1-3. (a) Yihooway nuussi immido loˈˈo imotatuppe issoy aybee? Nuuni hegaa bessenna ogiyan waati goˈettana danddayiyoo? (b) Nuuni haasayiyo imotaa waati goˈettana bessii?

 ISSI aaway ba yelaga naˈawu bishkkiliitiyaa immees. I he dumma imotaa ba naˈawu immidoogan ufayttees. SHin he naˈay akeeki baynna hanotan laaggidi bishkkiliitiyan hara ura dechchikko, qassi bana qohikko shin? Aawayyo aybi siyettanee?

² Yihooway ‘loˈˈo imo ubbaanne kumetta woyto ubbaa’ Immiyaagaa. (Yaaqooba 1:17) Haasayiyoogee I nuussi immido loˈˈo imotatuppe issuwaa. Haasayiyo imotay nu qofaanne nuussi siyettiyaabaa yootanawu nuna maaddees. Nuuni asaa maaddiyaabaanne etawu loˈˈobay siyettanaadan oottiyaabaa haasayana danddayoos. SHin nuuni haasayiyoobay harata qohananne eti azzananaadan oottana danddayees.

³ Haasayay keehi wolqqaamaba; qassi haasayiyo imotaa nuuni waati loytti goˈettanaakko Yihooway nuna tamaarissees. I hagaadan gees: “Intte haasayai siyiyaageeta go77ana mala, koshshiyoogaadan minttettiya lo77o qaalai intte doonaappe kiyoppe attin, iita qaalai mulekka kiyoppo.” (Efisoona 4:29) Xoossay immido ha imotaa  A ufayssiyaanne harata minttettiya ogiyan nuuni waati goˈettana danddayiyaakko ane pilggoos.

4, 5. Haasayawu deˈiya wolqqaabaa Geeshsha Maxaafaappe nuuni ay tamaarana danddayiyoo?

⁴ Haasayawu wolqqay deˈees; hegaa gishshawu, nuuni ay haasayanaakkonne waati haasayanaakko naagettana koshshees. Leemiso 15:4y, “SHonggaara de7iya lo77o haasayai de7o mittaa mala; shin geella haasayai ayyaanaa kinchchees” yaagees. Loˈˈiya mittay gazddissiyoogaadan, keha qaalay siyiya ura woppissees. Hara baggaara qassi, iita qaalay harata qoheessinne azzanttees.—Leemiso 18:21.

⁵ Leemiso 12:18y, “Akeekennan haasayiyo haasayai cuphedan caddees” yaagees. Iita qaalay harati azzananaadan oottananne dabbotaa moorana danddayees. Issi uri iita qaalaa haasayidi nena keehi qohido wodiyaa haasayana danddayaasa. SHin, he xiqisee gujjidi hagaadan gees: “Aadhdhida eranchchaa inxxarssai pattees.” Akeekan haasayiyo haasayay azzaniya wozanaa pattananne issi ura hanotaa bala ogiyan akeekidoogaa gaasuwan moorettida dabbotaa giigissanawu maaddana danddayees. (Leemiso 16:24 nabbaba.) Nuuni haasayiyoobay harata qohiyoogaa akeekikko, nuuni haasayiyooban naagettana.

6. Haasayiyooban naagettiyoogee keehi baaxeyiyaaba gidiyoy aybissee?

⁶ Nuuni ubbay nagaranchcha gidiyoogee haasayiyooban naagettanaadan oottiya hara gaaso. “Asi wozanan qoppiyoobai ubbai iita,” qassi nuuni haasayiyoobay darotoo nu wozanan deˈiyaabaa qonccissees. (Doomettaabaa 8:21; Luqaasa 6:45) Nuuni haasayiyooban naagettiyoogee  keehi baaxeyiyaaba gidana danddayees. (Yaaqooba 3:2-4 nabbaba.) SHin nuuni harata kaseegaappe loˈˈo hanotan waati haasayissanaakko ubbatoo baaxetana koshshees.

7, 8. Nuuni haasayiyoobay Yihoowaara nu dabbotido dabbotaa waati moorana danddayii?

⁷ Qassi nuuni haasayiyoobawunne hegaa waati haasayiyaakko Yihoowa sinttan nuuni oyshettiyo gishshawu haasayiyooban naagettana koshshees. Yaaqooba 1:26y hagaadan gees: “Ba inxxarssaa naagennan bana cimmiiddi, bau Xoossaa ammaniyoobaa milatiyo urai de7ikko, a ammanoi mela.” “Mela” geetettidi birshshettida koyro qaalay “pattennaba” geetettanakka danddayees. (1 Qoronttoosa 15:17) Nuuni haasayiyooban naagettennaba gidikko, Yihoowaara nu dabbatido dabbotay moorettanaadan, ubba qassi he dabbotay duuxxanaadan oottana danddayoos.—Yaaqooba 3:8-10.

