Yihooway saꞌaa asaassi immiis. Saꞌay nuuni deꞌiyo soho. Hegaa gishshau, koyro azinaynne machiyaa, Addaameenne Hewaana merettidoy saluwan deꞌanaadaana gidenna; Xoossay eta medhanaappe kase saluwan deꞌanaadan medhidoy kiitanchata. (Iyyooba 38:​4, 7) Xoossay koyro bitanee Edene Gannatiyaa geetettiya loꞌꞌiya sohuwan deꞌana mala yan wottiis. (Doomettaabaa 2:​15-17) Addaameenne i yelana naati saꞌan merinau ufayssan deꞌanaadan Yihooway halchiis.​—Mazamure 37:29; 115:16 nabbaba.

 Koyro gannate gididay Edene gannate xalla. Koyro azinaynne machiyaa yelidi corattidi saꞌaa kumanaadan azazettidosona. Takkidi, eti kumetta saꞌaa haaranaadaaninne gannate oottanaadan azazettidosona. (Doomettaabaa 1:28) Saꞌay mule xayenna. Saꞌay merinau asaa naati deꞌiyoosa gidana.​—Mazamure 104:5 nabbaba.

 Xoossay Saꞌaa Medhdhidoy Aybissee? Giya Biiduwaa Xeella

 Addaameenne Hewaana Xoossau azazettibeenna gishshau, Yihooway eta gannatiyaappe kessiis. Gannatee xayiis; ay asinne saꞌay zaarettidi gannate gidanaadan oottana danddayibeenna. He wodeppe doommidi saꞌan iita asay deꞌees.​—Doomettaabaa 3:​23, 24 nabbaba.

 Yihooway asaa naatussi koyro halchidobaa aggidee? Aggibeenna! I ubbaa danddayiya Xoossa. Ba halchidobaa polees. (Isiyaasa 45:18) I koyro qoppidoogaadan asaa naati deꞌanaadan oottana.​—Mazamure 37:​11, 34 nabbaba.

 Xoossay sunttido Kawo gidiyoogaadan Yesuusi haariyo wode, saꞌay zaarettidi Gannate gidana. Armmageedoona giyo olan Yesuusi Xoossaa kiitanchata kaalettidi Xoossaa morkketa ubbaa xayssana. Hegaappe simmin, Yesuusi Seexaanaa 1,000 layttau qachana. Xoossaa asaa kaalettiyaynne naagiyay Yesuusa gidiyo gishshau, eti bashshaappe attana. Yaatidi, eti Gannatiyan merinaa deꞌuwaa demmana.​—Ajjuutaa 20:​1-3; 21:​3, 4 nabbaba.

 Xoossay saꞌaappe iitabaa xayssanay awudee? Yesuusi wurssettay matattidoogaa erissiya ‘malaataa’ yootiis. Ha wodiyan alamiyan hanettiiddi deꞌiyaabay asay keehi hirgganaadan oottiyaabanne nuuni ‘wodiyaa wurssettan’ deꞌiyoogaa bessiyaaba.​—Maatiyoosa 24:​3, 7-14, 21, 22 nabbaba.

 Yesuusi saluwan uttidi 1,000 layttaa saꞌaa haariyo wode, ubba metuwaa xayssana. (Isiyaasa 9:​6, 7; 11:9) Yesuusi Kawo gididi haariyoogaappekka haray, Qeese Ubbatu Halaqaa gididi oottiyo gishshau, Xoossaa siiqiyaageetu nagaraa atto giissana. Yaatiyoogan, Xoossay Yesuusa baggaara harggiyaa, ceegatettaanne hayquwaa xayssana.​—Isiyaasa 25:8; 33:24 nabbaba.

 Xoossaayyo azazettiya asay Gannatiyan deꞌana. (1 Yohaannisa 2:17) Yesuusi bana kaalliyaageeti ashkke asata koyidi, eti Xoossaa waatidi ufayssana danddayiyaakko tamaarissana mala kiittiis. Saꞌay Gannate gidiyo wode deꞌana miilooniyan qoodettiya asaa Yihooway ha wodiyan giigissiiddi deꞌees. (Sofonaasa 2:3) Yihoowa Markkatu SHiiquwaa Addaraashan, asay loꞌꞌo azinanne loꞌꞌo aawa, qassi loꞌꞌo machonne loꞌꞌo aayo gidanau tamaarees. Naatinne yelidaageeti issippe goynnoosonanne mishiraachoy eta ayba ogiyan goꞌꞌiyaakko tamaaroosona.​—Mikiyaasa 4:​1-4 nabbaba.