1-3. (a) Ba oosuwaa xeelliyaagan daro asawu aybi siyettii? (b) Ha shemppuwan nuuni pilggana oyshati awugeetee?

 KUMETTA saˈan deˈiya asay baassinne ba soo asaassi koshshiyaabaa kunttanawu minnidi oottees. Daroti bantta oosuwaa dosokkona; ubba qassi issoti issoti ubba gallassi hirggiiddi oosuwaa boosona. Neeyyo hegaadan siyettikko, ne oosoy kaseegaappe aaruwan ufayssiyaagaa gidanaadan waatana danddayay? Ne oosuwan waata ufayttana danddayay?

² Yihooway hagaadan gees: “Asay miyoogaaninne uyiyoogan, qassi minnidi oottiyo ooso ubban ufayttees. Hegee Xoossaappe imettida imota.” (Eranchchaa 3:13, NW) Yihooway nuuni oosuwaa oottanawu koyanaadan oottidi nuna medhdhiis. I nuuni oosuwan ufayttanaadan koyees.—Eranchchaa 2:24; 5:18 nabbaba.

³ Hegaa gishshawu, nuuni nu oosuwan ufayttanaadan aybi maaddana danddayii? Kiristtaaneti oottana koshshenna oosoti awugeetee? Nuuni nu oosuwaa Yihoowawu goynniyo goynuwaara waatidi bessiyaagaadan xeellana danddayiyoo? Qassi nuuni oottana danddayiyo ooso ubbaappe aadhdhiya oosoy aybee?

4, 5. Yihooway oosuwaa waati xeellii?

⁴ Yihooway oosuwaa dosees. Doomettaabaa 1:1y, “Xoossai salotanne sa7aa koiro medhdhiis” yaagees.  Xoossay saˈaanne saˈan deˈiya ubbabaa medhdhiyoogaa wurssi simmidi, I medhdhidobay “daro lo77o” gidiyoogaa yootiis. (Doomettaabaa 1:31) Nuna medhdhidaagee ba medhidoban ufayttiis.—1 Ximootiyoosa 1:11.

⁵ Oottiyoogaa Yihooway mulekka aggi erenna. Yesuusi, “Ta Aawai ubba wode oottees” yaagiis. (Yohaannisa 5:17) Nuuni Yihooway oottido maalaalissiya ubbabaa erana xayikkonne, hegaappe amaridaagaa eroos. I ba Naˈaa, Yesuus Kiristtoosaara Kawotettan haaranaageeta dooriiddi takkiis. (2 Qoronttoosa 5:17) Qassi Yihooway asaa mintti kaalettiiddinne etawu koshshiyaabaa kunttiiddi deˈees. Kumetta saˈan sabbakiyo oosuwaa gaasuwan, miilooniyan qoodettiya asay Yihoowa eriiddi deˈees; qassi gannate gidana saˈan merinawu deˈiyo hidootay etawu deˈees.—Yohaannisa 6:44; Roome 6:23.

6, 7. Yesuusi ay mala oosanchchee?

⁶ Ba Aawaagaadan, Yesuusi oosuwaa dosees. I saˈaa yaanaappe kase, saluwaaninne saˈan deˈiya ubbabaa medhdhiyoogan, Yesuusi Xoossaayyo “waanna oosanchcha.” (Leemiso 8:22-31; Qolasiyaasa 1:15-17) Yesuusi saˈan deˈiyo wodekka ubbatoo minnidi oottiis. Yelagatettan, I gooba anaaxe gidanaadan tamaariis; I dumma dumma miishshaa giigissidabanne keettaa keexxidaba milatees. Yesuusi ba oosuwan keehi gooba gidiyo gishshawu, I ‘anaaxe’ gidiyoogan erettees.—Marqqoosa 6:3.

⁷ SHin, Yesuusi saˈan deˈiyo wode oottido ubbaappe aadhdhiya oosoy mishiraachchuwaa yootiyoogaanne Yihoowabaa asaa tamaarissiyoogaa. Yesuusi ba haggaazuwaa polanawu awu deˈiya wodee heezzu layttanne bagga; qassi I guuran doommidi keehi qammana gakkanaashin minnidi oottiis. (Luqaasa 21:37, 38; Yohaannisa 3:2) Yesuusi danddayettida keenan daro asawu  mishiraachchuwaa yootanawu, baanattiya ogiyan xeetan qoodettiya kilo meetiriyaa tohuwan hemettiis.—Luqaasa 8:1.

