1, 2. Nuuni eranawu keehi koyana bessiya Xoossaa ‘xuuray’ aybee, qassi aybissi?

XUURABAY harata yeemoyiyaaba gidiyo gishshawu, asay hegaa odennan agganawu darotoo metootees. Gidoppe attin, Geeshsha Maxaafay hagaadan gees: “Xuuraa genttiyoogee Xoossaayyo bonchcho.” (Leemiso 25:2) Yihooway Ubbabaa Haariyaagaanne Medhdhidaagaa gidiyo gishshawu, xuuraabaa qonccissana koshshiyo wodee gakkanaashin asaappe hegaa genttanawu awu maatay deˈees.

² SHin, Yihooway asaa yeemoyiya issi xuuraabaa Qaalan qonccissiis. Hegee ‘Xoossaa halchchuwaa xuuraa’ geetettees. (Efisoona 1:9) Hegaabaa tamaariyoogaa goˈˈay neeni eranawu koyiyo koshshaa aliyoogaa xalla gidenna. He xuuraa eriyoogee atotettaa demmanaadan oottana danddayees, qassi zawi baynna Yihoowa aadhdhida eratettaappe neeni guuttaa akeekanaadan maaddana danddayees.

3, 4. Doomettaabaa 3:15n deˈiya hiraagay hidootay daanaadan waati oottidee, qassi A giddon deˈiya geemmidabay woy Xoossaa ‘xuuray’ aybee?

³ Wottiyoobi baynna asay gannate saˈan kumanaadan Yihooway halchchido halchchoy Addaameenne Hewaana nagaraa oottido wode halidaba milatana danddayees. SHin, Xoossay hegaa giigissiyo ogiyaa sohuwaara yootiis. I hagaadan giis: “Taani nenanne [shooshshaanne] maccaasiyo, ne zerettaanne i zerettaa morkke kessana; i ne huuphiyaa qoxxana; neenikka a qirbbiyaa dukkana.”—Doomettaabaa 3:15.

⁴ He qofay akeekanawu metiyaaba. He maccaasiyaa oonee? SHooshshay oonee? SHooshshaa huuphiyaa qoxxana  ‘zerettay’ oonee? Addaameenne Hewaana he oyshatu zaaruwaa maliyoogaappe harabaa oottana danddayokkona. SHin, Xoossay yootidobay he ammanettibeenna asatuppe yelettiya ammanettidaageetuyyo hidootay daanaadan oottiis. Xillotettay xoonana. Yihoowa halchchoy polettana. SHin waanidi? Hegee xuuraba! Geeshsha Maxaafay hegaa ‘asaappe geemettida Xoossaa xuura aadhdhida eratettaa’ yaagees.—1 Qoronttoosa 2:7.

5. Yihooway ba xuuraa loddan loddan qonccissidoy aybissakko leemisuwaa yoota.

⁵ Yihooway ‘xuurata qonccissiyaagaa’ gidiyo gishshawu, ha xuuray polettiyoogaara gayttidaagan koshshiyaabaa wurssettan qonccissana. (Daaneela 2:28) SHin I hegaa loddan loddan oottana. Leemisuwawu, issi guutta naˈay, “Abbaa, taani waana yelettidanaa?” giidi oychchiyo wode, siiqiya A aaway waati zaariyaakko qoppana danddayoos. Aadhdhida eranchcha aaway guutta naˈay akeekana danddayiyooba xallaa yootees. SHin, naˈay dicciyo wode, aaway gujjidi yootees. Hegaadan, Yihooway ba sheniyaanne ba halchchuwaa ba asawu awude qonccissanaakko kuuyees.—Leemiso 4:18; Daaneela 12:4.

6. (a) Maachchay aybawu maaddii? (b) Yihooway asaara maachchaa maacettiyoogee maalaalissiyaaba gidiyoy aybissee?

⁶ Yihooway hegaa waati qonccissidee? I loytti qonccissanawu daro maachchata goˈettiis. Geella neeni keettaa shammanawu woy miishshaa talˈˈiyaa ekkanawu woy immanawu issi issitoo maacettennan waaya aggana. Hegaa mala maachchay maayettidobay polettanaagaa bessiya waabe mala. SHin, Yihooway asaara maachchata maacettana koshshiyoy aybissee? I yootidobay I gelido qaalaa poliyoogawu waabe mala. Hegee tuma; shin, Xoossay higgiyan koyettiyaagaadan maachchata maacettiyoogan ba haasayidobata dumma dumma wodetun minttiis. He mino maachchati nagaranchcha asay Yihooway qaalaa  gelidobatun mintti ammanettanaadan maaddoosona.—Ibraawe 6:16-18.