⁸ Nuuni ay haasayanaakko, qassi waati haasayanaakko  naagettanaadan oottiya daro gaasoy deˈiyoogee qoncce. Haasayiyo imotaa nuuni Yihooway koyiyoogaadan goˈettanawu, nuuni ay mala haasayaappe naagettana koshshiyaakko erana bessees.

9, 10. (a) Ha wodiyan alamiyan meeze gidida haasayay awugee? (b) Nuuni yeellayiya haasayaappe naagettana koshshiyoy aybissee?

⁹ Ha wodiyan yeellayiya, woy geeshsha gidenna haasayay meeze gididaba. Daroti asay bantta qofaa akeekanaadan cayananne pokkobaa haasayana bessiyaabadan qoppoosona. Asaa miichchiyaageeti pokkonne yeellayiya haasayaa darotoo haasayidi asay miiccanaadan oottoosona. SHin, kiitettida PHawuloosi hagaadan giis: “Intte qassi hanqquwaa, yiilluwaa, ixuwaa, intte doonaappe kiyiya cashshaanne yeellayiya haasayaa hageeta ubbaa intteppe xaissite.” (Qolasiyaasa 3:8) Qassi I “pattenna qiree” tumu Kiristtaanetu ‘giddon mule siyettana’ bessennaagaakka yootiis.—Efisoona 5:3, 4.

¹⁰ Yihoowaynne A siiqiyaageeti yeellayiya haasayan ufayttokkona. Hegee geeshsha gidennaba. ‘Asatettaa oosuwaappe’ issoy “tunatettaa” gidiyoogaa Geeshsha Maxaafay yootees. (Galaatiyaa 5:19-21) ‘Tunatettay’ nagara gidida dumma dumma darobaa bessiyaaba gidana danddayees; qassi issi tuna meezee hara tunabaa kaalettana danddayees. Issi uri keehi pokko haasayaanne yeellayiya haasayaa meeze oottidi haasayiyoogaa aggana xayikko, hegee I hegaappe simmin gubaaˈiyaa yara gidana bessennaagaa qonccissiyaaba gidana danddayees.—2 Qoronttoosa 12:21; Efisoona 4:19; Wurssetta Qofaa 23 xeella.

11, 12. (a) Zigirssay aybee? (b) Nuuni issi ura sunttaa moorennaadan naagettana bessiyoy aybissee?

¹¹ Nuuni zigirssaappekka naagettana koshshees. Nuuni  haratubaa eranawu koyiyoogee, qassi laggetubaanne soo asaabaa haasayiyoogee wottin deˈiyaaba. Koyro xeetu layttankka, beni Kiristtaaneti bantta ishanttinne michchontti waani deˈiyaakko, qassi eta maaddanawu eti ay oottana danddayiyaakko eranawu koyidosona. (Efisoona 6:21, 22; Qolasiyaasa 4:8, 9) SHin hara uraabaa haasayiyoogee akeekennan zigirssa gidana danddayees. Nuuni zigirssaa zaarettidi haasayikko, tuma gidennabaa woy xuura gididabaa haasayana danddayoos. Nuuni naagettana xayikko, he iita haasayay worddo mooto woy sunttaa mooriyooba gidana danddayees. Parisaaweti Yesuusi oottibeennaban A mootido wode eti A sunttaa mooridosona. (Maatiyoosa 9:32-34; 12:22-24) Sunttaa mooriyoogee issi ura hayttaa bashshees, ooyettanaadaaninne azzananaadan oottees, qassi dabbotay duuxxanaadan oottees.—Leemiso 26:20.

¹² Yihooway nuuni haasayiyoobay harata maaddanaadaaninne minttettanaadan koyeesippe attin, nu laggeti nuussi morkke gidanaadan oottiyaabaa haasayanaadan koyenna. Yihooway “ishatu giddon ooshshaa medhdhiya” asata ixxees. (Leemiso 6:16-19) Sunttaa koyro mooriday Seexaanaa Dabloosa; I Xoossaa sunttaa mooriis. (Ajjuutaa 12:9, 10) Ha wodiyan alamiyan asay issoy issuwaabaa worddotiyoogee meeze gididaba. SHin Kiristtaane gubaaˈiyan hegaadan gidana bessenna. (Galaatiyaa 5:19-21) Hegaa gishshawu, nuuni haasayiyoobawu naagettananne haasayanaappe kase ubbatoo qoppana bessees. Issi uraabaa issibaa zaarettada haasayanaappe kase, hagaadan nena oychcha: ‘Taani haasayanabay tumee? Hegee kehatetta bessiyaabee? Hegee maaddiyaabee? Taani haasayiyoobaa he uri siyanaadan koyiyaanaa? Issi uri tabaa hegaadan haasayiyaakko tawu aybi siyettanee?’—1 Tasalonqqe 4:11 nabbaba.

