1-3. (a) Leemiso 13:20⁠ppe ay tamaariyoo? (b) Nuuni nu laggeta akeekan doorana koshshiyoy aybissee?

 GUUTTA naˈi ba aawaa woy ba aayyiyo waati akeekan xeelliyaakko beˈa eray? I haasayaa doommanaappe kasekka, beˈiyo ubbabaanne siyiyo ubbabaa akeekees. I gitatiyo wode, aynne baaxetennan ba aawaanne aayyiyo qulliyoogaa doommees. Gita asaykka eti daro wodiyaa issippe aattiyo asatuugaadan qoppiyoogeenne eta qulliyoogaa doommiyoogee garamissiyaaba gidenna.

² Leemiso 13:20y, “Aadhdhida eranchcha asatuura hemettiya asi aadhdhida eranchcha gidees” yaagees. Ha xiqisiyan, issi uraara ‘hemettiyoogaa’ geetettida qofay aara wodiyaa aattiyoogaa qonccissees. Hegaa giyoogee he uraa matan takkiyoogaa xalla gidenna. Geeshsha Maxaafaa eranchcha gidida issi bitanee issi uraara hemettiyoogaa giyoogee he uraa siiqiyoogaanne aara kaseegaappe aaruwan laggetiyoogaa bessiyaaba gidiyoogaa yootiis. Nuuni daro wodiyaa issippe aattiyoogeeta, ubba qassi etaara laggetiyoogeeta darotoo kaalloos.

³ Nu laggeti nuna maaddana woy qohana danddayoosona. Leemiso 13:20y gujjidi hagaadan gees: “Eeyya asatuura hemettiya [“zuppetiya,” NW] asi metuwan  gelees.” Ibraawettuwan, issi uraara ‘zuppetiyoogaa’ giyoogee he uraara ‘laggetiyoogaa’ bessiyaaba gidana danddayees. (Leemiso 22:24; Daannata 14:20) Xoossaa siiqiya laggeti nuuni awu ammanettidi deˈanaadan nuna minttettoosona. Nuuni nu laggeta akeekan dooranaadan maaddana mala, Yihooway ba dabbo oottidi dooriyoy ay mala asakko ane pilggoos.

4. Xoossaa dabbo gidiyoogee gita maata giyoy aybissee? Yihooway Abrahaama “ta dabbuwaa” giidoy aybissee?

⁴ Ubbabaa Haariya Yihooway, nuuni A dabbo gidanaadan koyees. Hegee gita maata. Yihooway ba dabbota akeekan doorees. I bana siiqiyaageetanne bawu ammanettiyaageeta doorees. Abrahaamabaa qoppa. I Xoossawu aybanne oottanawu koyiis. Abrahaami ammanettiyaagaanne azazettiyaagaa gidiyoogaa darotoo bessiis. I ba naˈaa Yisaaqa ba dosan yarshshanawukka eeno giis. “Xoossai Yisaaqa harai atto, haiquwaappekka pattanau danddayiyoogaa” Abrahaami ammaniis. (Ibraawe 11:17-19; Doomettaabaa 22:1, 2, 9-13) Abrahaami ammanettido gishshawunne azazettido gishshawu, Yihooway A, “Ta dabbuwaa” yaagiis.—Isiyaasa 41:8; Yaaqooba 2:21-23.

5. Yihooway bawu ammanettiyaageeta waati xeellii?

⁵ Yihooway ba dabbota xoqqu ootti xeellees. A dabboti hara aybippenne aaruwan awu ammanettidi deˈanawu koyoosona. (2 Sameela 22:26 nabbaba.) Eti A siiqiyo gishshawu, ayyo ammanettoosonanne azazettoosona. Geeshsha Maxaafay Xoossay bawu azazettiya ‘suuretuyyo ulottiyoogaa’ yootees. (Leemiso 3:32) Yihooway ba dabboti ba ‘dunkkaaniyan’ imatta gidanaadan  shoobbees. I baayyo eti goynnanaadaaninne awudenne A woossanaadan shoobbees.—Mazamure 15:1-5.

