1-3. Yesuusi asay beeta maqidasiyaa moorishin beꞌidi waatidee?

 YESUUSI Yerusalaamen deꞌiya beeta maqidasee aybawu leemisokko eriyo gishshawu, hegaa keehi bonchiis. Beeta maqidasee daro layttawu saꞌan tumu goynuwawu waanna soho. SHin geeshsha Xoossaa Yihoowawu goynniyo goynoy geeshsha gidana bessees. Yesuusi Niisaana 10, 33 M.Ln beeta maqidasiyaa biidi, asay hegaa moorishin beꞌidi waanidaakko qoppa. Hanidabay aybee?—Maatiyoosa 21:12, 13 nabbaba.

² Ayhuda gidenna asaa dabaaban zalꞌꞌiyaanne miishshaa laammiya yaaretiya asay Yihoowayyo yarshshanawu yaa biidaageeta yuuꞌees. a Yesuusi beeta maqidasiyan “baizziyaageetanne shammiyaageeta ubbaa kare yedettiis; qassi miishshaa laammiyaageetu” xarapheezaa aatti yeggiis. (Nahimiyaa 13:7-9⁠ra gatta xeella.) He yaaretiya asati ba Aawaa keettaa “panggati qosettiyo gonggolo” kessido gishshawu, Yesuusi eta bolli pirddiis. Yaatiyoogan, Yesuusi beeta maqidasiyaanne hegee leemiso gididobaa bonchiyoogaa bessiis. A Aawaayyo goynniyo goynoy geeshsha gidana koshshees!

³ Daro layttaappe guyyiyan, Yesuusi Mase Kawo gidi simmidi, ha wodiyan Yihoowawu bessiyaagaadan goynnanawu koyiya ubbaa maaddiya beeta maqidasiyaa haranttuwaa geeshshiis. I he wode geeshshido beeta maqidasee awugee?

4, 5. (a) Yesuusa kaalliya ayyaanan tiyettidaageeti 1914⁠ppe 1919 doomettaa gakkanaassi waanidi geeyidonaa? (b) Xoossaa asaa geeshshiyoogee he wode polettidee? Qonccissa.

⁴ Nuuni ha maxaafan SHemppuwaa 2n beꞌidoogaadan, Yesuusi 1914n kawoti simmidi, geeshsha goynuwawu giigida ayyaanaa beeta maqidasiyaa qoranawu ba Aawaara yiis. b Hegaappe denddidaagan, Kawoy ayyaanan tiyettidaageeta, hegeetikka “Leewa zareta” geeshshana koshshiyoogaa akeekiis. (Mil. 3:1-3) Geeshshiyaagee Yihooway 1914⁠ppe 1919 doomettaa gakkanaassi ba asay dumma dumma paaciyaaninne metuwan geeyanaadan oottiis. Ayyaanan tiyettidaageeti tama mala paaciyaa paacetti geeyidi, Mase Kawuwawu exatanawu koyiyoogaa bessidoogee ufayssiyaaba!

 ⁵ Xoossaa asaa geeshshiyoogee he wode polettidee? CHii, polettibeenna. Wurssetta gallassi, Yihooway Mase Kawuwaa baggaara a kaalliyaageeti ayyaanaa beeta maqidasiyan deꞌanawu geeshsha gidana mala maaddiis. I eta kandduwaanne eta dirijjitiyaa kaseegaappe waatidi loyttidaakko kaalliya naaꞌꞌu shemppuwan beꞌana. SHin ane koyro, ayyaanaaban geeshshiyoogaara gayttidabaa beꞌoos. Yesuusi bana kaalliyaageeti ayyaanaaban geeshsha gidanaadan maaddanawu, qoncce gididanne qoncce gidenna ogiyan oottidobaa qoppiyoogee ammanuwaa minttiyaaba.