13, 14. (a) Yiilloyiya haasayay asay waananaadan oottana danddayii? (b) Cashshay aybee? Kiristtaaneti harata cayennaadan naagettana koshshiyoy aybissee?

 ¹³ Issi issitoo, guyyeppe zilˈˈettanaadan oottiyaabaa nuuni haasayana danddayoos. SHin harata boriyoogee woy iitabaa woykko qohiyaabaa haasayiyoogee nuuyyo meeze gidanaadan koyokko. Nuuni yiilloyiya haasayaa haasayana bessenna. Yiilloyiya haasayay asaa bonchchennaadaaninne eti banttana pattennabadan xeellanaadan oottees. Naati eesuwaara qohettana danddayiyo gishshawu, nuuni haasayiyooban eta qohennaadan naagettana koyoos.—Qolasiyaasa 3:21.

¹⁴ Geeshsha Maxaafay keehi yiilloyiya haasaya gidida cashshaappe nuuni naagettanaadan yootees. PHawuloosi hagaadan giis: “Ixo hanotettaa, yiilluwaa, hanqquwaa, waasuwaanne cashshaa ubbaa . . . intteppe xaissite.” (Efisoona 4:31) Cashshay harata qohanawu qoppidi ubbatoo haasayiyooba. Issi uri ba aqo laggiyaa woy ba naata qohanawu hegaadan cayikko, hegee keehi azzanttiyaaba! Issi uri harata cayiyoogaa aggana xayikko, gubaaˈiyaa yara gidana danddayenna. (1 Qoronttoosa 5:11-13; 6:9, 10) Nuuni yeellayiyaabaa, worddobaa, woy iitabaa haasayiyaaba gidikko, Yihoowaaranne haraatuura nuuyyo dabbotay moorettanaagaa tamaarida.

15. Ay mala haasayay dabbotaa minttii?

¹⁵ Haasayiyo imotaa Yihooway koyiyoogaadan nuuni waati goˈettana danddayiyoo? Geeshsha Maxaafay nuuni haasayana bessiyaabanne bessennaba ubbabaa yootennaba gidikkokka, ‘minttettiya loˈˈo qaala’ xallaa nuuni haasayanaadan yootees. (Efisoona 4:29) Minttettiya haasayay geeshsha, kehanne tuma. Nuuni haasayiyooban  harata minttettanaadaaninne maaddanaadan Yihooway koyees. Hegee keehi baaxeyiyaaba gidana danddayees. Iitabaanne pattennabaa haasayiyoogaappe loˈˈobaa haasayiyoogee baaxeyiyaaba. (Tiitu 2:8) Nuuni haasayiyooban harata minttettana danddayiyo issi issi ogeta ane pilggoos.

16, 17. (a) Nuuni harata galatana bessiyoy aybissee? (b) Nuuni oona galatana danddayiyoo?

¹⁶ Yihoowaykka Yesuusikka keehi galatoosona. Nuuni eta milatanawu koyoos. (Maatiyoosa 3:17; 25:19-23; Yohaannisa 1:47) Nuuni issi ura wozanappe minttettiya ogiyan galatanawu ayyo loytti qoppiyaageeta gidana bessees. Leemiso 15:23y, “Haasayaa likke wodiyan haasayiyoogee aiba lo77obee!” yaagees. Nuuni minni oottido gishshawu issi uri wozanappe nuna galatiyo wode woy issibaa oottido gishshawu nuna nashshiyo wode nuuni minettoos.—Maatiyoosa 7:12 nabbaba; Wurssetta Qofaa 27 xeella.

¹⁷ Neeni haratuyyo deˈiya loˈˈobaa xeelliyoogaa meezetikko, eta wozanappe galatanawu metootakka. Leemisuwawu, gubaaˈiyan deˈiya issi uri ba haasayaa loytti giigettiyoogaa woy shiiquwan qofaa yootanawu baaxetiyoogaa akeekana danddayaasa. Issi yelagay timirtte keettan tumawu loytti exatiyoogaa woy issi cimida uri ubbatoo haggaaziyoogaa akeekana danddayaasa. Neeni galatiyoogee etawu keehi koshshidaba gidennan aggenna. Azinay ba maccaasiyo siiqiyoogaanne nashshiyoogaa yootiyoogeekka keehi koshshiyaaba. (Leemiso 31:10, 28) Mittawunne maatawu pooˈoynne haattay koshshiyoogaadan, nashshiyoogee asawu koshshees. Nashshiyoogee naatuyyo keehi koshshees. Eta loˈˈo eeshshaa gishshawunne eti oottiyoobaa gishshawu eta galatite. Galatiyoogee eti  xalanaadan, qassi likkebaa oottanawu kaseegaappe aaruwan baaxetanaadankka oottana danddayees.