7, 8. (a) Yihooway Abrahaamaara maacettido maachchay aybee, hegan Xoossaa xuuraabaa ay qonccissidee? (b) Qaalaa gelido Zerettay yelettana zariyaa loddan loddan Yihooway waati qonccissidee?

⁷ Yihooway asaa gannatiyaappe kessoosappe naaˈˈu shaˈaappe dariya layttay aadhdhin, ba ammanettida ashkkaraa Abrahaama hagaadan giis: “Taani nena tumu anjjana; ne zerettaakka taani saluwaa xoolinttiyaa . . . keeni oottada corayana. . . . Neeni taayyo azazettido gishshau, ha sa7aa kawotettati ubbai ne zerettaa baggaara anjjettana.” (Doomettaabaa 22:17, 18) Hegee qaalaa gelidobaa xalla gidenna; Yihooway hegawu higgiyan koyettiyaagaadan maacettiis, qassi hegaa ba mino caaquwan minttiis. (Doomettaabaa 17:1, 2; Ibraawe 6:13-15) Ubbaa Haariya Goday asaa anjjanawu maachchaa maacettidoogee keehi maalaaliyaaba!

⁸ Abrahaamaara maacettido maachchay qaalaa gelido Zerettay asa gididi yaanaagaa qonccissiis; ayssi giikko, I Abrahaama zare gidana. SHin, I oonee? Abrahaama naˈay Yisaaqi he Zerettawu mayzza aawa gidanaagaa Yihooway guyyeppe qonccissiis. Yisaaqa attuma naatu naaˈˈaappe Yaaqoobi doorettiis. (Doomettaabaa 21:12; 28:13, 14) Takkidi, Yaaqoobi ba 12 attuma naatuppe issuwaabaa kasetidi hagaadan giis: “Haariyaagee yaana gakkanaashin, kawotaa xam77ai Yihudaappe, deriyaa haariyaageetu gatimai a toho giddoppe shaahettenna. Qassi dere asai ayyo azazettana.” (Doomettaabaa 49:10) Yihudaa zariyaappe yelettana he Zerettay kawo gidanaagee he wode erettiis.

9, 10. (a) Yihooway Israaˈeela deriyaara maacettido maachchay aybee, qassi he maachchay waati naagidee? (b) Asawu wozoy koshshiyoogaa Higgee waati qonccissidee?

⁹ Yihooway xuuraabaa gujjidi qonccissana ogiyaa 1513n K.K.  giigissiis. I Abrahaama zare gidida Israaˈeela deriyaara maachchaa maacettiis. Muuse Higgiyaa maachchay ha wodiyan oottana xayikkonne, Yihooway qaalaa gelido Zerettaa ehaanawu halchchido halchchuwan keehi koshshiyaaba. Waanidi? Heezzu ogeta beˈa. Koyruwan, Higgee godadan naagiis. (Efisoona 2:14) An qonccida geeshsha maarati Ayhudata Ayhuda gidennaageetuppe shaakkiya goda mala. Hegaa gishshawu, qaalaa gelido Zerettay yelettana zariyaa naaganawu Higgee maaddiis. Masee Yihudaa zariyaappe yelettanaadan Xoossay keerido wodee gakkinkka he deree deˈanaadan he naagoy daro maaddiis.

¹⁰ Naaˈˈanttuwan, Higgee asawu wozoy koshshiyoogaa loytti qonccissiis. Wottiyoobi baynna Higgee nagaranchcha asay A muleera naagana danddayennaagaa qonccissiis. Yaatiyo gishshawu, “Higgee mooro ooso gidiyaabai aibakko bessanau Xoossai immana giidi haasayido Abrahaama zaree yaana gakkanaashin gujettiis.” (Galaatiyaa 3:19) Higgee mehiyaa yarshshuwan nagaray guutta wodiyawu atto geetettanaadan oottiis. Gidoppe attin, PHawuloosi yootidoogaadan, “korima suuttinne deeshsha suutti nagara xaissanau mulekka danddayenna” gishshawu, he yarshshoy Kiristtoosa wozuwaa yarshshuwawu eesho xalaala. (Ibraawe 10:1-4) He wode, he maachchay ammanettida Ayhudata “Kiristtoosi yaana gakkanaassi . . . naagiyaagaa gidiis.”—Galaatiyaa 3:24.

