1. Amarida tumu Kiristtaaneta gujjin, daroti yibbaatidi waati qoppiyoonaa?

 NENA Xoossaa Yihooway siiqii? Issooti issooti Yohaannisa 3:16y yootiyoogaadan Xoossay asaa siiqiyoogaa maayoosona. SHin eti, ‘Xoossay tana mule siiqana danddayenna’ giidi qoppoosona. Tumu Kiristtaanetikka hegaara gayttidaagan issi issitoo sirana danddayoosona. Hidootaa qanxxida issi bitanee hagaadan giis: “Xoossay tabaa guuttaakkonne qoppiyoogaa ammananawu metootaas.” Neenikka issi issitoo hegaadan siray?

2, 3. Yihooway nuna siiqenna woy alꞌꞌobadan xeellenna giidi nuuni qoppanaadan koyiyay oonee, qassi he qofaa nuuni waati eqettana danddayiyoo?

² Xoossaa Yihooway nuna siiqenna woy alꞌꞌobadan xeellenna giidi nuuni qoppanaadan Seexaanay keehi koyees. Darotoo Seexaanay otorettiya asay dosiyooban eta cimmiyoogee tuma. (2 Qoronttoosa 11:3) SHin eesuwan qohettiyaageeti banttana toochchanaadan oottiyoogankka I ufayttees. (Yohaannisa 7:47-49; 8:13, 44) Ha wayssiya ‘wurssetta gallassatun’ Seexaanay hegaadan oottees. Ha wodiyan daroti ‘siiqoy baynna’ keettan diccoosona. Harati qassi kehennaageetuura, bantta xallaa siiqiyaageetuuranne bantta qofaa mule laammennaageetuura ubbatoo gayttoosona. (2 Ximootiyoosa 3:1-5) Hegaa mala asata harati daro layttawu naaqqido gishshawunne zariyan woy hara gaasuwan ixxido gishshawu, eti banttana pattenna asadan woy ooninne siiqenna asadan xeelloosona.

³ Neeni hegaadan qoppiyoogaa akeekikko, hidootaa qanxxoppa. Nuuppe daroti issi issitoo bessennaban nu bolli pirddoos. SHin Xoossaa Qaalay ‘mooruwaa suurissanawu’ giigidoogaa  hassaya. (2 Ximootiyoosa 3:16) Geeshsha Maxaafay hagaadan gees: “Nu wozanai nu bolli pirddiyo wode ubban, Xoossaa sinttan tumatettaa nuna . . . erissees. Aissi giikko, Xoossai nu wozanaappe gita; qassi i ubbabaa erees.” (1 Yohaannisa 3:19, 20) Yihooway nuna siiqiyoogaa ‘nu eranaadan’ Geeshsha Maxaafay maaddiyo oyddu ogeta ane beꞌoos.

4, 5. Yesuusi siine kafotubaa yootido leemisoy nuuni Yihoowa sinttan alꞌꞌo gidiyoogaa waati qonccissii?

⁴ Koyruwan, Xoossay ba ashkkarata ubbaa alꞌꞌobadan xeelliyoogaa Geeshsha Maxaafay tamaarissees. Leemisuwawu, Yesuusi hagaadan giis: “Naa77u siine kafoti bakkannan baizettokkonaayye? Intte Aawai gaana xayikko, he siine kafotuppe issinniyaakka sa7an wodhdhukku. SHin harai atto, intte huuphiyan de7iya binnaana ubbaikka qoodan de7ees. Simmi yayyoppite; daro siine kafotuppe intte aadhdheeta.” (Maatiyoosa 10:29-31) Yesuusi yootiyoobaa koyro xeetu layttan ezggiyaageetuyyo hegee ay qonccissiyaakko qoppa.

