Issi Kiristtaane maccaara goynuwaara gayttidaagan ba huuphiyaa qachana koshshiyoy awudee, qassi aybissee? Ha yohuwaa xeelliyaagan kiitettida PHauloosi ayyaanay denttettin woygidi xaafidaakko ane beˈoos. I, nuuni Xoossaa bonchissiya loˈˈo kuushshaa kuuyanau koshshiya kaaletuwaa immiis. (1 Qoronttoosa 11:3-16) PHauloosi nuuni qoppana bessiyo heezzubata qonccissiis: (1) issi maccaara huuphiyaa qachana koshshiyo oosota, (2) a hegaadan oottana koshshiyo hanotatanne (3) a ha maaraa oosuwan peeshshanaadan denttettiyaabata.

Oosota. PHauloosi naaˈˈubata yootiis; hegeetikka woosaanne hananabaa yootiyoogaa. (Paydo 4, 5) Woosay Yihoowaara haassayiyo, goyno oge. Ha wodiyan hananabaa yootiyoogee, issi Kiristtaanee tamaarissiyo, Geeshsha Maxaafan baasettida ayba timirttenne malaatana danddayees. Gidoppe attin, PHauloosi issi maccaara woossiyo wodenne Geeshsha Maxaafaa tumaa tamaarissiyo wode ubban ba huuphiyaa qachana koshshees giidee? Akkay. Issi maccaasiyaa woossiyo woykko tamaarissiyo wode deˈiya hanotay dummatettaa medhees.

Hanotata. PHauloosa qaalati naaˈˈu hanotata woykko oottiyo heerata malaatoosona; hegeetikka sooninne gubaaˈiyan deˈiyaabata. I: “Attumaasi maccaasassi huuphe . . . Woossaidda woi hananabaa yootaidda, ba huuphiyaa qachchenna maccaara ba azinaa toochchausu” yaagiis. (Paydo 3, 5) Yihooway so asaa duussaa  giigissuwan, maccaarissi azinay huuphe gidanaadan oottiis. A ba azinaa aawatettaa bessiyaagaadan xeellennan aggada, Yihooway ayyo immido aawatettaa ba huuphe polikko, ba azinaa toochawusu. Leemisuwau, ba azinay deˈiyoosan Geeshsha Maxaafaa xannaˈissiyoogee koshshiyaaba gidikko, huuphiyaa qachiyoogan ba azinaa huuphetettaa bessiyaagaadan xeelliyoogaa qonccissawusu. I xammaqettidaagaa gidin aggin, so asau huuphe gidiyo gishshau, a hegaadan oottawusu. * Gamma gakkibeenna, xammaqettida naˈay deˈiyoosan a woossiyaaba woykko tamaarissiyaaba gidikkokka ba huuphiyaa qachawusu. A hegaadan oottiyoy naˈay so asau huuphe gidiyo gishshau gidennan, Kiristtaanee gubaaˈiyan xammaqettida attuma asaassi deˈiya maataa bonchiyo gishshataassa.

PHauloosi gubaaˈiyaara gayttidaagan huuphiyaa qachiyo hanotaa: “Ooninne ha yohuwan palamettana koyikko, nuussi gidin woikko Xoossaa woosa keettatussi gidinkka, hagaappe hara meezee baawa” yaagidi yootiis. (Paydo 16) Kiristtaane gubaaˈiyan huuphetettaa maatay imettidoy xammaqettida attuma asaassa. (1 Ximootiyoosa 2:11-14; Ibraawe 13:17) Gubaaˈe cimatanne gubaaˈiyan oottiyaageeta gididi Xoossaa wudiyaa naaganaadan Xoossay aawatettaa maatau sunttiyoogeeti attuma asatu xalaala. (Oosuwaa 20:28) Gidikkonne, issi issitoo giday deˈiyo xammaqettida attuma asi oottana bessiyoobaa issi Kiristtaane maccaasiyaa oottanaadan koshshiyo hanotati merettana danddayoosona. Leemisuwau, haggaazuwaa kiyanau shiiqiyo shiiquwaa kaalettiya, giday deˈiyo xammaqettida attuma asi deˈennaba woykko yibeennaba gidikko, maccaara kaalettiyoogee koshshana danddayees. Woykko xammaqettida attuma asi deˈiyoosan Geeshsha Maxaafaa xinaatiyaa xannaˈissana danddayawusu. Hegaa mala oosoti Kiristtaane gubaaˈiyan oosettiya tamaarissiyo ooso bagga gidiyo gishshau, attuma asi oottanau bessiyo oosuwaa oottaydda deˈiyoogaa bessanau ba huuphiyaa qachawusu.

