1, 2. Yihooway medhdhanawu goꞌettiyo wolqqaa awa ayfee waati qonccissii?

 MEEGGIYA qamman neeni tamaa achchan uttiyo wode waatay? Ne kusheta tamay hoꞌettana danddayiyoogaa keenaa lacuwaappe haassada tamaakko shiishshaasa. Neeni yaa loytta shiiqikko, hoꞌꞌoy keehi darees. Neeni tamaappe keehi haakkikko, nena meeggees.

² Nu bollay gallassi hoꞌꞌanaadan oottiya “tamay” deꞌees. He tamay 150 miiloone kilo meetire gidiyaagaa keenaa haakkiya sohuwan eexxees! a Hegaa keena haaho sohuwaappe nena hoꞌꞌiya awaa wolqqay ay keena giteeshsha! SHin, maalaalissiya niyukileeriyaa hobbiyaa cooce mala awaappe biittay bessiyaagaa keena haakkidi yuuyees. Biittay awaakko keehi shiiqiyaakko biittan deꞌiya haattay penttuwaadan pude denddana; qassi awaappe keehi haakkiyaakko saꞌaa haatta ubbay shachcha gidana. Keehi shiiqiyoogeekka keehi haakkiyoogeekka deꞌoy biittan xayanaadan oottees. Saꞌan deꞌuwawu keehi koshshiya awaa poꞌoy ufayssiyoogaa xalla gidennan, moorettidabi aybinne baynna geeshshaa.—Eranchchaa 11:7.

3. Awa ayfee qonccissiyo keehi koshshiya tumay aybee?

³ Asay deꞌuwan deꞌanawu away keehi koshshiyaaba gidikkonne, daro asay awaa goꞌꞌaa nashshenna. Yaatiyo gishshawu, eti awaappe tamaarana danddayiyoobaa akeekokkona. Geeshsha Maxaafay Yihoowabaa hagaadan gees: “Awaanne aginaa eta sohuwan wottidaagee nena.” (Mazamure 74:16) Ee, away ‘saluwaanne saꞌaa medhdhida’ Yihooway bonchchettanaadan oottees. (Mazamure 19:1; 146:6) Yihooway medhdhanawu goꞌettiyo  wolqqaabaa tamaarissiya qoodin wurenna saluwaa meretatuppe awa ayfiyaa issinno. Saꞌaaninne A bollan deꞌiyaaban nu xeelaa wottanaappe kase saluwaa meretatuppe amaridaageeta ane loytti pilggoos.

4, 5. (a) Awa ayfee ay keena wolqqaameenne ay keena gitee? (b) Hara xoolinttetuura geeddarssiyo wode I ay keenee?

⁴ Neeni eriyoogaadan, awa ayfee xoolintte. Awa ayfee matasan deꞌiyo gishshawu, nuuni qammi beꞌiyo xoolinttetuura geeddarssiyo wode, keehi gita milatees. A wolqqay ay keenee? Awa ayfiyaa hoꞌꞌoy humꞌꞌuwan 15,000,000 digiri senttigireede gidees. Neeni awa ayfiyaa humꞌꞌuwaappe gaashe ayfe keenaa ekkada saꞌan wottiyaakko, he guutta hoꞌꞌuwaakko 140 kilo meetiriyaappe matatta eqqana danddayakka! Daro xeetu miilooniyan qoodettiya niyukileere bombbee xuuqqin kiyiyaagaa keena wolqqay sokonddiyan sokonddiyan awa ayfiyaappe kiyees.