6. Nuuni Yesuusa siiqiyoogaa waati bessana danddayiyoo?

⁶ Yesuusi hagaadan giis: “Tana siiqiya ooninne ta qaalaa naagana; ta Aawai a siiqana.” (Yohaannisa 14:23) Hegaa gishshawu Yihoowa dabbo gidanawu, nuuni Yesuusa siiqananne I nuna tamaarissidobaakka oottana koshshees. Leemisuwawu, nuuni mishiraachchuwaa sabbakanaadaaninne erissiyo ashkkara oottanaadan Yesuusi azazidobaa azazettoos. (Maatiyoosa 28:19, 20; Yohaannisa 14:15, 21) Nuuni Yesuusa siiqiyo gishshawu, ‘A kaalloos.’ (1 PHeexiroosa 2:21) Yihooway nuuni haasayiyoobaaninne oottiyooban ba Naˈaa milatanawu nuuyyo danddayettida ubbabaa oottiiddi deˈiyoogaa beˈiyo wode ufayttees.

7. Nu laggeti Yihoowa dabbota gidana bessiyoy aybissee?

⁷ Yihoowa dabboti ammanettiyaageetanne azazettiyaageeta; qassi eti A Naˈaa siiqoosona. Taani Yihooway ba dabbota oottidi dooriyoogeeta dooriyaanaa? Ne laggeti Yesuusa milatiyaageetanne harata Xoossaa Kawotettaabaa tamaarissiyaageeta gidikko, eti neeni loˈˈo asa gidanaadaaninne Yihoowayyo ammanettada deˈanaadan nena maaddana danddayoosona.

8. Urutinne Naaˈoomi laggetettaappe neeni dosiyoobay aybee?

⁸ Urutinne I bollotee Naaˈoomi laggetettaa mala, daro laggetettaabaa Geeshsha Maxaafay yootees. He maccaasatu biittaynne wogay dumma dumma; qassi Naaˈooma Urutippe keehi bayra. SHin eti naaˈˈaykka Yihoowa siiqiyo gishshawu, mata lagge gididosona.  Naaˈooma Mooˈaaba biittaappe Israaˈeela biitti simmiyo wode, “Uruta o baqqa oiqqada ixxaasu.” A Naaˈoomiyyo, “Ne asai ta asaa gidana; ne Xoossai ta Xoossaa gidana” yaagaasu. (Uruto 1:14, 16) Uruta Naaˈoomiyyo daro keha. Eti Israaˈeela biitti gakki simmin, Uruta ba laggiyo maaddanawu minnada oottaasu. Naaˈooma Uruto keehi siiqiyo gishshawu, O loˈˈo zore zoraasu. Uruta A zoridobaa siyaasu; hegaappe denddidaagan, eti naaˈˈaykka keehi anjjettidosona.—Uruto 3:6.

9. Daawitanne Yonaataana laggetettaa xeelliyaagan nena garamissiyaabay aybee?

⁹ Loˈˈo lagge gidiyoogan leemiso gidiya harati Daawitanne Yonaataana; eti naaˈˈaykka Yihoowawu ammanettidosona. Yonaataani Daawitappe 30 laytta gidiyaagaa bayratees; qassi Israaˈeelan kaalliya kawo gidana danddayiyay A. (1 Sameela 17:33; 31:2; 2 Sameela 5:4) Gidoppe attin, kawo gidanaadan Yihooway Daawita dooridoogaa I erido wode, qanaatibeenna woy keesettibeenna. SHin, Daawita maaddanawu Yonaataani danddayiyo ubbabaa oottiis. Leemisuwawu, Daawita qohiyaabay gakkido wodekka, Yonaataani Daawiti “GODAN wolqqaa demmanaadan” maaddiis. I Daawita gishshawu ba shemppuwaa aattidi immiis. (1 Sameela 23:16, 17) Daawitikka ammanettiya lagge. I Yonaataana keetta asawu koshshiyaabaa kunttanawu qaalaa geliis; Yonaataani hayqqi simminkka, I ba gelido qaalaa naagiis.—1 Sameela 18:1; 20:15-17, 30-34; 2 Sameela 9:1-7.

