Asay saꞌan merinau deꞌanaagaa yootiya mishiraachoy Geeshsha Maxaafan deꞌees. (Mazamure 37:29) Geeshsha Maxaafan 66 guutta maxaafati deꞌoosona. Xoossay he maxaafata 40 gidiya ammanettida attuma asata goꞌettidi xaafissiis. Koyro maxaafata ichashata Muusee xaafoosappe 3,500 gidiya layttay aadhiis. Wurssetta maxaafaa kiitettida Yohaannisi xaafoosappe 1,900ppe dariya layttay aadhiis. Geeshsha Maxaafaa xaafidaageeti o qofaa xaafidonaa? Xoossay ba geeshsha ayyaanaa baggaara Geeshsha Maxaafaa xaafida asata haasayissiis. (2 Sameela 23:2) Eti xaafidoy bantta qofaa gidennan, Xoossaa qofaa. Hegaa gishshau, Geeshsha Maxaafaa xaafissidaagee Yihoowa.​—2 Ximootiyoosa 3:16; 2 PHeexiroosa 1:​20, 21 nabbaba.

 Geeshsha Maxaafaa Xaafissiday Oonee? Giya Biiduwaa Xeella

 Geeshsha Maxaafay sinttappe hanettana ubbabaa geeshshi yootiyo gishshau, xaafissidaagee Xoossaa gidiyoogaa eroos. Asi hegaadan oottana danddayenna. (Yaasa 23:14) Asaa naatu sinttanaa hanotaa suure yootana danddayiyay Ubbaa Danddayiya Xoossaa xalla.​—Isiyaasa 42:9; 46:10 nabbaba.

 Xoossay xaafissido maxaafay dumma gidana bessees; tumukka dumma maxaafa. Biilooniyan qoodettiya Geeshsha Maxaafay xeetan qoodettiya qaalan asau gakkiis. Geeshsha Maxaafay xaafettoosappe takkidaba gidikkokka, tumu saynisiyaara moggees. Qassi Geeshsha Maxaafaa xaafida 40 asati issoy haraagaappe dummatiyaabaa xaafibookkona. a Hegaa bollikka, Geeshsha Maxaafay Xoossaa siiquwaa qonccissees; qassi asaa deꞌoy kaseegaappe giiga gidanaadan oottees. Ha hanotati, miilooniyan qoodettiya asay Geeshsha Maxaafay Xoossaa Qaala gidiyoogaa ammananaadan oottoosona.​—1 Tasalonqqe 2:13 nabbaba.

 Geeshsha Maxaafay Tuma Gidiyoogaa Waati Erana Danddayiyoo? Giya Biiduwaa Xeella

 Geeshsha Maxaafay yootiyo waanna mishiraachotuppe issoy Xoossay asaa naatuyyo siiquwan halchidobaa. Asay saꞌan merinau deꞌiyo maatay asaa naatu taarikiyaa doomettan waanidi attidaakko, qassi wurssettan saꞌay waanidi gannate gidanaakko Geeshsha Maxaafay yootees.​—Ajjuutaa 21:​4, 5 nabbaba.

 Xoossaa Qaalay higgiyaa, baaso siraataanne zoriyaakka oyqqiis. Qassi Geeshsha Maxaafay kase wodetun Xoossay asaa waati oyqqidaakko yootees; hegee nuuni Xoossaa eeshshaa eranau maaddees. Yaatiyo gishshau, Geeshsha Maxaafay neeni Xoossaa eranaadan maaddana danddayees. Geeshsha Maxaafay neeni Xoossaa dabbo gidana danddayiyo ogiyaakka yootees.​—Mazamure 19:​7, 11; Yaaqooba 2:23; 4:8 nabbaba.

 Ha brooshuree, Yesuusi goꞌettidoogaa mala ogiyan neeni Geeshsha Maxaafay yootiyoobaa akeekanaadan maaddana. I Geeshsha Maxaafaa qofaa issuwaa haraara geeddarssiyoogan ‘Xoossaa maxaafati giyoobaa’ qonccissiis.​—Luqaasa 24:​27, 45 nabbaba.

 Xoossaappe yiida mishiraachuwaadan ufayssiyaabi he keena. SHin issi issi asay hegaa siyanau koyenna; qassi harati ubba hegan hanqqettoosona. Gidikkokka, hidootaa qanxxoppa. Neeni merinaa deꞌuwaa demmana danddayiyoy Xoossaa eriyoogaana.​—Yohaannisa 17:3 nabbaba.