1, 2. Neeni erenna sohuwaa biyo wode neeyyo kaaletoy koshshiyoy aybissee? Yihooway nuuyyo immido kaaletoy aybee?

 NEENI issi gita bazzuwaa kanttada biyaabadan qoppa. Wolqqaama carkkoy carkkiyo wode shafee dumma dumma ginan laalettiyo gishshawu, he heeray ubbatoo laamettees. Neeni ogiyaa dogana danddayaasa. Neeni baanasaa waata eranee? Nena kaalettiya issi ura woy neeni beˈiyo issibaa koshshees. Koshshiyaabay komppaase, awa ayfiyaanne xoolintteta, karttaa, woy qassi he bazzuwaa loytti eriya ura gidana danddayees. Neeni beˈiyoobay woy nena kaalettiya uri deˈiyoogee keehi koshshiyaaba;  ayssi giikko, biyoosaa eriyoogee ne shemppuwaa ashshana danddayees.

² Nuna ubbaa daro metoy gakkees; qassi nuuni waatanaakko issi issitoo erennan aggana danddayoos. SHin nuna kaalettanawu, Yihooway nu ubbawu kahaa immiis. (Yaaqooba 1:17) Kahay aybakko, qassi waati oottiyaakko ane pilggoos. Yaatidi nuuni nu kahaa waatidi loohissana danddayiyaakko, hara asaa kahawu qoppana bessiyoy aybissakko, qassi geeshsha kahay nu deˈoy keehi loˈˈo gidanaadan waati oottana danddayiyaakko tamaarana.

3. Kahay aybee?

³ Nu kahay Xoossay immido maalaalissiya imota. Hegee likke gididabaanne likke gidennabaa erissiya nu giddon deˈiyaaba. Geeshsha Maxaafan “kahaa” geetettida Giriiketto qaalaa birshshettay “ba huuphiyaa eriyoogaa” qonccissiyaaba. Nu kahay maara oottiyo wode, nu hanotaa loytti qoranaadan maaddees. Kahay nuuni nu wozanan deˈiyaabaanne nuussi siyettiyaabaa eranawu maaddana danddayees. Kahay nuuni loˈˈobaa oottanaadaaninne iitabaappe haakkanaadan nuna kaalettana danddayees. Kahay nuuni loˈˈobaa kuuyiyo wode ufayttanaadan woy iitabaa kuuyi simmin nuna mooranchchadan xeellanaadan oottana danddayees.—Wurssetta Qofaa 5 xeella.

4, 5. (a) Addaameenne Hewaana bantta kahay yootiyoobaa siyennan ixxido wode aybi hanidee? (b) Kahay waati oottiyaakko qonccissiya, Geeshsha Maxaafan deˈiya amarida leemisoti awugeetee?

⁴ Nuuni ubbay nu kahay yootiyoobaa siyana woy siyennan aggana danddayoos. Addaameenne Hewaana bantta kahay yootiyoobaa siyibeenna gishshawu  nagaraa oottidosona. Hegaappe simmin eti banttana mooranchchadan xeellidosona; shin hegee aynne maaddenna. Eti Xoossawu azazettibookkona. (Doomettaabaa 3:7, 8) Etawu wottiyoobi baynna kahay deˈees; qassi eti Xoossawu azazettennan ixxiyoogee bala gidiyoogaa eroosona; shin bantta kahay yootiyoobaa siyibookkona.

⁵ Hara baggaara, nagaranchcha gidida daro asay ba kahay yootiyoobaa siyiis. Iyyoobi loˈˈo leemiso. I ba kahay yootiyoobaa siyido gishshawunne loˈˈobaa kuuyido gishshawu hagaadan giis: “Taani de7ido laitta ubban ta wozanai kahai tana walassenna.” (Iyyooba 27:6) SHin Daawiti issi issitoo ba kahay yootiyoobaa siyennan ixxido gishshawu, Yihoowawu azazettibeenna. Guyyeppe I bana mooranchchadan xeelliisinne “wozanan azzaniis.” (1 Sameela 24:5) Hegee Daawita kahay I balabaa oottidoogaa awu yootiyoogaa bessiyaaba. I ba kahay yootiyoobaa siyiyoogan, hegaa mala balabaa zaarettidi oottennan agganawu tamaarana danddayees.