11. Higgiyaa maachchay Israaˈeelati naaganaadan oottido keehi bonchchobay aybee, shin he deriyaappe hegee halidoy aybissee?

¹¹ Heezzanttuwan, he maachchay Israaˈeela deree keehi bonchchobaa naaganaadan oottiis. Eti maachchawu ammanettidi deˈiyoogaa bessikko, “qeesetu kawotettanne geeshsha kawotetta” gidanaagaa Yihooway etassi yootiis. (Kessaabaa 19:5, 6) Wurssettan, saluwaa kawotettan koyro qeeseta gidida asati Israaˈeelata. SHin, Israaˈeelati Higgiyaa maachchaa bolli makkalidi Mase Zerettaa ixxido gishshawu, he keehi bonchchobay etappe haliis. Yaatin, kawo qeese gidana harati oonee? He anjjettida deree qaalaa gelido Zerettaara waani gayttii? Xoossaa xuuraara gayttida he yohoti Xoossay keerido wodiyan qonccana.

12. Yihooway Daawitaara maacettido maachchay aybee, qassi hegee Xoossaa xuuraa waati gujji qonccissidee?

¹² Yihooway 11tta xeetu layttan K.K. hara maachchaa maacettido wode, xuuraa gujjidi qonccissiis. I ammanettida Kawuwaa Daawitawu hagaadan qaalaa geliis: “Ne gulbbataappe yelettida na7aa taani denttana; denttada a kawotettaa minttana. . . . Taani a kawotaa araataa merinau mintta essana.” (2 Sameela 7:12, 13; Mazamure 89:3) Qaalaa gelido Zerettay Daawita zare gidanaagee he wode erettiis. SHin, asi “merinaassi” haarana danddayii? (Mazamure 89:20, 29, 34-36) Kawo gidiya asi nagaraappenne hayquwaappe asaa ashshana danddayii?

13, 14. (a) Mazamure 110y yootiyoogaadan, Yihooway I tiyido Kawuwawu gelido qaalay aybee? (b) Yihooway kiittin hananabaa yootiyaageeti yaana Zerettaa xeelliyaagan gujji qonccissidobay aybee?

¹³ Geeshsha ayyaanay kaalettin Daawiti hagaadan giis: “GODAI ta godaa, ‘Taani ne morkketa neeni tohuwan yedhdha eqqiyoobaa oottana gakkanaassi, hagan taappe ushachcha baggaara utta’ yaagiis. GODAI, ‘Malkki-Xedeqi qeese gididoogaadan, neenikka merinau qeese gidana’ yaagidi caaqqiis; i ba qofaa laammenna.” (Mazamure 110:1, 4) Daawiti yootidobay qaalaa gelido Zerettaa woy Masiyaa qonccissiyaaba. (Oosuwaa 2:35, 36) He Kawoy Yerusalaamen uttidi haarenna, shin saluwan Yihoowappe “ushachcha baggaara” uttidi haarana. Hegee assi Israaˈeela biittaa xallan gidennan, kumetta saˈan maatay deˈanaadan oottees. (Mazamure 2:6-8) Hegan harabaykka qoncciis. “Malkki-Xedeqi qeese gididoogaadan,” Masee “qeese” gidanaagaa Yihooway caaqqidoogaa akeeka. Abrahaama wode kawonne qeese gididi oottida Malkki-Xedeqadan, yaana Zerettay Kawonne Qeese gididi oottanaadan Xoossay sunttana!—Doomettaabaa 14:17-20.

¹⁴ Yihooway hananabaa yootiyaageetu baggaara daro layttawu ba xuuraabaa gujjidi qonccissiis. Leemisuwawu, Zerettay yarshsho gididi hayqqanaagaa Isiyaasi yootiis. (Isiyaasa 53: 3-12) Masee yelettana sohuwaa Mikiyaasi kasetidi odiis. (Mikiyaasa 5:2) Zerettay yaana wodiyaanne hayqqana wodiyaa Daaneeli hiraagaa yootiis.—Daaneela 9:24-27.

15, 16. (a) Yihoowa Naˈay “maccaasi yelidoogaa” waani gididee? (b) Yesuusi ba aawaappenne aayeeppe laattidobay aybee, qassi qaalaa gelido Zerettaa gididi I yiidoy awudee?

