1-3. (a) Yelidaageeti bantta yiira naˈaara gayttiyo hanotaappe asaa meretaabaa nuuni ay tamaarana danddayiyoo? (b) Issi uri nuna siiqiyo wode nuuni waatiyoo, qassi nuuni nuna oychchana danddayiyo keehi koshshiya oyshay aybee?

BIRON yelettida bantta naˈi noocu giyoogaa beˈiyoogan yelidaageeti ufayttoosona. Eti bantta sinttaa yiira naˈaa sinttaakko shiishshidi muxuxiiddi noocu giidi kaassoosona. Eti bantta naˈay haniyoobaa beˈanawu yeemottoosona. Qassi guuttaa takkidi he naˈaa gacoy qiibaa geli ekkees, menttershshay qaaxxees, yaatidi naˈay noocu gees. He guutta naˈay noocu giyoogee yelidaageeti A siiqiyo gishshawu ikka eta koyro siiqiyoogaa bessiyaaba.

² He guutta naˈay noocu giyoogee asaa meretaabaa keehi koshshiyaabaa nuna hassayissees. Nuuni siiqiya uraa siiqiyoogee wottin deˈiyaaba. Nuuni merettidoy hegaadaana. (Mazamure 22:9) Nuuni dicciyo wode, nuna siiqiya uraa waati loytti siiqanaakko akeekoos. Nena yelidaageeti, dabboti, woy laggeti nena ay keena siiqidaakko neeni hassayennan waaya aggana. Siiqoy ne wozanan xaphuwaa yeddees, diccees, qassi nena oosuwawu denttettees. Neenikka he uraa siiqaasa. Neeni Xoossaa Yihoowaara dabbotido dabbotaykka hegaa malee?

³ Geeshsha Maxaafay hagaadan gees: “Xoossai koiro nuna siiqido gishshau, nuuni a siiqoos.” (1 Yohaannisa 4:19) Ha maxaafan shaaho 1⁠ppe 3 gakkanawu, siiqiyoogaa bessiya ogiyan Xoossaa Yihooway ba wolqqaa, ba suure pirddaanne ba aadhdhida eratettaa nena maaddanawu goˈettidoogaa hassayaasa. Qassi I neessinne asa ubbawu ba siiquwaa maalaalissiya ogetun waati qonccissidaakko shaaho 4n beˈadasa. Haˈˈi issi oyshay denddees. Neeni keehi koshshiya ha oyshaa nena oychchana  danddayaasa: ‘Yihooway siiqido gishshawu taani waatana koshshii?’

4. Xoossaa siiqiyoogaa giyoogee woygiyoogaakko asay akeekanawu metootidoy ayba ogiyaanee?

⁴ Siiquwawu Pultto gidida Yihooway, siiqoy haratussi deˈiya keehi loˈˈo eeshshata qonccissanawu wolqqay deˈiyoogaa loytti erees. Ammanettenna asay ubbatoo makkalikkonne, I eta siiqidoogaadan amarida asati A siiqanaagaa ammanettees. Qassi daroti hegaadan oottidoogee qoncce. SHin, ha moorettida alamiyan deˈiya haymaanooteti Xoossaa siiqiyoogaa giyoogee woygiyoogaakko asay akeekanawu metootanaadan oottidoogee azzanttiyaaba. Zawi baynna asay Xoossaa siiqiyoogaa yootikkonne, he siiqoy wozanappe gidennan haasaya xallan qoncciyaaba etawu milatees. Guutta naˈay koyro heeran noocu giidi bana yelidaageetussi siiquwaa qonccissana danddayiyoogaadan, Xoossaa siiqiyoogeekka hegaadan doommana danddayees. SHin, siiqiyoogaa gastta asay bessiyoy hegaa xallaana gidenna.

5. Xoossaa siiqiyoogee woygiyoogaakko Geeshsha Maxaafay waati qonccissii, qassi hegaadan qonccissidoogee nuna ufayssana koshshiyoy aybissee?