6. Nuuni kahay Xoossay ubba asawu immido imota gaana danddayiyoy aybissee?

⁶ Yihoowa erenna asaykka likke gididabaynne likke gidennabay deˈiyoogaa darotoo akeekees. Geeshsha Maxaafay hagaadan gees: ‘Eta qofay eta mootees woykko qassi [eta mooranchcha gidekketa gees].’ (Roome 2:14, 15) Leemisuwawu, woriyoogeenne wuuqqiyoogee bala gidiyoogaa daro asay erees. Eti likke gididabaanne likke gidennabaa shaakki erissiya Yihooway eta giddon wottidobay, hegeekka bantta kahay yootiyoobaa siyoosona; shin hegaa akeekokkona. Eti Xoossay kessido maarata woy nuuni deˈuwan loˈˈobaa dooranaadan maaddiya, Yihooway immido tumubaa kaalloosona.

7. Nu kahay issi issitoo baliyoy aybissee?

⁷ SHin nu kahay issi issitoo balana danddayees. Leemisuwawu,  nu kahay nuuni nagaranchcha gidiyoogaa gaasuwan qoppiyoobaaninne nuuyyo siyettiyaaban qohettana danddayees; qassi nuna bala ogiyan kaalettana danddayees. Loˈˈo kahay coo beettiyaaba gidenna. Kahay loohana koshshees. Loˈˈo kahay Yooseefi paaciyaa eqettanaadan maaddiis. (Doomettaabaa 39:1, 2, 7-12) Nuna maaddanawu, Yihooway geeshsha ayyaanaanne Geeshsha Maxaafaa maarata immees. (Roome 9:1) Nuuni nu kahaa waati loohissana danddayiyaakko ane pilggoos.

8. (a) Nuuyyo siyettiyaabay nu kahaa waati qohana danddayii? (b) Nuuni issibaa kuuyanaappe kase nuna oychchana bessiya oyshay aybee?

⁸ Issi issi asay ba kahay yootiyoobaa siyoogee bawu siyettiyaabaa kaalliyoogaa giidi qoppees. Eti koyiyo ubbabay eti loˈˈo giidi qoppidoba gidikko, hegaa oottana danddayiyaabadan qoppoosona. SHin nuuni nagaranchcha gidiyoogaa gaasuwan nuuyyo siyettiyaabay nuna balettana danddayees. Nuuyyo siyettiyaabay nu kahaa qohiyaagaa keena wolqqaama gidana danddayees. Geeshsha Maxaafay hagaadan gees: “Asa wozani ubbabaappe aadhdhi cimmiyaabaanne keehi daro iita. A ooni eranau danddayii?” (Ermmaasa 17:9) Hegaa gishshawu, nuuni issibay likke gidennaba gidikkokka, likke giidi qoppiyoogaa doommana danddayoos. Leemisuwawu, PHawuloosi Kiristtaane gidanaappe kase, I Xoossaa asaa meqetti baynna hanotan yedettiis; qassi I oottidobay likke giidi qoppiis. I bawu loˈˈo kahay deˈees giidi qoppiis. SHin I guyyeppe, “Tana pirddiyaagee Godaa” yaagiis. (1 Qoronttoosa 4:4; Oosuwaa 23:1; 2 Ximootiyoosa 1:3) PHawuloosi oottidobaa xeelliyaagan Yihoowayyo  aybi siyettidaakko I erido wode, I laamettana koshshiyoogaa akeekiis. Nuuni issibaa oottanaappe kase nuna hagaadan oychchana koshshees: ‘Taani oottanaadan Yihooway koyiyoobay aybee?’

