1, 2. Neeni Xoossaa Yihoowa siiqiyoy aybissee?

 NEENI Xoossaa siiqay? Neeni A keehi siiqiyo gishshawu nena ayyo sheedhdhadasa. I neeyyo ooppenne aadhdhiya Dabbo gaada qoppana danddayaasa. SHin, neeni Yihoowa siiqanaappe kase, I nena siiqiis. Geeshsha Maxaafay, “Xoossai koiro nuna siiqido gishshau, nuuni a siiqoos” yaagees.—1 Yohaannisa 4:19.

² Yihooway nuna siiqiyoogaa bessido oge ubbaa qoppa. I loꞌꞌiya keettaa mala gidida saꞌaanne deꞌuwan ufayttanawu koshshiya ubbabaa nuussi immiis. (Maatiyoosa 5:43-48; Ajjuutaa 4:11) Nuuni aara mino dabbotaa medhdhanaadan I koyees; qassi nuuni abaa tamaaranaadan oottiis. Nuuni Geeshsha Maxaafaa nabbabiyo wode, Yihooway yootiyoobaa siyoos. Qassi nuuni woossiyo wode, I nu woosaa siyees. (Mazamure 65:2) I ba geeshsha ayyaanaa baggaara nuna kaaletteesinne minttettees. (Luqaasa 11:13) I nuna nagaraappenne hayquwaappe laꞌa kessanawu ba alꞌꞌo Naꞌaa saꞌaa kiittiis.—Yohaannisa 3:16; Roome 5:8 nabbaba.

3. Yihoowaara waani dabbotidi deꞌana danddayiyoo?

³ Neeni ufayttiyo wodekka azzaniyo wodekka neeppe shaahettenna, neeyyo keehi mata laggetuppe issuwaabaa ane qoppa. Laggetettay hegaadan minnidi  deꞌanaadan baaxetana koshshees. Nuuyyo ooppenne aaruwan mata Dabbo gidiya, Yihoowaara dabbotiyoogeekka hegaa mala. Nuuni aara dabbotiyo dabbotay merinawu deꞌana danddayees. Hegaa gishshawu, Geeshsha Maxaafay, “Intte huuphiyaa Xoossaa siiquwan wottite” yaagees. (Yihudaa 21) Nuuni waatidi hegaa oottana danddayiyoo? Geeshsha Maxaafay, “Nuuni Xoossaa siiqiyoogee a azazuwaa naagiyoogaa; a azazoikka deexo gidenna” yaagidi zaarees.—1 Yohaannisa 5:3.

4, 5. (a) ‘Xoossaa siiqiyoogaa’ giyoogee woygiyoogee? (b) Neeni Yihoowa siiqiyo siiqoy dicciyoogaa waani doommidee?

⁴ Geeshsha Maxaafay ‘Xoossaa siiqiyoogaa’ giyoogee woygiyoogee? Hegee Xoossay nuna siiqiyoogaa gidennan, nuuni Xoossaa siiqiyoogaa bessiyaaba. Neeni Yihoowa siiqiyoogaa awude doommidaakko hassayay?

⁵ Neeni ooratta alamiyan merinawu deꞌanaadan Yihooway koyiyoogaa neeni koyro erido wode neeyyo aybi siyettidaakko hassaya. Neeni hegaa demmanaadan I neeyyo oottido ubbabaa eradasa; qassi Yihooway ba Naꞌaa saꞌaa kiittido wode keehi alꞌꞌo imotaa nuussi immidoogaa akeekadasa. (Maatiyoosa 20:28; Yohaannisa 8:29; Roome 5:12, 18) Yihooway nena keehi siiqiyoogaa eridoogee ne wozanaa denttettin, neenikka A siiqiyoogaa doommadasa.—1 Yohaannisa 4:9, 10 nabbaba.