⁵ Nuuni, ‘Issi uri siine kafuwaa ayssi shammii?’ giidi qoppana danddayoos. Yesuusa wode asay miyo, bayzettiya kafo ubbaappe keehi hiraysoy siine kafo. Issi uri waagay guutta gidido issi santtimiyan naaꞌꞌu siine kafota shammiyoogaa akeeka. SHin issi uri naaꞌꞌu santtimiyan oyddaa gidennan, ichchashu siine kafota shammiyoogaa Yesuusi guyyeppe yootiis. Issi kafoy waaga kessennabadan yessaa immiyooba. He meretata geelladan asay pattennabadan xeellikkonne, Medhdhidaagee eta waati xeellii? Yesuusi hagaadan giis: “Etappe issinnonne [yessaa imettidaarokka] Xoossai dogenna.” (Luqaasa 12:6, 7) Yesuusi yootidobaa haꞌꞌi akeekana danddayoos. Yihooway issi siine kafuwaa alꞌꞌobadan xeellikko, issi asa hegaappe keehi alꞌꞌobadan xeellees! Yesuusi yootidoogaadan, Yihooway nubaa ubbabaa erees. Haray atto, nu huuphiyaa binnaanaykka ubbay qoodettiis!

6. Yesuusi nu huuphiyaa binnaanay qoodettidoogaa yootidoogee hanennabaa gidennaagaa nu ammanettiyoy aybissee?

⁶ Amaridaageeti Yesuusi nu huuphiyaa binnaanay qoodettiis  giidoogaa hanennaba giidi qoppana danddayoosona. SHin dendduwaa hidootaabaa ane qoppa. Nuna zaaretti medhdhanawu Yihooway nuna loytti eriyoogee qoncce! Nuuni nu deꞌo laytta ubban hassayiyoobaanne meezetidobaa gujjin, nu hanota ubbaa I hassayiyo gishshawu nuna alꞌꞌobadan xeellees. a Hegaara geeddarssiyo wode, asaa huuphiyan deꞌiya 100,000 gidiya binnaanaa qoodiyoogee metennaba.

7, 8. (a) Yihooway asaa wozanaa qoridi demmiyo wode I ufayttiyo amarida eeshshati aybee? (b) Nuuni oottiyoobatuppe Yihooway nashshiyo amaridabati aybee?

⁷ Naaꞌꞌanttuwan, Yihooway ba ashkkaratuban ay nashshiyaakko Geeshsha Maxaafay yootees. I nu loꞌꞌo eeshshatuuninne nuuni minni oottiyooban ufayttees. Kawuwaa Daawiti ba naꞌawu Solomonawu hagaadan giis: “GODAI wozanaa ubbaa qorees; qofan de7iya halchchuwaa ubbaakka erees.” (1 Hanidabaa Odiya 28:9) Danoynne ixoy kumido ha alamiyan Xoossay biilooniyan qoodettiya asaa wozanaa qoridi sarotettaa, tumaanne xillotettaa siiqiya wozanaa demmiyo wode keehi ufayttiyoogee qoncce! Xoossay wozanappe A siiqiyaageeta, qassi abaa tamaaranawunne he eridobaa haratuyyo yootanawu koyiyaageeta demmiyo wode waatii? Yihooway babaa haratuyyo yootiyaageeta wudidi xeelliyoogaa yootiis. Yihooway ‘baassi yayyiyaageetanne ba sunttaa bonchchiyaageeta hassayiyo maxaafaykka’ awu deꞌees. (Milkkiyaasa 3:16) He eeshshata I keehi nashshees.

⁸ Yihooway nashshiyo amarida loꞌꞌo oosoti aybee? A Naꞌaa Yesuus  Kiristtoosa milatanawu nuuni baaxetiyoogaa I nashshiyoogee qoncce. (1 PHeexiroosa 2:21) A Kawotettaa mishiraachchuwaa yootiyoogee Xoossay nashshiyo keehi koshshiya ooso. Roome 10:15y hagaadan gees: “Ufaissiya mishiraachchuwaa yootiyaageetu tohoti aiba lo77iyoonaa!” Nuuni nu tohoy ‘loꞌꞌees’ giidi qoppennan aggana danddayoos. SHin ha xiqisiyan tohoy Yihoowa ashkkarati mishiraachchuwaa sabbakanawu oottiyoobaa qonccissees. Hegaadan oottiyo ubbabay A sinttan loꞌꞌeesinne hegaa I nashshees.—Maatiyoosa 24:14; 28:19, 20.