10. Neeni heezzu Ibraawetuppe laggetettaabaa ay tamaaray?

¹⁰ Sidiraaqa, Misaaqanne Abddanaago geetettiya heezzu yelaga Ibraawe laggeti naatettan sooppe omoodettidi biidosona. Eti bantta soo asaappe haakkidi  deˈikkokka, Yihoowawu ammanettidi deˈanaadan issoy issuwaa maaddidosona. Guyyeppe, eti gitaa gidin, Kawuwaa Naabukadanaxoori worqqaa misiliyawu goynnanaadan eta azazido wode, eta ammanoy paacettiis. Sidiraaqi, Misaaqinne Abddanaagoy he misiliyawu goynnennan ixxidosona; qassi kawuwaayyo hagaadan giidosona: ‘Nuuni ne xoossatuyyo oottokkonne neeni essido worqqaa misiliyaayyo goynnokko.’ Eta ammanoy paacettido wode, he heezzu laggeti bantta Xoossawu ammanettidi deˈidosona.—Daaneela 1:1-17; 3:12, 16-28.

11. PHawuloosinne Ximootiyoosi waanidi loˈˈo lagge gididonaa?

¹¹ Kiitettida PHawuloosi yelaga Ximootiyoosaara gayttido wode, Ximootiyoosi Yihoowa siiqiyoogaanne gubaaˈiyawu wozanappe qoppiyoogaa akeekiis. Hegaa gishshawu, dumma dummasan deˈiya ishanttanne michchontta maaddanaadan PHawuloosi Ximootiyoosa loohissiis. (Oosuwaa 16:1-8; 17:10-14) Ximootiyoosi keehi minni oottin PHawuloosi hagaadan giis: ‘I tanaara issippe wonggeliyaa oosuwaa oottiis.’ Ximootiyoosi ishanttuyyoonne michchontuyyo “wozanappe” qoppiyoogaa PHawuloosi erees. Yihoowawu issippe minnidi oottido gishshawu, PHawuloosinne Ximootiyoosi loˈˈo lagge gididosona.—Piliphphisiyuusa 2:20-22; 1 Qoronttoosa 4:17.

12, 13. (a) Gubaaˈiyankka nuuni nu laggeta akeekan doorana koshshiyoy aybissee? (b) Kiitettida PHawuloosi 1 Qoronttoosa 15:33n deˈiya qofaa yootidoy aybissee?

¹² Gubaaˈiyan, nu ishanttuppenne michchonttuppe tamaarananne ammanettidi deˈanaadan issoy issuwaa maaddana danddayoos. (Roome 1:11, 12 nabbaba.)  SHin, gubaaˈiyankka, nuussi mata lagge gidanaadan oona dooranaakko akeekanchcha gidana koshshees. Nu ishanttunne michchonttu wogaynne diccido hanotay dumma dumma. Issoti issoti gubaaˈiyawu ooratta, harati qassi daro layttawu Yihoowawu haggaaziiddi takkidosona. Mittaa ayfee teeranawu wodiyaa koshshiyoogaadan, issi uri Yihoowaara dabbota minttanawu wodiyaa koshshees. Yaatiyo gishshawu, nuuni issoy issuwaa danddayananne siiqana koshshees; qassi nu laggeta ubbatoo akeekan doorana koshshees.—Roome 14:1; 15:1; Ibraawe 5:12–6:3.

 ¹³ Issi issitoo, gubaaˈiyan gita metoy merettana danddayees; qassi he wode nuuni naagettana koshshees. Metoy merettana danddayiyoy issi ishay woy michchiyaa Geeshsha Maxaafay bala giyoobaa oottido gishshataassa gidana danddayees. Woy qassi issi uri gubaaˈiyaa qohana danddayiya hanotan amassalana danddayees. Koyro xeetu layttankka issi issitoo gubaaˈiyan metoy merettido gishshawu, hegee nuna garamissenna. Kiitettida PHawuloosi he wode deˈiya Kiristtaaneta, “Cimettoppite; iita laggetettai lo77o hanotettaa moorees” yaagiis. (1 Qoronttoosa 15:12, 33) Ximootiyoosi bawu mata lagge gidanaadan oona dooranaakko naagettana malakka PHawuloosi zoriis. Ha wodiyan nuuni hegaadan oottana koshshees.—2 Ximootiyoosa 2:20-22 nabbaba.