⁵ Yihooway asay A siiqiyoogaa giyoogee woygiyoogaakko qonccissiis. A Qaalay hagaadan gees: “Nuuni Xoossaa siiqiyoogee a azazuwaa naagiyoogaa.” Yaatiyo gishshawu, Xoossaa siiqiyoogee oosuwan qonccana koshshees. Azazettiyoogaa giyo qofaa daroti dosennaagee tuma. SHin ha xiqisee gujjidikka hagaadan gees: “[Xoossaa] azazoikka deexo gidenna.” (1 Yohaannisa 5:3) Yihoowa higgetinne I kessido maarati nuna maaddoosonappe attin, huqqunokkona. (Isiyaasa 48:17, 18) Nuuni Xoossaakko shiiqanaadan maaddiya daro maarati A Qaalan deˈoosona. Waatidi maaddiyoonaa? Nuuni Xoossaara dabbotido dabbotaa xeelliyaagan heezzu macarata ane zaarettoos. Hegeeti Yihoowaara haasayiyoogaa, ayyo goynniyoogaanne A milatiyoogaa.

6-8. (a) Yihooway haasayiyo wode nuuni waati siyana danddayiyoo? (b) Nuuni Geeshsha Maxaafan nabbabiyoobay nuussi qoncci beettanaadan waatana danddayiyoo?

⁶ SHemppo 1y, “Xoossaara haasayiyoogaabaa neeni qoppa eray?” giya oyshan doommiis. Hagee coo qoppiyooba xalla gidennaagaa nuuni akeekida. Muusee Xoossaara haasayiis. Nuuni shin? Ha wodee Yihooway ba asaara haasayanawu ba kiitanchchata kiittiyo wode gidenna. Gidoppe attin, ha wodiyan Yihooway nunaara haasayiyo keehi maalaalissiya ogee deˈees. Yihooway haasayiyo wode nuuni waati siyana danddayiyoo?

⁷ “Xoossaa maxaafa ubban Xoossaa Ayyaanai” deˈiyo gishshawu, A Qaalaa Geeshsha Maxaafaa nabbabiyoogan Yihooway haasayiyoobaa siyoos. (2 Ximootiyoosa 3:16) Hegaa gishshawu, Yihoowa ashkkarati “gallassinne qammi” hegaa nabbabanaadan mazamuraawee zoriis. (Mazamure 1:1, 2) Nuuni yaatanawu nuussi danddayettida ubbabaa oottana koshshees. Qassi yaatanawu baaxetiyoogee bessiyaaba. Nuuni SHemppo 18n beˈidoogaadan, Geeshsha Maxaafay saluwan deˈiya nu Aawaappe yiida alˈˈo dabddaabbe mala. Yaatiyo gishshawu, A nabbabiyoogee nuuni meeziyan oottiyooba gidana koshshenna. Nuuni Geeshsha Maxaafan nabbabiyoobay nuuyyo qoncci beettana koshshees. Nuuni hegaadan waati oottana danddayiyoo?

⁸ Neeni nabbabiyo wode Geeshsha Maxaafaa taarikiyaa qoppa. Geeshsha Maxaafan etabay odettidoogeeta deˈuwan deˈiya asadan qoppanawu mala. Eta wogaa, eta hanotaanne eta koshshaa akeekanawu mala. Yaatada, ne nabbabiyoobaa loytta qoppada, nena hagaadan oychcha: ‘Ha taarikiyaappe Yihoowabaa taani ay tamaariyaanaa? A eeshshatuppe ha taarikiyan qoncciday awugee? Taani tamaaranaadan Yihooway koyido maaray awugee, qassi ha maaraa ta deˈuwan waata oosuwan peeshshana danddayiyaanaa?’ Neeni nabbabadanne wotta dentta qoppada, oosuwan peeshshiyo wode, Xoossaa Qaalay neessi keehi qonccees.—Mazamure 77:12; Yaaqooba 1:23-25.

9. ‘Ammanettida wozannaama ashkkaray’ oonee, qassi nuuni he ‘ashkkaray’ yootiyoobaa loytti ezggana koshshiyoy aybissee?