⁵ Awa ayfee 1,300,000ppe dariya saꞌaa A giddon wottana danddayiyoogaa keena keehi gita. Awa ayfee zawi baynna gitee?  Akkay, saluwaa meretatubaa xannaꞌiyaageeti awa ayfee guutta xoolintte gidiyoogaa yootoosona. Kiitettida PHawuloosi ‘issi xoolinttiyaa bonchchoy haraagaappe dummatiyoogaa’ yootiis. (1 Qoronttoosa 15:41) Geeshsha ayyaanay kaalettin xaafettida he qofay ay keena tumakko I eriyoobi baawa. Awaa sohuwan deꞌiyaakko, saꞌay A giddon deꞌiyoogaa keena keehi gita xoolinttee deꞌees. Awaa sohuwan deꞌiyaakko, Saatern giyo pilaaneetee deꞌiyoosaa gakkiya issi keehi gita xoolinttee deꞌees. He keehi gita xoolinttee awaa sohuwan deꞌiyaakko, wolqqaama zayyiyaa xuussin kiyiya xiitiyaappe 40ppe dariya kushiyaa eesotiyaabay saꞌaappe denddidi oyddu layttan yaa gakkiyoogaa keenaa haakkidi deꞌiya Saatern giyo pilaaneetee deꞌiyoosaa gakkees!

6. Xoolintteti asi qoodi danddayennaagaa keena keehi cora gidiyoogaa Geeshsha Maxaafay waati qonccissii?

⁶ Xoolinttetu qooday eta yesuwaappe aaruwan garamissiyaaba.  ‘Abbaa shafiyaa’ qoodana danddayennaagaadan, xoolinttetakka qoodana danddayennaagaa Geeshsha Maxaafay yootees. (Ermmaasa 33:22) Ha qofay nuuni ayfiyan beꞌana danddayiyoogaappe keehi cora xoolintteti deꞌiyoogaa qonccissees. Qassi, issi asi harabaa goꞌettennan ba ayfiyan qammi saluwaa xeelliyaakko beꞌana danddayiyo xoolintteti heezzu shaꞌaappe darenna gishshawu, Ermmaasa mala Geeshsha Maxaafaa xaafee qammi saluwaa xeelliyaakko qoodana danddayiyoy hegaa keena. He qooday issi zolle shafiyaappe darenna. Gidoppe attin, xoolinttetu qooday abbaa shafiyaadan zawi baynnaagaa. b Hegaa ooni qoodana danddayii?

7. (a) Milkkiwey gaalakisiyan ay keena xoolintteti deꞌiyoonaa, qassi he qooday ay keena daroo? (Tohossa qofaa xeella.) (b) Saluwaa meretatubaa xannaꞌiyaageeti gaalakisetu qoodaa eranawu metootiyoogaa nuuni akeekana koshshiyoy aybissee, qassi hegee Yihooway medhdhanawu goꞌettiyo wolqqaabaa nuna ay tamaarissii?

⁷ Isiyaasa 40:26y zaaruwaa hagaadan gees: “Intte aifiyaa xoqqu oottidi, saluwaa xeellite; he xoolintteta medhdhidai oonee? I eta olanchchaadan kaalettees; eta qoodaakka erees. I eta ubbaakka eta sunttan sunttan xeesees.” Mazamure 147:4y, ‘I xoolinttetu qoodaa likkiyan wottiis’ yaagees. ‘Xoolinttetu qooday’ aappunee? Hegee deexo oysha. Saluwaa meretatubaa xannaꞌiyaageeti Milkkiwey gaalakisiyaa xallan 100 biilooneppe dariya xoolintteti deꞌiyoogaa yootoosona. c SHin Milkkiwey gaalakisee daro gaalakisetuppe issuwaa; qassi he gaalakisetuppe darotu giddon yaa haa biya xoolintteti ubba keehi daro. Aappun gaalakiseti deꞌiyoonaa? Saluwaa meretatubaa xannaꞌiya amaridaageeti gaalakisetu qooday 50 biiloone gidana giidosona. Harati qassi  gaalakiseti 125 biilooneppe darana danddayiyoogaa yootoosona. Hegaa gishshawu, gaalakisetu giddon deꞌiya biilooniyan qoodettiya xoolinttetu likke qoodaa yootiyoogee atto shin, gaalakiseti aappunakkokka asi erana danddayenna. Gidoppe attin, Yihooway eta qoodaa erees. Qassi, I ubba xoolinttetuyyo sunttaa sunttiis!