9, 10. (a) Nuna gakkiya dumma dumma metota nuuni gencciyo wode Yihooway nashshiyoogaa ammanettana danddayiyoy aybissee? (b) Yihooway ammanettidi bawu oottiyaageeta xeelliyaagan mule qoppenna iitabay aybee?

⁹ Nu genccaakka Yihooway nashshees. (Maatiyoosa 24:13) Seexaanay neeni Yihoowawu zokkuwaa zaaranaadan koyiyoogaa hassaya. Neeni ubba galla Yihoowawu ammanettada deꞌiyoogan Seexaanay boriyoobaa I zaaranaadan maaddaasa. (Leemiso 27:11) Gencciyoogee issi issitoo wayssiyaaba gidana danddayees. Sahoy, miishshaa metoy, unꞌꞌettiyoogeenne hara  metoti nuuni galla galla waayettanaadan oottana danddayoosona. Koyiyoobay polettennan gamꞌꞌiyoogee hidootaa qanxxanaadan oottana danddayees. (Leemiso 13:12) He metoti ubbay gakkishin gencciyoogaa Yihooway keehi nashshees. Kawuwaa Daawiti ba afuttaa Yihooway ogoruwan dagayanaadan oychchidoy hegaassa; I ammanettidi hagaadankka giis: “Eti ne mazggafan de7okkonaa?” (Mazamure 56:8) Nuuni Yihoowayyo ammanettidi deꞌiyo wode afuxxiyo afuttaanne gencciyo meto ubbaa I nashshiyoogeenne hassayiyoogee qoncce. Hegeetakka I nashshees.

¹⁰ Nu bolli pirddiya wozanay nuuni Xoossaa sinttan alꞌꞌo gidiyoogaa bessiya hegaa malabaa eqettana danddayees. Wozanay ubbatoo hagaadan gaana danddayees: ‘SHin leemiso gidiyoogan taappe aadhdhiya daroti deꞌoosona. Yihooway tana etaara geeddarssiyo wode ufayttennaagee qoncce.’ Yihooway issi ura hara uraara geeddarssenna; qassi I qohiyaabaa qoppenna woy ba qofaa laammennaagaa gidenna. (Galaatiyaa 6:4) I nu wozanan deꞌiyaabaa aybanne ashshennan geeshshidi erees; qassi nu wozanan deꞌiya loꞌꞌobay keehi guutta gidikkonne, I nashshees.

11. Abiiyaara gayttidaagan Yihooway oottidobaappe nuuni abaa ay tamaarana danddayiyoo?

¹¹ Heezzanttuwan, Yihooway nuna qoriyo wode loꞌꞌobaa demmanawu loyttidi harqqees. Leemisuwawu, kaddida Kawuwaa Iyorbbaama so asaa muleera xayssanawu Yihooway kuuyido wode, kawuwaa naatuppe issoy Abiiyi duufuwan moogettanaadan I azaziis. Aybissi? ‘Israaꞌeela Xoossaa Yihoowa sinttan ha naꞌan loꞌꞌobay beettido gishshataassa.’ (1 Kawotu Maxaafaa 14:1, 10-13) Yihooway ha yelagaa wozanaa harqqidi ‘loꞌꞌobaa’ demmiis giyoogaa mala. Yihooway demmido loꞌꞌobay keehi guutta gidikkonne, hegaa I nashshiyo gishshawu ba Qaalan xaafettanaadan oottiis. Qassi kaddida keettaa asaa yara gidida he naꞌaa bessiyaagaa keenaa maariyoogan Yihooway woytiis.

12, 13. (a) Nuuni nagaraa oottiyo wodekka Yihooway nunan loꞌꞌobaa koyiyoogaa Kawuwaa Yoosaafixa hanotay waati bessii? (b) Yihooway nuuni oottido loꞌꞌo oosotanne nu loꞌꞌo eeshshata xeelliyaagan siiqiya Aawadan waatii?