 ⁹ Yihooway ‘ammanettida wozannaama ashkkaraa’ baggaarakka nuna haasayissees. Yesuusi kasetidi yootidoogaadan, wayssiya ha wurssetta gallassatun ayyaanaabaa “qumaa koshshiyo wodiyan” giigissanaadan, ayyaanan tiyettida Kiristtaanetuppe amaridaageeti sunttettidosona. (Maatiyoosa 24:45-47) Nuuni Geeshsha Maxaafay yootiyo tumu eraa demmanawu maaddiya xuufeta nabbabiyo wode, qassi gubaaˈe shiiqotanne gita shiiqota shiiqiyo wode wozannaama ashkkaray giigissido ayyaanaabaa qumaa moos. I Kiristtoosa ashkkara gidiyo gishshawu, “intte siyiyo yohuwaa ezggidi siyite” yaagidi Yesuusi yootido zoriyaa nuuni oosuwan peeshshoos. (Luqaasa 8:18) Yihooway nuna haasayissiyo ogiyaappe issoy ammanettida ashkkaraa baggaara gidiyoogaa nuuni akeekiyo gishshawu, loytti ezggoos.

10-12. (a) Woosay Yihooway immido maalaalissiya imota gidiyoy aybissee? (b) Nuuni Yihoowa ufayssiya woosaa waati woossana danddayiyoo, qassi I nu woosaa xoqqu oottidi xeelliyoogaa nuuni ammanettana danddayiyoy aybissee?

¹⁰ Xoossaara haasayiyoogaabaa shin? Nuuni Yihoowaara haasayana danddayiyoo? Hegee keehi maalaalissiyaaba. Neeni ne heeran gita maatay deˈiyo issi uraa nena qofissidabaa haasayissanawu koyiyaakko, neeni aara gayttiyoogee danddayettiyaabee? Issi issi hanotan, hegaa malabaa oottanawu maliyoogee qohiyaaba gidana danddayees! Asttirinne Marddikiyoosa wode, kawoy xeegennan Parsse kawuwaakko geliya uri hayqqana danddayees. (Asttiro 4:10, 11) Ubbaa Haariya Godaara geeddarssiyo wode, keehi wolqqaama asaykka “gumbburo mala” gidiyoogaa qoppa. (Isiyaasa 40:22) Nuuni akko shiiqanawu yayyana koshshii? Aynne yayyana koshshenna!

¹¹ Nuuni ubbay A haasayissanaadan Yihooway nuussi woosaa maataa immiis. Issi guutta naˈaykka ammanettidi, Yesuusa sunttan Yihoowa woossana danddayees. (Yohaannisa 14:6; Ibraawe 11:6) Qassi, woosay nuuni nu wozanaa qofaanne nuuyyo siyettiyaabaa, ubba qassi yootanawu deexxiyaabaakka odanaadan nuna maaddees. (Roome 8:26) Yihooway nuna  nashshanaadan giidi nuuni mela biddidi woossiyoogee woy adussa woosaa woossiyoogee maaddenna. (Maatiyoosa 6:7, 8) SHin, nuuni Yihoowa ay keena adussa woosaa woossanaakko woy ay keena zaaretti zaarettidi woossanaakko I zawaa wottibeenna. Nuuni ‘ubba wode Xoossaa woossanaadan’ A Qaalay yootees.—1 Tasalonqqe 5:17.

¹² ‘Woosaa siyiyaagaa’ geetettiyay Yihoowa xalaala gidiyoogaanne I wozanappe qarettidi siyiyoogaa hassaya. (Mazamure 65:2) Ammanettida A ashkkarati woossiyo woosaa I coo danddayan siyii? CHii; I eta woosan ufayttees. Hegaa mala woosaa sawuwaa tonggu giiddi pude cuwattiya ixaanaa cuwaara A Qaalay geeddarssees. (Mazamure 141:2; Ajjuutaa 5:8; 8:4) Nuuni wozanappe woossiyo woosay ixaanadan pude biidi Ubbaa Haariya Godaa ufayssiyoogaa qoppiyoogee minttettiyaaba gidiyoogee tuma. Yaatiyo gishshawu, neeni Yihoowakko shiiqanawu koyikko, ubba galla nena ziqqi oottada zaara zaara A woossa. Nena qofissida ubbabaa ayyo aynne ashshennan yoota. (Mazamure 62:8) Nena qofissiyaabaa, ufayssiyaabaa, neeni galatanawunne sabbanawu koyiyoobaa saluwan deˈiya ne Aawawu yoota. Hegaappe denddidaagan, neeni aara dabbotido dabbotay kaseppe aaruwan minnana.

