TIMIRTTE 40
Xoossaa Sinttan Geeshsha Gidanawu Ay Oottana Danddayiyoo?
Ba guutta naꞌay timirtte keetti baanawu giiganaadan maaddiya issi siiqiya aayyiyo qoppa. A ba naꞌay meecettidi geeshsha maayuwaa maayanaadan oottawusu. Hegee A payyatettaa naagees; qassi A aawaynne aayyiyaa A loytti oyqqiyoogaa harati akeekanaadan maaddees. Hegaadan, nuna siiqiya Aaway Yihooway nu asatettay, nuussi deꞌiyaabay, nu qofay, nu haasayaynne nu hanotay geeshsha gidanaadan koyees. Nuuni geeshsha gidiyoogee nuna goꞌꞌeesinne Yihoowa bonchchissees.
1. Nu bollaynne nuussi deꞌiyaabay geeshsha gidanaadan waatana danddayiyoo?
Yihooway ‘nuuni geeshsha gidanaadan’ zorees. (1 PHeexiroosa 1:16) Nuuni geeshsha gidana mala nu kanddoy, nu bollaynne nuussi deꞌiyaabay geeshsha gidana bessees. Nuuni nu bollaa ubbatoo meecetikko, nu maayuwaa, qassi nu keettaanne nu kaamiyaa geeshshidi oyqqikko, nu asatettaynne nuussi deꞌiyaabay geeshsha gidana danddayees. Nu SHiiquwaa Addaraashay geeshsha gidanaadankka maaddana danddayoos. Nu asatettaynne nuussi deꞌiyaabay awudenne geeshsha gidikko, Yihoowa bonchchissees.—2 Qoronttoosa 6:3, 4.
2. Nu geeshshatettaa naaganawu nuuni aggana koshshiya iita meezeti awugeetee?
Nuuni “nu ashuwaanne nu shemppuwaa tunissiya ubbabaappe nu huuphiyaa [geeshshanaadan]” Geeshsha Maxaafay zorees. (2 Qoronttoosa 7:1) Hegaa gishshawu, nu asatettaa woy nu qofaa qohiya aybanne nuuni aggana koshshees. Nu qoppiyoobay Yihoowa ufayssana koshshiyo gishshawu, iitabaa qoppennaadan nuussi danddayettida ubbabaa oottoos. (Mazamure 104:34) Qassi loꞌꞌobaa haasayanawu baaxetoos.—Qolasiyaasa 3:8 nabbaba.
Nu asatettaa woy nu kandduwaa geeshshatettaa moorana danddayiya harabay aybee? Issi issibay nu asatettaa qohana danddayees. Yaatiyo gishshawu, nuuni tambbuwaa goꞌettiyoogaa, jallissiyaaban allaxxiyoogaanne hegaa malabaa oottokko. Hageeta oottennaagee nu payyatettawu maaddees; qassi yaatiyoogan Yihooway immido deꞌuwaa bonchchiyoogaa bessoos. Mastterbeeshine a giyo tunabaa oottennaaninne pornograafiyaa b beꞌennan aggiyoogankka kandduwan geeshsha gidanawu baaxetoos. (Mazamure 119:37; Efisoona 5:5) Hageeti meeze gidiyo wode agganawu metana danddayikkokka, agganaadan Yihooway nuna maaddana.—Isiyaasa 41:13 nabbaba.
LOYTTA AKEEKA
Nuuni geeshsha gidiyo wode Yihoowa bonchchissiyoy aybissakko, qassi iita meezeta waati aggana danddayiyaakko akeeka.
3. Nu asatettaynne nuussi deꞌiyaabay geeshsha gidiyoogee Yihoowa bonchchissees
Yihooway beni Israaꞌeelata azazidobaa nabbabiyoogan I geeshshatettaa waati xeelliyaakko akeekoos. Kessaabaa 19:10nne 30:17-19 nabbabite; yaatidi ha oyshata tobbite:
-
Ha xiqiseti geeshshatettaa xeelliyaagan Yihoowa qofaa ay qonccissiyoonaa?
-
Awudenne geeshsha gidanawu ay oottana danddayay?
Geeshsha gidiyoogee daro wodeenne baaxee koshshiyooba. Nuuni awan deꞌin woy hiyyeesa gidin dure gidinkka yaatana danddayoos. BIIDUWAA beꞌite; yaatidi kaallidi deꞌiya oyshaa tobbite.
-
Nuuni mishiraachchuwaa yootiyo asay nuussi deꞌiyaabay geeshsha gidiyoogaa beꞌiyoogee Yihooway bonchchettanaadan waati maaddii?
4. Iita meezeta muleera agga
Ay iita meeziyaanne agganaadan Yihooway nuna maaddana danddayees
Neeni sijaaraa uyiyaaba woy jallissiyaaban allaxxiyaaba gidikko, hegaa muleera aggiyoogee ay keena metiyaakko erennan aggakka. Hegaa agganawu nena aybi maaddanee? He meezee nena waati qohiyaakko akeeka. Maatiyoosa 22:37-39 nabbabite; yaatidi . . .
-
issi uri Yihoowaara dabbotido dabbotaa,
-
eta so asaanne A yuushuwan deꞌiya harata, tambboy woy jallissiyaaban allaxxiyoogee waati qohiyaakko tobbite.
Iita meeziyaa muleera agganawu oottanabaa halchcha. c BIIDUWAA beꞌite.
Piliphphisiyuusa 4:13 nabbabite; yaatidi ha oyshaa tobbite:
-
Issi uri ubbatoo woossiyoogee, Geeshsha Maxaafaa xannaꞌiyoogeenne shiiquwaa shiiqiyoogee iita meeziyaa agganawu waati maaddii?