8. (a) Neeni Milkkiwey gaalakisiyaa aahotettaa waata qonccissuutee? (b) Yihooway saluwaa meretatu qaattaa aybin kaalettii?

⁸ Gaalakiseti keehi aaho gidiyoogaa nuuni wotti dentti qoppiyo wode, Xoossaa kaseegaappe aaruwan bonchchoos. Pooꞌoy keehi eesuwan, issi sokonddiyan 300,000 kilo meetiriyaa bees. Hegaa keena eesuwan biiddi, poꞌoy Milkkiwey gaalakisiyaa kanttanawu 100,000 gidiya layttaa wurssiyoogaa ane qoppa. Qassi hara amarida gaalakiseti Milkkiwey gaalakisiyaappe keehi daroosona. Geeshsha Maxaafay Yihooway saluwaa dunkkaaniyaadan ‘tolidoogaa’ yootees. (Mazamure 104:2) Hegaa bollikka, he meretati A azazuwan qaaxxoosona. Xoolintettuppe gidduwan deꞌiya baana mala guuttabaappe doommidi wolqqaama gaalakisiyaa gakkanawu deꞌiya ubbabay qaaxxiyoy Xoossay etawu kessido higgiyaadaana. (Iyyooba 38:31-33) Hegaa gishshawu, saynisiyaa eranchchati saluwaa meretati bali baynnan qaaxxiyo qaattaa maalaaliya durssaara geeddarssoosona! Ane qassi hegeeta medhdhidaagaa qoppa. Xoossay medhdhanawu goꞌettiyo zawi baynna wolqqan neeni maalaalettikkii?

9, 10. Awa ayfenne A yuuyiyaabati, Jupiteree, saꞌaynne aginay deꞌiyo sohoy Yihoowa wolqqaa waati qonccissii?

⁹ Yihooway medhdhanawu goꞌettiyo wolqqaa nuuni deꞌiyo saꞌay bessees. I yuushshi qoppidi, ha aaho salo gufantton saꞌaa likke sohuwan wottiis. Daro gaalakiseti deꞌuwan deꞌiyaabawu saꞌaadan injjetennaagaa amarida saynttistteti yootoosona. Milkkiwey gaalakisiyaappe dariya baggay paxa deꞌiyaabay deꞌanaadan merettibeennaagee qoncce. He gaalakisiyawu giddo heeran xoolintteti kumidosona. Hegan wolqqaama woraajjiyaabay (radiation) kumiis, qassi darotoo xoolintteti  xoolinttetuura domꞌꞌettiichchi attoosona. Deꞌuwawu keehi koshshiya darobay he gaalakisiyawu bolla baggan baawa. Deꞌuwawu keehi koshshiyaabay baynna sohuwaappe gidduwan awa ayfeenne A yuuyiyaabati keehi giiga sohuwan deꞌoosona.

¹⁰ Jupiter giyo keehi gita pilaaneetee haahuwan deꞌikkonne, saꞌay qohettennaadan keehi naagees. Jupiteree yesuwan saꞌaappe shaꞌu kushe dariyo gishshawu, A dafuwaa wolqqay keehi daro. Hegee ay kaalettidee? Saluwan xonggettidi eesuwan biyaabaa he pilaaneetee ba giddo mittees woy hara ginaa baanaadan oottees. Saluwaappe yiya gitabati saꞌaa bolli gattiyo qohoy, Jupiteree baynnaakko, ha wodiyaagaappe 10,000 kusheppe darana giidi saynttistteti qoppoosona. Saꞌaayyo satalayte mala gidida aginay keehi maaddees. Aginay loꞌꞌiyoogaanne “qammi poꞌiyoogaa” xalla gidennan, saꞌay geddi giido likkee laamettennan deꞌanaadan oottees. Saꞌay geddi giido likkee deꞌuwawu keehi maaddiya, laamettenna wodeti deꞌanaadan oottiis.

