1, 2. Nuuni ammanettanau baaxetiyoogaa beˈiyo wode Yihooway ufayttiyoy aybissee? Leemisuwan yoota.

ISSI aayyiyaa ba guutta naˈaara suuqiyaappe kiyaydda deˈawusu. Qoppennan naˈay eqqi bayiis; i dagammidoogaa a somˈˈoy erissees. Suuqiyaappe ekkido issi guutta ashanguluutiyaa oyqqi uttiis. Naˈay ashanguluutiyaa sohuwan zaaridi wottanaagaa woykko aayyiyaa ayyo shammanaadan oychanaagaa dogiis. I haniyooba xayidi, waatoo giidi ba aayyiyo oychiis. Aayyiyaa, i mooridoogaa yootidi ashanguluutiyaa zaaranaadan aara simmada suuqiyaa baanaagaa yootada minttettaasu. I hegaadan oottido gishshau aayyiyaa keehippe ufayttaasu. Aybissi?

² Ammanettiyoogee keehippe koshshiyaaba gidiyoogaa naati akeekiyo wode, yelidaageeti darotoo keehi ufayttoosona. ‘Tumaa Xoossaa’ gidida saluwan deˈiya nu Aawaykka hegaadan ufayttees. (Mazamure 31:5) Nuuni ayyaanaaban wozannaama gidanau dichaa bessiyoogaanne ammanettidaageeta gidanau baaxetiyoogaa beˈiyo wode i ufayttees. Nuuni a ufayssanaunne a siiquwan deˈanau koyiyo gishshau, “Nuuni ubbaban ammanettanau koyoos” yaagida PHauloosa qofaa maayoos. (Ibraawe 13:18, NW) Ammanettidaageeta gidiyoogee issi issitoo nu deˈuwan deexxana danddayiyo oyddu macarata ane beˈoos. Hegaappe simmin, ammanettiyoogan demmiyo issi issi anjjota beˈana.

3-5. (a) Ba huuphiyaa cimmiyoogee gattiyo daafaa xeelliyaagan Xoossaa Qaalay nuna woygi zorii? (b) Nu huuphessi ammanettanaadan aybi maaddana danddayii?

³ Ammanettiyoogaara gayttidaagan deexxiya koyrobay, nu huuphessi ammanettiyoogaa. Nuuni polo asa gidenna gishshau,  nuna nu huuphe cimmanaagee metennaba. Leemisuwau, Yesuusi Lodooqiyan deˈiya Kiristtaaneti ayyaanaaban “hiyyeesa, qooqenne kallottida asa” gidi uttidi, dure gididabadan qoppidi banttana eeyyettidoogaa yootiis. Eta hanotay tumuppe azzanttiyaaba. (Ajjuutaa 3:17) Eti banttana cimmido hanotay eta keehippe qohiis.

⁴ Erissiyo ashkkaaraa Yaaqoobi: “Ba inxxarssaa naagennan bana cimmiiddi, bau Xoossaa ammaniyoobaa milatiyo urai de7ikko, a ammanoi mela” yaagidoogaakka hassayana danddayaasa. (Yaaqooba 1:26) Nuuni nu inxxarssaa bessenna ogiyan goˈettiiddi, Yihoowayyo goynniyaabadan qoppikko, nu huuphiyaa cimmiiddi deˈoos. Nuuni Yihoowayyo goynniyoogee, aynne maaddenna melaba. Hegaa mala azzanttiya hanotaappe nuna aybi naagana danddayii?