5. Iitabaa qoppennaadaaninne oottennaadan baaxeta
Qolasiyaasa 3:5 nabbabite; yaatidi ha oyshata tobbite:
-
Pornograafiyaa, sekisttinggiyaanne d mastterbeeshiniyaa Yihooway tunaba ootti xeelliyoogaa nuuni aybin eriyoo?
-
Yihooway nu kanddoy geeshsha gidanaadan koyiyoogee bessiyaabee? Aybissi?
Iitabaa qoppennaadan waata baaxetanaakko akeeka. BIIDUWAA beꞌite.
Yesuusi nuuni kandduwan geeshsha gididi deꞌanawu koshshiyaabaa oottanawu murttana bessiyoogaa qonccissiya leemisuwaa yootiis. Maatiyoosa 5:29, 30 nabbabite; yaatidi ha oyshaa tobbite:
-
Yesuusi nuuni nu bollaa qohana bessees gibeenna; shin nuuni issibaa oottana koshshiyoogaa yootiis. Issi uri iitabaa qoppenna mala waatanawu murttana bessii? e
Neeni iitabaa qoppennaadan baaxetaydda deꞌikko, Yihooway ne oottiyoobaa nashshees. Mazamure 103:13, 14 nabbabite; yaatidi ha oyshaa tobbite:
-
Neeni iitabaa oottennaadan baaxetaydda deꞌikko, ha xiqisee neeni aggennan baaxetanaadan waati minttettii?
Baaxetiyoogaa aggoppa!
‘Ta iita meeziyan xoonettido gishshawu baaxetennan aggiyaakko keha’ giidi qoppiyoogee metennaba. SHin hagaa qoppa: Issi wottanchchay xubettidi kunddiyoogee I xoonettiis woy wottaa wodhdhi eqqi doommana koshshees giyoogaa gidenna. Hegaadan, issi balay iitabaa oottennaadan baaxetiyo baaxiyan xoonettadasa giyoogaa gidenna. Woy qassi ne oottido loꞌꞌobaa ubbaa hegee hada kessenna. Hegaadan baliyoogee wottin deꞌiyaaba. Hidootaa qanxxoppa! Yihooway maaddin he iita meeziyaa aggana danddayaasa.
ISSI ISSI ASAY HAGAADAN GEES: “Tawu amale gidiis. Ta aggana danddayikke.”
-
Issi uri Yihooway maaddin iita meeziyaa aggana danddayiyoogaa bessanawu ne goꞌettana danddayiyo xiqisee awugee?
AY AKEEKADII?
Nu bollay, nu qofaynne nu eeshshay awudenne geeshsha gidikko Yihooway ufayttees.
Zaaretuwaa
-
Geeshsha gidana koshshiyoy aybissee?
-
Geeshsha gidanawu waatana danddayay?
-
Ne qoppiyoobaynne ne eeshshay awudenne geeshsha gidanaadan waatana danddayay?
PILGGA
Neeni hiyyeesa gidikkonne, geeshshatettaa naaganawu neeni metootennan oottana danddayiyoobati aybee?
Payyatettaanne Geeshshatettaa—Kushiyaa Meecettiyoogaa (3:01)
Sijaaraa uyiyoogaa agganawu ne oottana danddayiyoobata akeeka.
“Sijaaraa Uyiyoogaa Aggana Danddayettees” (Beegottite! huuphe yohuwaa)
Pornograafee waati qohiyaakko akeeka.
“Pokko Misilee—Qohiyaabee?” (Wochchiyo Keelaa, [Amaarattuwaa] Naase 1, 2013)
Issi bitanee pornograafiyaa beꞌiyoogaa waati aggidaakko akeeka.
“Darotoo Kunddikkokka Wurssettan Denddaas” (Wochchiyo Keelaa Paydo 3 2016)
a Mastterbeeshinee issi uri attumay maccaariira gayttiyoogaadan alanawu ba attumatettaa woy maccatettaa denttettiyoogaa.
b “Pornograafe” giya qaalay beꞌiya, nabbabiya woy siyiya ura denttettanawu giigida inddaa woy asho gaytettaa qonccissi bessiya biidota, misileta, xuufetanne ezggiyoobata bessiyaaba.
c Ha timirttiyan Pilgga giyaagaa giddon deꞌiya, “Sijaaraa Waata Aggana Danddayay?” giya qofay amale gididabaa agganawu oottana danddayiyoobaa qonccissees.
d Sekisttinggee pokkiya kiitaa, pootuwaa woy biiduwaa moobayle malaban kiittiyoogaa bessiyaaba.
e “Mastterbeeshiniyaa Waata Aggana Danddayiyaanaa?” Yelagati Oychchiyo Oyshaa—Oosuwan Peꞌiya Zaaruwaa giya maxaafan, Paydo 1, shemppo 25n deꞌiya mastterbeeshiniyaa agganawu maaddiya qofaa xeella.
Hageeta Beꞌadii?
ASAY DAROTOO OYCHIYO OYSHATA
Yihoowa Markkati Geeshsha Maxaafaa Xannaꞌissiyoy Ayba Ogiyaanee?
Yihoowa Markkati miishsha qanxxissennan xannaꞌissiyo prograamiyan, Geeshsha Maxaafaa birshshettaa awugaakka goꞌettana danddayaasa. Ne so asa ubbaynne ne laggetikka nenaara xannaꞌanaadan shoobbana danddayaasa.