6. Yihooway omoodettida Ayhudatussi yootido azazoy ayyaanaabaa geeshshatettay aybakko nuuni eranaadan waati maaddii?

⁶ Ayyaanaabaa geeshshatettay aybee? Ha oyshaa zaaranawu, Baabiloonen omoodettidi deꞌiya Ayhudati usuppuntta xeetu layttan K.K. bantta biitti simmiyo wode Yihooway etawu yootidobaa ane beꞌoos. (Isiyaasa 52:11 nabbaba.) Eti omooduwaappe bantta katamaa Yerusalaame simmidoy beeta maqidasiyaa zaarettidi keexxanaassanne tumu goynoy zaarettidi eqqanaadan oottanaassa. (Izi. 1:2-4) Yihooway ba asay Baabiloone haymaanootiyaara gayttida ubbabaa aggibayanaadan koyiis. Yihooway etawu, “Tunabaa bochchoppite,” “a giddoppe kiyiichchite,” qassi “intte huuphiyaukka geeyite” yaagidi, dumma dumma azazuwaa azazidoogaa akeeka. Yihoowa geeshsha goynoy worddo haymaanootiyan hambbalaashshettana bessenna. Yaatin, nuuni hegaappe ay kuuyana danddayiyoo? Ayyaanaabaa geeshshatettay worddo haymaanootiyaa timirttiyaappenne a meeziyaappe naxa kiyiyoogaa.

7. Yesuusi bana kaalliyaageeta ayyaanaaban geeshshanawu goꞌettidobay aybee?

⁷ Kawoy Yesuusi kawoti simmidi takkennan, bana kaalliyaageeta ayyaanaaban geeshshanawu goꞌettiyo qoncciyan beettiyaabaa giigissiis. Kiristtoosi goꞌettidobay i 1919n sunttido ammanettida wozannaama ashkkaraa. (Maa. 24:45) Geeshsha Maxaafaa Tamaareti he laytti gakkanaassi, worddo haymaanootee tamaarissiyo daro timirttiyaappe geeyi uttidosona. Gidikkokka, eti ayyaanaaban geeyana koshshiyo issi issibay deꞌees. Kiristtoosi ammanettida ba ashkkaraa baggaara bana kaalliyaageeti aggana koshshiyo dumma dumma baalatubaanne meezetubaa loddan loddan qonccissiis. (Lee. 4:18) Hegaara gayttidaagan, amarida leemisuwaa ane beꞌoos.

8. Geeshsha Maxaafaa Tamaareti Ufayssa Masqqalaabaa daro wodiyaappe kase ay eridonaa, shin eti loytti akeekibeennabay aybee?

⁸ Geeshsha Maxaafaa Tamaareti Ufayssa Masqqalawu denddoy eeqa goyno gidiyoogaanne Yesuusi Tisaase 25n yelettibeennaagaa daro wodiyaappe kase eridosona. Tisaase 1881 Xiyoone Wochiyo Keelay hagaadan giis: “Miilooniyan qoodettiya asay eeqa goynuwaa aggidi woosa keettaa yiis. SHin, eeqa goynuwaa qeeseti kiristtaane qeese gidido gishshawunne Ufayssa Masqqalaynne  hegaa mala hara eeqa goynuwaa baalati kiristtaane ammanuwan sunttettido gishshawu, he asati laamettidoy suntta xallaana.” Wochiyo Keelay 1883n “Yesuusi Yelettidoy Awudee?” giya huuphe yohuwan, Yesuusi Xiqimita aginaa doomettaa heeran yelettidoogaa qonccissiis. c SHin Geeshsha Maxaafaa Tamaareti Ufayssa Masqqalaa bonchiyoogaa aggana bessiyoogaa he wode loytti akeekibookkona. Birukiliine Beeteele keettaa asaykka hegaa bonchiyoogaa aggibeenna. Gidoppe attin, 1926⁠ppe simmin hanotay laamettiyoogaa doommiis. Aybissi?