¹⁵ Zerettay qonccana gakkanaashin, ha hiraagati waani polettanaakko xuura gididi takkiis. Galaatiyaa 4:4y hagaadan gees: “Wodiyaa wurssettai gakkido wode, Xoossai maccaasi yelidoogaa, . . . ba na7aa kiittiis.” Issi kiitanchchay Mayraamo geetettiya Ayhuda geelaˈeessi 2n K.K. hagaadan giis: “Be7a; neeni shahaarada attuma na7a yelana; a sunttaa Yesuusa yaagada sunttana. I gita gidana; qassi Ubbaappe Bolla Xoossaa Na7a geetettana; Godai ayyo a aawaa Daawita kawotettaa immana; . . . Geeshsha Ayyaanai ne bolli yaana; Ubbaappe Bolla Xoossaa wolqqai nenan shemppana; hegaa gishshau, ne yelana geeshsha na7ai Xoossaa Na7aa geetettana.”—Luqaasa 1:31, 32, 35.

¹⁶ Guyyeppe, Yihooway ba naˈaa deˈuwaa saluwaappe Mayraami uluwawu aattido gishshawu, I maccaasappe yelettiis. Mayraama nagaranchcha maccaasa. Gidikkonne, Yesuusi “Xoossaa Na7aa” gidiyo gishshawu, ippe nagaraa laattibeenna. Qassi, Yesuusa aawaynne aayyiyaa Daawita zare gidiyo gishshawu, Yesuusi yeletankka higgee yootiyoogaadankka Daawita laattiyo maatay deˈiyoogaa gidiis. (Oosuwaa 13:22, 23) Yesuusi 29 M.Ln xammaqettiyo wode, Yihooway A geeshsha ayyaanan tiyidi hagaadan giis: “Taani siiqiyo ta Na7ai, . . . hagaa.” (Maatiyoosa 3:16, 17) Wurssettan, Zerettay yiis! (Galaatiyaa 3:16) He wodee Xoossaa xuuray gujji qoncciyo wode.—2 Ximootiyoosa 1:10.

17. Doomettaabaa 3:15 birshshettay waani qonccidee?

¹⁷ Doomettaabaa 3:15n odettida shooshshay Seexaanaa gidiyoogaanne shooshshaa zerettay Seexaanaa kaalliyaageeta gidiyoogaa Yesuusi saˈan haggaaziyo wode qonccissiis.  (Maatiyoosa 23:33; Yohaannisa 8:44) Hegeeti ubbay merinawu waani xayanaakko guyyeppe qoncciis. (Ajjuutaa 20:1-3, 10, 15) Qassi saluwan deˈiya ayyaana meretatu dirijjite gidida, Yihoowawu machcho mala maccaasiyaa, ‘saluwan deˈiya Yerusalaamo’ geetettaasu. *—Galaatiyaa 4:26; Ajjuutaa 12:1-6.

18. “Ooratta maachchaa” halchchoy aybee?

¹⁸ Yesuusi ammanettida ba erissiyo ashkkaratuyyo I hayqqanaappe kase qammi ‘ooratta maachchaabaa’ yootido wode, awudeegaappenne aadhdhiya maalaaliyaabaa qonccissennan waayi aggana. (Luqaasa 22:20) Appe kasetiya Muuse Higgiyaa maachchaadan, ha ooratta maachchay ‘qeesetu kawotettay’ eqqanaadan oottana. (Kessaabaa 19:6; 1 PHeexiroosa 2:9) SHin, yeletan gidennan ayyaanaaban “Xoossaa Israaˈeela” gidida, Kiristtoosa kaalliya, ayyaanan tiyettida ammanettidaageetu xalaalaa kawotettay ha maachchan eqqana. (Galaatiyaa 6:16, NW) Ooratta maachchaa maacettida ha asati asawu anjjuwaa demissiyaabaa Yesuusaara issippe oottana.

19. (a) Ooratta maachchay ‘qeesetu kawotettay’ eqqanaadan oottiyoy aybissee? (b) Tiyettida Kiristtaaneti “ooratta mereta” geetettiyoy aybissee, qassi Kiristtoosaara saluwan haaranaageeti aappunee?