11. Saꞌaa yuushuwan deꞌiya carkkoy waanidi qohiyaabaa teqqiyaaba gididi giigidee?

¹¹ Yihooway medhdhanawu goꞌettiyo wolqqay saꞌay merettido oge ubban qoncciis. Qohiyaabaa teqqiya, saꞌaa yuushuwan deꞌiya carkkuwaabaa qoppa. Awa ayfiyaappe kiyidi woraajjiyaabatun (rays) maaddiyaageetinne woriyaageeti deꞌoosona. Woriya woraajjiyaabati saꞌaa yuushuwan deꞌiya carkkuwawu bolla baggaa shociyo wode, okisijjinee oozone giyoobawu laamettanaadan oottoosona. Hegaadan merettida oozonee he woriya daro woraajjiyaabata ba giddo mittees. Saꞌay yanxxila malaban kamettidi giigiis gaana danddayettees.

12. Saꞌaa yuushuwan deꞌiya carkkuwan haattay yuuyiyo hanotay Yihooway medhdhanawu goꞌettiyo wolqqaa waati qonccissii?

¹² Saꞌan woy saꞌaa heeran deꞌiya meretatussi maaddiya daro gaazee deꞌiyo, saꞌaa yuushuwan deꞌiya carkkuwaa xeelliyaagan hegee issi macara xalla. Haattay yuuyidi ba sohuwaa simmiyoogee saꞌaa yuushuwan deꞌiya carkkuwaaban garamissiyaabaappe issuwaa. Away abbaappe layttan layttan 400,000 kilo meetire kiyubeppe daro haattay penttuwan pude kiyanaadan oottees. Saꞌaa yuushuwan deꞌiya carkkoy carkkidi daro sohuwaa efiyo shaaray  haattaappe merettees. Gacetti xillida he haattay iranne shachcha gidi wodhdhidi, ba sohuwaa simmees. Eranchchaa 1:7y hagaadan gees: “Goggiya haattai ubbai abban gelees; shin abbai kumi erenna. He haattai qassikka simmidi gogganau, guyye ba pulttiyo sohuwaa bees.” Hegaa malabaa oottana danddayiyay Yihoowa xalla.

13. Saꞌaa bollan mokkiya doliyaabatinne biittay Medhdhidaagaa wolqqaa qonccissiyoobaa ay akeekiyoo?

¹³ Nuuni paxa deꞌiyaabaa beꞌiyo soho ubban, Medhdhidaagaa wolqqaa beꞌoos. Redwud giyo 100 meetireppe aduqqiya mittaappe biidi nu shemppiyo okisijiiniyaappe dariya baggaa giigissiya, ano abban kumida, ayfiyan beettenna mokkiyaabata gakkanawu deꞌiyaabati Yihooway medhdhanawu goꞌettiyo wolqqaa bessoosona. Paxa deꞌiya guxuneti, morssatinne ayfiyan beettennabati biitta giddon kumidosona. Mokkiyaabati diccanaadan maaddanawu he ubbati maalaalissiya ogiyan issippe oottoosona.

14. Ayfiyan beettenna atomiyan geemmi uttida wolqqay ay keenee?

¹⁴ Yihooway ‘ba wolqqan saꞌaa medhdhidoogee’ aynne sirissenna. (Ermmaasa 10:12) Xoossaa wolqqay I medhdhido ubbaban keehi guuttabatunkka qonccees. Leemisuwawu, keehi guutta mereta gidida miiloone atometa miyyiyan miyyiyan issippe wottiyaakko asa binnaanaappe orddokkona. Hegaa bollikka, he atomiyaassi humꞌꞌuwan deꞌiyaabay keehi wolqqaama gidiyo gishshawu, gita xuussa xuussanawu A goꞌettidosona.