13, 14. Yihoowayyo goynniyoogaa giyoogee woygiyoogee, qassi nuuni yaatiyoogee bessiyaaba giyoy aybissee?

¹³ Nuuni Xoossaa Yihoowaara haasayiyoogee, nu laggiyaara woy dabbuwaara haasayiyoogaa mala gidenna. Yihoowayyo bessiyaagaadan A bonchchiyoogaaninne yayyiyoogan ayyo goynnoos. Tumu goynoy nu deˈo ubban qonccees. Hegee Yihoowa nu kumetta shemppuwaappe siiqiyoogaaninne an ammanettiyoogan qonccees; qassi tumu goynoy saluwan gidin woy saˈan Yihoowayyo ammanettiya meretatu ubbaa giddon issippetettay deˈanaadan oottees. Kiitettida Yohaannisi beˈido ajjuutan issi kiitanchchay ha azazuwaa awaajjishin siyiis: “Saluwaa, sa7aa, abbaanne haattaa pulttuwaa medhdhida Xoossaayyo goinnite.”—Ajjuutaa 14:7.

 ¹⁴ Nuuni Yihoowayyo goynnana koshshiyoy aybissee? Nuuni ha maxaafan xannaˈido eeshshatubaa qoppa; hegeetikka geeshshatettaa, wolqqaa, ba huuphiyaa naagiyoogaa, suure pirddaa, xalatettaa, maarotaa, aadhdhida eratettaa, bana ziqqi oottiyoogaa, siiquwaa, qaretaa, ammanettiyoogaanne loˈˈotettaa. Keehi loˈˈo eeshsha ubbawu aybippenne aadhdhiya leemisoy Yihoowa gidiyoogaa nuuni beˈida. Nuuni A eeshshata ubbaa eranawu baaxetikko, I ooppenne keehi aadhdhiyoogaa akeekoos. I bonchchuwaaninne gitatettan nuuppe keehi xoqqa. (Isiyaasa 55:9) Yihoowawu ubbabaa haariyo maatay deˈiyoogeenne nuuni ayyo goynnana bessiyoogee qoncce. Gidoppe attin, nuuni Yihoowayyo waati goynnana koshshii?

15. Nuuni Yihoowayyo “ayyaanaaninne tumatettan” waati goynnana danddayiyoo, qassi Kiristtaane shiiqoti nuuni waatanaadan maaddiyoonaa?

¹⁵ Yesuusi hagaadan giis: “Xoossai ayyaana; qassi au goinniyaageeti ayyaanaaninne tumatettan goinnanau bessees.”  (Yohaannisa 4:24) Nuuni Xoossaayyo ‘ayyaanan’ goynnanawu, Xoossay nuussi ba ayyaanaa immanaadan woossananne A kaaletuwaa kaallana koshshees. Qassi nuuni tumaara, hegeekka Xoossaa Qaalan deˈiya suure eraara maayettiya ogiyan goynnana koshshees. Nuuni nu mala Kiristtaanetuura shiiqiyo shiiqo ubbay Yihoowayyo “ayyaanaaninne tumatettan” goynniyo keehi injje wode. (Ibraawe 10:24, 25) Nuuni tumu goynuwan Yihoowa sabbanawu yexxiyo wode, issippe A woossiyo wode, A Qaalaa siyiyo wodenne tobbiyo wode A siiqiyoogaa bessoos.

16. Tumu Kiristtaanetussi imettida ubbaappe aadhdhiya azazotuppe issoy aybee, qassi nuuni hegaa azazettana koshshiyoy aybissee?

