Mishiraachoy so asay ufayttanaadan koyiya, ufayttiya Xoossaa, Yihoowappe yees. (1 Ximootiyoosa 1:​11, NW) Aqo deꞌuwaa doomissidaagee a. Higgee azaziyo maaran ekkiyoogeenne geliyoogee naata dichanau loꞌꞌo hanotay deꞌanaadan oottiyo gishshau, so asaa ufayssau keehi koshshiyaaba. Kiristtaaneti aqo oyqqiyoogaara gayttidaagan bantta biittaa higgiyaa bonchana koshshees.​—Luqaasa 2:1, 4, 5 nabbaba.

 Xoossay aqo deꞌuwaa waati xeellii? I azinaynne machiyaa shaahettennan deꞌanaadan koyees. Azinaynne machiyaa issoy issuwau ammanettidaageeta gidanaadan Yihooway koyees. (Ibraawe 13:4) I azinaynne machiyaa paraman shaahettiyoogaa ixxees. (Milkkiyaasa 2:​16) SHin aqo laggee wodiraa laammiyaaba gidikko, Kiristtaaneti paraman shaahettidi haranttuwaa ekkiyoogaa woy geliyoogaa diggenna.​—Maatiyoosa 19:​3-6, 9 nabbaba.

 Azinaynne machiyaa issoy issuwaa maaddiyaageeta gidanaadan oottidi Yihooway medhiis. (Doomettaabaa 2:18) Azinay so asau huuphe gidiyo gishshau, ba soo asau asatettan koshshiyaabaa kunttiyoogaaninne Xoossaabaa eta tamaarissiyoogan sintta xeera gidana koshshees. I ba goꞌꞌaa aggidi ba maccaasiyo siiqiyaagaa gidana bessees. Azinaynne machiyaa issoy issuwaa siiqananne bonchana koshshees. Ubba azinatinne machoti polo gidenna gishshau, issoy issuwaa balaa atto giyoogee aqo deꞌuwan ufayttanau keehippe koshshiyaaba.​—Efisoona 4:​31, 32; 5:​22-25, 33; 1 PHeexiroosa 3:7 nabbaba.

 Aqo deꞌuwan metoy merettikko, intte naaꞌꞌaykka issoy issuwaa siiquwan oyqqanau baaxetana koshshees. (1 Qoronttoosa 13:​4, 5)  Xoossaa Qaalay, aqo deꞌuwan metoy merettiyo wode ubban shaahettanaadan minttettenna.​—1 Qoronttoosa 7:​10-​13 nabbaba.

 Yihooway intte ufayttanaadan koyees. Intte yelagatettan waani ufayttana danddayiyaakko, i loꞌꞌo zoriyaa zorees. Intte inttena yelidaageetussi deꞌiya aadhida eratettaappenne eraappe goꞌettanaadan i koyees. (Qolasiyaasa 3:20) Yihooway intte inttena Medhidaagaunne a Naꞌau oottiyoogankka ufayttanaadan koyees.​—Eranchchaa 11:9–​12:1; Maatiyoosa 19:​13-​15; 21:​15, 16 nabbaba.

 Intte naatussi qumay, keettaynne maayoy deꞌanaadan intte minnidi oottana bessees. (1 Ximootiyoosa 5:8) SHin intte naati ufayttana mala, eti Xoossaa siiqanaadaaninne appe tamaaranaadankka intte eta tamaarissana koshshees. (Efisoona 6:4) Xoossaa siiqiyoogan intte leemiso gidiyoogee eta keehippe maaddana danddayees. Intte Xoossaa Qaalaa goꞌettidi tamaarissiyoogee intte naꞌaa qofay suure gidanaadan maaddana danddayees.​—Zaarettido Wogaa 6:​4-7; Leemiso 22:6 nabbaba.

 Intte intte naata minttettiyoogeenne galatiyoogee eta goꞌꞌees. Seeraynne zoreekka etau koshshees. Hegaadan loohissiyoogee, eti ufayttennaadan oottiya eeshshay etau deꞌenna mala maaddees. (Leemiso 22:15) Gidikkokka, qareti baynna ogiyan seerana koshshenna.​—Qolasiyaasa 3:21 nabbaba.

 Yihoowa Markkati yelidaageetanne naata keehi goꞌꞌiya daro maxaafata giigissidosona. Ha maxaafati Geeshsha Maxaafaa amppidi giigissidobata.​—Mazamure 19:​7, 11 nabbaba.