14. Nuuni dooriyo laggeti Yihoowaara dabbotay nuuyyo moorettanaadan waati oottana danddayiyoonaa?

¹⁴ Nuuni Yihoowaara dabbotido dabbotaa naagana bessees. Hegee nuuyyo deˈiya ubbabaappe aadhdhiya alˈˈoba. Hegaa gishshawu, nuuni nu ammanuwaa shugissana danddayiyaanne he dabbotaa moorana danddayiya uraara mata lagge gidennaadan naagettoos. Caala woyne eessan yeggido ispponjjee haattaa xunxxennaagaadan, iitabaa oottiyaageetuura laggetidi nuuni metootennan suurebaa oottana giidi naagana danddayokko. Nuuni nu mata laggeta akeekan doorana koshshees.—1 Qoronttoosa 5:6; 2 Tasalonqqe 3:6, 7, 14.

15. Gubaaˈiyan loˈˈo laggeta demmanawu neeni waatana danddayay?

¹⁵ Gubaaˈiyan, Yihoowa wozanappe siiqiyaageeta demmana danddayaasa. Eti neeyyo mata lagge gidana danddayoosona. (Mazamure 133:1) Ne  lagge woy neegaa mala wogan diccida asatu xallaara laggetanawu koyoppa. Yonaataani Daawitappe keehi bayratiyoogaanne Uruta Naaˈoomippe keehi kaalo gidiyoogaa hassaya. Geeshsha Maxaafay ‘intte uluwaa aassi dooyite’ giyo zoriyaa nuuni kaallanawu koyoos. (2 Qoronttoosa 6:13; 1 PHeexiroosa 2:17 nabbaba.) Qassi neeni Yihoowa milatiyo wode, harati kaseegaappe aaruwan ne lagge gidanawu koyana.

16, 17. Gubaaˈiyan issi uri nuna yiilloyikko, ay oottana bessennee?

¹⁶ Eeshshan, qofaaninne issibaa oottiyo ogiyan, ubba keettan deˈiya asay dumma dumma. Gubaaˈiyankka hanotay hegaa mala. Hegaadan dummatiyoogee deˈoy ufayssiyaagaa gidanaadan oottees; qassi nuuni issoy issuwaappe darobaa tamaarana danddayoos. SHin, issi issitoo nu dummatettaa gaasuwan nu ishanttu woy michchonttu hanotaa bala ogiyan akeekoos; qassi nuuni etan yiillotoos. Issi issitoo, nuuni lanccana woy qohettana danddayoos. (Leemiso 12:18) Hegaa mala metoy nuna hidootaa qanxxissanaadan woy gubaaˈiyaappe haassanaadan nuuni oottana bessii?

¹⁷ Bessenna. Issi uri issiban nuna azzanttikkokka, nuuni gubaaˈiyaappe haakkokko. Nuuni lanccanaadan oottiday Yihoowa gidenna. I nuussi deˈuwaanne hara ubbabaa immiis. Nuuni A siiqiyoogeenne awu ammanettiyoogee bessiyaaba. (Ajjuutaa 4:11) Gubaaˈee nuuni ammanuwan minnidi deˈanaadan nuna maaddana mala Yihooway immido imota. (Ibraawe 13:17) Issi uri nuna azzanttido gishshawu, Yihoowa imotaa mule ekkennan ixxokko.—Mazamure 119:165 nabbaba.

18. (a) Nuuni nu ishanttuuranne michchonttuura laggetanawu nuna aybi maaddana danddayii? (b) Nuuni haratuyyo atto gaana bessiyoy aybissee?