⁵ He sohuwan, Yaaqoobi Xoossaa qaalaa tumaa heregan leemissiis. Bali baynna Xoossaa higgiyaa xeellidi, he higgiyaadan giigissuwaa oottanaadan nuna zoriis. (Yaaqooba 1:23-25) Nuuni nu huuphessi ammanettanaadaaninne giigi giigi baanau ay oottana koshshiyaakko akeekanau, Geeshsha Maxaafay maaddana danddayees. (Zilaassaa 3:40; Hagga 1:5) Yihooway nuna qoranaadaaninne nu giddon deˈiya iitabaa nuuni ammani ekkidi giigissanaadan maaddana mala wossana danddayoos. (Mazamure 139:23, 24) Ammanettenna uri he pacay bau deˈiyoogaa erannan aggana danddayees; ammanettenna hanotaa nuuni saluwan deˈiya nu Aaway xeelliyoogaadan xeellana koshshees. Leemiso 3:32y: “GODAI iitaa oottiyaageeta ixxees; shin suuretuyyo i ulottees” yaagees. Yihooway nuuyyo baagaa mala qofay deˈanaadaaninne i nuna xeelliyoogaadan nu huuphiyaa xeellanaadan maaddana danddayees. PHauloosi, “Nuuni . . . ammanettanau koyoos” yaagidoogaa hassaya. Nuuni ha wodiyan polo gidana danddayokko; shin ammanettidaageeta gidanau wozanappe amottoosinne koyoos.

6. Aqo laggeti issoy issuwau ammanettidaageeta gidana koshshiyoy aybissee? Eti hegaadan oottiyoogan ayba metuwaappe naagettiyoonaa?

⁶ Ammanettiyoogee Kiristtaane so asaayyo waanna malaata  gidana koshshees. Yaatiyo gishshau, azinaynne machiyaa ammanettidi, issoy issuwaara qoncciyan haasayana bessees. Kiristtaaneti bantta aqo deˈuwaa qohiya tuna oosota oottokkona. Hegee, ba aqo lagge gidenna uraa lambbeechiyoogaa, Intteneetiyan haratuura geeman gayttiyoogaa woykko ay qommo pornogiraafiyaakka goˈettiyoogaa milatiyaabata gujjees. Issi issi ekkida woy gelida Kiristtaaneti, bantta aqo laggee erennan, geeman hegaa mala iitabaa oottoosona. Hegaadan oottiyoogee ammanettennaagaa bessiyaaba. Ammanettida Kawuwaa Daawiti: “Taani cimmiya asatuura issippe uttikke; lo77o milatiya iitatu maabaran gelikke” yaagidoogaa akeeka. (Mazamure 26:4) Neeni ekkidaba woy gelidaba gidikko, neeni oottaydda deˈiyoobaa ne aqo laggiyaappe genttanaadan oottiyaabaa mulekka oottoppa!

7, 8. Ammanettiyoogee goˈˈiyaaba gidiyoogaa naati tamaaranaadan maaddana danddayiya Geeshsha Maxaafaa leemisoti awugeetee?

⁷ Ammanettiyoogee goˈˈiyaaba gidiyoogaa bantta naata tamaarissiyoogan, yelidaageeti Geeshsha Maxaafaa leemisota eratettan goˈettoosona. Ammanettibeenna asatuppe, ba wuuqqidobaa qosanau malida Akkaana, miishshaa gishshau giidi worddotida Gehaaza, oyqqido miishshaappe wuuqqidanne Yesuusa bolli iita qohuwaa gattanau worddotida Yihudaanne hegaa mala asatu taariketi deˈoosona.—Yaasa 6:17-19; 7:11-25; 2 Kawotu 5:14-16, 20-27; Maatiyoosa 26:14, 15; Yohaannisa 12:6.

⁸ Ammanettiyoogan loˈˈo leemiso gidiya asatuppe, ba naati bantta ogoruwaa doonan demmido miishshay dogettidi yegettidaba gidennan aggenna giidi qoppido gishshau, zaaranaadan minttettida Yaaqooba, Yofataaha, ba aaway  shiiqettido shiiquwaa gishshau ba goˈˈaa yarshshida a naˈiyonne hiraagaa polanaunne ba erissiyo ashkkaratu bolli qohoy gakkennadan giidi, iita qofan bana oyqqanau yiida asatuyyo xalatettan bana qonccissida Yesuusa malatiya asatu taariketi deˈoosona. (Doomettaabaa 43:12; Daannata 11:30-40; Yohaannisa 18:3-11) Ha amarida leemisoti, yelidaageeti bantta naati ammanettiyoogaa dosanaadaaninne a xoqqu ootti xeellanaadan tamaarissanau maaddana danddayiya Xoossaa Qaalan deˈiya goˈˈiya qofaa oyqqidosona.