 ¹² Loꞌꞌo Kawuwaa Yoosaafixabay hegaappekka aadhdhiya loꞌꞌo leemiso. Yihooway kiittin hananabaa yootiyaagee kawoy eeyyabaa oottido wode ayyo hagaadan giis: “Hegaa gishshau, GODAA hanqqoi ne bolli yiis.” Hegee keehi daganttiyaaba! SHin Yihooway yootidobay hegaa xalla gidenna. Hagaadankka giis: “Gidikkonne, . . . neeni lo77obaa oottadasa.” (2 Hanidabaa Odiya 19:1-3) Hegaa gishshawu, Yihoowa xillo hanqqoy I Yoosaafixan loꞌꞌobaa beꞌennaadan diggibeenna. Nagaranchcha asaagaappe hegee keehi dummatees! Harati hanqqetissiyo wode, eta loꞌꞌobay nuuyyo beettennan aggana danddayees. Qassi nuuni nagaraa oottiyo wode, hidootaa qanxxana, yeellatananne nuna mooranchchadan xeellana danddayiyo gishshawu nubaa loꞌꞌobaa waayi beꞌana. SHin, nuuni nu nagaraappe simmidi hegaa zaarettidi oottennan agganawu minni baaxetikko, Yihooway nuuyyo atto giyoogaa hassaya.

¹³ Worqqaa bookkiyaagee maaddennabaa diggiichchidi worqqaa ashshiyoogaadan,  Yihooway nena qoriyo wode hegaa mala nagaraa diggees. Ne loꞌꞌo eeshshatanne ne oottiyo loꞌꞌo oosota shin? Hegeeta I “worqqaadan” minjjees. Siiqiya aawaynne aayyiyaa bantta naati medhdhido misileta woy timirttiyaa tamaariyo wode oottidobata naati dogi simmin, issi issitoo daro wodiyawu alꞌꞌobadan minjjiyoogaa neeni beꞌa eray? Yihooway ooppenne aaruwan siiqiya Aawa. Nuuni awu ammanettidi deꞌiyaaba gidikko, nuuni oottido loꞌꞌo oosotanne nu loꞌꞌo eeshshata I mule dogenna. Hegeeta dogiyoogaa I suure gidennabadan xeellees, qassi suure gidennabaa I mule oottenna. (Ibraawe 6:10) I nuna hara ogiyankka harqqees.

14, 15. (a) Nuuni nagaranchcha gidiyoogee Yihooway nunan loꞌꞌobaa beꞌennaadan diggennay aybissee? Leemisuwaa yoota. (b) Yihooway nunan demmiyo loꞌꞌo eeshshata waatii, qassi ammanettida ba asaa I aybidan xeellii?

¹⁴ Yihooway nu nagaraa gidennan nu oottana danddayiyoobaa xeellees. Leemisuwawu, misile malabaa dosiya asati keehi moorettida misileta woy harabata zaarettidi giigissanawu keehi baaxetoosona. Inggilizen Londdene kataman misiliyaanne hegaa malabaa wottiyo keettan deꞌiya, Liyonardo da Vinchi medhdhido, 30 miiloone Amarkkaa doolaare kessiya misiliyaa issi uri zayiyaa tokkosidi moorin, hegee moorettido gishshawu oli bayana koshshees giida uri baawa. Ichchashu xeeta gidiya layttaa gamꞌꞌida keehi loꞌꞌiya he misiliyaa zaaretti giigissiyoogaa sohuwaara doommidosona. Aybissi? Misiliyaa dosiyaageeti hegaa keehi nashshiyo gishshataassa. CHookiyaaninne kasaliyan medhdhido misiliyaappe neeni keehi aadhdhikkii? Neeni laattido nagaran ay keena qohettikkonne, Xoossay nena nashshees. (Mazamure 72:12-14) Asa ubbaa medhdhida Xoossay Yihooway, I siiquwan etassi oottidobaa nashshiya ubbata wottiyoobi baynna asa kessanawu koshshiya ubbabaa oottana.—Oosuwaa 3:21; Roome 8:20-22.

