Xoossaa Yihoowanne A Qaalaa Geeshsha Maxaafaa siiqiya asawu:

Yesuusi, “Intte tumatettaakka erana; qassi tumatettai inttena ailletettaappe kessana” yaagiis. (Yohaannisa 8:32) Geeshsha Maxaafaappe tumaa koyro erido wode neeyyo aybi siyettidaakko qoppa! Wordduwan kumida alamiyan nuuni tumaa tamaarana danddayiyoogaa eriyoogee keehi ufayssiyaaba.—2 Ximootiyoosa 3:1.

Xoossaa Yihooway nuuni tumaa eranaadan koyees. Nuuni asaa siiqiyo gishshawu tumaabaa etawu yootana koyoos. SHin Xoossawu oottanawu hegaa xallay gidenna. Nuuni Yihooway kessido maaraa wozanappe bonchchiyo gishshawu, Kiristtaanetuppe koyettiyaagaadan deˈanawu baaxetana bessees. Yesuusi nuuni Xoossaa siiqiyoogaa bessiyo waanna ogiyaa yootiis. I hagaadan giis: “Taani ta Aawaa azazuwaa naagada a siiquwan de7idoogaadan, inttekka ta azazuwaa naagikko, ta siiquwan de7ana.”—Yohaannisa 15:10.

Yesuusi ba Aawaa wozanappe siiqeesinne I oottanaadan Aaway koyiyo ubbabaa oottees. Nuuni Yesuusa leemisuwaa kaallidi deˈiyaaba gidikko, Yihooway nuna siiqana; nuunikka tumuppe ufayttana. Hegee Yesuusi, “Intte hegaa eridi oottiyaabaa gidikko anjjettidaageeta” giidoogaa bessiyaaba.—Yohaannisa 13:17.

Geeshsha Maxaafay yootiyo tumaadan neeni waana deˈanaakkonne Xoossaa dabbo waana gidanaakko tamaaranawu ha maxaafay maaddana giidi hidootoos. Neeni kaseegaappe aaruwan Xoossaa siiqanaadaaninne ‘merinaa deˈuwaa naagaydda, ne huuphiyaa Xoossaa siiquwan wottanaadan’ Yihoowa woossoos.—Yihudaa 21.