6. Issi ura siiqanawu waatana koshshii? Neeni Xoossaa siiqiyoogee ay oottanaadan nena denttettidee?

⁶ SHin, he siiqoy neeni Xoossaa siiqiyoogawu doometta xalla. Leemisuwawu, nuuni issi ura siiqiyo wode,  “Ta nena siiqays” giyoogaa xallay gidenna. Siiqoy nuuni he ura ufayssiyaabaa oottanaadan denttettees. Hegaadan, neeni Yihoowa siiqiyoogee A ufayssiya ogiyan deꞌanaadan oottees. He siiqoy dicciyo wode, nena ayyo sheedhdhada xammaqettadasa. Yaatiyoogan, Yihoowawu merinawu haggaazanawu qaalaa geladasa. (Roome 14:7, 8 nabbaba.) Neeni he qaalaadan waana deꞌana danddayay?

7. Nuuni Yihoowa siiqikko, waatiyoo? A azazotuppe amaridaageeti awugeetee?

⁷ Nuuni Yihoowa siiqiyo gishshawu, ‘A azazuwaa naagoos.’ Nuuni hegaadan oottanawu waatana koshshii? Awu azazettana koshshees. Nuuni waani deꞌanaadan Yihooway koyiyaakko Geeshsha Maxaafay yootees. Leemisuwawu, mattottiyoogee, wuuqqiyoogee woy worddotiyoogee, nu aqo lagge gidenna uraara mattuman gayttiyoogee, woy Yihoowaappe harawu woy harabawu goynniyoogee bala gidiyoogaa I nuussi yootees.—1 Qoronttoosa 5:11; 6:18; 10:14; Efisoona 4:28; Qolasiyaasa 3:9.

8, 9. Geeshsha Maxaafay nuuni ay oottana koshshiyaakko yaata yaatoppa giidi yootenna hanotatun nuuni ay oottanaadan Yihooway koyiyaakko waati erana danddayiyoo? Leemisuwaa yoota.

⁸ SHin nuuni Yihoowa ufayssanawu A azazota naagiyoogaa xallay gidenna. I deꞌuwan nuna gakkiya ubbabawu higgiyaa immibeenna. Hegaa gishshawu, Geeshsha Maxaafay nuuni ay oottana koshshiyaakko yaata yaatoppa giidi issi issitoo yootenna wodee deꞌees. Nuuni waatidi loꞌꞌobaa kuuyana danddayiyoo? (Efisoona 5:17) Yihooway issi issibaa waati xeelliyaakko nuuni akeekanaadan maaddiya maarati Geeshsha Maxaafan  deꞌoosona. Qassi nuuni Geeshsha Maxaafaa nabbabiyo wode, Yihoowa loytti eroos. I siiqiyoobaanne ixxiyoobaa gujjin, I waatidi qoppiyaakko tamaaroos.—Roome 12:9 nabbaba; Leemiso 6:16-19; Wurssetta Qofaa 1 xeella.

⁹ Leemisuwawu, nuuni televizhiiniyan woy Interneettiyan ay beꞌanaakko waati kuuyana danddayiyoo? Yihooway nuuni oottana bessiya ubbabaa nuuyyo yootenna. SHin I nuussi immido maarati nuuni loꞌꞌobaa kuuyanaadan maaddoosona. Wodiyaa aattiyo darobay ha wodiyan danobaaninne mattumaa gaytettaa bessiyaaban kumiis. Yihooway ‘iitatanne hanttaarabaa siiqiyaageeta keehippe’ ixxiyoogaanne ‘shaaramuxanawu qaaqqatiyaageeta pirddanaagaa’ Geeshsha Maxaafay yootees. (Mazamure 11:5; Ibraawe 13:4) Ha maarati loꞌꞌobaa kuuyanaadan nuna waati maaddana danddayiyoonaa? Yihooway ixxiyoobaa woy pokkobadan xeelliyoobaa nuuni erikko, hegaappe haakkana bessees.

10, 11. Nuuni Yihoowawu azazettiyoy aybissee?