9. Geeshsha Maxaafaa Tamaareti Ufayssa Masqqalaabaa ay akeekidonaa?

⁹ Geeshsha Maxaafaa Tamaareti he yohuwaa loytti pilggido gishshawu, Ufayssa Masqqalaa denddoynne hegaara gayttida meezee Xoossaa bonchissennaagaa akeekidosona. Tisaase 14, 1927 Zi Golden Eej giyo maxeetee “Ufayssa Masqqalaa Dendduwaa” giya huuphe yohuwan, Ufayssa Masqqalay eeqa goyno baalanne ufayttana xallawu bonchiyo baala gidiyoogaa qonccissiis. He huuphe yohoy he baalaa bonchanaadan Kiristtoosi azazibeennaagaa qonccissidi, Ufayssa Masqqalaa xeelliyaagan hagaadan kuuyiis: “Alamee, ashoynne Seexaanay ha baalay ubbatoo bonchettanaadan koyiyoogee . . . Yihoowayyo wozanappe haggaaziyaageeti he baalaa keehi ixxanaadan oottiyaaba.” Beeteele keettaa asay he laytti Tisaasiyan woy hegaappe simmin mule Ufayssa Masqqalaa bonchibeennaagee garamissiyaaba gidenna!

10. (a) Tisaase 1928n Ufayssa Masqqalaa xeelliyaagan qoncciyaa kessidobay aybee? (“ Ufayssa Masqqalaa Dendduwaanne Asay A Bonchiyo Gaasuwaa” giya saaxiniyaakka xeella.) (b) Bonchana koshshenna hara baalatubay Xoossaa asawu waani odettidee? (“ Hara Baalata Qoncciyaa Kessiyoogaa” giya saaxiniyaa xeella.)

¹⁰ Hegaappe kaalliya layttan, Geeshsha Maxaafaa Tamaaretussi Ufayssa Masqqalaa xeelliyaagan tumay aybakko keehi qoncciis. Tisaase 12, 1928n, waanna biiruwan oottiya Ishaa Richard H. Barberi Ufayssa Masqqalawu denddoy tunabaappe gidiyoogaa  qoncciyaa kessidi eraadooniyan yootiis. Waanna biiroy qoncce azazuwaa azazin Xoossaa asay waatidee? Ishaa CHarles Brandliini inne a soo asay Ufayssa Masqqalaa bonchiyoogaa awude aggidaakko hagaadan giis: “Nuuni eeqa goynuwaa baalaa agganawu metootidoo? Akkay metootibookko! . . . Hegee qitattida maayuwaa qaaridi oliyoogaa mala.” Guyyeppe gubaaꞌeta xomoosiyaagaa gididi oottida Ishaa Henri A. Kantwelikka hegaadan giis. I, “Nuuni Yihoowa siiqiyoogaa bessanawu issibaa aggibayido gishshawu ufayttida” yaagiis. Kiristtoosa kaalliya ammanettidaageeti eeno giidi laamettidosona; qassi denddoy eeqa goyno gidido baalaa bonchibookkona. d—Yoh. 15:19; 17:14.

11. Nuuni Mase Kawuwawu exatiyoogaa waatidi bessana danddayiyoo?

¹¹ He ammanettida Geeshsha Maxaafaa Tamaareti nuussi loꞌꞌo leemiso gididosona! Nuuni eti oottidobaa qoppiyo wode, nuna hagaadan oychana koshshees: ‘Nuussi waanna biiruwaappe imettiya azazuwaa taani waata xeelliyaanaa? Taani hegaa siyada tamaaridoogaadan oottiyaanaa?’ Nuuni eeno giidi azazettiyoogee, ammanettida ashkkaraa baggaara ayyaanaabaa qumaa koshshiya wodiyan giigissiya Mase Kawuwawu exatiyoogaa bessees.—Oos. 16:4, 5.

