Geeshsha Maxaafan deꞌiya ha baaso timirtteta akeekido gishshau, Yihoowa kaseegaappe aaruwan siiqaasa giidi qoppoos. Ha siiquwaa minttiyaabaa ubbatoo oottana koshshees. (1 PHeexiroosa 2:2) Neeni merinaa deꞌuwaa demmana danddayiyoy Xoossaa Qaalaa xannaꞌiyoogan ubbatoo akko shiiqiyoogaana.​—Yohaannisa 17:3; Yihudaa 21 nabbaba.

 Neeni kaseegaappe aaruwan Xoossaa eriyo wode, ne ammanoy minnana. Neeni Xoossaa ufayssanau ammanoy maaddees. (Ibraawe 11:​1, 6) Ammanoy neeni nagaraappe simmanaadaaninne ne deꞌuwan issi issibaa laammanaadan maaddees.​—Oosuwaa 3:19 nabbaba.

 Neeni tamaaridobaa haratuyyo yootanaagee erettidaagaa; nuuni ubbay mishiraachuwaa yootiyoogan ufayttoos. Geeshsha Maxaafaa aggennan xannaꞌiyoogan, ne ammanuwaabaanne mishiraachuwaa yootanau Geeshsha Maxaafaa waata goꞌettanaakko akeekaasa.​—Roome 10:​13-15 nabbaba.

 Daro asay mishiraachuwaa odiyoogaa doommiyoy ba laggiyau woy dabbuwau yootiyoogaana. SHin akeekancha gida. Eta haymaanootee likke gidennaagaa yootiyoogaappe, Xoossay ehaanau qaalaa gelidobaa yoota. Qassi, asay darotoo neeni yootiyoobaappe aaruwan ne eeshshan garamettiyoogaa hassaya.​—2 Ximootiyoosa 2:​24, 25 nabbaba.

 Xoossaa Qaalaa xannaꞌiyoogee neeni ayyaanaaban diccanaadan maaddees. Wurssettan, neeni Yihoowaara dumma dabbotaa medhana danddayaasa. Qassi a soo asaa yame gidana danddayaasa.​—2 Qoronttoosa 6:18 nabbaba.

 Xoossaa Qaalaa aggennan xannaꞌiyoogan ayyaanaaban diccana danddayaasa. (Ibraawe 5:​13, 14) Tumuppe Geeshsha Maxaafay Tamaarissiyoy Aybee? giya maxaafaa goꞌettidi, nena Geeshsha Maxaafaa xannaꞌissanaadan Yihoowa Markkatuppe issuwaa oycha. Xoossaa Qaalaa loytta tamaariyo wode, ne deꞌoy keehi injjetana.​—Mazamure 1:​1-3; 73:​27, 28 nabbaba.

 Mishiraachoy ufayttiya Xoossaa, Yihoowappe yees. Neeni a asatukko shiiqiyoogan akko shiiqana danddayaasa. (Ibraawe 10:​24, 25) Yihoowa ufayssanau aggennan baaxetiyoogan, tumu deꞌuwaa, giishin merinaa deꞌuwaa demmanau koshshiyaabaa oottaasa. Xoossaakko shiiqiyoogee neeni oottana koshshiyo aybippenne aadhiyaaba.​—1 Ximootiyoosa 1:11; 6:19 nabbaba.