9. Xoossaassi yayyiyoogaa giyoogee woygiyoogee?

⁹ Neeni issi ura siiqikko, A woy O ufayssennabaa oottana koyakka. Nuuni Yihoowa siiqiyo gishshawu, A ufayssennabaa aybanne oottana koyokko. Nuuni Yihoowa ufayssennabaa oottennaadan keehi yayyana koshshees. Hegaa Nahimiyaa hanotaappe akeekoos. I deriyaa ayssiyo ba maataa goˈettidi duretanawu koyibeenna. Ayssi? I hegaadan oottidoy “Xoossaassi yayyido” gishshataassa gidiyoogaa yootiis. (Nahimiyaa 5:15) Nahimee Yihoowa ufayssennabaa aybanne oottana koyibeenna. Nuunikka balabaa oottidi Yihoowa ufayssennan aggenna mala Nahimiyaagaadan yayyoos. Nuuni Geeshsha Maxaafaa nabbabiyoogan Yihoowa ufayssiyaabaa erana danddayoos.—Wurssetta Qofaa 6 xeella.

10, 11. Ushshaa xeelliyaagan nuuni loˈˈobaa kuuyanaadan nuna maaddana danddayiya Geeshsha Maxaafaa maarati awugeetee?

¹⁰ Leemisuwawu, issi Kiristtaanee ushshaa uyanawu woy uyennan agganawu kuuyana danddayees. I loˈˈobaa kuuyanaadan maaddiya maarati awugeetee? Amaridaageeti kaallidi deˈiyaageeta: Geeshsha Maxaafay ushshaa uyiyoogaa diggenna. Geeshsha Maxaafay woyne eessay Xoossa imota gidiyoogaa yootees. (Mazamure 104:14, 15) SHin, Yesuusi bana kaalliyaageeti daro ‘ushshaa’ uyennaadan yootiis. (Luqaasa 21:34) Qassi PHawuloosi Kiristtaaneti uyidi cabbottennaadaaninne ‘mattottennaadan’ odiis. (Roome 13:13) I mattottiyaageeti, “Xoossaa kawotettaa laattokkona” yaagiis.—1 Qoronttoosa 6:9, 10.

 ¹¹ Issi Kiristtaanee bana hagaadan oychchana danddayees: ‘Ushshay taassi ay keena keehi koshshiyaabee? Allaxxanawu taassi ushshay koshshii? Taani ushshaa uyiyoy keehi xalanaassee? Taani woqqaa uyanaakko, qassi aapputoo uyanaakko tana naagana danddayiyaanaa? * Taani ta laggetuura wodiyaa aattiyoosan ushshay baynnaba gidikkokka, loˈˈo wodiyaa aattana danddayiyaanaa?’ Nuuni loˈˈobaa dooranaadan Yihooway nuna maaddana mala oychchana danddayoos. (Mazamure 139:23, 24 nabbaba.) Yaatiyoogan, nu kahay Geeshsha Maxaafay yootiyo maaratuura maayanaadan loohissoos. SHin, koshshiya harabaa nuuni kaallidi pilggana.

12, 13. Nu kahay haratuugaappe dummatana danddayiyoy aybissee? He dummatettaa nuuni waatana danddayiyoo?

¹² Ubba asaa kahay issi mala gidenna. Ne kahay hara uri oottennabaa neeni oottanaadan eeno gaana danddayees. Leemisuwawu, hara asi ushshaa uyennaba gidikkonne, neeni uyana danddayaasa. Hegaa xeelliyaagan naaˈˈu asati dumma dummabaa qoppana danddayiyoy aybissee?

