SHAAHUWAA 2
Kawotettaabaa Sabbakiyoogaa—Mishiraachuwaa Kumetta Saꞌan Yootiyoogaa
NEENI oosuwaappe shemppiyo gallassi guuraara haggaazuwawu kiyanawu giigettidabadan qoppa. Guuttaa daafurido gishshawu, kiyanawu mammottaasa. Guuran shemppanawu keehi koyadasa! SHin hegaa xeelliyaagan woossada kiyanawu murttaasa. Issi cima micheera haggaazada, a minonne keha gidiyoogaa beꞌada keehi ufayttaasa. Qassi neeni sooppe soo baada haggaazishin, kumetta saꞌan deꞌiya ne ishanttinne michontti issi mala xuufiyaa goꞌettidi issi mala qofaa asawu yootiyoogeenne ubbaykka issi mala ogiyan loohiyoogee neeyyo karhi gees. Neeni soo gakkiyo wode, gazddadasa. Haggaazuwaa kiyido gishshawu keehi ufayttaasa!
Ha wodiyan Xoossaa Kawotettaa oosuwan waannatiyaagee Kiristtaanetu haggaazuwaa. Sabbakiyo oosoy wurssetta gallassan keehi aakkanaagaa Yesuusi yootiis. (Maa. 24:14) I yootido hiraagay waanidi polettidee? Kumetta saꞌan deꞌiya, miilooniyan qoodettiya asawu Xoossaa Kawotettay qoncci beettanaadan maaddiya, Kiristtaanetu haggaazuwan keehi maaddiya asaabaa, hiillaabaanne miishshaabaa ha shaahuwan pilggana.
HA SHAAHUWAN
SHEMPPUWAA 6
Sabbakiya Asaa—Haggaaziyaageeti Bantta Dosan Eeno Goosona
Yesuusi wurssetta gallassan bantta dosan sabbakiya daro asay deꞌanaagaa ammanettidoy aybissee? Neeni kasetada Kawotettaa koyiyoogaa waatada bessana danddayay?
SHEMPPUWAA 7
Sabbakiyo Hiillaa—Asawu Sabbakanawu Ubbabaa Goꞌettiyoogaa
Xoossaa asay wurssettay yaanaappe kase danddayettida keenan mishiraachuwaa daro asawu yootanawu makkisidi goꞌettido hiillaabaa akeeka.
SHEMPPUWAA 8
Sabbakanawu Maaddiya Miishshata—Kumetta Saꞌan Deꞌiya Asawu Xuufiyaa Giigissiyoogaa
Nuuni xuufiyaa birshshiyo oosoy Yesuusi nuna maaddiyoogaa waati bessii? Nu xuufiyaara gayttidaagan Kawotettay neessi beettiyaagaa keena qoncce gidiyoogaa bessiyaabi aybee?
SHEMPPUWAA 9
Sabbakiyoogee Demissiyo Ayfiyaa—“Kattai Cahaa Bessiis”
Yesuusi ayyaanaabaa cahaa xeelliyaagan ba erissiyo ashkkarata keehippe koshshiya naaꞌꞌubaa tamaarissiis. Hegee nuna ha wodiyan waatidi maaddii?
