Xoossaassi waanna morkkee Seexaanaa Dablloosa. I Yihoowa bolli makkalida ayyaana mereta. Seexaanay Xoossaara eqettiyoogaa aggibeennanne asaa naatu bolli daro metuwaa kaalettees. Seexaanay iita. I worddanchchanne shemppo woriyaagaa.—Yohaannisa 8:44.

Hara ayyaana meretattikka Xoossaa bolli makkaliyoogan Seexaanaara zuppettidosona. Geeshsha Maxaafay eta daydanttata yaagi xeegees. Seexaanaagaadankka, daydanttati asaa naatuyyo morkke. Asaa qohanau koyoosona. (Maatiyoosa 9:32, 33; 12:22) Yihooway Seexaanaanne daydanttata merinau xayssana. Eti asaa naatu bolli meto gattiiddi takkanay guutta wode xalaalaassa.—Ajjuutaa 12:12.

Xoossaa dabbo gidanau koyikko, Seexaanay giyoobaa oottana bessenna. Seexaanaynne daydanttati Yihoowa ixxoosona. Eti Xoossaa morkke, nenakka Xoossaa morkke oottanau koyoosona. Neeni Seexaanaa woy Yihoowa ufayssana koyiyaakko doorana koshshees. Merinaa deˈuwaa koyikko, Yihoowa sheniyaa oottanau doorana koshshees. Seexaanay asaa cimmiyo daro hayyotinne ogeti deˈoosona. Daro asay an baletettiiddi deˈees.—Ajjuutaa 12:9.