Hara baggaara, issi michiyaa goynuwaara gayttidaagan huuphiyaa qachana koshshenna daro hanotati deˈoosona. Leemisuwau, gubaaˈiyaa shiiqotun qofaa immiyo wodiyan, ba azinaara  woykko xammaqettida hara ishaara sooppe soo haggaaziyo wodiyan woykko xammaqettibeenna ba naatuura xannaˈiyo woy woossiyo wode, huuphiyaa qachana koshshenna. Geella hara oyshati denddiyo wodiyan, michiyaa he allaalliyaabaa geeshshada erana xayikko, gujo qofaa demmanau pilggana danddayawusu. * Yaata simmadakka geeshshada erana xayikko, qassi i zoriya wozanay huuphiyaa qachanaadan o denttettikko, hagan deˈiya misiliyan beˈiyoogaadan hegaadan oottiyoogee bala gidenna.

Denttettiyaabata. Paydo 10n, “Maccaara ba azinaa alaafetettaappe garssaara de7iyoogaa erissiya malaatai kiitanchchatu gishshau, i huuphiyan de7anau bessees” yaagiyaagan Kiristtaane maccaara ba huuphiyaa qachana koshshiyo naaˈˈu gaasoti deˈoosona: Koyro, ‘alaafetettaappe garssaara deˈiyoogaa erissiya malaata’ yaagiyaagaa akeeka. Maccaara huuphiyaa qachiyoogee Yihooway gubaaˈiyan xammaqettida attuma asaassi immido aawatettaa ammanada ekkiyoogaa bessiyo oge. Yaatiyoogan a, Xoossaa Yihoowa siiqiyoogaanne ayyo ammanettiyoogaa bessawusu. Naaˈˈantto gaasoy, “kiitanchchatu gishshau” yaagiya qofan deˈees. Maccaara ba huuphiyaa qachiyoogee wolqqaama gidida he ayyaana meretata waatidi bochii?

Saluwan gidin saˈan gidin, Yihoowa dirijjitiyaa kumettan, Xoossay immido aawatettay bonchettiyoogaa beˈiyoogan kiitanchati goˈettoosona. Hegaara gayttidaagan polo gidenna asaa naati leemiso gidiyo hanotaappekka goˈettoosona. Etikka Yihoowa giigissotussi haarettiyaageeta gidana bessees. Hegee, beni wode daro kiitanchati paacettidi kunddidoba. (Yihudaa 6) Ha wodiyan, Kiristtaane maccaara gubaaˈiyan deˈiya xammaqettida attumaagaappe deˈuwan beˈidoban, eraaninne akeekan aadhiyaaba gidikkonne, he uraa alaafetettau haarettiyo hanotata kiitanchati beˈana danddayoosona. Ubba he maccaara sinttappe Kiristtoosaara haaranau  ayyaanan tiyettida Kiristtaane gidana danddayawusu. Hegaa mala maccaara wodeppe kiitanchatussi deˈiya sohuwaappekka aadhiya, saluwan Kiristtoosaara haariyo maataa demmana. Hegee, kiitanchati ha wodiyan beˈiyo ayba loˈˈo leemisoo! Ubba michoti, miilooniyan qoodettiya ammanettida kiitanchatu sinttan, ammanettiyoogaaninne haarettiyoogan bantta huuphiyaa kawushshidi azazettiyoogaa bessiyo ayba gita maata demmidonaa!