1, 2. (a) Mati aqo oyqqidaageeti hidootan naagiyoobi aybee? (b) Ha shemppuwan nuuni pilggana oyshati awugeetee?

 BANTTA bullachchaa gallassi ufayttiya mishira naˈaanne mishira naˈiyo qoppa. Eti banttawu deˈoy sinttappe daroban loˈˈo gidana gi qoppidi ufayttoosona. Eti bantta aqo deˈoy adussa wodiyaa gamˈˈanaagaanne ufayssiyaaba gidanaagaa hidootoosona.

² SHin, daro aqo deˈuwawu doomettay loˈˈo gidikkonne, hegaadan takkenna. Aqo deˈoy adussa wodiyaa gamˈˈanaadaaninne ufayssiyaaba gidanaadan, aqo laggetuyyo Xoossaa kaaletoy koshshees. Hegaa gishshawu, kaallidi deˈiya oyshatu zaaruwaa Geeshsha Maxaafaappe ane pilggoos: Aqo deˈoy maaddiyo amaridabay aybee? Neeni aqo oyqqana koyikko, ne aqo laggiyaa waata maara doorana danddayay? Neeni loˈˈo azina woy machcho waana gidana danddayay? Qassi aqo deˈoy adussa wodiyaa gamˈˈanaadan aybi maaddana danddayii?—Leemiso 3:5, 6 nabbaba.

3. Neeni issi uri ufayttanawu aqo oyqqana koshshees gaada qoppay? Qonccissa.

³ Issi uri ekkana woy gelana xayikko ufayttana danddayenna giidi issoti issoti qoppoosona. SHin hegee tuma gidenna. Aqo oyqqennan deˈiyoogee imota gidana danddayiyoogaa Yesuusi yootiis. (Maatiyoosa 19:11, 12) Qassi  aqo oyqqennan deˈiyoogee maaddiyaaba gidiyoogaa kiitettida PHawuloosi yootiis. (1 Qoronttoosa 7:32-38) Aqo oyqqanaakko agganaakko doorana danddayaasa. Neeni aqo oyqqanaadan ne laggeti, so asay woy wogay nena giddanaadan eeno gaana bessenna.

4. Loˈˈo aqo deˈuwawu deˈiya amarida goˈˈay aybee?

⁴ Aqo deˈoykka Xoossaa imota gidiyoogaanne amarida ogiyan goˈˈiyoogaa Geeshsha Maxaafay yootees. Yihooway koyro bitaniyaa, Addaama hagaadan giis: “Bitanee barkka de7iyoogee lo77o gidenna; taani ayyo injjetiyaabaanne maaddiyaabaa kessana.” (Doomettaabaa 2:18) Addaameyyo machcho gidanaadan Yihooway Hewaano medhdhiis; qassi eti koyro azinanne machcho. Azinaynne machchiyaa naata yelikko, naata dichchanawu eta aqo deˈoy woppay deˈiyoogaa gidana bessees. SHin, aqo deˈuwaa halchchoy naata yeliyoogaa xalla gidenna.—Mazamure 127:3; Efisoona 6:1-4.

5, 6. Aqo deˈoy ‘heezzu achchan dooqettida wodoro’ mala waani gidana danddayii?

⁵ Kawuwaa Solomoni hagaadan giis: “Issuwaa gidiyoogaappe naa77a gidiyoogee lo77o; aissi giikko, eta oosoi issuwaagaappe aadhdhidi, lo77o aifiyaa immanau danddayees. Qassi, naa77aappe issoi kunddikko issoi denttees; shin barkka de7iya urai kunddikkonne a denttiyaabi bainna gishshau, au aayye7ana! . . . Heezzu achchan dooqettida wodoroikka elle duuxxenna.”—Eranchchaa 4:9-12.

