1, 2. Israaꞌeelati 1513n K.K. Siinaa bazzuwaa gakkido wode eta hirggissiyaabay aybi gakkidee, qassi Yihooway eta waati minttettidee?

 ISRAAꞌEELATI 1513n K.K. Siinaa bazzuwaa gakkido wode eta hanotay hirggissees. Eti ‘marzziyaara deꞌiya shooshshaynne masimasoy kumido gitanne yashshiya bazzuwaa’ kanttidi keehi yashshiya manddara manddaranawu deꞌoosona. (Zaarettido Wogaa 8:15) Ixxiya kawotettatikka eta qohanawu yashissidosona. Ba asay ha metiya hanotay deꞌiyo sohuwaa yaanaadan Yihooway oottiis. Eta Xoossaa gidiyoogaadan, I eta naaganee?

² Yihooway haasayidobay keehi minttettees. I, “Taani Gibxxetu bolli ai oottidaakkonne qassi argganttaa [qefiyan] taani inttena waata tookkada taakko ehiidaakkonne intte intte huuphen be7ideta” yaagiis. (Kessaabaa 19:4) Yihooway argganttaa goꞌettidobadan, ba asaa Gibxxetuppe ashshidi hirggennaadan oottidoogaa eta hassayissiis. SHin, ‘Argganttaa qefeti’ Xoossaa naaguwawu bessiya leemiso gidiyo hara gaasoti deꞌoosona.

3. ‘Argganttaa qefeti’ Xoossaa naaguwawu bessiya leemiso gidiyoy aybissee?

³ Argganttay ba aaho mino qefeta goꞌettiyoy paallana xallaassa gidenna. Argganttiyaa 2 meetireppe dariya ba qefeta miccada gallassi xuuggiya awaappe ba marata ashshawusu. Haroode qassi, ba marata meeguwaappe ashshanawu ba qefetun haphphawusu. Argganttiyaa ba maraa naagiyoogaadan, Yihooway ooratti eqqida Israaꞌeela deriyaa naagiis. A asay bazzuwan ammanettidi deꞌido wode ubban, A wolqqaama qefetu giddon naaguwaa demmana. (Zaarettido Wogaa 32:9-11; Mazamure 36:7) Gidoppe attin, nuuni ha wodiyan Xoossaa naaguwaa demmana giidi naagana danddayiyoo?

4, 5. Xoossay naaganawu gelido qaalan nuuni mintti ammanettana danddayiyoy aybissee?

⁴ Yihooway ba asaa naagana danddayiyoogee tuma. I “Ubbaa Danddayiya Xoossaa”; he bonchcho sunttay awu zawi baynna wolqqay deꞌiyoogaa bessees. (Doomettaabaa 17:1) Teqettenna beetaadan, Yihoowa wolqqaa teqqana danddayiyaabi baawa. I ba koyiyo aybanne oottana danddayiyo gishshawu, nuuni ‘Yihooway ba asaa naaganawu ba wolqqaa goꞌettanawu koyii?’ giidi oychchana danddayoos.

⁵ Qanttan, ee giidi zaarana danddayoos. Yihooway I ba asaa naaganaagaa nuuyyo yootees. Mazamure 46:1y, “Xoossai nuuni naagetti attiyo sohonne nuuyyo wolqqa. Nuna metoi gakkiyo wode, maaddanau i ubbatoo matan de7ees” yaagees. Xoossay “worddotenna” gishshawu, naaganawu I gelido qaalan nuuni mintti ammanettana danddayoos. (Tiitu 1:2) Yihooway ba naaguwaa qonccissanawu goꞌettiyo amarida leemisota ane beꞌoos.

6, 7. (a) Beni wode henttanchchay ba dorssata waati naagii? (b) Geeshsha Maxaafay Yihooway ba dorssata naaganawu wozanappe koyiyoogaa leemisuwan waati qonccissii?

⁶ Yihooway Henttanchcha, qassi “nuuni a asatanne a qooruwan de7iya dorssata.” (Mazamure 23:1; 100:3) Dorssaadan eesuwan qohettiya meheti darokkona. Beni wode henttanchchay ba dorssata gaammotuppe, wanggireellotuppe, beere giyo doꞌatuppenne kaysotuppe naaganawu xala gidana koshshees. (1 Sameela 17:34, 35; Yohaannisa 10:12, 13) SHin dorssata naaganawu qarettana bessiyo wodeti deꞌoosona. Issi dorssiyaa birddiyaappe keehi haahosan yeliyo wode, henttanchchay I matan eqqidi O naagees, qassi eesuwan qohettana danddayiya maraa kiyuwan idimmidi birddiyaakko efees.

