Nuna Medhidaagee aadhida eratettan nuuppe keehi aadhees. I siiqo Aawa gidiyo gishshau, nuussi qoppees. Qassi nuuni a haaruwaappe kiyidi deꞌanaadan halchibeenna. (Ermmaasa 10:23) Hegaa gishshau, guutta naati bantta aawaa woy aayee kaaletuwaa kaallana koshshiyoogaadan, nuuni ubbay Xoossaa kaaletuwaa kaallana koshshees. (Isiyaasa 48:​17, 18) Geeshsha Maxaafan deꞌiya higgee Xoossay immido kaaletuwaa oyqqiis.​—2 Ximootiyoosa 3:​16 nabbaba.

 Yihoowa higgee ha wodiyan nuuni loꞌꞌo deꞌuwaa deꞌiyo ogiyaa tamaarissees; qassi sinttappe nuuni merinaa anjjuwaa waati demmana danddayiyaakko yootees. Xoossay nuna medhido gishshau, nuuni a kaaletuwaa ufayssan kaalliyoogee bessiyaaba.​—Mazamure 19:​7, 11; Ajjuutaa 4:​11 nabbaba.

 Nuuni dumma dumma hanotan ay oottanaadan Xoossay koyiyaakko Geeshsha Maxaafan deꞌiya issi issi qofaappe akeekoos. SHin Geeshsha Maxaafan deꞌiya higgeti issi issibaa xallau goꞌꞌoosona. (Zaarettido Wogaa 22:8) Geeshsha Maxaafay yootiyo issibay, nuuni ay oottanaadan minttettiyaakko akeekanau adussi qoppana koshshees. (Leemiso 2:​10-12) Leemisuwau, Geeshsha Maxaafay deꞌoy Xoossaa imota gidiyoogaa yootees. He tumay nuna kaalettana danddayees. Hegee nuuni nu deꞌuwaunne hara asaa deꞌuwau naagettanaadan oottees.​—Oosuwaa 17:28 nabbaba.

 Yesuusi ubbaappe aadhiya naaꞌꞌu higgeta yootiis. Koyroogee asaa naati Xoossaa eranaadan, a siiqanaadaaninne ammanettidi  ayyo oottanaadan merettidoogaa qonccissees. Hagee nuuni kuuyiyo kuushsha ubban sinttayana koshshiyooba. (Leemiso 3:6) Ha kaaletuwaadan deꞌiyaageeti Xoossaara dabbotoosona, tumu ufayssaanne merina deꞌuwaa demmoosona.​—Maatiyoosa 22:​36-38 nabbaba.

 Naaꞌꞌantoogee qassi hara asaara saruwan deꞌanaadan oottees. (1 Qoronttoosa 13:​4-7) Ha higgiyau azazettiyoogee Xoossay xeelliyo ogiyan nuuni asaa xeellanaadan maaddees.​—Maatiyoosa 7:12; 22:​39, 40 nabbaba.

 Geeshsha Maxaafaa higgee so asay siiquwan waanidi issippetettay deꞌiyoogaa gidanaakko tamaarissees. (Qolasiyaasa 3:​12-14) Xoossaa Qaalay, hara kaaletuwaa, giishin, aqo deꞌoy laalettana bessennaagaa tamaarissiyoogankka so asay qohuwaappe naagettanaadan maaddees.​—Doomettaabaa 2:24 nabbaba.

 Geeshsha Maxaafay yootiyoogaadan deꞌiyoogan, asatettaaninne qofan nuna qohiyaabaappe naagettana danddayoos. Leemisuwau, ootissiyaageeti Geeshsha Maxaafay yootiyoogaadan ammanettiyaanne minnidi oottiya oosanchata darotoo koyoosona. (Leemiso 10:​4, 26; Ibraawe 13:18) Xoossaa Qaalay nuuni deꞌuwau koshshiyaabay gidana giidi deꞌanaadaaninne aquwaappe aattidi Xoossaara deꞌiya dabbotaa xoqqu oottidi xeellanaadankka tamaarissees.​—Maatiyoosa 6:​24, 25, 33; 1 Ximootiyoosa 6:​8-10 nabbaba.

 Xoossaa higgiyaadan deꞌiyoogee nuuni payya gididi deꞌanaadan maaddana danddayees. (Leemiso 14:30; 22:​24, 25) Leemisuwau, mattottennaadan Xoossaa Qaalay yootiyoogaa azazettiyoogee woriya harggiyaappenne daafabaappe nuna naagees. (Leemiso 23:20) Ushshaa uyiyoogaa Yihooway diggennaba gidikkokka, likkiyan uyana koshshees. (Mazamure 104:15; 1 Qoronttoosa 6:10) Xoossaa higgee nuuni oottiyooba xalla gidennan, qoppiyoobaakka naagettanaadan tamaarissiyoogan nuna goꞌꞌees. (Mazamure 119:​97-100) Gidikkokka, tumu Kiristtaaneti Xoossaa higgiyau azazettiyoy banttana goꞌꞌiyoogaa xallaassa gidenna. Eti azazettiyoy Yihoowa bonchanau koyiyo gishshataassa.​—Maatiyoosa 5:​14-16 nabbaba.