15. Yihooway Iyyoobawu dumma dumma doꞌatubaa yootiyoogan A ay tamaarissidee?

¹⁵ Yihooway medhdhanawu goꞌettiyo wolqqaa loytti qonccissiya harabay saꞌan deꞌiya keehi daro mehiyaanne doꞌaa. Yihoowa galatiya darobata qonccissiya Mazamure 148n, paydo 10y ‘mehetanne doꞌata’ yootees. Asay Medhdhidaagan maalaalettidi A bonchchana bessiyoy aybissakko qonccissanawu, Yihooway Iyyoobawu gaammuwaa, harddiidaa, menttaa, Bihemoota (woy xadiyaa), qassi Lewaataana (hegee hawulaashuwaa gidennan  waayi aggana) mala doꞌatubaa yootiis. Yihooway odana koyidobay aybee? Aadissana danddayenna he wolqqaama meretatun maalaalettidi issi uri keehi yayyiyaaba gidikko, eta Medhdhidaagan hegaappe aaruwan maalaalettidi yayyana koshshiyoogee qoncce.—Iyyooba, shemppo 38-41.

16. Yihooway medhdhido amarida kafota xeelliyaagan nena keehi garamissiyaabay aybee?

¹⁶ Mazamure 148:10y ‘paalliya kafotubaakka’ yootees. Eti dumma dumma gidiyoogaa ane qoppa. Yihooway ‘paraa bollinne paraawaa bolli miicciya’ Yanchchabaa Iyyoobawu yootiis. A geesay 2.5 meetire gidiyo he kafoy paallennaba gidikkokka, issitoo 4.5 meetire tanggiyoogan issi saatiyan 65 kilo meetiriyaa woxxana danddayees! (Iyyooba 39:13, 18) SHin albatros giyo kafoy ba deꞌo layttaappe dariya baggaa abbaa bollan aallanttiyoogan aattees. He kafuwaa qefee 3 meetire gidiyaagaa keena adussa. He kafoy ba qefeta miccidi qaattennan daro saatiyaa carkkuwan takkana danddayees.[24] Ichchashu sentti meetire xallaa aduqqiya bii hamingberd giyo kafoy alamiyan deꞌiya kafotu ubbaappe guutta. I issi sokonddiyan ba qefiyaa 80too qaattana danddayees! Alleeqodan phooliya hamingberd giyo kafoti helikoptteretudan aallanttananne ubba qassi guyye gutti paallana danddayoosona.

17. Bilu weyil giyo doꞌay ay keena gitee, qassi Yihooway medhdhido doꞌatubaa wotti dentti qoppi simmidi nuuni waatana koshshii?

¹⁷ Mazamure 148:7y (NW), ‘abbaa giddon deꞌiya gita doꞌatikka’ Yihoowa galatiyoogaa yootees. Ha saꞌan deꞌida doꞌatu ubbaappe keehi gita giidi daro asay qoppiyo bilu weyil giyo doꞌaa ane qoppoos. Ano abbaa giddon deꞌiya he wolqqaama doꞌay 30 meetire woy hegaappe daruwaa adussa gidana danddayees. I 30 gita danggarssatu wudiyaa keena deexxana danddayees. A inxxarssay issi danggarssaa keena deexxees. A wozanay issi guutta kaame keena. Issi daqiiqan 1,200too diddiqana danddayiya hamingberd giyo kafuwaa wozanaara geeddarssiyo wode, he gita wozanay issi daqiiqan 9too xallaa diddiqees. He wolqqaama doꞌaa suuttaa xaphoti issi guutta naꞌay A giddon zuummana danddayiyoogaa keena gita. Mazamure maxaafaa wurssettan deꞌiya zoriyaadan nuunikka, “Paxa shemppiya ubbati GODAA galatona”  yaaganaadan nu wozanay denttettiyoogee qoncce.—Mazamure 150:6.

18, 19. Yihooway saꞌan medhdhido deꞌon deꞌiyaabati ay keena coree, qassi merettidabati I ubbaa hariyo maataabaa nuna ay tamaarissiyoonaa?