¹⁶ Nuuni abaa haratussi yootiyo wodekka Yihoowayyo goynnoos. (Ibraawe 13:15) Yihoowa Kawotettaabaa mishiraachchuwaa sabbakiyoogee tumu Kiristtaanetussi imettida ubbaappe aadhdhiya azazotuppe issuwaa gidiyoogee tuma. (Maatiyoosa 24:14) Nuuni Yihoowa siiqiyo gishshawu he azazuwaa azazettanawu yeemottoos. “Ha sa7aa Xoossai” Seexaanaa Dabloosi Yihoowabaa bulla wordduwaa yootiyoogan ‘ammanenna asatu qofaa jallissidoogaa’ nuuni qoppiyo wode, nu Xoossaa sunttay moorettidaagee geeyana mala abaa haratussi markkattanawu yeemottokkoo? (2 Qoronttoosa 4:4; Isiyaasa 43:10-12) Qassi maalaalissiya Yihoowa eeshshatubaa qoppiyo wode, nuuni abaa haratussi yootanawu keehi koyokkoo? Harati saluwan deˈiya nu Aawaa nuugaadan eranaadaaninne siiqanaadan maaddiyoogaappe aadhdhiya maati baynnaagee tuma.

17. Nuuni Yihoowawu goynniyoogee ay ay gujjii, qassi nuuni ayyo suuretettan goynnana koshshiyoy aybissee?

¹⁷ Nuuni Yihoowayyo goynnanawu harabaakka oottana koshshees. Hegee nu deˈo macara ubbaara gayttidaba. (Qolasiyaasa 3:23) Yihooway Ubbaa Haariya Godaa gidiyoogaa akeekikko, nu soo deˈuwaa, nu oosuwaa, nuuni harata oyqqiyo ogiyaanne nuuni wodiyaa aattiyoobaa gujjin, ubbaban A sheniyaa polanawu koyoos. Nuuni “kumetta wozanaaninne” suuretettan Yihoowayyo haggaazanawu koyoos. (1 Hanidabaa Odiya 28:9) Hegaadan goynniyoogee wozanay shaahettennaadan woy naaˈˈu qommo deˈo deˈennaadan, hegeekka Yihoowayyo haggaaziyaaba  milatiiddi geeman gita nagaraa oottiyoogan cimmiyaageeta gidennaadan teqqees. Suure gidiyoogee cimmiya ura gidennaadan oottees; siiqoy qassi cimmiyoogaa ixxanaadan oottees. Xoossaa bonchchiyoogeekka maaddana. Hegaadan bonchchiyoogaa Geeshsha Maxaafay Yihoowawu ubbatoo mata dabbo gididi deˈiyoogaara gattidi qonccissees; hegee naaˈˈu mata laggetu giddon deˈiya dabbotaa mala.—Mazamure 25:14.

18, 19. Nagaranchcha asay Xoossaa Yihoowa milatana danddayees giidi qoppiyoogee bessiyaaba gidiyoy aybissee?

¹⁸ Ha maxaafaa ubba shaahotun wurssetta shemppoy ‘Xoossay siiqiyo naatudan, A waati milatanaakko’ qonccissiyoogan kuuyees. (Efisoona 5:1) Nuuni nagaranchcha gidikkonne, Yihooway wottiyoobi baynna ogiyan wolqqaa, suure pirddaa, aadhdhida eratettaanne siiquwaa bessido ogiyaa kaallana danddayiyoogaa hassayana koshshees. Ubbaa Danddayiyaagaa nuuni milatana danddayiyoogaa waati eriyoo? Yihooway ba halchchuwaa polanawu ba koyidobaa aybanne haniyoogaa A sunttaa birshshettay nuna tamaarissiyoogaa hassaya. Hegee nuna keehi maalaalissiyaaba gidikkonne, nuuni Yihoowa milatana danddayokko giyoogee? CHii.

¹⁹ Nuuni Xoossaa leemisuwan merettida. (Doomettaabaa 1:26) Yaatiyo gishshawu, asay saˈan deˈiya ay meretatuppenne dumma. Nuuni issibaa meretan demmidoban, laattidoban woy heeraadan oottokko. Yihooway nuuni koyidobaa dooriyo maalaalissiya maataa nuussi immiis. Nuuni nagaranchcha gidikkonne, nu hanana koyiyoobaa dooriyo maatay nuuyyo deˈees. Neeni wolqqaa suure goˈettiya, siiqiya, aadhdhida eranchchanne xillo asa gidanawu koyay? Yihoowa ayyaanay maaddin, neeni hegaa mala asa gidana danddayaasa! Hegaappe denddidaagan, neeni oottana loˈˈobata qoppa.