9. Ammanettiyoogaa xeelliyaagan yelidaageeti bantta naatuyyo loˈˈo leemiso gidanau aybippe haakkana koshshii? Hegaa mala leemisoy keehippe koshshiyoy aybissee?

⁹ Hegaa mala timirttee yelidaageetikka polana bessiyo gita aawatettaa immees. Kiitettida PHauloosi: “Yaatin, neeni harata tamaarissiyaagee nena ne huuphen aissi tamaarissikkii? Neeni, ‘Wuuqqoppa’ yaagada qaalaa yootaasa; shin neeni ne huuphen wuuqqaiyye?” yaagidi oychiis. (Roome 2:21) Yelidaageetuppe issoti issoti banttau ammanettennaageeta gidi uttidi ammanettanaadan bantta naata tamaarissiyoogan, naati suurebaa shaakki eranau metootanaadan oottoosona. Eti guuttabaa wuuqqidi, “Hagaa asay ekkiyoogaa ubbi eriyoobaa” yaagoosona. Qassi lahotti simmidi, “Hegaa mala worddoy nagara gidenna” yaagoosona. Gidoppe attin, wuuqqidobi ayba gidikkonne wuussi wuussa; worddotin lahottinkka worddoy worddo. * (Luqaasa 16:10) Yelidaageeti loˈˈo milatidi iitabaa oottikko, naati sohuwaara eroosona; hegee naata keehippe qohana danddayees. (Efisoona 6:4) Gidikkokka, naati banttana yelidaageetu leemisuwaappe ammanettiyoogaa tamaariyo wode, ha ammanettenna alamiyan Yihoowa bonchissiya hanotan diccana danddayoosona.—Leemiso 22:6.

10. Nu mala Kiristtaanetuura tumaa haasayiyoogaa xeelliyaagan, nuuni akeekana bessiyaabay aybee?

¹⁰ Nu mala Kiristtaanetuura medhiyo issippetettay, ammanettiyoogan  dichaa bessanau nuussi daro injjiyaa medhees. Nuuni SHemppuwaa 12n beˈidoogaadan, haasayana danddayiyo imotaa goˈettiyo ogiyan, ubba qassi nu ayyaana ishatuuranne michotuura goˈettiyo ogiyan akeekancha gidana koshshees. Ubbatoo haasayiyo haasayay haratubaa bessenna ogiyan haasayiyoogau, ubba qassi zigirssau laamettana danddayees. Tumakko worddokko shaakkana danddayeennabaa nuuni zaaridi yootiyaaba gidikko, wordduwaa aassana danddayiyo gishshau, nu doonaa shiishshi ekkiyoogee loˈˈoba. (Leemiso 10:19) Hara baggaara, issibay tuma gidiyoogaa erana danddayoos; shin hegaa yootana bessees giyoogaa gidenna. Leemisuwau, he allaallee nuna gattennaba woykko hegaa yootiyoogee kehatetta bessennaba gidana danddayees. (1 Tasalonqqe 4:11) Issi issi asay harata lanccissiyaabaa haasayidi, hegee tumu gididabaa qoncciyan haasayiyooba yaagees. Gidoppe attin, nu haasayay ubbatoo siyanau kehiyaagaanne ufayssiyaagaa gidanau bessees.—Qolasiyaasa 4:6.