⁶ Loˈˈo aqo deˈoy issoy issuwaa maaddiya, minttettiyaanne naagiya naaˈˈu asatu giddon deˈiya aybippenne aadhdhiya laggetetta gidana danddayees. Siiqoy aqo deˈoy minnanaadan oottana danddayees; shin azinaynne machchiyaa Yihoowawu goynnikko, aqo deˈoy hegaappekka aaruwan minnana. Qassi eta aqo deˈoy ‘heezzu  achchan dooqettida wodoro’ mala gidana danddayees. Hegaa mala wodoroy naaˈˈu achcha xallan dooqettida wodoruwaappe keehi mino. Aqo deˈuwan Yihooway deˈikko, aqo deˈoy minnana.

7, 8. Aqo deˈuwaa xeelliyaagan PHawuloosi zoridobay aybee?

⁷ Azinaynne machchiyaa mattumaa gaytettan issoy issuwaa ufayssana danddayoosona. (Leemiso 5:18) SHin, issi uri aqo oyqqiyoy mattumaa gaytettan ufayttana xallaassa gidikko, he uri aqo laggiyaa akeekan waayi doorana. Mattumaa gaytettaa koshshay wolqqaamiyo ‘panttatettaa wodee’ aadhdhi simmin, issi uri ekkana woy gelana bessiyoogaa Geeshsha Maxaafay yootiyoy hegaassa. (1 Qoronttoosa 7:36, NW) He koshshay wolqqaamiyo wodee aadhdhana gakkanaashin ekkennan woy gelennan takkiyoogee loˈˈo. Hegaappe simmin, issi uri maara qoppananne suure dooruwaa doorana danddayees.—1 Qoronttoosa 7:9; Yaaqooba 1:15.

⁸ Neeni aqo oyqqanawu qoppikko, bessiyaagaadan qoppiyoogeenne aqo deˈo ubban metiyaabay deˈiyoogaa eriyoogee loˈˈo. Aqo oyqqiyaageeti ‘bantta bolli waayiyaa ehaanaagaa’ PHawuloosi yootiis. (1 Qoronttoosa 7:28) Keehi loˈˈo aqo deˈuwankka metoy merettees. Hegaa gishshawu, neeni aqo oyqqanawu qofaa qachchikko, ne aqo laggiyaa akeekan doorana bessees.

9, 10. Nuuni Yihoowawu goynnenna ura ekkikko woy gelikko aybi gakkanee?

⁹ Azina woy machcho dooriyo wode, ‘Ammanenna asatuura zuppetoppite’ woy waaxettoppite giya, keehi koshshiya Geeshsha Maxaafay yootiyo maaraa hassayana bessees. (2 Qoronttoosa 6:14) Ha leemisoy goshshanchchati  oottiyo meeziyaara gayttidaba. Naaˈˈu meheti geesan woy wolqqan keehi dummatikko, goshshanchchay gadiyaa goyanawu eta issippe waaxenna. Hegee naaˈˈu mehetikka qohettanaadan oottiyo gishshawu, kehatetta gidenna. Hegaadan, Yihoowawu goynniya uri Yihoowawu goynnenna ura ekkiyaaba woy geliyaaba gidikko, daro metoy gakkana danddayees. Yaatiyo gishshawu, Geeshsha Maxaafay nuuni ‘Godaa ammaniya asa’ ekkanaadan woy gelanaadan loˈˈo zoriyaa yootees.—1 Qoronttoosa 7:39.

¹⁰ Issi issitoo, barkka deˈiyoogaappe Yihoowawu goynnenna ura ekkiyoogee woy geliyoogee loˈˈo giidi issi issi Kiristtaaneti qoppoosona. SHin, nuuni Geeshsha Maxaafaa zoriyaa xaasayi xeellikko, darotoo waayeenne azzanttiyaabay gakkees. Nuuni Yihoowawu goynniyaageeta gidiyo gishshawu, ayyo haggaaziyoogee nu deˈuwan keehi koshshiyaaba. Ne deˈuwan keehi koshshiyaabaa ne aqo laggiyaara oottana danddayennaba gidiyaakko, neeyyo aybi siyettanee? Yihoowa siiqennanne ayyo goynnenna ura ekkiyoogaappe woy geliyoogaappe, aqo oyqqennan deˈanawu daroti qofaa qachchidosona.—Mazamure 32:8 nabbaba.