¹⁰ Nuuni Yihoowawu azazettiyoy aybissee? Qixaatiyaappe woy iitabaa kuuyido gishshawu gakkiya metuwaappe attana xallaassa gidenna. (Galaatiyaa 6:7) Nuuni Yihoowa siiqiyo gishshawu ayyo azazettoos. Naati bantta aawaa ufayssanawu koyiyoogaadan, nuuni saluwan deꞌiya nu Aawaa ufayssanawu koyoos. Yihooway nunan ufayttiyoogaa eriyoogaappe aadhdhiyaabi baa!—Mazamure 5:12; Leemiso 12:2; Wurssetta Qofaa 2 xeella.

¹¹ Nuuni Yihoowawu azazettiyoy issibay metennaba gidiyo wode woy hara dooroy nuuyyo baynna wode xallaana gidenna. Qassi nuuni A higgetuppenne  maaratuppe awugaa kaallanaakkonne awugaa kaallennan agganaakko doorokko. (Zaarettido Wogaa 12:32) SHin, “Taani ne azazota siiqiyo gishshau, etan ufaittais” giida mazamuraawiyaagaadan, Yihoowawu kumetta wozanaappe azazettoos. (Mazamure 119:47; Roome 6:17) Yihooway azazido ubbabaa oottiyoogan A siiqiyoogaa bessida Noha milatanawu koyoos. Geeshsha Maxaafay Nohee, “Xoossai azazidoogaadan oottiis” yaagees. (Doomettaabaa 6:22) Yihooway nebaa hegaadan gaanaadan koyay?

12. Nuuni waatidi Yihoowa ufayssana danddayiyoo?

¹² Nuuni Yihoowawu azazettiyo wode awu aybi siyettii? Nuuni A wozanaa ‘ufayssoos.’ (Leemiso 11:20; 27:11) Ane hegaa qoppa! Nuuni awu azazettiyo wode, saluwaanne saꞌaa Medhdhidaagaa ufayssoos. SHin, nuuni azazettanaadan I nuna mule wolqqanttenna. SHin, koyidobaa dooriyo maataa I nuussi immiis. Hegaa giyoogee iitaa woy kehaa dooriyo maatay nuussi deꞌees giyoogaa. Yihooway nuuni keehi ufayssiya deꞌuwaa demmana mala A siiqiyoogee denttettin nuuni loꞌꞌobaa kuuyanaadan koyees.—Zaarettido Wogaa 30:15, 16, 19, 20; Wurssetta Qofaa 3 xeella.

13, 14. Xoossaa azazoti azazettanawu keehi deexxiyaaba gidennaagaa nuuni waati eriyoo? Leemisuwan qonccissa.

¹³ Yihoowa azazoti azazettanawu keehi deexxiyaabadan woy laꞌatettaa diggiyaabadan nuuni qoppikko shin? Geeshsha Maxaafay, “A azazoikka deexo gidenna” yaagees. (1 Yohaannisa 5:3) Hara xiqiseti, harata qohanawunne haaranawu maliya, bessenna higgeta woy asata qonccissanawu deexo giyo qaalaa goꞌettoosona.  (Maatiyoosa 23:4; Oosuwaa 20:29, 30) Hegaa gishshawu, Yihoowa azazoti “deexo” gidokkona giyoogee nuuni azazettanawu keehi metiyaaba gidokkona giyoogaa. I nuuni nu wolqqappe aadhdhiyaabaa oottanaadan mule koyenna.