20. Nuuni Yihoowa milatiyo wode oottana danddayiyo loˈˈobay aybee?

²⁰ Neeni saluwan deˈiya ne Aawaa wozanaa ufayssana. (Leemiso 27:11) Yihooway ne abbiyaa pacaa akeekiyo gishshawu,  neeni ‘ubba wode A ufayssana’ danddayaasa. (Qolasiyaasa 1:9, 10) Qassi neeni siiqiya ne Aawaa milatiyoogan ubbatoo loˈˈo eeshshay deˈiyoogaa gidikko, neeni gita maataa demmana. Neeni Xoossaappe haakkida ha xuma alamiyan pooˈuwaa pooˈissiyaagaa gidana. (Maatiyoosa 5:1, 2, 14) Maalaalissiya Yihoowa eeshshatuppe amaridaagee kumetta saˈan qonccanaadan neeni maaddana. Hegee gita maata!

21, 22. Yihoowa siiqiyaageeta ubbaa ubbatoo ayba anjjoy naagii?

²¹ Yaaqooba 4:8n deˈiya qoncce zoree coo halchcho xalla gidenna. Hegee aggennan oottiyooba. Nuuni ammanettidi deˈido wode ubban, hegee awudenne oottiyooba. Nuuni Yihoowakko shiiqiyoogaa mule aggokko. Nuuni abaa tamaaridi awudenne wurssennaagee qoncce. Nuuni ha maxaafan Yihoowabaa ubbabaa tamaaridabadan qoppana koshshenna. Nuuni Geeshsha Maxaafay nu Xoossaabaa yootiyoobaa tamaariyoogaa biron doommoos! Geeshsha Maxaafaykka nuuni Yihoowabaa erana danddayiyo ubbabaa yootenna. Yesuusi saˈan haggaaziyo wode oottidobay ubbay xaafettiyaakko “xaafettiya maxaafatuyyo ha mule sa7ai “ gidennaagaa kiitettida Yohaannisi yootiis.  (Yohaannisa 21:25) Naˈaagee hagaa mala gidikko, Aawaagee hegaappe keehi dariyoogee qoncce!

²² Nuuni merinawu deˈikkokka, Yihoowabaa tamaaridi wurssokko. (Eranchchaa 3:11) Yaatikko nu sinttanaa hidootaabaa qoppa. Nuuni xeetan, shaˈan, miilooniyan, ubba qassi biilooniyan qoodettiya layttawu deˈi simmidikka, Xoossaa Yihoowabaa ha wodiyaagaappe keehi darobaa erana. SHin he wodekka nuuni tamaarana koshshiya zawi baynna maalaalissiyaabay deˈiyoogaa akeekana. “Taani Xoossaa matan de7iyoogee taayyo lo77o” giidi yexxida mazamuraawiyaagaadan nuuyyo ubbatoo siyettiyo gishshawu, nuuni hara darobaa tamaaranawu yeemottana. (Mazamure 73:28) Merinaa deˈoy nuuni qoppana danddayiyoogaappe aaruwan nuna ufayssiyaaba gidana; qassi Yihoowakko ubbatoo shiiqiyoogee nuuni merinawu deˈiyo wode demmiyo aybippenne aadhdhiya anjjo.

23. Neeni oottanaadan minttettiyoobay aybee?

²³ Yihooway nena siiqido gishshawu, neeni A ne kumetta wozanaappe, shemppuwaappe, qofaappenne wolqqaappe siiqanaadan amottoos. (Marqqoosa 12:29, 30) Neeni Yihoowa aggennan siiqanaadan koyoos. Guuttabaappe gitabaa gakkanawu neeni galla galla kuuyiyoobay saluwan deˈiya ne Aawaara kaseppe aaruwan dabbotaa minttanawu dooridoogaa bessiyaaba gido. Ubbaappe aaruwan, meri merinawu neeni Yihoowakko shiiqanaadaaninne ikka neekko shiiqanaadan amottoos!