Iita asay Gannatiya xayssanaadan Yihooway oottenna. A dabbotu xallay yan deˈana. Iita asay waananee? Ha oyshau zaaruwaa demmanau, tumuppe hanida Nohe taarikiyaa akeeka. Nohee shaˈan qoodettiya layttatuppe kase deˈiis. Nohee Xoossaa sheniyaa ubbatoo oottanau baaxettida loˈˈo asa. SHin saˈan deˈiya hara asay iitabaa oottiis. Hegaa gishshau, Yihooway iita asaa ubbaa xayssanau bashsha haattaa ehaana hanniyoogaa Noheyyo yootiis. Noheenne a soo asay Bashsha Haattay yiyo wode hayqqennaadan markkabiyaa keexxanaadan Noheyyo yootiis.—Doomettaabaa 6:9-18.

Noheenne a soo asay markkabiyaa keexxidosona. Nohee Bashsha Haattay yiyoogaa asaa akeekissiis; shin eti i giyoobaa siyibookona. Iita oosuwaa aggibookkona. Markkabee keexetti wuri simmin, Nohee mehiyaanne doˈaa markkabe giddo gelissiis; qassi inne a soo asaykka gelidosona. Hegaappe guyyiyan Yihooway wolqqaama iraa ehiis. Iray 40 gallassaanne 40 qammaa bukkiis. Haattay saˈaa ubbaa walxxi gi kumiis.—Doomettaabaa 7:7-12.

 Iita asay ubbay ba shemppuwaa xayiis; shin Noheenne a soo asay attiis. Yihooway eta Bashsha Haattaappe ashshidi iitatettaappe geeyida saˈan deˈanaadan oottiis. (Doomettaabaa 7:22, 23) Geeshsha Maxaafay suurebaa oottanau ixxis giyaageeta, Yihooway zaarettidi xayssiyo wodee yaanaagaa yootees. Loˈˈo asay xayenna. Eti Gannate gidiya biittan merinau deˈana.—2 PHeexiroosa 2:5, 6, 9.

Ha wodiyan daro asay iitabaa oottees. Alamee metuwan kumi uttiis. Daro asay Yihoowa qaalaa siyanau koyennaba gidikkokka, Yihooway ba Markkata asaa akeekissanaadan zaari zaari kiittees. Eti bantta ogiyaa laammanau koyokkona. Xoossay suurenne bala giidi yootiyoobatubaa ekkanau koyokkona. Ha asati ay hananee? Eti issi gallassi laamettanee? Daroti mule laamettokkona. Iitati xayiyo wodeenne simmidi deˈanau mule ­danddayenna wodee matattiis.—Mazamure 92:7.

Saˈay xayenna; ubba gannate gidana. Xoossaa dabbo gidiyaageeti Gannate gidiya biittan merinau deˈana.—Mazamure 37:29.