8, 9. Yesuusi ba oosuwan ufayttidoy aybissee?

⁸ Xoossaa oosuwaa oottiyoogee Yesuusawu quma mala. Ha oosoy awu wolqqaanne minotettaa immiis. Yesuusi qumaa maanawu wode xayana gakkanaashinkka keehi minnidi oottido wodee deˈees. (Yohaannisa 4:31-38) I harata ba Aawaabaa tamaarissanawu bawu danddayettida ubbabaa oottiis. I Yihoowayyo hagaadan gaana danddayidoy hegaassa: “Neeni taayyo oottanau immido oosuwaa polada, nena sa7an bonchchaas.”—Yohaannisa 17:4.

⁹ Yihoowaykka Yesuusikka keehi minnidi oottiyoogeenne bantta oosuwan ufayttiyoogee qoncce. Nuuni ‘Xoossaa milatananne’ “[Yesuusa] kaallana” koyoos. (Efisoona 5:1; 1 PHeexiroosa 2:21) Nuuni minni oottanawunne ubbaban nuuyyo danddayettida keenan loˈˈobaa oottanawu baaxetiyoy hegaassa.

10, 11. Nuuni nu oosuwaa xeelliyaagan loˈˈobaa qoppanaadan nuna aybi maaddana danddayii?

¹⁰ Nuuni Yihoowa asa gidiyo gishshawu nuussinne nu soo asaassi koshshiyaabaa kunttanawu minnidi oottoos. Nuuni nu oosuwan ufayttanawu koyoos; shin hegee metiyaaba gidana danddayees. Hegaa gishshawu, nuuni nu oosuwan ufayttana xayikko, waatana danddayiyoo?

¹¹ Loˈˈobaa qoppa. Nuuni oottiyo sohuwaa woy ay keenabaa oottanaakko laammana danddayennaba gidikkonne, nu xeelaa laammana danddayoos. Yihooway nuuppe koyiyoobaa akeekiyoogee nuna maaddana  danddayees. Leemisuwawu, so asawu huuphe gidida uri baassi danddayettida ubban ba soo asawu koshshiyaabaa kunttanaadan Yihooway appe koyees. Ba soo asawu koshshiyaabaa kunttenna uri ‘ammanenna asaappekka aadhdhidi iita’ gidiyoogaa Geeshsha Maxaafay yootees. (1 Ximootiyoosa 5:8) Neeni so asawu huuphe gidikko, ne soo asawu koshshiyaabaa kunttanawu minnada ootta. Neeni ne oottiyo oosuwaa dosin dosana xayin, ne soo asawu koshshiyaabaa kunttiyoogee Yihoowa ufayssiyoogaakka eraasa.

12. Minnidi oottiyoogeenne ammanettidaageeta gididi deˈiyoogee nuna waati maaddii?

¹² Minnada oottiyaagaanne ammanettiyaagaa gida. Hegee neeni ne oosuwan ufayttanaadan oottana danddayees. (Leemiso 12:24; 22:29) Qassi nena ootissiyaagee nenan ammanettana. Ammanettiya oosanchchati miishshaa, harabaa woy wodiyaa wuuqqenna gishshawu ootissiyaageeti eta xoqqu ootti xeelloosona. (Efisoona 4:28) Ubbaappe aaruwan, neeni mino oosanchchanne ammanettiyaagaa gidiyoogaa Yihooway erees. Neeni Xoossaa ufayssiyoogaa eriyo gishshaassi neeyyo “zoriya lo77o wozanai” woy ammanettiya kahay deˈana danddayees.—Ibraawe 13:18; Qolasiyaasa 3:22-24.

13. Oosuwan ammanettiyoogee hara ayba ayfe demissana danddayii?

¹³ Ooso sohuwan neeni bessiyo eeshshay Yihooway sabettanaadan oottana danddayiyoogaa akeeka. Hegee nuuni nu oosuwan ufayttanaadan oottiya hara gaaso. (Tiitu 2:9, 10) Qassi neeni loˈˈoban leemiso gidiyoogaa gaasuwan, nenaara issippe oottiyaageeti Geeshsha Maxaafaa xannaˈana danddayoosona.—Leemiso 27:11; 1 PHeexiroosa 2:12 Nabbaba.