¹³ Issi uri qoppiyoobawu gaasoy I diccido heeraa, eta soo asay issibaa xeelliyo hanotaa, A deˈuwan hanidabaanne harabaa gidana danddayees. Ushshaara gayttidaagan, kase ushshaa uyiiddi bana naaganawu metootiya uri mule uyennan aggana danddayees. (1 Kawotu Maxaafaa 8:38, 39) Hegaa gishshawu, neeni issi ura ushshaa uyanaadan shoobbin I ixxis giikko, waatuutee? Neeni yiillotanee? Uyanaadan keehi minttettuutee?  Neeni I ayssi ixxis giidaakko eranawu koyuutee? CHii, ayssi giikko, neeni A kahaa bonchchaasa.

14, 15. PHawuloosa wode merettidabay aybee? PHawuloosi zorido loˈˈo zoree aybee?

¹⁴ Kiitettida PHawuloosa wode, kahay waanidi dummatana danddayiyaakko bessiya issi hanotay merettiis. Giyan bayzziyo ashuwaappe amaridaagee worddo goynuwaassi goˈettidobanne eeqatussi yarshshidoba. (1 Qoronttoosa 10:25) He ashuwaa shammidi miyoogee bala giidi PHawuloosi qoppibeenna. I quma ubbaa Yihooway immidobadan qoppiis. SHin kase eeqawu goynniya amarida ishantti aagaappe dummatiyaabaa qoppidosona. He ashuwaa miyoogee bala giidi eti qoppidosona. PHawuloosi, ‘Hegee ta kahaa qumˈˈiyaaba gidenna. Taani koyidobaa miyo maatay tawu deˈees’ giidi qoppidee?

¹⁵ PHawuloosi hegaadan qoppibeenna. A ishantti qoppiyoobay I xoqqu oottidi xeelliyooba gidiyo gishshawu, ba maataappe amaridabaa ba dosan aggiis. PHawuloosi “nuuni nu xalaalaa ufaissanau” bessennaagaa yootiis. I gujjidi, “Harai atto Kiristtoosikka bana ufaissibeenna” yaagiis. (Roome 15:1, 3) Yesuusadan, PHawuloosi baagaappe aattidi haratuyyo qoppiis.—1 Qoronttoosa 8:13; 10:23, 24, 31-33 nabbaba.

16. Issi ishaa kahay I oottanaadan eeno giidobaa gaasuwan, nuuni A bolli pirddana bessennay aybissee?

¹⁶ Nuussi bala milatiyaabaa hara uri oottanaadan A kahay eeno giikko shin? Nuuni likke giidi hara ura borennaadaaninne aara palamettennaadan keehi naagettana bessees. (Roome 14:10 nabbaba.) Yihooway nuussi kahaa immidoy nuuni nu bolli pirddanaassappe attin, haratu bolli pirddanaassa gidenna. (Maatiyoosa 7:1) Nuuni nuuyyo dooriyoobay gubaaˈee shaahettanaadan oottiyaaba gidana mala mule koyokko. Nuuni siiqoynne  issippetettay deˈanaadan baaxetana koshshees.—Roome 14:19.

17. Issi issi asaa kahay waanidee?

¹⁷ Kiitettida PHeexiroosi, “Inttena zoriya wozanai [woy kahay] geeshsha gido” yaagiis. (1 PHeexiroosa 3:16) Asay Yihooway kessido maarata ubbatoo xaasayidi xeelliyo wode, wurssettan eta kahay etassi yootiyoogaa aggees. Hegaa mala kahay ‘taman bonqqida biratan xuuggidobadan donjjillidoogaa’ PHawuloosi yootiis.  (1 Ximootiyoosa 4:2) Neeni taman keehi xuuggetta eray? Xuugettikko, ne gogan malaatay kiyees; he sohon neeyyo aybinne siyettana danddayenna. Issi uri ubbatoo balabaa oottikko, A kahay ‘donjjillidi’ oottiyoogaa wurssettan aggana danddayees.

18, 19. (a) Nuna mooranchchadan xeellanaadan woy yeellatanaadan oottiyaabaappe ay tamaariyoo? (b) Nuuni aggido nagaraabaa qoppidi nuna mooranchchadan xeellikko, waatana danddayiyoo?