¹⁵ Geella nuuni beꞌenna loꞌꞌobaa Yihooway nunan beꞌiyoogee qoncce. Qassi nuuni awu haggaaziyo wode, sinttappe wottiyoobi baynna asa gidana gakkanaashin, I he loꞌꞌobay diccanaadan oottees. Seexaanaa alamee nu bolli ay qoho gattikkonne,  Yihooway baayyo ammanettidi oottiyaageeta aqodan woy alꞌꞌobadan xeellees.—Hagga 2:7.

16. Yihooway nuna siiqiyoogaa bessiya ubbabaappe aadhdhiyaabay aybee, qassi he imotay nuussi huuphiyan huuphiyan imettidoogaa aybin eriyoo?

¹⁶ Oyddanttuwan, Yihooway nuna siiqiyoogaa bessanawu darobaa oottees. Nuna pattenna asa woy oonne siiqenna asa giidi Seexaanay worddotiyoobawu Kiristtoosa wozo yarshshoy aybippenne aadhdhiya zaaro gidiyoogee qoncce. Yesuusi mittaa bolli iita hayqo hayqqiyo wode keehi waayettiis. Qassi Yihooway ba siiqiyo Naꞌay hayqqiyoogaa beꞌiiddi genccido wode hegaappe aadhdhiya waayiyaa waayettiis. Hegee eti nuna siiqiyoogaa bessiyaaba gidiyoogaa nuuni mule dogana koshshenna. Daro asay he imotay banttassi huuphiyan huuphiyan imettidoogaa ammananawu metootiyoogee azzanttiyaaba. Eti hegee banttawu bessennabadan qoppoosona. Gidoppe attin, kase kiitettida PHawuloosi Kiristtoosa kaalliyaageeta yedettiyaagaa gidiyoogaa hassaya. SHin I hagaadan giis: ‘Xoossaa Naꞌay tana siiqidi, ta gishshawu ba huuphiyaa immiis.’—Galaatiyaa 1:13; 2:20.

17. Yihooway nuna baakkonne ba Naꞌaakko waati shiishshii?

¹⁷ Yihooway nuuni huuphiyan huuphiyan Kiristtoosa yarshshuwaappe goꞌettanaadan maaddiyoogan nuna siiqiyoogaa bessees. Yesuusi hagaadan giis: “Tana kiittida ta Aawai taakko ehiido asappe attin, taakko yaanau danddayiya asi baawa.” (Yohaannisa 6:44) Ee, Yihooway nuna huuphiyan huuphiyan ba Naꞌaakko shiishsheesinne nuussi merinaa deꞌuwaa hidootay deꞌanaadan oottees. Waatidi? Nuuni mishiraachchoy sabbakettin huuphiyan huuphiyan siyanaadan oottiyoogaaninne nagaranchcha gidikkonne, ayyaanaabaa tumaa akeekanaadaaninne oosuwan peeshshanaadan ba geeshsha ayyaanan maaddiyoogan, Yihooway hegaadan shiishshees. Hegaa gishshawu, Yihooway Israaꞌeelatussi, “Taani inttena merinaa siiquwan siiqais; ta aggenna siiquwan taani inttena taakko shiishshaas” giidoogaadan, nuussikka gaana danddayees.—Ermmaasa 31:3.

18, 19. (a) Yihooway nuna siiqiyoogaa bessiya aybippenne aadhdhiya ogee aybee, qassi I ba huuphe hegaa kaalliyoogaa bessiyay aybee? (b) Yihooway nu woosaa siyiyo wode nuuyyo siyettiyaabaa akeekiyaagaa gidiyoogaa A Qaalay waati qonccissii?