14-16. Nuuni oosuwaa dooriyo wode ay qoppana koshshii?

¹⁴ Kiristtaaneti oottana bessiyo woy bessenna ooso ubbaa Geeshsha Maxaafay yootenna. SHin loˈˈobaa kuuyanawu nuna maaddana danddayiya maarata Geeshsha Maxaafay yootees. (Leemiso 2:6) Geeshsha Maxaafay yootiyo maarata goˈettidi, nuuni kaallidi deˈiya oyshata nuna oychchana danddayoos.

¹⁵ Ha oosoy Yihooway bala giyoobaa taani  oottanaadan oottii? Wuuqqiyoogaanne worddotiyoogaa mala Yihooway ixxiyo meezetubaa nuuni tamaarida. (Kessaabaa 20:4; Oosuwaa 15:29; Efisoona 4:28; Ajjuutaa 21:8) Yaatiyo gishshawu, Yihooway kessido maarata kanttanaadan oottiya ay oosoppekka naagettana bessees.—1 Yohaannisa 5:3 nabbaba.

¹⁶ Ha oosoy Yihooway ixxiyoobaa aassiyaabee woy kaafiyaabee? Leemisuwawu, shahaaraa kessiya issi kilinikiyan imattaa mokkiyoosan oottiyo ooso neeni demmikko shin? Imattaa mokkiyoosan oottiyoogee bala gidenna. SHin shahaaraa kesissiyoogaa Yihooway waati xeelliyaakko eraasa. SHahaaraa kessiyay nena gidana xayikkonne, Yihoowa sinttan neenikka mooranchcha gidiyoogee attenna.—Kessaabaa 21:22-24, NW.

17. Xoossaa ufayssiyaabaa kuuyanaadan nuna aybi maaddana danddayii?

¹⁷ Xoossay kessido maarata goˈettiyoogan, nuuni Ibraawe 5:14n odettida ‘iitaa kehaa shaakkida’ asatu mala gidana danddayoos. Nena hagaadan oychcha: ‘Taani he oosuwaa oottikko, harati xubettanee? Ha oosoy taani ta aqo laggiyaanne ta naata aggada hara biitti baanaadan oottii? Hegee eta waati qohii?’

18. Nu goynuwaa kaseyiyoogee metiyaaba gidana danddayiyoy aybissee?

¹⁸ Ha ‘wayssiya wodiyan’ Yihoowawu goynniyoogaa kaseyiyoogee metiyaaba gidana danddayees. (2 Ximootiyoosa 3:1) Ooso demmiyoogeenne he oosuwan takkiyoogee metiyaaba gidana danddayees. Nuuni nu soo asawu koshshiyaabaa kunttana bessees; shin nu goynuwaa kaseyana bessiyoogaa eroos. Nuuni nu deˈuwan aquwaa keehi xoqqu oottidi xeellana bessenna. (1 Ximootiyoosa  6:9, 10) Yaatiyo gishshawu, nuuni ‘keehi koshshiyaabaa waati shaakkidi erana,’ qassi nu soo asawu koshshiyaabaa waati kunttana danddayiyoo?—Piliphphisiyuusa 1:10, NW.

19. Yihoowan ammanettiyoogee nu oosuwaa bessiyaagaadan xeellanawu waati maaddii?

¹⁹ Yihoowan wozanappe ammanetta. (Leemiso 3:5, 6 nabbaba.) Nuussi koshshiyaabaa Xoossay eriyoogaanne I nuussi keehi qoppiyoogaa eroos. (Mazamure 37:25; 1 PHeexiroosa 5:7) Geeshsha Maxaafay hagaadan gees: “Miishsha siiqoppe inttena naagite; intteyyo de7iyaagee intteyyo gido. Aissi giikko, Xoossai ba huuphen, ‘Taani nena mulekka yeggikke woikko aggikke’ yaagiis.” (Ibraawe 13:5) Nu soo asawu koshshiyaabaa kunttanawu nuuni ubbatoo hirgganaadan Yihooway koyenna. I ba asawu koshshiyaabaa kunttana danddayiyoogaa darotoo bessiis. (Maatiyoosa 6:25-32) Nu oosuwaa hanotay ayba gidinkka, nuuni ubbatoo Xoossaa Qaalaa xannaˈoos, mishiraachchuwaa yootoos, qassi gubaaˈiyaa shiiquwaa shiiqoos.—Maatiyoosa 24:14; Ibraawe 10:24, 25.