11, 12. (a) Deexo nagaraa oottida issi issi asati, nagaraa bolli nagaraa gujjiyoy ayba ogiyaanee? (b) Deexo nagaraa xeelliyaagan, Seexaanay aassiyo worddotuppe amaridaageeti awugeetee? Nuuni hegaa waati teqqana danddayiyoo? (c) Yihoowa dirijjitiyau ammanettiyoogaa waati bessana danddayiyoo?

¹¹ Ubba qassi gubaaˈiyan sintta xeera gididi kaalettiyaageetuyyo tumaa yootiyoogee keehi koshshiyaaba. Deexo nagaraa oottidaageeti bantta nagaraa genttanau maliyoogaaninne hegaa gubaaˈiyaa cimati oychiyo wode worddotiyoogan, nagaraa bolli nagaraa gujjoosona. Hegaa mala asati, deexo nagaraa  oottiiddi Yihoowau haggaaziyaaba milatiyoogan, ubba naaˈˈu mera duussaa deˈiyoogaa doommoosona. Hegaa mala deˈoy, he uri ba hanota ubban worddancha gidanaadan oottees. (Mazamure 12:2) Harati qassi, gubaaˈiyaa cimatuyyo yootana koshshiya waannabaa genttidi, bagga tumaa yootoosona. (Oosuwaa 5:1-11) Ammanettennaagaa bessiya hegaa mala hanotay, darotoo Seexaanay aassiyo wordduwaa ammaniyoogaappe yees.— Sinttaa 164-5n deˈiya, “ Deexo Nagaraara Gayttidaagan Seexaanaa Ufayssiya Worddota” yaagiya saaxiniyaa xeella.

¹² Yihoowa dirijjitee nuuni xaafidi zaaranaadan oychiyoobau tuma gididabaa zaariyoogeekka keehippe koshshiyaaba. Leemisuwau, nu haggaazuwaa iriporttiyaa zaariyo wode, likke gidennabaa zaarennaadan naagettana bessees. Hegaadankka, issi haggazo maataassi malkkachaa kunttiyo wode, nu payyatettaa woykko nu hanota ubbaa xeelliyaagan tuma gidennabaa mule kunttana koshshenna.—Leemiso 6:16-19.

13. Zalˈˈiyan woy oosuwan nu mala Kiristtaanetuura gattiyaabay deˈikko, nuuni waanidi ammanettidaageeta gidana danddayiyoo?

¹³ Nu mala Kiristtaanetuyyo ammanettiyoogee zalˈˈiyaara woy hara oosuwaara gayttidabaakka gujjees. Issi issi wode, Kiristtaaneti ishatuuranne michetuura miishshan gattiyaabaa issippe oottana danddayoosona. Kawotettaa Adaraashshan goynuwau shiiqiyo wodiyan woy haggaaziyo wodiyan hegaa mala allaalliyaa polennaadan naagettana koshshees. He gaytotettay ootissiyaanne oottiya ura giddon deˈiyaba gidana danddayees. Nuuni ishata woy michota ootissiyaaba gidikko, eta damoozaa wodiyan qanxxiyoogan, giidoogaa keenaa immiyoogaaninne higgiyan koyettiyaagaadan etau bessiyaabaa oottiyoogan, eta oyqqiyo ogiyan ammanettiyaageeta gidana koshshees. (1 Ximootiyoosa 5:18; Yaaqooba 5:1-4) Hara baggaara qassi, issi ishay woy issi michiyaa nuna ootissiyaaba gidikko, nuuppe koyettiya keena oosuwaa oottana bessees. (2 Tasalonqqe 3:10) Nuuni ayyaanaaban dabbotiyoogaappe denddidaagan, ootissiyaagee hara oosanchatuugaappe dumma hanotan oosuwaappe shemppiyo gallassaa woy hara goˈˈaa nuussi immana bessiyaabadan naagokko.—Efisoona 6:5-8.