⁷ Yihooway bana henttanchchaara geeddarssiyoogan, I  nuna naaganawu wozanappe koyiyoogaa yootees. (Hizqqeela 34:11-16) Isiyaasa 40:11 Yihoowabaa yootiyoobaa ha maxaafan SHemppo 2n beꞌidoogaa hassaya: “I ba wudiyaa henttanchchaadan mizees; ba dorssa maratakka ba qesiyan shiishshidi, ba kiyuwan idimmana.” Guutta dorssa maray henttanchchaa “kiyuwan” waani idimettii? Dorssa maray henttanchchaakko shiiqidi A gediyaa loddaara bochchana danddayees. SHin hokkidi dorssa maraa tookkidi ba kiyuwan loddan idimmiyay henttanchchaa. Hagee nu Gita Henttanchchay nuna naaganawu koyiyoogaa bessiya keehi loꞌꞌo leemiso!

8. (a) Xoossay oona naaganawu qaalaa gelidee, qassi hegee Leemiso 18:10n waani qonccidee? (b) Xoossaa sunttay nuuyyo baqati attiyo soho gidanaadan nuuni waatana koshshii?

⁸ Xoossay naaganawu qaalaa gelidoy baakko shiiqiyaageetu xallaassa. Leemiso 18:10y, “GODAA sunttai mino gimbbe mala; xillo asi yaa woxxidi saro attana” yaagees. Beni wode, asay baqati attana mala bazzuwan issi issitoo gimbbee gimbbettees. Gidikkonne, he gimbbiyaakko baqatidi attiyoogee aawu shene. Xoossaa sunttaa baqati attiyo soho oottiyoogeekka hegaa mala. Yaatanawu Xoossaa sunttaa zaaretti zaarettidi xeesiyoogaa xallay gidenna; Xoossaa sunttaa xallay asawu danddayettennabaa oottiya wolqqa gidenna. Nuuni he sunttan Xeegettiyaagaa erananne ammanana, qassi I kessido xillotettaa maaraadan deꞌana koshshees. Nuuni Yihoowan ammanettikko I nu naagetti attiyo gimbbe gidanaagaa yootidoogee, I ay keena kehakko bessiyaaba!

9. Yihooway naaganawu qaalaa geliyoogaappe aadhdhiyaaba waati oottidee?

⁹ Yihooway naaganawu qaalaa geliyoogaappe aadhdhiyaaba oottiis. Beni wode, I ba asaa naagana danddayiyoogaa maalaalissiya ogiyan bessiis. Israaꞌeelatu taarikiyan, Yihoowa mino ‘kushee’ darotoo wolqqaama morkketa teqqiis.  (Kessaabaa 7:4) Gidikkokka, Yihooway naaganawu goꞌettiyo ba wolqqaa issi issi uraa naaganawukka goꞌettiis.

10, 11. Yihooway naaganawu goꞌettiyo ba wolqqaa issi issi uraa naaganawu goꞌettiyoogaa bessiya Geeshsha Maxaafaa taarikee awugee?

¹⁰ Heezzu yelaga Ibraaweti Sidiraaqi, Misaaqinne Abddanaagoy Kawoy Naabukadanaxoori essido worqqaa misiliyawu goynnennan ixxido wode, hanqquwaa suulliya he kawoy eta eexxiya itoone tamaa giddon olana giidi yashissiis. He wode saꞌan ooppenne aadhdhiya wolqqaama kawo gidida Naabukadanaxoori, “Ai xoossee inttena ta kushiyaappe ashshanai?” yaagidi cayiis. (Daaneela 3:15) He heezzu yelagati bantta Xoossawu banttana naagiyo wolqqay deꞌiyoogaa loytti eroosona, shin he wode I banttana ashshees giidi eti ammanibookkona. (Daaneela 3:17, 18) Itooniya tamay kaseegaappe laappun kushiyaa aadhdhidi eexxikkonne, koyidobaa aybanne oottana danddayiyo wolqqay deꞌiyo eta Xoossaa hegee metiyaaba gidenna. Xoossay eta ashshin, kawoy hagaadan giis: “Hara ai xoossinne hagaadan oottidi, asa ashshenna.”—Daaneela 3:29.