11. Neeni aqo laggiyaa waata maara doorana danddayay?

¹¹ SHin, issi uri Yihoowawu goynniyo gishsha xallawu neeyyo loˈˈo aqo lagge gidees giyoogaa gidenna. Neeni aqo oyqqanawu qoppikko, tumuppe dosiyo ura koya, qassi aara loytta laggeta. Neeni oottanawu koyiyoogaa malabaa oottana koyiyaanne Xoossaayyo haggaaziyoogaa kaseyiya ura demmana gakkanaashin naaga. Ammanettida ashkkaray giigissiyo, aqo deˈuwaa xeelliyaagan maaddiya zoree deˈiyo xuufeta nabbabanawunne wotta dentta qoppanawu wodiyaa bazza.—Mazamure 119:105 nabbaba.

12. Yelidaageeti doorin aqo oyqqiyoogaa xeelliyaagan Geeshsha Maxaafaappe ay tamaarana danddayiyoo?

 ¹² Yelidaageeti bantta naˈaayyo woy naˈeeyyo aqo lagge dooriyoogee issi issi wogatun meeze gididaba. Yelidaageeti bantta naˈawu loˈˈobaa eriyaabadan qoppoosona. He meezee beni wode keehi erettidaba. Hegaa gishshawu, intte soo asay he meeziyaa kaallanawu doorikko, ay mala eeshshay deˈiyo ura koyana bessiyaakko eranaadan Geeshsha Maxaafay yelidaageeta maaddana danddayees. Leemisuwawu, Abrahaami Yisaaqayyo machchiyo doorido wode, I miishshaa woy aannisaa kaseyibeenna; I kaseyidobay A Yihoowa siiqiyoogaa.—Doomettaabaa 24:3, 67; Wurssetta Qofaa 25 xeella.

13-15. (a) Issi attumaagee loˈˈo azina gidanawu waani giigettana danddayii? (b) Issi maccaara loˈˈo machcho gidanawu waana giigettana danddayay?

¹³ Neeni aqo oyqqanawu qoppikko, giigettana bessees. Neeni giigettaas gaada qoppana danddayaasa; shin aqo oyqqanawu giigettiyoogaa giyoogee tumuppe aybakko ane pilggoos. Zaaroy nena garamissana danddayees.

¹⁴ Azinatussinne machchotussi son aawatettay dumma dumma gidiyoogaa Geeshsha Maxaafay yootees. Yaatiyo gishshawu, aqo oyqqanawu giigettiyoogee attuma asawu woy macca asawu eta hanotaadan dumma dumma gidiyoogee bessiyaaba. Issi attumaagee aqo oyqqanawu qoppikko, so asawu huuphe gidanawu I giigettidaakkonne bana oychchana koshshees. Issi azinay ba machcheessinne ba naatussi asatettaaninne haraban koshshiyaabaa kunttanaadan Yihooway koyees. Ubbaappe aaruwan, azinay goynuwaara gayttidaagan ba soo asaa kaalettana bessees. Ba soo asawu koshshiyaabaa kunttenna asi ‘ammanenna asappe aadhdhidi iita’ gidiyoogaa Geeshsha Maxaafay yootees. (1 Ximootiyoosa 5:8) Hegaa gishshawu, neeni ekkanawu qoppiya ura gidikko, kaallidi deˈiya Geeshsha Maxaafay yootiyo maaraa neeni waatada oosuwan peeshshana danddayiyaakko qoppa: “Kasetada ne gadiyaa ootta; kattaakka zera; hegaappe guyyiyan, ne keettaa keexxa.” Hegaa giyoogee neeni aqo oyqqanaappe kase, Yihooway koyiyoogaa mala azina gidana danddayiyaakkonne akeekana bessees giyoogaa.—Leemiso 24:27.

¹⁵ Neeni gelanawu qoppiya ura gidikko, machcho, qassi geella aayo gidiyo aawatettawu giigettidaakkonne nena oychchana koshshees. Loˈˈo machchiyaa ba azinaassinne ba naatussi koshshiyaabaa kunttiyo daro ogetuppe  amaridaagaa Geeshsha Maxaafay yootees. (Leemiso 31:10-31) Ha wodiyan, daro attumaageetinne maccaageeti aqo laggee banttassi oottanaba xallaa qoppoosona. SHin, nuuni nu aqo laggiyaassi oottana danddayiyoobaa qoppanaadan Yihooway koyees.