14. Miishshaara gayttidaban Kiristtaaneti issippe oottiyo wode, kasetidi eratettan ay oottana bessii? Aybissi?

 ¹⁴ Nu oosoy wodhana woy gammaa maana danddayiya, kotta zalˈˈiyaara woykko kottaa zalˈˈanau talˈˈidobaara gayttidaba gidikko shin? Geeshsha Maxaafay keehippe koshshiyaanne goˈˈiya baaso siraataa yootees; hegeekka, ubbabaa xaafi oyqqanaadaana. Leemisuwau, Ermmaasi gadiyaa shammido wode, markkati deˈiyoosan shamaa paramaa naaˈˈu koppiyaa giigissiis; yaatidi, koshshiyo wode goˈettanau loˈˈosan wottiis. (Ermmaasa 32:9-12; Doomettaabaa 23:16-20kka xeella.) Miishshaara gayttidaban nu mala Kiristtaanetuura gattiyaabaa oottiyo wode, ubbabaa loytti giigissi woraqqatan xaafidi, marakkatu sinttan paramettidi oyqqiyoogee nu mala Kiristtaaniyaa ammanennaagaa bessenna. Hegaappe ubba, issoy issuwaa qofaa bala ogiyan akeekiyoogaappe, azzanttiya hanotatuppenne issoy issuwaappe haakkanaadan oottiya ooshshaappe naagees. Miishshaara gayttidaban issippe oottiya Kiristtaaneti ubbay, hegaa mala ayba oosoynne gubaaˈiyaa issippetettaanne sarotettaa moorana bessennaagaa akeekana koshshees. *—1 Qoronttoosa 6:1-8.

15. Ammanettennaagaa bessiya zalˈˈe oosotun Yihoowayyo aybi siyettii? Ubbasan meeze gidida hegaa malabay Kiristtaaneta gakkiyo wode, eti waatana bessii?

¹⁵ Issi Kiristtaanee ammanettiyoogaa bessiyoy gubaaˈe xallaana gidenna. PHauloosi: “Nuuni ubbaban ammanettanau koyoos” yaagiis. (Ibraawe 13:18, NW) Nuuni oosuwaara gayttidaban ammanettiyoogaa, nuna Medhidaagee keehippe xoqqu oottidi xeellees. Leemiso maxaafa xallay worddo meezaanaa xeelliyaagan oyddu sohuwan yootees. (Leemiso 11:1; 16:11; 20:10, 23) Beni wode, zalˈˈiyaara gayttidaagan shammiyoobaanne qanxxiyo miishshaa likkanau woy kilanau meezaanaanne yiggiyoobaa goˈettoosona. Ammanettenna zalˈˈanchati asaa cimmanau  likke gidenna meezaanaanne naaˈˈu qommo yiggiyoobaa goˈettoosona. * Hegaa mala oosuwaa Yihooway shenetees! A siiquwan deˈanau, ammanettennaagaa bessiya zalˈˈe ooso ubbaappe nuuni muleera haakkana bessees.

16, 17. Ha wodiyan alamiyan meeze gidida, ammanettennaagaa bessiya hanotati awugeetee? Tumu Kiristtaaneti ay oottanau murttidonaa?

¹⁶ Ha alamiyaa haariyaagee Seexaanaa gidiyo gishshau, nu yuusho ubban ammanettenna hanotay deˈiyoogan garamettokko. Ammanettennaadan paaciyaabi galla galla nuna gakkana danddayees. Asay ooso oyqqanau malkkachaa gelissiyo wode, worddotiyoogeenne baynnabaa gujjiyoogee meeze gididaba. Hegaa oottiyoy, timirtte xekkaanne ooso meeziyaa xeelliyaagan worddo naqaashaa shiishshiyoogaana. Asay kare biitti baanau, qaraxaa qanxxanau, inshuranssiyaa ekkanaunne hegaa mala harabau qitsiyaa kunttiyo wode, ba koyiyoobaa demmanau worddotiyoogee meeze gididaba. Daro tamaare naati paaciyaa wode wuuqqoosona; woykko bantta timirttiyaara gayttidabaa xaafidi iriportte oottiyo wode, Intterneetiyan demmidobaa duuqqi ehiidi, banttabaadan wordduwan shiishshoosona. Qassi asay darotoo ba koyidobaa demmanau, mattaayiyaa meeze oottida sunttattyyo mattaayiyaa immees. Daro asati “banttana siiqiyaageeta, miishshaa siiqiyaageeta, . . . lo77obaa dosennaageeta” gidido alamiyan hagaa mala eeshshay deˈanaagee erettidaba.—2 Ximootiyoosa 3:1-5.