¹¹ Yihooway ba mexi issi Naꞌaa deꞌuwaa Ayhuda geelaꞌee Mayraami uluwaa aattido wode, naaganawu I goꞌettiyo ba wolqqaa maalaalissiya ogiyan qonccissiis. Mayraama ‘shahaarada attuma naꞌaa yelanaagaa’ issi kiitanchchay iyyo yootiis. He kiitanchchay hagaadan giis: ‘Geeshsha ayyaanay ne bolli yaana; Ubbaappe Bolla Xoossaa wolqqay nenan shemppana.’ (Luqaasa 1:31, 35) Hegaa mala hirggissiyaabay Xoossaa Naꞌaa mule gakki erennaba milatees. Aayee nagaray yelettibeenna naꞌaa shaallanee? He Naꞌay yelettanaappe kase Seexaanay A qohanee woy woranee? Hegee mule hanennaba! Yihooway shahaaray attido wodiyaappe doommidi nagaray shaallennaadan, qassi qohiya harabay, woriya asinne daydanttati he naꞌaa qohennaadan Mayraamo loytti naagiis.[9] Yesuusa naatettankka Yihooway naagiis. (Maatiyoosa 2:1-15) Xoossay keerido wodee gakkanaashin, I dosiyo Naꞌaa ayba qohoynne gakkibeenna.

12. Yihooway beni wode issi issi asata keehi maalaalissiya ogiyan naagidoy aybissee?

 ¹² Yihooway issi issi asata keehi maalaalissiya ogiyan naagiyoy aybissee? Daro hanotatun, Yihooway eta naagido gaasoy ba halchchuwaa polanaassa. Leemisuwawu, Xoossay asa ubbaa maaddana ba halchchuwaa polanawu Yesuusi naatettan qohettennaadan naagidoogee keehi koshshiyaaba. Yihooway naaganawu ba wolqqaa goꞌettiyoogaa bessiya daro taariketi Geeshsha Maxaafan deꞌoosona. “Xoossaa maxaafai nuuyyo immiyo genccaaninne minttettuwan nuuni demmana giidi ufaissan naagi uttidoogee de7ana mala” nuna tamaarissanawu geeshsha ayyaanay kaalettin hegee xaafettiis. (Roome 15:4) Ee, koyidoba aybanne oottana danddayiyo wolqqay deꞌiyo Xoossan kaseegaappe aaruwan nuuni ammanettanaadan ha taariketi maaddoosona. Gidoppe attin, Xoossay nuna ha wodiyan ayba ogiyan naagana giidi qoppana danddayiyoo?

13. Yihooway nu gishshawu maalaalissiyaabaa oottiyoogee attennabee? Qonccissa.

¹³ Yihooway naaganawu qaalaa geliis giyoogee I nu gishshawu maalaalissiyaabaa oottiyoogee attenna giyoogaa gidenna. Ha alamiyan nuna ayba metoynne gakkennaadan oottanawu Xoossay qaalaa gelibeenna. Hiyyeesatettaa, olaa, sahuwaanne hayquwaa mala daro metoti Yihoowawu ammanettidi haggaaziya darota gakkoosona. Yesuusi ba erissiyo ashkkarati bantta ammanuwaa gaasuwan hayqqanaagaa geeshshi yootiis. Wurssettaa gakkanaashin genccana koshshiyoogaa Yesuusi mintti yootidoy hegaassa. (Maatiyoosa 24:9, 13) Yihooway ay hanotankka ashshanawu maalaalissiya ogiyan ba wolqqaa goꞌettiyaakko, Seexaanay Yihoowa cayananne asay Xoossawu wozanappe haarettenna giidi siranaadan oottana danddayees.—Iyyooba 1:9, 10.

14. Yihooway ba ashkkarata ubbaa issi mala ogiyan naagennaagaa bessiya taariketi awugeetee?

 ¹⁴ Beni wodekka, ba ashkkarata hayquwaappe ashshanawu Yihooway naaganawu goꞌettiyo ba wolqqaa goꞌettibeenna. Leemisuwawu, kiitettida Yaaqooba 44 M.Ln, Heeroodisi worissiis; shin hegaappe simmin daro takkennan, Yihooway ‘Heeroodisa kushiyaappe’ PHeexiroosa ashshiis. (Oosuwaa 12:1-11) Qassi Yaaqooba ishay Yohaannisi, PHeexiroosikka Yaaqoobikka hayqqi simmin daro wodiyawu deꞌiis. Nu Xoossay ba ashkkarata ubbaa issi mala ogiyan naagees giidi nuuni qoppennaagee qoncce. Hegaa bollikka, ‘nuuni ubbay qoppennan gakkiya iita wodiyan oyqettoos.’ (Eranchchaa 9:12) Yaatin, ha wodiyan Yihooway nuna waati naagii?

15, 16. (a) Yihooway baayyo goynniyaageeta citan asatettaaban naagidoogaa bessiya ayba naqaashi deꞌii? (b) Yihooway ba ashkkarata ha wodiyankka ‘gita waayiya’ wodekka naaganaagaa nuuni ammanettana danddayiyoy aybissee?