12. Daro layttawu, Geeshsha Maxaafaa Tamaareti masqqaliyaa aybidan xeellidonaa?

¹² Daro layttawu, Geeshsha Maxaafaa Tamaareti masqqaliyaa Kiristtaane ammanuwaa malaatadan goꞌettana koshshiyaabadan xeellidosona. Eti eeqaa goynoy likke gidennaagaa eriyo gishshawu, masqqaliyawu goynnana koshshiyaabadan qoppibeennaagee tuma. (1 Qor. 10:14; 1 Yoh. 5:21) Wochiyo Keelay  1883n, “eeqa goyno ubbay Xoossaa sheneyiyaaba” gidiyoogaa geeshshidi yootiis. SHin, Geeshsha Maxaafaa Tamaareti koyro, masqqaliyaa maara goꞌettiyo oge giidi xeellidobay bala gidenna gi qoppidosona. Leemisuwawu, masqqaliyaa misileenne kallachaa misilee deꞌiyo alleequwaa banttana erissiyaabadan bantta maayuwaa bollan wottoosona. Eti hayqqana gakkanaassi ammanettidi deꞌikko, deꞌo akiliiliyaa ekkanaagawu hegee malaata giidi qoppidosona. He alleequwaa malaatay he wode 1891⁠ppe doommidi, Wochiyo Keelan koyro sinttan kiyees.

13. Kiristtoosa kaalliyaageetussi masqqaliyaa goꞌettiyoogaa xeelliyaagan qonccidabay aybee? (“ Masqqaliyaa Goꞌettiyoogaabay Loddan Loddan Qoncciis” giya saaxiniyaakka xeella.)

¹³ Geeshsha Maxaafaa Tamaareti masqqaliyaa misileenne kallachaa misilee deꞌiyo malaataa kase xoqqu oottidi xeelloosona. SHin, 1927 heerappe doommidi, Kiristtoosa kaalliyaageetussi masqqaliyaa goꞌettiyoogaara gayttidabay loddan loddan qoncciis. Guyyeppe Bolla Gididi Heemmiyaagaa yara gidida Ishaa Grant Suteri Amarkkan, Mishigan giyo sohuwan, Ditroyt kataman 1928n shiiqido gita shiiquwaabaa hagaadan giis: “Masqqaliyaa misileenne kallachaa misilee deꞌiyo malaatati koshshennaba xalla gidennan, sheneyiyaaba gidiyoogee he shiiquwan qoncciis.” Hegaappe simmin amarida layttatun, darobay qoncciis. Ayyaanaaban geeshsha goynuwan masqqaliyaa goꞌettana koshshennaagee qoncce.

14. Xoossaa asay masqqaliyaa xeelliyaagan loddan loddan akeekidobaara gayttidaagan ay oottidee?

¹⁴ Xoossaa asay masqqaliyaa xeelliyaagan loddan loddan akeekidobaara gayttidaagan ay oottidee? Masqqaliyaa misileenne kallachaa misilee deꞌiyo eti keehi dosiyo malaataa goꞌettiyoogaa aggibookkonaa? Daro wodiyawu Yihoowa Markka gidada haggaazida Lila Roberts giyo michiyaa hagaadan gaasu: “Nuuni hegee aybaa malaatakko erido wode, hegaa goꞌettiyoogaa sohuwaara aggida.” Ursula Serenko giyo hara ammanettida michiyaa darotu qofaa hagaadan qonccissaasu: “Nu Godaa hayquwawunne nuuni nu huuphiyaa geppida Kiristtaane gidiyoogawu malaata giidi issi wode xoqqu oottidi xeelliyoobay eeqa goynuwaa malaata gidiyoogaa akeekida. Leemiso 4:18y yootiyoogaadan, ogiyaa pooꞌoy keehi gujji gujji biido gishshawu, Yihoowa galatida.” Kiristtoosa kaalliya ammanettidaageeti worddo haymaanootiyaa tuna meeziyaa kaallanawu koyibookkona!

15, 16. Yihoowa ayyaana beeta maqidasiyawu saꞌaa dabaabaa geeshsha oottanawu murttidoogaa waatidi bessana danddayiyoo?

