TIMIRTTE 44
Xoossay Baalaa Waati xeellii?
Yihooway nuuni nu deꞌuwan ufayttanaadaaninne issi issitoo ubba ufayttiyoobaa giigissanaadan koyees. SHin baalay A ufayssii? Nuuni Yihoowa siiqiyoogaa waati bessana danddayiyoo?
1. Baalay Yihoowa ufayssennay aybissee?
Neeni daro baalati Geeshsha Maxaafay yootiyoobaa phalqqiya woy worddo haymaanootiyaappe yiida qofaara gayttiyoogaa erada garamettennan aggakka. He baalati iita ayyaanaa oosuwaara woy shemppoy hayqqenna giyoogaara gayttidaba gidana danddayoosona. Issi issi baalati malaa woy qaadaa ammaniyoogaara gayttidaageeta. (Isiyaasa 65:11) Yihooway, “Etappe shaahettite. Tunabaakka bochchoppite” giidi bawu goynniyaageetussi yootiis.—2 Qoronttoosa 6:17. a
2. Yihooway asay asaa bessenna ogiyan bonchchiyoogaa waati xeellii?
Yihooway nuuni ‘asan ammanettennaadan’ yootiis. (Ermmaasa 17:5 nabbaba.) Issi issi baalatun haariyaageeti woy ola gadaawati bonchchettoosona. Hara baalatun issi biittay laꞌꞌa kiyido gallassati woy banddiraa mala malaatati bonchchettoosona. (1 Yohaannisa 5:21) Hara baalatun qassi asay polotikaa dirijjiteta woy hara dirijjiteta bonchchees. Yihoowa halchchuwaa phalqqiyaabaa tamaarissiya ura woy dirijjite bessenna ogiyan nu bonchchikko, Yihoowayyo aybi siyettanee?
3. Asay bonchchiyoobata Xoossay dosennaadan oottiya hanotati aybee?
‘Mattoy, yettay woy maaraa xayida gibiraynne daro ushshaa uyiyoogee’ Geeshsha Maxaafan digettidaba. (1 PHeexiroosa 4:3) Issi issi baalatun asay bana naagennanne pokkobaa oottees. Nuuni Yihoowaara dabbotidi deꞌanawu hegaa mala iitabaappe haakkana koshshees.
LOYTTA AKEEKA
Neeni baalaara gayttidaagan loꞌꞌobaa kuuyada Yihoowa waata ufayssana danddayiyaakko akeeka.
4. Yihooway dosenna baalata bonchchoppa
Efisoona 5:10 nabbabite; yaatidi ha oyshata tobbite:
-
Nuuni issi baalaa bonchchana koshshiyaakkonne kuuyanawu ay shaakki erana bessii?
-
Neeni deꞌiyo biittan erettida baalati awugeetee?
-
He baalati Yihoowa ufayssoosona gaada qoppay?
Leemisuwawu, Xoossay asay ba yeletaa gallassaa bonchchiyoogaa waati xeelliyaakko qoppa eray? Geeshsha Maxaafay Yihoowawu goynniya uri yeletaa gallassaa bonchchidoogaa yootenna, shin ayyo goynnennaageeti bonchchido, naaꞌꞌu asatu yeletaa gallassaabaa yootees. Doomettaabaa 40:20-22nne Maatiyoosa 14:6-10 nabbabite. Yaatidi ha oyshata tobbite:
-
Ha naaꞌꞌu yeletaa gallassati bonchchettido hanotay issi mala gidiyoy aybiinee?
-
Yeletaa gallassaara gayttidaagan Yihoowa qofay aybakko ha naaꞌꞌu taariketuppe ay akeekadii?
Gidoppe attin neeni, ‘Taani yeletaa gallassaa woy Geeshsha Maxaafaara maayenna hara baalaa bonchchin aggin hegee Yihoowa qofissii?’ gaada qoppana danddayaasa. Kessaabaa 32:1-8 nabbabite. Yaatidi, .BIIDUWAA beꞌidi kaallidi deꞌiya oyshata tobbite.
-
Yihoowa ufayssiyaabaa nuuni shaakki erana koshshiyoy aybissee?
-
Hegaa waati shaakki erana danddayiyoo?
Issi baalay Yihoowa ufayssennaagaa aybin erana danddayiyoo?
-
Geeshsha Maxaafaara maayenna qofaara gayttidabee? Hegaa akeekanawu, ayyo dendduwaa pilgga.
-
Asay he baalan asaa, dirijjiteta woy banddiraa mala malaatata bessenna ogiyan bonchchii? Nuuni aybippenne aaruwan Yihoowa bonchchoos, qassi saꞌaappe metuwaa I qaaranaagaa ammanettoos.