20. Nu deˈoy muttumurettennaadan waatana danddayiyoo?

²⁰ Ne ayfee payya gido. (Maatiyoosa 6:22, 23 nabbaba.) Hegee ne deˈuwan aquwaappe Yihoowayyo haggaaziyoogaa sinttayiyoogaa giyoogaa. Xoossaara dabbotida nu dabbotaappe miishshaa, ishalo deˈuwaa, woy zammaana elektiroonike miishshaa xoqqu ootti xeelliyoogee eeyyatetta gidiyoogaa eroos. Yaatiyo gishshawu, kaseyana bessiyaabaa kaseyanaadan nuna aybi maaddanee? Nuuni acuwan gelennaadan nuuyyo danddayettida ubbabaa oottana bessees. Neeni acotidaba gidikko, acuwaappe poxxanawu woy acuwaa muleera qanxxanawu maaddiyaabaa halchcha. Nuuni naagettana xayikko, aquwaabay nu wodiyaappenne wolqqaappe dariya  baggaa wurssana danddayees; qassi nuuni woossanawu, xannaˈanawu woy sabbakanawu daro wodiyaa bazzennan aggana danddayoos. Aquwaaban nu deˈoy muttumurettanaadan oottiyoogaappe ‘miyoobaanne maayiyoobaa’ mala koshshiyaabatun nuuni woppu giidi deˈanawu koyoos. (1 Ximootiyoosa 6:8) Qassi nu hanotay ayba gidinkka, Yihoowayyo kaseegaappe waati loytti haggaazanaakko eranawu issi issitoo nu hanotaa qoriyoogee loˈˈo.

21. Nuuni ay kaseyana bessiyaakko kuuyana koshshiyoy aybissee?

²¹ Kaseyana bessiyaabaa kaseya. Nuuni nu wodiyaa, nu wolqqaanne nu aquwaa akeekan goˈettana koshshees.  Nuuni naagettana xayikko, timirttiyaa woy miishshaa mala darin koshshennabati nu alˈˈo wodiyaa coo xayssana danddayoosona. Yesuusi, ‘Kasetidi Xoossaa kawotettaa koyite’ yaagiis. (Maatiyoosa 6:33) Nuuni dooriyoobay, nu meezee, nuuni galla galla oottiyoobaynne nu halchchiyoobay nuuni nu wozanan kaseyiyoobaa qonccissees.

22, 23. (a) Nuuni Kiristtaaneti oottana danddayiyo ooso ubbaappe aadhdhiya oosoy awugee? (b) Nu oosuwan ufayttanaadan nuna aybi maaddanee?

²² Nuuni oottiyo ooso ubbaappe aadhdhiya oosoy Yihoowayyo haggaaziyoogaanne haratuyyo mishiraachchuwaa yootiyoogaa. (Maatiyoosa 24:14; 28:19, 20) Yesuusadan, nuuyyo danddayettida ubbaban nuuni ha oosuwaa oottana koyoos. Issoti issoti aassiyaageeti keehi koshshiyoosan haggaazanawu biidosona. Harati kare biittaa qaalaa haasayiya asawu sabbakanawu he qaalaa tamaariiddi deˈoosona. Hegaadan oottidaageetuura haasaya; qassi hegaabaa eta oychcha. Eti bantta deˈuwan keehi ufayttiyoogaa neeyyo yootana.—Leemiso 10:22 nabbaba.

²³ Ha wodiyan, nuuppe daroti nu soo asawu koshshiyaabaa kunttanawu issi oosuwaa woy qassi daro oosuwaa oottiyoogan daro saatiyaa wurssoos. Yihooway hegaa erees; qassi nuuni nu soo asawu koshshiyaabaa kunttanawu oottiyo ubbabaa nashshees. Hegaa gishshawu, nuuni ayba oosokka oottikko, minnidi oottiyoogan Yihoowanne Yesuusa ubbatoo milatiyaageeta gidoos. Nuuni oottana danddayiyo ooso ubbaappe aadhdhiya oosoy Yihoowayyo haggaaziyoogaanne Xoossaa Kawotettaa mishiraachchuwaa yootiyoogaa gidiyoogaa hassayiyaageeta gidoos. Hegee tumu ufayssaa demissees.