 ¹⁸ Yihooway nuna siiqiyoogaa bessiya aybippenne aadhdhiya ogee woosaa maataa gidennan waayi aggana. Nuuni ubbay ‘ubba wode Xoossaa woossanaadan’ Geeshsha Maxaafay yootees. (1 Tasalonqqe 5:17) Xoossay nu woosaa siyees. Qassi I ‘woosaa siyiyaagaa’ geetettiis. I he maataa oossinne, haray atto ba Naꞌaassikka immibeenna. (Mazamure 65:2) Ane hagaa qoppa: Ubbabaa Medhdhidaagee nuuni laꞌatettan akko woossanaadan nuna minttettees. Siyiyoogan I ay malee? Qarettennaagee, shenehoo giyaagee, qoppennaagee? Mulekka gidenna.

¹⁹ Yihooway nuuyyo siyettiyaabaa akeekees. A asaa Israaꞌeelatu waayiyaa I beꞌido wode ayyo siyettidabaappe hegaa akeekana danddayoos. Geeshsha Maxaafay hagaadan gees: “Eta [waaye] ubban i waayettiis.” (Isiyaasa 63:9) Yihooway ba asaa waayiyaa beꞌiyoogaa xalla gidennan, I etawu qarettiis. Yihooway ba ashkkaratuyyo keehi qoppiyoogaa hagaadan giidi qonccissiis: “Inttena bochchiyaagee ta aifiyaa buluwaa bochchees.” b (Zakkaariyaasa 2:8) Hegee keehi seelliyaaba! Ee, Yihooway nuussi qoppees. Nuuni qohettiyo wode ikka azzanees.

20. Nuuni Roome 12:3n deꞌiya zoriyaa azazettanawu koyikko, qoppana koshshenna iita qofay aybee?

²⁰ Yuushshi qoppiya Kiristtaanee Xoossaa siiquwaa bessiya he hanotaa gaasoyidi otorettenna woy bana xoqqissenna. Kiitettida PHawuloosi hagaadan giis: “Xoossai tau immido aaro kehatettan taani intteyyo yootais; intte qoppanau bessiyaagaappe aattidi, otoruwan qoppoppite; hegaa aggidi, wozannaama asadan qoppite; Xoossai intteyyo huuphiyan huuphiyan immido ammanuwaa keenan intte bolli pirddite.”  (Roome 12:3) Yaatiyo gishshawu, saluwan deꞌiya nu Aaway siiqiyoogee nuna ufayssikkonne, nuuni wozannaama asadan qoppidi, Xoossaa siiqoy bessiyoogeeta gidennaagaa hassayoos.—Luqaasa 17:10.

21. Nuuni ubbatoo eqettana bessiyo, Seexaanay yootiyo worddobay aybee, qassi nu wozanan wottana danddayiyo Geeshsha Maxaafaa tumay aybee?

²¹ Nuna pattenna asa woy oonne siiqenna asa giyo wordduwaa gujjin, Seexaanaa worddo ubbaa eqettanawu, ubbaykka nuuyyo danddayettida ubbabaa oottoos. Ne deꞌuwan gakkidabay Xoossaa gita siiqoy neeyyo bessenna metiya asadan, woy ne loꞌꞌo oosoti ubbabaa beꞌiya A ayfiyan maaddennabadan, woy qassi ne nagaraa A alꞌꞌo Naꞌaa hayqoy xayssana danddayiyoogaappe dariyaabadan neeni xeellanaadan oottikko, hegee worddoba. Hegaa mala worddo ubbaa ne kumetta wozanaappe eqetta! PHawuloosi ayyaanay denttettin yootido tumaa ubbatoo nu wozanan wottoos. I hagaadan giis: “Haiqo gidin, de7o gidin, kiitanchchata gidin, haariyaageeta gidin, ha77i de7iyaagaa gidin, sinttappe yaanaagaa gidin, wolqqaamata gidin, bolla saluwaa gidin, garssa sa7aa gidin, ai mereta gidinkka, Kiristtoos Yesuusan de7iya Xoossaa siiquwaappe nuna shaakkanau danddayennaagaa taani eraas.”—Roome 8:38, 39.