16, 17. Neeni aqo oyqqanawu qoppiyaaba gidikko, ay wotta dentta qoppana bessii?

¹⁶ Neeni aqo oyqqanaappe kase, azinatanne machchota xeelliyaagan Yihooway yootiyoobaa wotta dentta qoppa. So asawu huuphe gidiyoogee issi uri asatettan woy qofan addettana danddayees giyoogaa gidenna. Ba soo asawu loˈˈo huuphe gidida uri I heemmiyoogeeta ubbatoo siiqiyaanne etawu kehiya Yesuusa leemisuwaa kaallees. (Efisoona 5:23) Issi maccaasiyaa ba azinay kuuyiyoobaa maayanawunne aara hasheta oottanawu waatanaakko loytta qoppana koshshees. (Roome 7:2) A nagaranchcha gidida azinawu haarettiyoogan ufayttana danddayiyaakkonne bana oychchana bessees. A ufayttana danddayennabadan qoppikko, aqo oyqqennan takkiyoogee iyyo loˈˈo gidiyoogaa A kuuyana danddayawusu.

¹⁷ Azinatinne machchoti bantta ufayssaappe aaruwan bantta aqo laggiyaa ufayssaa qoppana koshshees. (Piliphphisiyuusa 2:4 nabbaba.) PHawuloosi hagaadan giis: “Intte huuphiyan huuphiyan intte maccaasaa intte huuphedan siiqanau bessees; maccaasa ubbaikka bantta azinaa azinaa bonchchanau bessees.” (Efisoona 5:21-33) Attuma asaykka macca asaykka siiqettananne bonchchettana koyees. SHin aqo deˈoy giiga gidanawu, issi bitanee A machchiyaa A bonchchiyoogaa erana koshshees; qassi issi machchiyaa I azinay O siiqiyoogaa erana koshshees.

18. Ekkanawu woy gelanawu qoppidi issippe wodiyaa aattiyo wode attumaageenne maccaara naagettana koshshiyoy aybissee?

¹⁸ Ekkanawu woy gelanawu qoppidi issoy issuwaa loytti  eranawu issi attumaageenne maccaara issippe aattiyo wodee ufayssiyaagaa gidana bessees. Qassi he wodee eti bantta deˈo layttan issippe deˈanawu tumuppe koyiyaakkonne kuuyana mala hanana danddayiyaabaanne tumubaa haasayiyo wode. Ekkanawu woy gelanawu qoppidi issippe wodiyaa aattiyo wode, issi attumaageenne maccaara issoy issuwaara haasayiyoogaa tamaaroosona; qassi issoy issuwaa wozanan deˈiyaabaa eranawu baaxetoosona. Eta dabbotay keehi minniyo wode, eti issoy issuwaa siiqiyoogee wottin deˈiyaaba. SHin eti aqo oyqqanaappe kase, pokkobaa oottennaadan bantta siiquwaa qonccissiyo  wode naagettana koshshees. Tumu siiqoy eti banttana naaganaadan, qassi issoy issuwaaranne Yihoowaara dabbotido dabbotaa mooriyaabaa oottennaadan maaddana.—1 Tasalonqqe 4:6.

19, 20. Kiristtaaneti aqo deˈuwaa waati xeelliyoonaa?

¹⁹ Daro maxaafatinne pilmeti yootiyo taarikee gitanne ufayssiya bullachchan polettees. SHin tumu deˈuwan, bullachchay biron doometta. Yihooway aqo laggeti shaahettennan deˈanaadan halchchiis.—Doomettaabaa 2:24.