¹⁹ Ooratta maachchay asawu anjjuwaa demissana ‘qeesetu kawotettay’ eqqanaadan oottees. Aybissi? Ayssi giikko, he maachchay Kiristtoosi erissiyo ashkkarata nagaranchcha geenna, shin A yarshshuwaa baggaara eti maarotettaa demmanaadan oottees. (Ermmaasa 31:31-34) Eti Yihoowa sinttan geeshsha gidikko, I eta saluwan ba soo asa oottees, qassi geeshsha ayyaanan eta tiyees. (Roome 8:15-17; 2 Qoronttoosa 1:21) Yaatiyo gishshawu, eti banttana ‘saluwan naagiya deˈuwaa hidootawu  naaˈˈanttuwaa yelettidosona.’ (1 PHeexiroosa 1:3, 4) He keehi xoqqa maatay asawu muleera oorattaba gidiyo gishshawu, he Kiristtaaneti “ooratta mereta” geetettoosona. (2 Qoronttoosa 5:17) Xoossay wozido asaa saluwan uttidi wurssettan haaranaageeti 144,000 gidiyoogaa Geeshsha Maxaafay qonccissees.—Ajjuutaa 5:9, 10; 14:1-4.

20. (a) Xoossaa xuuraara gayttidaagan, 36 M.Ln aybi qonccidee? (b) Abrahaamawu qaalaa gelido anjjuwaa demmanay oonee?

²⁰ Yesuusinne ha tiyettidaageeti “Abrahaama zare” gidoosona. * (Galaatiyaa 3:29) Yeletan Ayhuda gididaageeti koyro doorettidosona. SHin 36 M.Ln, Xoossaa xuurawu hara ginay qoncciis: Ayhuda gidennaageetikka saluwaa biyo hidootaa demmoosona. (Roome 9:6-8; 11:25, 26; Efisoona 3:5, 6) Abrahaamawu qaalaa gelido anjjuwaa demmanay tiyettida Kiristtaanetu xalaalee? Yesuusa yarshshoy asa ubbaa goˈˈiyo gishshawu, eta xalaala gidokkona. (1 Yohaannisa 2:2) Ooninne qoodanawu danddayenna ‘zaway baynna daro asay’ Seexaanaa alamee xayiyo wode paxa attanaagaa Yihooway guyyeppe qonccissiis. (Ajjuutaa 7:9, 14) Keehi daro asay Gannatiyan merinawu deˈanawu hayquwaappe denddana!—Luqaasa 23:43; Yohaannisa 5:28, 29; Ajjuutaa 20:11-15; 21:3, 4.

21, 22. Yihoowa xuuray A aadhdhida eratettaa ayba ogetun qonccissii?

²¹ Xoossaa xuuray “zawai bainna [A] aadhdhida eratettaa” maalaalissiya ogiyan bessiyaaba. (Efisoona 3:8-10) Ha xuuraa yootiyoogaaninne hegaa keehi loddan loddan qonccissiyoogan Yihooway ba gita aadhdhida eratettaa bessiis! I asay danddayennabay aybakko qoppidi, eti bantta wozanan deˈiya tumubaa qonccissanaadan oottiis.—Mazamure 103:14.

 ²² Kawo gidanaadan Yesuusa dooriyoogankka Yihooway zawi baynna ba aadhdhida eratettaa bessiis. Yihoowa Naˈay ay meretappenne keehi ammanettidaagaa. Yesuusi asa gididi deˈido wode daro metoy A gakkiis. I asaa metuwaa loytti akeekees. (Ibraawe 5:7-9) Yesuusaara issippe haariyaageetubaa shin? Daro xeetu layttatu giddon, zare ubbaappe, qaala ubbaappenne woga ubbaappe doorettida attumaageetinne maccaageeti tiyettidosona. Eti banttana gakkin xoonibeenna metoy baawa. (Efisoona 4:22-24) Kawonne qeese gidida ha qarettiyaageeti haariyo wodiyan deˈiyoogee ufayssiyaaba gidana!

23. Yihoowa xuuraara gayttidaagan Kiristtaanetuyyo ayba maatay deˈii?

²³ Kiitettida PHawuloosi hagaadan giis: ‘Ha qaalay [“xuuray,” NW] hagaappe kase bagga ubban asa ubbawu erettennan geemmidi deˈiyaagaa, ba geeshshatuyyo Xoossay qonccissiis.’ (Qolasiyaasa 1:26) Yihooway ayyaanan tiyido geeshshati Xoossaa xuuraabaa darobaa erido gishshawu, hegaa miilooniyan qoodettiyaageetuyyo yootidosona. Nuuni ubbay keehi gita maataa demmida! Yihooway “polanau qoppi wottido xuura yohuwaa nuna erissiis.” (Efisoona 1:9) Zawi baynna Xoossaa Yihoowa aadhdhida eratettaa harati akeekanaadan maaddiyoogan, ha maalaalissiya xuuraa etayyo yootoos!