanay asaa mootidobata loytta akeeka.
“Iyyoobi Ba Suuretettaa Naagiis” (Geeshsha Maxaafaa—A Giddon Deꞌiya Waanna Qofay Aybee? shaahuwaa 6)
Haray atto, naatikka Yihoowa siiqiyoogaa waati bessana danddayiyaakko akeeka.
Issi naꞌi bessennabaa oottanaadan hara naati denttettiyo wodekka Yihoowawu ammanettidi I koyiyoobaa waati oottana danddayii?
Hageeta Beꞌadii?
ASAY DAROTOO OYCHIYO OYSHATA
Yihoowa Markkati Geeshsha Maxaafaa Xannaꞌissiyoy Ayba Ogiyaanee?
Yihoowa Markkati miishsha qanxxissennan xannaꞌissiyo prograamiyan, Geeshsha Maxaafaa birshshettaa awugaakka goꞌettana danddayaasa. Ne so asa ubbaynne ne laggetikka nenaara xannaꞌanaadan shoobbana danddayaasa.