²⁰ Ha wodiyan, daroti aqo deˈoy guutta wode xallawu takkiyaabadan qoppoosona. Aqo oyqqiyoogeenne paraman shaahettiyoogee metennaba. Metoy merettiyo wode bantta aqo laggiyaa aggidi baanawunne paraman shaahettanawu issoti issoti qoppoosona. SHin Geeshsha Maxaafay yootiyo heezzu achchan dooqettida mino wodoruwaabaa hassaya. Hegaa mala wodoroy wolqqaamabaa qachchinkka duuxxenna. Nuuni Yihooway maaddana mala woossikko, nu aqo deˈoy adussa wodiyawu gamˈˈana danddayees. Yesuusi, “Xoossai issippe gattidoogaa asi shaakkoppo” yaagiis.—Maatiyoosa 19:6.

21. Issi azinaynne machchiyaa issoy issuwaa siiqanaadan aybi maaddanee?

²¹ Nuuni ubbay minonne shugo gidiyoobay deˈees. Harati, ubba qassi nu aqo laggee shugo gididobaa ubbatoo qoriyoogee metennaba. SHin nuuni hegaadan oottikko, ufayttokko. Hara baggaara qassi, nu aqo laggiyaa loˈˈo eeshshaa xeellikko, nuuni aqo deˈuwan ufayttana danddayoos. Hegee hanana danddayiyaabee? Ee! Yihooway  nuuni nagaranchcha gidiyoogaa erikkonne, nu loˈˈo eeshshaa xeellees. I hegaadan oottennaakko hananabaa qoppa! Mazamurawee, “Abeet GODAU, neeni nu nagaraa mazggafan xaafidaakko, abeet Godau, woni ooni pirddaappe attanau danddayii?” yaagiis. (Mazamure 130:3) Azinatinne machchoti bantta aqo laggetuyyo deˈiya loˈˈo eeshshaa xeelliyoogaaninne eesuwan atto giyoogan Yihoowa milatana danddayoosona.—Efisoona 4:32 nabbaba.

22, 23. Aqo oyqqidaageetuyyo Abrahaaminne Saara waani loˈˈo leemiso gidiyoonaa?

 ²² Gamˈˈidi, aqo deˈoy minnana danddayees. Abrahaaminne Saara aqo deˈuwan daro wodiyawu ufayttidi deˈidosona. Abrahaami Ura kataman deˈiya bantta keettaa aggidi baanaadan Yihooway ayyo yootido wode, Saariyyo layttay 60⁠ppe darennan aggenna. A ba injje keettaa aggada dunkkaaniyan deˈidoogee iyyo ay keena deexxidaakko qoppa. SHin Saara ba azinaayyo loˈˈo laggenne loˈˈo machcho, qassi A wozanappe ba azinaa bonchchaasu. Hegaa gishshawu, A Abrahaami kuuyidobaa maayettaasu; qassi hegee polettanaadan maaddaasu.—Doomettaabaa 18:12; 1 PHeexiroosa 3:6.

²³ Loˈˈo aqo deˈo giyoogee azinaynne machchiyaa ubbaban muletoo maayettoosona giyoogaa gidenna. Issitoo Abrahaami Saariira maayettibeenna wode, Yihooway awu, “Saara neeyyo yootiyoobaa ubbaa siya” yaagiis. Abrahaami hegaadan oottiis; qassi hegee loˈˈobaa demissiis. (Doomettaabaa 21:9-13) Neeninne ne aqo laggee issi issitoo maayettana xayikko, hidootaa qanxxoppa. Intte maayettenna wodekka issoy issuwaa siiquwaaninne bonchchuwan oyqqiyoogee keehi koshshiyaaba.

24. Nu aqo deˈoy Yihoowa waati bonchchissana danddayii?

²⁴ Kiristtaane gubaaˈiyan, bantta aqo deˈuwan ufayttiya shaˈan qoodettiya azinatinne machchoti deˈoosona. Neeni aqo oyqqanawu koyikko, aqo laggiyaa dooriyoogee ne kuuyiyo aybippenne aadhdhiyaaba gidiyoogaa hassaya. Hegee ne deˈuwaa laammiyaaba gidiyo gishshawu, kaaletuwaa demmanawu Yihoowa woossa. Yaatikko, neeni aqo laggiyaa akeekan doorana, aqo oyqqanawu loytta giigettana, qassi Yihoowa bonchchissiya minonne siiqo dabbotaa medhdhana.