-
He baalan meezedan oosettiyaabay Geeshsha Maxaafaa maaraara maayennee? Nuuni kandduwan awudenne geeshsha gidana koshshees.
5. Neeni ammaniyoobaa bonchchanaadan harata maadda
Yihoowa ufayssenna baalata bonchchanaadan harati iissiyo wode ixxis gaanaagee metana danddayees. Neeni kuuyidobaa hiillan yoota, qassi danddaya. Hegaadan oottiyoogaa bessiyaabaa akeekanawu, BIIDUWAA beꞌite.
Maatiyoosa 7:12 nabbabite; yaatidi ha oyshata tobbite:
-
Ha xiqisiyaappe, intte son Yihoowa Markka gidennaageeti baalaa bonchchanaakko agganaakko ooni kuuyana bessiyoogaa akeekadii?
-
Intte so asaara neeni baalaa bonchchana xayikkonne, eta siiqiyoogaanne etawu qoppiyoogaa bessanawu ay oottana danddayay?
6. Yihooway nuuni ufayttanaadan koyees
Yihooway nuuni nu so asaaranne nu laggetuura ufayssiya wodiyaa aattanaadan koyees. Eranchchaa 8:15 nabbabite; yaatidi ha oyshaa tobbite:
-
Yihooway nuuni ufayttanaadan koyiyoogaa ha xiqisee waati qonccissii?
Yihooway ba asay ufayttanaadaaninne loꞌꞌo wodiyaa issippe aattanaadan koyees. Daro biittaappe shiiqido shiiqotun hegee waani qonccidaakko akeekanawu, BIIDUWAA beꞌite.
Galaatiyaa 6:10 nabbabite; yaatidi ha oyshata tobbite:
-
Nuuni haratussi “lo77obaa” oottanawu, erettida baalata bonchchana koshshii?
-
Nena keehi ufayssanay awugee: Baalaa wode imotaa immana koshshees gaada immiyoogeeyye immanawu koyada immiyoogee?
-
Daro Yihoowa Markkati issi issitoo bantta naatussi dummabaa giigissidi, eti qoppennan imotaa immoosona. Neeyyo naati deꞌikko, etawu dummabaa ay oottana danddayay?
ISSI ISSI ASAY HAGAADAN GEES: “Baalaa dendduwaabay qoppana koshshiyaaba gidenna. So asaaranne laggetuura wodiyaa aattiyoogaa qoppana koshshees.”
-
Woygada zaaruutee?
AY AKEEKADII?
Nuuni nu so asaaranne nu laggetuura ufayssiya wodiyaa aattanaadan Yihooway koyees. SHin A ufayssenna baalata nuuni bonchchennaadankka koyees.
Zaaretuwaa
-
Issi baalay Yihoowa ufayssennaakkonne shaakki eranawu woygi oychchana danddayiyoo?
-
Baalata xeelliyaagan nu kuuyidobaa nu so asaynne nu laggeti akeekanaadan waati maaddana danddayiyoo?
-
Yihooway nuuni ufayttanaadaaninne loꞌꞌo wodiyaa aattanaadan koyiyoogaa neeni eranaadan maaddiyaabay aybee?
PILGGA
Kiristtaaneti bonchchenna baalatuppe amaridaageeta beꞌa.
“Yihoowa Markkati Issi Issi Baalata Bonchchennay Aybissee?” (Nu websaytiyan deꞌiyaaba)
Yeleta gallassaa bonchchiyoogee Xoossaa ufayssennaagaa nuuni ammaniyo oyddu gaasota akeeka.
“Yihoowa Markkati Yeleta Gallassaa Bonchchennay Aybissee?” (Nu websaytiyan deꞌiyaaba)
Harati baalaa bonchchiyo wode Yihoowa siiqiya guutta naꞌiya A waata ufayssidaakko beꞌa.
Keehi daro Kiristtaaneti ufayssa masqqalaa bonchchokkona. Hegan etawu aybi siyettii?
a Baalaara gayttidaagan issi issibaa eranawu Wurssetta Qofaa 5 xeella.
Hageeta Beꞌadii?
ASAY DAROTOO OYCHIYO OYSHATA
Yihoowa Markkati Geeshsha Maxaafaa Xannaꞌissiyoy Ayba Ogiyaanee?
Yihoowa Markkati miishsha qanxxissennan xannaꞌissiyo prograamiyan, Geeshsha Maxaafaa birshshettaa awugaakka goꞌettana danddayaasa. Ne so asa ubbaynne ne laggetikka nenaara xannaꞌanaadan shoobbana danddayaasa.