 ¹⁸ Nuuni nu ishanttanne michchontta siiqiyo gishshawu, eti nu lagge gidanaadan koyoos. Yihooway ay asinne wottiyoobi baynnaagaa gidana giidi qoppenna; nuunikka qoppana bessenna. (Leemiso 17:9; 1 PHeexiroosa 4:8) Nuuni ubbay baloos; shin siiqoy “issoi issuwau atto” gaanaadan nuna maaddana. (Qolasiyaasa 3:13) Balan akeekido issi guuttabay wolqqaama metoy merettanaadan oottenna mala siiqoy nuna teqqees. Issi uri nuna yiilloyiyo wode, hegaabaa qoppiyoogaa agganawu metootana danddayiyoogee qoncce. He uraa bolli eesuwan yiillotoosinne uluwan lancciyaa oyqqoos. SHin, hegee nuuni ufayttennaadaaninne hanqqettanaadan oottana. Hara baggaara qassi, nuuni nuna yiilloyida uraa atto giyo wode, woppu gaana, gubaaˈiyaara issippetettan deˈananne ubbaappe aaruwan Yihoowaara mino dabbotay deˈiyoogeeta gidana danddayoos.—Maatiyoosa 6:14, 15; Luqaasa 17:3, 4; Roome 14:19.

19. Nuuni gubaaˈiyan issi uraara laggettiyoogaa aggana koshshiyoy awudee?

¹⁹ Siiqettiya keettan, harati ufayttanaadan so asay huuphiyan huuphiyan oottiyoobay deˈees. SHin issi uri makkalidabadan qoppa. Son deˈiya asa ubbay A maaddanawu darotoo baaxetikkonne, I maaduwaa koyennan ixxiis. I sooppe kiyanawu qofaa qachchana danddayees, woy son aawatiya uri I sooppe kiyanaadan oychchana danddayees. Gubaaˈiyan hegaa malabay merettana danddayees. Issi uri Yihoowa  ufayssennabaanne gubaaˈiyaa qohiyaabaa aggennan oottana danddayees. I maaduwaa koyenna, qassi I ba oottiyooban hegaappe simmin gubaaˈiyaa yame gidanawu koyennaagaa bessees. I ba huuphe gubaaˈiyaa agganawu doorana danddayees, woy bohettana danddayees. Hegaadaana gidikko, Geeshsha Maxaafay nuuni aara ‘gayttana’ koshshennaagaa yootees. (1 Qoronttoosa 5:11-13 nabbaba; 2 Yohaannisa 9-11) I nu lagge woy nu soo asa gidikko, hegee keehi deexxiyaaba gidana danddayees. SHin hegaa mala hanotan, nuuni Yihoowayyo ammanettiyoogee hara ooyyoonne ammanettiyoogaappe aadhdhana bessees.—Wurssetta Qofaa 8 xeella.

20, 21. (a) Bohihoogee siiqiyoogaa waati bessii? (b) Nuuni nu laggeta akeekan dooriyoogee keehi koshshiyaaba gidiyoy aybissee?

²⁰ Bohiyoogee Yihooway siiquwan giigissidoba. Hegee Yihooway kessido maaraa kaallennaageetun gubaaˈee qohettennaadan maaddees. (1 Qoronttoosa 5:7; Ibraawe 12:15, 16) Bohiyoogee nuuni Yihoowa geeshsha sunttaa, I kessido kandduwaa maaraanne A siiqiyoogaa bessanaadan maaddees. (1 PHeexiroosa 1:15, 16) Bohiyoogee gubaaˈiyaa yame gidiyoogaa aggida uraa siiqiyoogaa bessiyaaba. He wolqqaama seeray I oottiiddi deˈiyoobay bala gidiyoogaa akeekanaadan maaddana danddayees; qassi I laamettanaadan oottees. Kase bohettida daroti guyyeppe Yihoowakko simmin gubaaˈee eta ufayssan mokki ekkiis.—Ibraawe 12:11.

²¹ Nu laggeti nuna maaddiyoogee woy qohiyoogee attennaba. Hegaa gishshawu, nuuni eta akeekan dooriyoogee keehi koshshiyaaba. Nuuni Yihooway siiqiyoogeeta siiqikko, eti nuuni merinawu awu ammanettidi deˈanaadan maaddana danddayoosona.