¹⁵ Koyruwan, asatettaaban naagiyoogaabaa ane qoppa. Nuuni Yihoowayyo goynniyaageeta gidiyoogaadan, asatettaaban I nuna citan naagees giidi qoppana danddayoos. Hegee baynnaakko, nuuni Seexaanaa piriyan sohuwaara geloos. Hagaa qoppa: ‘Ha saꞌaa haariya,’ Seexaanay tumu goynuwaa muleera xayssiyaakko ixxenna. (Yohaannisa 12:31; Ajjuutaa 12:17) Saꞌan deꞌiya keehi wolqqaama kawotettatuppe amaridaageeti sabbakuwaa oosuwaa teqqidosonanne nuna muleera xayssanawu malidosona. SHin, Yihoowa asay minnidi deꞌiisinne aggennan sabbakiis! Ha guuttanne ashshiyaabi baynnaba milatiya Kiristtaanetu oosuwaa wolqqaama kawotettati digganawu danddayibeennay aybissee? Yihooway ba wolqqaama qefetun nuna naagido gishshataassa!—Mazamure 17:7, 8.

¹⁶ Mata wodiyan yaana ‘gita waayiya’ wode nuuni asatettaaban demmana naagoy shin? Nuuni Xoossaa pirddaa yayyana koshshenna. “Godai Xoossau goynniya asata paaciyaappe waati ashshanaakko erees; nagaranchchata qassi, . . .  pirddaa gallassai gakkanaassi Godai qaxxayiiddi wottanaagaakka erees.” (Ajjuutaa 7:14; 2 PHeexiroosa 2:9) He wodee gakkanaashin, nuuni naaꞌꞌubaa ubbatoo ammanettana danddayoos. Koyro, ammanettidi baayyo oottiyaageeti saꞌaappe muleera xayanaadan Yihooway awudenne eeno geenna. Naaꞌꞌantto, ammanettidi deꞌiyaageeta Yihooway ooratta alamiyan merinaa deꞌuwaa woytana; koshshikko, eta hayquwaappe denttidi woytana. Hayqqidaageetussi, Xoossay hassayiyo sohuwan deꞌiyoogaappe aadhdhiya loꞌꞌo sohoy baawa.—Yohaannisa 5:28, 29.

17. Yihooway ba Qaalaa baggaara nuna waati naagii?

¹⁷ Yihooway ha wodiyankka, asaa wozanay paxanaadaaninne eta deꞌoy laamettanaadan eta denttettiyo wolqqay deꞌiyo paxa deꞌiya ba ‘qaalaa’ baggaara nuna naagees. (Ibraawe 4:12) An deꞌiya maarata oosuwan peeshshiyoogan, asatettaa qohiyaabaappe amarida hanotan nuuni naagettana danddayoos. Isiyaasa 48:17y, “Taani GODAI, . . . nena maaddiyaabaa tamaarissiyaagaa” yaagees. Nuuni Xoossaa Qaalaara maayettiya ogiyan deꞌiyoogee nu payyatettaa kaseegaappe loyttananne nu bariyaa adussana danddayiyoogee qoncce. Leemisuwawu, shaaramuxiyoogaappenne nuna tunissiyaabatuppe haakkanaadan Geeshsha Maxaafay yootiyo zoriyaa oosuwan peeshshoos. Hegaa gishshawu, Xoossay dosennabaa oottiya asaa deꞌoy moorettanaadan oottiya geeshsha gidenna oosotuppenne qohiya meezetuppe naagettoos. (Oosuwaa 15:29; 2 Qoronttoosa 7:1) Xoossaa Qaalay nuna naagiyo gishshawu keehi galatoos!

18. Yihooway nuna ayyaanaaban waati naagii?

¹⁸ Ubbaappe aaruwan, Yihooway ayyaanaaban naagees. Nu siiqo Xoossay nuuni paaciyaa genccanawunne aara dabbotido dabbotaa naaganawu koshshiyaabaa nuuyyo immiyoogan ayyaanaabaa qohuwaappe nuna naagees. Hegaa gishshawu, Yihooway nu deꞌuwaa amarida qantta wode xallawu gidennan, merinawu naagees. Nuna ayyaanaaban naaganawu Xoossay giigissido amaridabata ane beꞌoos.