18, 19. Nuuni harata minttettanawu wozanappe baaxetana koshshiyoy aybissee? Nuuni hegaa waati oottana danddayiyoo?

¹⁸ Nuuni harata minttettiyo wode, Yihoowa leemisuwaa kaalloos. ‘Banttana ziqqi oottiyaageetuyyoonne bantta oottido nagarawu azzanidi simmiyaageetuyyo’ I wozanappe qoppees. (Isiyaasa 57:15) Nuuni ubbatoo ‘issoy issuwaa minttettanaadaaninne’ ‘yayyiyaageeta [“unˈˈettiyaageeta,” NW] minttettanaadan’ Yihooway koyees. (1 Tasalonqqe 5:11, 14) Nuuni hegaadan oottanawu baaxetiyo wode, nu baaxiyaa I akeekeesinne nashshees.

¹⁹ Gubaaˈiyan deˈiya issi uri hidootaa qanxxiyoogaa woy  unˈˈettiyoogaa akeekana danddayaasa. Maaddana danddayiyaabaa neeni ay haasayana danddayay? Neeni metuwaa giigissennan aggana danddayikkonne, neeni awu qoppiyoogaa I eranaadan oottana danddayaasa. Leemisuwawu, neeni aara woy iira wodiyaa aattana danddayaasa. Neeni minttettiya issi xiqisiyaa Geeshsha Maxaafaappe nabbabana danddayaasa; ubba qassi woossana danddayaasa. (Mazamure 34:18; Maatiyoosa 10:29-31) Gubaaˈiyan deˈiya eta ishanttinne michchontti eta siiqiyoogaa ammanettanaadan hegaa mala asatussi yoota. (1 Qoronttoosa 12:12-26; Yaaqooba 5:14, 15) Neeni wozanappe haasayiyoogaanne hegaa ammaniyoogaa bessiya ogiyan haasaya.—Leemiso 12:25 nabbaba.

20, 21. Asay zoriyaa metootennan ekkanaadan oottiyaabay aybee?

 ²⁰ Nuuni loˈˈo zoriyaa zoriyo wodekka, harata minttettoos. Nuuni nagaranchcha gidiyo gishshawu, nuussi ubbawu issi issitoo zoree koshshees. Leemiso 19:20y hagaadan gees: “Zoriyaa siya; timirttiyaakka ekka. Yaatikko, neeni wurssettan aadhdhida eranchcha gidana.” Zoriyaa zorana woy immana danddayiyay cimatu xalla gidokkona. Yelidaageeti bantta naata tamaarissana koshshees. (Efisoona 6:4) Qassi michchontti issoy issuwaa loˈˈo zoriyaa zorana danddayoosona. (Tiitu 2:3-5) Nuuni nu ishanttanne michchontta siiqiyo gishshawu, eti azzananaadan oottenna ogiyan eta zorana bessees. Yaatanawu nuna aybi maaddana danddayii?

²¹ Neeni ekkanawu metenna ogiyan issi uri loˈˈo zoriyaa nena zorido wodiyaa hassayennan aggakka. He zoree loˈˈo gidanaadan oottidabay aybee? He uri neessi wozanappe qoppidobadan neeyyo siyettana danddayees. Woy qassi he uri nena haasayissidoy kehatettaananne siiquwaana gidana danddayees. (Qolasiyaasa 4:6) Zoree imettidoy Geeshsha Maxaafaappe gidana danddayees. (2 Ximootiyoosa 3:16) Nuuni zoriyaa immiyoy Geeshsha Maxaafaappe nabbabidi gidin gidana xayin, nuuni zoriyo ay zoriyawukka denddoy Geeshsha Maxaafaa gidana bessees. Ooninne ba qofaa harati ekkanaadan giddana woy ba qofaara maayanaadan xiqiseta geellayidi goˈettana bessenna. Neeyyo zoree imettido ogiyaa hassayiyoogee neeni harata zoriyo wode nena maaddana danddayees.

22. Haasayiyo imotaa neeni waata goˈettana koyay?

²² Haasayiyoogee Xoossaa imota. Nuuni A siiqiyoogee hegaa maara goˈettanaadan oottana bessees. Haasayawu qohiyo woy minttettiyo wolqqay deˈiyoogaa hassaya. Yaatikko, nuuni harata minttettiyaabaa haasayanawu nuuyyo danddayettida ubbabaa ane oottoos.