¹⁸ Yihooway medhdhanawu goꞌettiyo wolqqaappe nuuni ay tamaariyoo? Meretati dumma dumma gidiyoogee nuuni keehi garamettanaadan oottiyaaba. Issi mazamuraawee hagaadan giis: “Abeet GODAU, ne oosoi ai keena daroo! . . . sa7ai neeni medhdhidoban kumiis.” (Mazamure 104:24) Hegee tuma! Deꞌon deꞌiyaabaa xannaꞌiyaageeti saꞌan miilooniyaappe dariya paxa deꞌiya meretatu sheeshshay deꞌiyoogaa eridosona; shin muleera 10 miiloone, 30 miiloone, woy hegaappe daro gidennan aggenna giidi dumma dumma qofaa yootoosona. Misiliyaa medhdhiya asi kaseegaadan oorattabaa medhdhiyo eray bawu baynnaagaa issi issitoo akeekana danddayees. SHin, Yihooway dumma dumma oorattabaa medhdhiyo wolqqay awudenne wurenna.

¹⁹ Yihooway medhdhanawu goꞌettiyo wolqqay I ubbaa haariyo maataabaa nuna tamaarissees. “Medhdhidaagaa” giya qaalay saluwan saꞌan deꞌiya ubbabaappe, hegeekka “merettida” ubbaappe Yihooway dummatiyoogaa bessees. Meretaa medhdhiyo wode “waanna oosanchcha” gididi oottida, Yihoowawu mexi  issi Naꞌaykka, Medhdhidaagaa woy issippe Medhdhidaagaa geetettidi Geeshsha Maxaafan mule xeesettibeenna. (Leemiso 8:30; Maatiyoosa 19:4) I “merettidabaa ubbaappe aadhdhiya baira.” (Qolasiyaasa 1:15) Yihooway ubbabaa Medhdhidaagaa gidiyoogaadan saluwan saꞌan ubbaa haariyo maatay deꞌiyoy A xalaalaassa.—Roome 1:20; Ajjuutaa 4:11.

20. Yihooway saꞌaa meretaa medhdhiyoogaa wurssi simmidi shemppidoy ayba ogiyaanee?

²⁰ Yihooway ba wolqqan medhdhanawu goꞌettiyoogaa aggidee? Usuppuntta meretaa gallassi Yihooway meretaa medhdhi wurssido wode, “ba oottido ooso ubbaappe laappuntta gallassi [shemppidoogaa]” Geeshsha Maxaafay yootees. (Doomettaabaa 2:2) Kiitettida PHawuloosi ha laappuntta ‘gallassay’ A wode gakkanaassi takkido gishshawu shaꞌan qoodettiya laytta gidiyoogaa qonccissiis. (Ibraawe 4:3-6) Gidoppe attin, “shemppiis” giyoogee Yihooway oottiyoogaa muleera aggiis giyoogee? CHii, Yihooway oottiyoogaa mule aggenna. (Mazamure 92:4; Yohaannisa 5:17) Yaatiyo gishshawu, I shemppidoogee saꞌan meretaa medhdhiyoogaa essidoogaa bessiyaaba milatees.[28] SHin, I ba halchchoy polettana gakkanaassi oottiyoogaa mule aggibeenna. Ayyaanay kaalettin Geeshsha Maxaafaa xaafissiyoogee he oosotuppe issuwaa. Nuuni SHemppo 19n beꞌana, ‘ooratta meretaa’ medhdhiyoogeekka A ooso.—2 Qoronttoosa 5:17.

21. Yihooway medhdhanawu goꞌettiyo wolqqay ammanettida asaa merinawu waati maaddanee?

²¹ Yihooway usuppuntta meretaa gallassay wurido wode yootidoogaadan, I saꞌan medhdhido ubbabay “daro lo77o” gidiyoogaa ba shemppo gallassay wuriyo wode yootana. (Doomettaabaa 1:31) I medhdhanawu goꞌettiyo zawi baynna ba wolqqaa hegaappe simmin waati goꞌettanaakko he wode beꞌana. Ay gidinkka, medhdhanawu ba wolqqaa Yihooway goꞌettiyoogee nuna ubbatoo ufayssiyaaba gidanaagee qoncce. Yihooway medhdhido meretaa baggaara abaa nuuni meri merinawu tamaarana. (Eranchchaa 3:11) Nuuni abaa loytti tamaariyo wode, kaseegaappe aaruwan maalaalettidi A bonchchana; qassi nuna Medhdhidaagaakko loytti shiiqana.