¹⁸ Nuuni nuna mooranchchadan xeelliyo wode, nu kahay nuuni likke gidennabaa oottidoogaa nuuyyo yootana danddayees. Hegee nuuni ay oottidaakko shaakki eranawunne hegaadan oottiyoogaa agganawu maaddana danddayees. Nuuni zaarettidi kaseegaadan moorenna mala appe tamaarana koyoos. Leemisuwawu, Kawuwaa Daawiti nagaraa oottikkokka, A kahay I ba nagaraappe  simmanaadan denttettiis. I oottidobaa shenetiis, qassi sinttappe Yihoowawu azazettanawu murttiis. Daawiti ba deˈuwan beˈidobaappe Yihooway “kehanne atto giyaagaa” gidiyoogaa yootiis.—Mazamure 51:1-19; 86:5; Wurssetta Qofaa 7 xeella.

¹⁹ Issi uri ba nagaraappe simmoosappe daro wodee aadhdhi simminkka, I kase oottidobaa gaasuwan bana mooranchchadan xeellana danddayees. Issi uri bana mooranchchadan xeelliyoogee qohana danddayees; qassi bana pattennabadan xeellanaadan oottana danddayees. Hegaadan neeyyo issi issitoo siyettikko, kase hanidabaa neeni laammana danddayennagaa hassaya. Neeni likke gididabaanne likke gidennabaa he wode loytta erin aggin, Yihooway neeyyo muleera atto giis; qassi he nagaray qucettiis. Neeni Yihoowa sinttan geeshsha; qassi  neeni likke gididabaa haˈˈi oottaydda deˈiyoogaa eraasa. Ne wozanay ne bolli haˈˈikka pirddana danddayees; shin Geeshsha Maxaafay, “Xoossai nu wozanaappe gita” yaagees. (1 Yohaannisa 3:19, 20 nabbaba.) Hegaa giyoogee A siiqoynne A maarotay nuuni nuna mooranchchadan xeellanaadan woy yeellatanaadan oottana danddayiya aybippenne keehi aadhdhees giyoogaa. Yihooway neeyyo atto giidoogaa ammanettana danddayaasa. Yihooway issi urawu atto giyo wode, A kahay sarotettaa demmana; qassi I Xoossawu haggaaziyoogan ufayttana danddayees.—1 Qoronttoosa 6:11; Ibraawe 10:22.

20, 21. (a) Ha maxaafay neeni ay oottanaadan maaddanawu giigidee? (b) Yihooway nuussi immido laˈatettay aybee? Nuuni hegaa waati goˈettana bessii?

²⁰ Metuwan kumida wurssetta gallassan ne kahay neeyyo yootanaadaaninne nena naaganaadan neeni A loohissana mala maaddanawu ha maxaafay giigiis. Ha maxaafay neeni Geeshsha Maxaafay yootiyo maarata ne deˈuwan dumma dumma hanotan oosuwan peeshshanaadankka maaddana. Ha maxaafay nuussi ubba hanotawu haniya higgiyaa yootenna. Nuuni Xoossay kessido maarata denddo oottida ‘Kiristtoosa higgiyan’ deˈoos. (Galaatiyaa 6:2) Nuuni issi allaalliyaa xeelliyaagan yaata yaattoppa giya higgee baynnaagaa balabaa oottanawu gaasoyokko. (2 Qoronttoosa 4:1, 2; Ibraawe 4:13; 1 PHeexiroosa 2:16) Hegaadan oottiyoogaappe, nu laˈatettaa Yihoowa siiqiyoogaa bessanawu goˈettoos.

²¹ Nuuni Geeshsha Maxaafay yootiyo maarata wotti dentti qoppidi oosuwan peeshshiyo wode, ‘iitaa kehaa shaakkidi’ eroosinne Yihooway qoppiyoogaadan qoppoos. (Ibraawe 5:14) Hegaappe denddidaagan, loohida kahay nuna deˈuwan kaalettananne nuuni Xoossaa siiquwan deˈanaadan maaddana.