Xoossaa dabbo gidiyoogee, neeyyo deˈana danddayiya ubbabaappe aadhdhiyaaba. Xoossay nena ufayssiya woppa deˈuwaa waata demmana danddayiyaakko tamaarissana; i nena daro bala ammanotuppenne qohiya meezetuppe laˈa kessana. I ne woosaa siyana. I nena ne garssa sarotettaaninne ammanettada deˈiyoogan ufayttanaadan maaddana. (Mazamure 71:5; 73:28) Meto wodekka Xoossay nena maaddana. (Mazamure 18:18) Qassi merinaa deˈuwaakka Xoossay neeyyo immana.—Roome 6:23.

Xoossaakko shiiqaydda biido keenan, a dabbotukkokka shiiqaasa. Etikka ne dabbo gidoosona. Ubba eti neessi ishanne miichcho mala gidana. Eti nena Xoossaabaa tamaarissanau, maaddanaunne minttettanau ufayttoosona.

Nuuni Xoossaara lagge gidokko. Neeni Xoossaa dabbo gidanau koyiyo wode, issi tumu yohuwaa akeekana koshshees. Xoossaara deˈiya dabbotettay lagge gidida naaˈˈu asatu giddon deˈiya dabbotaa mala gidenna. I nuuppe keehi daro wodiyaa deˈida, aadhdhida eranchchanne daro wolqqaara deˈiyaagaa. I nuna Haaranau maatay deˈiyoogaa. Hegaa gishshau, nuuni a dabbo gidanau koyikko, a ezgganaunne i oottite giidobata oottanau koshshees. Hegaadan oottiyoogee ubbatoo nuna goˈˈiyaaba.—Isiyaasa 48:18.