TIMIRTTE 36
Ubbaban Xillo Asa Gida
Ooninne xillo lagge koyees. Yihoowaykka ba dabboti xillo asa gidanaadan koyees. SHin ha alamiyan daroti xillo gidenna gishshawu, hegee metiyaaba. Ubbaban xillo gidiyoogaa goꞌꞌay aybee?
1. Xillo asa gidiyo waanna gaasoy aybee?
Nuuni haratussi xillobaa oottiyo woy haniyo wode, Yihoowa siiqiyoogaanne A bonchchiyoogaa bessoos. Ane hagaa qoppa: Yihooway nuuni qoppiyoobaanne oottiyoobaa ubbaa erees. (Ibraawe 4:13) Nuuni xillo asa gidanawu baaxetiyoogaa Yihooway beꞌees, qassi hegee A ufayssees. A Qaalay, “GODAI iitaa oottiyaageeta ixxees; shin suuretuyyo i ulottees” yaagees.—Leemiso 3:32.
2. Nu deꞌuwan ubba galla xillotettaa bessiyo issi issibati aybee?
Yihooway nuuni ‘issoy issuwaara tumubaa haasayanaadan’ koyees. (Zakkaariyaasa 8:16, 17) Hegee woygiyoogee? Nuuni haasayiyoy nu so asaara, nunaara oottiyaageetuura, Kiristtaane ishanttuuranne michchonttuura woy kawotettaa sunttatuurakka gidin, worddotokko woy cimmokko. Xillo asay wuuqqenna woy cimmenna. (Leemiso 24:28nne Efisoona 4:28 nabbaba.) Qassi eti immana bessiya giiraa ubbaa giiroosona. (Roome 13:5-7) Nuuni hagaaninne harabatun, ‘ubba wode ammanettiyaageeta’ gidiyoogaa bessoos.—Tiitu 2:10.
3. Xillo asa gidiyoogaa goꞌꞌay aybee?
Nuuni xillo asa gidiyoogan erettikko, nuna asay ammanees, qassi galchchan deꞌiya ubbay siiqettiya so asaara deꞌiyoogaadan, woppu gaanaadan oottoos. Nu kahay geeshsha gidees. Hegaa bollikka, nuuni xillo asa gidiyoogee ‘nuna ashshiya Xoossaabaa timirttiyaa galatissees,’ qassi hara asay Yihoowawu haggaazanawu koyanaadan oottees.—Tiitu 2:10.
LOYTTA AKEEKA
Neeni xillo asa gidiyoogaa Yihooway waati xeelliyaakko, hegee nenakka aybin goꞌꞌiyaakko, qassi deꞌuwan dumma dumma hanotatun waana xillo gidana danddayiyaakko akeeka.
4. Xillo asa gidiyoogee Yihoowa ufayssees
Mazamure 44:21nne Milkkiyaasa 3:16 nabbabite; yaatidi ha oyshata tobbite:
-
Tumaa genttana danddayoos giidi qoppiyoogee eeyyatetta gidiyoy aybissee?
-
Tumaa haasayanawu deexxiyo wodekka, nuuni yaatanawu kuuyiyo wode Yihoowawu aybi siyettii?
Naati tumubaa haasayiyo wode banttana yelidaageeta ufayssoosona. Nuuni tumubaa haasayiyo wode Yihooway ufayttees
5. Ubba wode xillobaa ootta
Daroti xillo asa gidiyoogee issi issitoo danddayettenna giidi qoppoosona. SHin nuuni ubbatoo xillo asa gidana koshshiyoy aybissakko akeeka. BIIDUWAA beꞌite.
Tiitu 2:10 nabbabite; yaatidi kaallidi deꞌiya hanotatun nuuni waani xillo asa gidana danddayiyaakko tobbite.
-
Nu so asawu.
-
Ooso sohuwan woy timirtte keettan.
-
Hara hanotatun.
6. Xillo asa gidiyoogee nuna maaddees
Xillo asa gidiyo wode koyro metoy gakkiyaaba milatana danddayees. SHin neeni awudenne oottana danddayiyo keehi loꞌꞌobay xillobaa gidiyoogee takkidi erettees. Mazamure 34:12-16 nabbabite; yaatidi ha oyshaa tobbite:
-
Xillo asa gidiyoogee ne deꞌoy kaseegaappe loꞌꞌanaadan waati maaddii?
-
Xillo azinatinne machchoti bantta aqo deꞌoy minnanaadan oottoosona
-
Ootissiya asati xillo oosanchchatun ammanettoosona
-
Kawotettaa sunttati xillo asata nashshoosona
ISSI ISSI ASAY HAGAADAN GEES: “Amarida worddoti keehi guutta gidiyo gishshawu aynne qohokkona.”
-
Yihooway worddo ubbaa ixxiyoogaa neeni ammaniyoy aybissee?
AY AKEEKADII?
Yihooway ba dabboti haasayiyoonne oottiyo ubbaban xillo gidanaadan koyees.
Zaaretuwaa
-
Nuuni xillo gidiyoogaa bessiyo issi issibati aybee?
-
Tuma gididabaa genttana danddayoos giidi qoppiyoogee eeyyatetta gidiyoy aybissee?
-
Neeni ubba wode xillo asa gidana koyiyoy aybissee?
PILGGA
Yelidaageeti bantta naati xillo asa gidanaadan waati tamaarissana danddayiyoonaa?
Nuuni oottana giidobaa oottiyoogee loꞌꞌo gidiyoy aybissee?
Neeni immido miishshaa bessenna ogiyan goꞌettikkokka giiraa giirana bessiyaakkonne akeeka.
“Qaraxaa Intte Qanxxana Bessii?” (Wochchiyo Keelaa, Xiqimita 1, 2011)
Worddotiya bitanee laamettidi xillobaa oottanaadan denttettidabay aybee?
“Yihooway Maariyaagaanne Atto Giyaagaa Gidiyoogaa Akeekaas” (Wochchiyo Keelaa, Isiine 1, 2015)
Hageeta Beꞌadii?
ASAY DAROTOO OYCHIYO OYSHATA
Yihoowa Markkati Geeshsha Maxaafaa Xannaꞌissiyoy Ayba Ogiyaanee?
Yihoowa Markkati miishsha qanxxissennan xannaꞌissiyo prograamiyan, Geeshsha Maxaafaa birshshettaa awugaakka goꞌettana danddayaasa. Ne so asa ubbaynne ne laggetikka nenaara xannaꞌanaadan shoobbana danddayaasa.