¹⁴ Leemisuwawu, neeyyo mata lagge gidida issi uri deꞌiyo keettaa laammiyo wode neeni A maaddanaadan oychchiis gaada qoppa. I bawu deꞌiya ubbabaa saaxinetun yeggiis. Etappe issoti issoti kawushshanne issi uri tookkana danddayiyoogeeta; shin harati naaꞌꞌu uray tookkana koshshiyaagaa keena keehi deexxiyaageeta. Ne laggee neeni keehi deexxiya saaxiniyaa nerkka tookkanaadan oychchanee? CHii, oychchenna! Aybissi? Neeni qohettanaadan I koyenna gishshataassa. He laggiyaadan, nuuni keehi deexxiyaabaa oottanaadan Yihooway nuna mule oychchenna. (Zaarettido Wogaa 30:11-14) Yihooway nu hanotaa akeekees. “Nuuni aibippe merettidaakkonne i erees; nuuni biitta gidiyoogaa i akeekees.”—Mazamure 103:14.

15. Nuuni Yihoowa azazoti nuussi loꞌꞌo gidiyoogaa ammanettana danddayiyoy aybissee?

¹⁵ Yihoowa azazoti etawu ‘loꞌꞌo gidiyoogaanne’ hegeeta azazettiyoogee eti “de7uwan de7ana mala” maaddanaagaa Muusee Israaꞌeela deriyawu yootiis. (Zaarettido Wogaa 5:28-33; 6:24) Ha wodiyankka hegaa mala. Nuuni oottanaadan Yihooway oychchiyo ubbabay nu deꞌoy loꞌꞌo gidanaadan oottana. (Isiyaasa 48:17 nabbaba.) Nu Aawaa, Yihooway nuussi aybi loꞌꞌokko erees. (Roome 11:33) Geeshsha Maxaafay, “Xoossai siiqo” yaagees. (1 Yohaannisa 4:8) Hegaa giyoogee Yihooway ubbabaa haasayiyoynne oottiyoy siiqoy denttettiina giyoogaa.

16. Nuuni nagaranchchanne ha iita alamiyan deꞌiyaaba gidikkokka, azazettana danddayiyoogaa waati eriyoo?

 ¹⁶ Xoossawu azazettiyoogee issi issitoo nuna metana danddayees. Nuuni Dabloosi haariyo iita alamiyan deꞌoos. I asay iitabaa oottanaadan denttettanawu baaxetees. (1 Yohaannisa 5:19) Nuuni nagaranchcha gidiyoogaappe denddidaagan qoppiyoobaynne nuussi siyettiyaabay nu Xoossawu azazettennaadan oottana danddayiyo gishshawu, baaxetana koshshees. (Roome 7:21-25) SHin, nuuni Yihoowa siiqiyoogee suurebaa oottanaadan nuna maaddees. I nuuni awu azazettanawu baaxetiyoogaa akeekees; qassi ba geeshsha ayyaanaa immiyoogan nuna maaddees. (1 Sameela 15:22, 23; Oosuwaa 5:32) Geeshsha ayyaanay nuuni metootennan ayyo azazettanaadan oottiya eeshshati deꞌanaadan maaddees.—Galaatiyaa 5:22, 23.

17, 18. (a) Nuuni ha maxaafan ay tamaaranee? (b) Nuuni kaalliya shemppuwan ay pilgganee?

¹⁷ Ha maxaafan, nuuni Yihoowa ufayssiya ogiyan waanidi deꞌanaakko tamaarana. Nuuni I kandduwaabawunne harabawu kessido maarata oosuwan waati peeshshanaakko tamaarana. Yihooway nuuni ayyo azazettanaadan mule wolqqanttennaagaa hassaya. Nuuni azazettiyo wode, nu deꞌoy kaseegaappe giigana; qassi sinttappe loꞌꞌobaa demmana. Ubbaappe aaruwan, azazettiyoogee nuuni Xoossaa keehi siiqiyoogaa bessees.—Wurssetta Qofaa 4 xeella.

¹⁸ Suurebaanne suure gidennabaa nuuni eranaadan maaddanawu Yihooway nu ubbawu kahaa immiis. Nuuni nu kahaa loohissiyoogee ‘A azazuwaa naaganawu’ nuna maaddana danddayees. SHin, kahay aybee, qassi nuuni nu kahaa waati loohissana danddayiyoo? Ane pilggoos.