Gannatee haˈˈi nu deˈiyo alamiyaa mala gidenna. Xoossay saˈay metuwan, kayyuwan, sahuwaaninne tuggan kumana mala mule koyibeenna. Sinttappe Xoossay saˈaa gannate oottana. Gannatee ay malataneeshsha? Geeshsha Maxaafay giyoobaa ane beˈoos:

Loˈˈo asaa. Gannatee Xoossaa dabboti deˈiyo soho gidana. Eti issoy issuwaassi loˈˈobaa oottana. Eti Xoossaa xillotetta ogiyaadan deˈana.—Leemiso 2:21.

Kumi palahiya kattaa. Gannatiyan namisi deˈenna. Geeshsha Maxaafay: ‘Biittan daro kattay mokkana’ yaagees.—Mazamure 72:16.

Injje keettaanne ufayssiya oosuwaa. Gannate biittan, ubba keettaa asaassi eta keettay deˈana. Ubba asay ba oottiyo oosuwan tumu ufayssaa demmiyaagaa gidana.—Isiyaasa 65:21-23.

 Saˈa yuusho sarotettaa. Olettiya asinne olan hayqqiya asi deˈenna. Xoossaa Qaalay: “[Xoossay] sa7aa gaxaa gakkanaassi de7iya olaa teqqees” yaagees.—Mazamure 46:8, 9.

Loˈˈo payyatettaa. Geeshsha Maxaafay: “[Gannatiyan] deˈiya ooninne ‘Taani harggayiis’ yaagenna” yaagidi hidootaa immees. (Isiyaasa 33:24) Qassi, ooninne wobbenna, qooqenna, tullennanne duudenna.—Isiyaasa 35:5, 6.

Sahoy, kayyoyinne hayqoy xayana. Xoossaa Qaalay: “Haiqoinne kayyoi woi waasoinne sahoi de7enna. Aissi giikko, ceegabai xayiis” yaagees.—Ajjuutaa 21:4.

Iita asay mule xayana. Yihooway “Iitati biittaappe xoqollettana; ammanettennageetikka shodettidi xayana” yaagidi qaalaa geliis.—Leemiso 2:22.

Asay issoy issuwaara siiqettananne bonchchettana. Pirddaa pacay, huqqunnay, yaarettiyoogeenne ixoy deˈenna. Asay Xoossaa xillotetta ogiyaara moggottidi issippetettan deˈana.—Isiyaasa 26:9.