¹⁷ Tumu Kiristtaaneti hegaa mala ayba oosuwaaninne shaahettennaadan murttidosona. Ammanettiyoogee issi issitoo metanaadan oottiyay, ha alamiyan ammanettenna asati hara asaagaappe loˈˈo deˈuwaa deˈiyaabanne goˈettiyaaba milatiyo gishshataassa. (Mazamure 73:1-8) Hegaa mala hanotan, Kiristtaaneti “ubbaban” ammanettanau koyiyo gishshau, miishshaara gayttidaban metootana danddayoosona. Hegaadan ba goˈˈaa  yarshshiyoogee bessiyaabee? Ee, bessiyaaba! Aybissi? Ammanettiyoogee ayba anjjo demissii?

18. Ammanettiyoogan demmiyo sunttay keehippe goˈˈiyaaba gididoy aybissee?

¹⁸ Neeni ne deˈuwan ammanettiya asanne xillo asa gidiyoogan demmiyo loˈˈo sunttaappe aadhiyaabati keehi guutta. (Sinttaa 167n deˈiya, “ Taani Ubba Wode Ammanettiya Asee?” yaagiya saaxiniyaa xeella.) Ane hegaa qoppa— hegaa mala sunttay ooninne demmana danddayiyooba! Hegee ne eran, ne aquwan, ne meran, ne diccido wogan woykko neeni koyidoogaadan oottana danddayenna hara aybiininne baasettidaba gidenna. Gidikkonne, daro asay alˈˈo gidida loˈˈo sunttaa demmibeenna gishshau, hegee darotuyyo deˈiyaaba gidenna. (Mikiyaasa 7:2) Neeni ammanettidaagaa gidiyoogan, issoti issoti qilliicana danddayoosona; shin harati hegan nena nashshanau, bonchanaunne nenan ammanettanau danddayoosona. Daro Yihoowa Markkati, ammanettiyoogee miishshaara gayttidaban banttana goˈˈidoogaa akeekidosona. Ammanettenna oosanchata oosuwaappe kessiyo wode, ammanettidaageeta kessokkona; woykkko ammanettiya oosanchati keehippe koyettiyo wode, eti oosuwaa demmoosona.

19. Nuuni ammanettidi deˈiyoogee nu zoriya wozanaanne Yihoowaara deˈiya dabbotaa waatidi bochana danddayii?

¹⁹ Hegaa malabay nena gakkidaba gidin aggin, ammanettiyoogan ubba hegaappe keehi dariya anjjuwaa demmanaagaa neeni akeekana danddayaasa. Neessi loˈˈo zoriya wozanay deˈana. PHauloosi: “Nuna zoriya lo77o wozanai nuuyyo de7ees” yaagidi xaafiis. (Ibraawe 13:18) Hegaa bollikka, neeyyo deˈiya loˈˈo sunttay, saluwan deˈiya nu siiqo Aawaykka akeekiyooba; i ammanettiya asata siiqees. (Mazamure 15:1, 2; Leemiso 22:1) Ee, ammanettiyoogee neeni Xoossaa siiquwan deˈanaadan maaddees; qassi hegee nuuni demmana danddayiyo anjjo ubbaappe aadhiyaaba. Ammanettiyoogaara gayttidaagan, Yihooway oosuwaa waati xeelliyaakko kaallidi beˈana.