¹⁵ Ha wodiyan nuunikka etaagaadan murttida. Kiristtoosi ba asay ayyaanaaban geeshsha gididi deꞌanaadan maaddanawu, ammanettida wozannaama ashkkaraa goꞌettiiddi takkidoogaa akeekoos. Hegaa gishshawu, worddo haymaanootiyaara gayttida baalaa, meeziyaa woy wogaa akeekanaadan maaddiya ayyaanaabaa qumaa demmiyo wode, nuuni sohuwaara azazettoos. Kiristtoosi qonccido wodiyaa doomettaa heeran deꞌida nu ishanttudaaninne michonttudan, nuunikka Yihoowa ayyaana beeta maqidasiyawu saꞌaa dabaabaa geeshsha oottanawu murttida.

¹⁶ Wurssetta gallassan, Yihoowa asaa gubaaꞌiyaa ayyaanaaban hambbalaashana danddayiyaageetuppe naaganawu,  Kiristtoosi qoncce gidenna ogiyankka oottiiddi takkiis. I hegaadan waatidi oottidaakko ane beꞌoos.

17, 18. Gitiyaa leemisuwan (a) gitiyaa yeggiyoogaa, (b) “ubba qommo moliyaa” oyqqiyoogaa, (c) loꞌꞌo moliyaa qoridi keeshiyan yeggiyoogaa, qassi (d) iita moliyaa wora oliyoogaa birshshettay aybee?

¹⁷ Kawuwaa Yesuus Kiristtoosi kumetta saꞌan deꞌiya Xoossaa asaa gubaaꞌeta ubbatoo wochees. Nuuni loytti akeekana danddayenna ogiyan, Kiristtoosinne kiitanchati qoriiddi takkidosona. Yesuusi he oosuwaabaa gitiyaa leemisuwan yootiis. (Maatiyoosa 13:47-50 nabbaba.) He leemisuwaa birshshettay aybee?

¹⁸ “Abban . . . gitiyaa” yeggiyoogaa. Gitee abban leemisettida asaa naatu ubbawu Kawotettaa mishiraachuwaa yootiiddi deꞌiyoogawu leemiso. “Ubba qommo moliyaa” oyqqiyoogaa. Ubba qommo asay, hegeekka tumu Kiristtaane gidanawu wozanappe koyiyaageetinne koyro ufayttidi siyikkonne wozanappe koyennaageetikka mishiraachuwaa ufayttidi siyoosona. e “Lo77o moliyaa qoridi, keeshiyan” yeggiyoogaa. Suure wozanay deꞌiyoogeeti Yihoowayyo geeshsha goynuwaa goynnana danddayiyo, keeshe mala gidida gubaaꞌiyaa shiiqoosona. “Iita moliyaa wora” oliyoogaa. Wurssetta gallassan, Kiristtoosinne kiitanchati “nagaranchchata xillotu giddoppe” qoriiddi takkidosona. f Yaatiyo gishshawu, wozanan suure gidennaageeti, hegeetikka bala ammanuwaa woy meeziyaa agganawu koyennaageeti gubaaꞌiyaa hambbalaashennaadan Yesuusi teqqiis. g

19. Kiristtoosi Xoossaa asay ayyaanaaban geeshsha gidanaadaaninne tumu goynoy geeshsha gidanaadan naaganawu oottidobaa xeelliyaagan neessi aybi siyettii?

¹⁹ Nu Kawuwaa, Yesuus Kiristtoosi ba haariyoogeeta naagiyoogaa eriyoogee minttettiyaaba gidennee? Qassi i koyro xeetu layttaa M.Ln beeta maqidasiyaa geeshshido wodiyaagaadan ha wodiyankka tumu goynuwawunne tumuppe goynniyaageetussi keehi mishettiyoogaa eriyoogee minttettiyaaba gidennee? Kiristtoosi Xoossaa asay ayyaanaaban geeshsha gidanaadaaninne tumu goynoy geeshsha gidanaadan naagiiddi takkido gishshawu a keehi galatoos! Worddo haymaanootiyaappe haakkiyoogan Kawuwawunne a Kawotettawu exatiyoogaa bessana danddayoos.