19. Nuna gakkiya paace ubbaa nuuni genccanaadan Yihoowa ayyaanay waati maaddana danddayii?

 ¹⁹ Yihooway ‘woosaa siyiyaagaa.’ (Mazamure 65:2) Unꞌꞌissiyaabay nu deꞌuwan gakkiyo wode, nuna qofissiyaabaa ayyo woosan yootiyoogee nuuni keehi woppu gaanaadan oottana danddayees. (Piliphphisiyuusa 4:6, 7) I nu paaciyaa maalaalissiyaabaa oottidi xayssana xayikkonne, nu wozanappe woossido woosaa siyiyoogan paaciyaa genccanawu nuuyyo aadhdhida eratettaa immana danddayees. (Yaaqooba 1:5, 6) Hegaappekka aaruwan, Yihooway bana woossiyaageetuyyo ba geeshsha ayyaanaa immees. (Luqaasa 11:13) He wolqqaama ayyaanay nuna gakkiya paace ubbaa woy meto ubbaa nuuni genccanaadan maaddana danddayees. Yihooway mata wode ehaana ooratta alamiyan meto ubbaa xayssana gakkanaassi nuuni genccanawu geeshsha ayyaanay nuussi ‘ubbaappe aadhdhiya wolqqaa’ immana danddayees.—2 Qoronttoosa 4:7.

20. Yihooway naaganawu goꞌettiyo wolqqay nu mala Kiristtaanetu baggaara waani qonccana danddayii?

²⁰ Yihooway naaganawu goꞌettiyo wolqqay nu mala Kiristtaanetu baggaara issi issitoo qonccana danddayees. Yihooway ba asay kumetta saꞌan deꞌiya ‘ishanttu’ maabaraa yame gidanaadan oottiis. (1 PHeexiroosa 2:17; Yohaannisa 6:44) Ishanttu maabaraa giddon deꞌiya siiqoy asay loꞌꞌobaa oottanaadan  denttettiyo wolqqay Xoossaa geeshsha ayyaanawu deꞌiyoogaa bessiyaaba. He ayyaanay nuuni siiquwaa, kehatettaanne loꞌꞌotettaa mala loꞌꞌo eeshshati deꞌiyoogeeta gidanaadan maaddees. (Galaatiyaa 5:22, 23) Yaatiyo gishshawu, nuuni unꞌꞌettiyo wode nu mala Kiristtaanee maaddiya zoriyaa zorikko woy minttettiyaabaa haasayikko, he uraa baggaara nuna maaddido gishshawu Yihoowa galatana danddayoos.

21. (a) Yihooway koshshiya wodiyan ‘ammanettida wozannaama ashkkaraa’ baggaara immiyo ayyaanaa qumay aybee? (b) Yihooway nuna ayyaanaaban naaganawu giigissidobaappe neeni waana goꞌettadii?

²¹ Yihooway nuna naaganawu harabaakka giigissiis; hegeekka koshshiyo wodiyan immiyo ayyaanaa qumaa. Nuuni A Qaalaappe maaduwaa demmanaadan, ‘ammanettida wozannaama ashkkaray’ ayyaanaa qumaa giigissana mala Yihooway sunttiis. He wozannaama ashkkaray “qumaa koshshiyo wodiyan” immanawu Wochchiyo Keelaanne Beegottite maxeeteta gujjin hara attamettida xuufeta, qassi gubaaꞌiyaa shiiqotanne gita shiiqota goꞌettees. (Maatiyoosa 24:45) Gubaaꞌiyaa shiiquwan harati zaariyo wode, haasayaa shiishshiyo wode, woy qassi woossiyo wode neessi koshshiya minttettuwaa demma eray? Nu maxeetetuppe issuwan kiyida huuphe yohoy deꞌuwan nena maaddidee? Nuna ayyaanaaban naaganawu Yihooway he ubbabaa giigissiyoogaa hassaya.

22. Yihooway ba wolqqaa ubbatoo ayba ogiyan goꞌettii, qassi I hegaadan oottiyoogee nuna maaddiyaaba gidiyoy aybissee?

²² Yihooway tumukka ‘akko baqatiya ubbatussi gonddalle.’ (Mazamure 18:30) Yihooway nuna ha wodiyan meto ubbaappe naaganawu ba wolqqaa goꞌettennaagaa nuuni eroos. Gidikkonne, naaganawu I goꞌettiyo ba wolqqaa ba halchchuwaa polanawu muletoo goꞌettees. I hegaadan oottiyoogee guyyeppe A asaa keehi maaddees. Nuuni akko shiiqikkonne A siiquwan deꞌikko, wottiyoobi baynna merinaa deꞌuwaa Yihooway nuussi immana. Hegaa qoppiyo wode, ha alamiyan nuna gakkiya ubbabaa ‘haꞌꞌissawu gakkiya guutta waayedan’ xeellana danddayoos.—2 Qoronttoosa 4:17.