Timirtte keettay darajjayissin issi heeraa beˈanawu biishin, bantta mala attuma tamaaretuura wolqqan mattumaa gayttanawu malidosona giidi amarida yelaga attumaageeta mootidosona. Eti ubbay Kanaada biittan issi keehi erettida buzo timirtte keettan tamaariyaageeta. He hanotaappe simmin, Liˈonard Isterni Ottawa Sitizin giyo gaazeexan hagaadan xaafiis: “Gooba asa gidiyoogee, loˈˈo timirttiyaa tamaariyoogeenne dure gidiyoogee yelagati iitabaa oottennaadan teqqenna.”

Isterni hagaadankka giis: “Yelidaageeti bantta naata tamaarissanawu keehi koshshiyaabay suure gididabaanne suure gidennabaa gaada neeni qoppiyoogee bessiyaaba. SHin, yelida daroti bantta naati daro miishshaa demmana mala timirttiyan gooba gidiyoogaanne loˈˈo ooso demmiyoogaa keehi koshshiyaaba giidi qoppiyaaba milatees.”

Timirttee keehi koshshiyaaba gidiyoogee tuma. Gidoppe attin, keehi loˈˈo giyo timirtteekka issi uri iitabaa amottennaadan diggenna. Yaatikko, nuuni kandduwaaban kaaletuwaa demmanaadan maaddiya timirttiyaa awuppe demmana danddayiyoo?

Geeshsha Maxaafay herega mala. Nuuni Geeshsha Maxaafaa xannaˈikko, nuussi danddayettennabaanne nuuni shugo gididobaa loytti akeekoos. (Yaaqooba 1:23-25) SHin Geeshsha Maxaafay nuuni harabaakka akeekanaadan oottees. I nuuni koshshiyaaban laamettanaadan, tumu sarotettawunne issippetettawu koshshiya eeshshati deˈiyoogeeta gidanaadan nuna maaddees. Loˈˈotettay, kehatettay, danddayay, bana naagiyoogeenne siiqoy he eeshshatuppe amaridaageeta. Qassi siiqoy ‘ubbabaa issippe shiishshi qachchiyaagaa’ geetettiis. (Qolasiyaasa 3:14) Siiqoy keehi dumma gidiyoy aybissee? Ha eeshshaabaa Geeshsha Maxaafay yootiyoobaa akeeka.

• “Siiqoi danddayanchcha. Siiqoi kehees. Siiqoi qanaatenna. Ceeqettenna; qassi otorettenna. Siiqoi baassi bessennabaanne oottenna. Uuzettenna. Yiillotenna. Siiqoi naaqettidobaakka paidenna. Siiqoi tumatettan ufaittiyoogaappe attin, wordduwan ufaittenna. Siiqoi ubbabaa danddayees. . . . Ubbabaa genccees. Siiqoi mulekka xayenna.”—1 Qoronttoosa 13:4-8.

• “Ba shooruwaa siiqiya ooninne ayyo iitabaa oottenna.”—Roome 13:10.

• “Siiqoi daro nagaraa kammiyo gishshau, ubbabaappe aattidi issoi issuwaara wozanappe siiqettite.”—1 PHeexiroosa 4:8.

Nena siiqiya asaara neeni deˈiyo wode, neessi aybi siyettii? Neeni woppu giyoogeenne hirggennaagee qoncce. Ee, eti neessi loˈˈobaa amottiyoogaa eraasa, eti eriiddi nena mule qohokkona.

Siiqoy haratu goˈˈaa gishshawu asay ba goˈˈaa aggibayanaadan, haray attoshin ba deˈuwaa hanotaa laammanaadan denttettana danddayees. Leemisuwawu, Jorj giyo bitaniyaa naˈiyaa yelido wode, I ba naˈee naˈaara wodiyaa aattanawu keehi koyiis. SHin metoy deˈees. I sijaaraa keehi uyiyo gishshawu, A naˈee azinay I guutta naˈaa mati shiiqanaadan koyibeenna. Jorji waatidee? I 50 gidiya layttawu sijaaraa uyikkonne, ba naˈee naˈaa gishshawu he amaliyaa aggiis. Ee, siiquwawu gita wolqqay deˈees!

Siiqoy nuuni tamaariyo eeshsha. Bantta naati harata waati siiqanaakko tamaarissiyo gita aawatettay yelidaageetussi deˈees. Eti bantta naata mizoosonanne naagoosona; qassi qohettiyo woy sahettiyo wode eta maaddoosona. Loˈˈo aawati woy aayoti bantta naatuura haasayoosonanne eta tamaarissoosona. Qassi eti bantta naata seeroosona; likkebaanne likke gidennabaa xeelliyaagan loˈˈo maarata tamaarissiyoogee yaatiyo issi oge. Hegaa bollikka, loˈˈo aawati woy aayoti bantta naatussi loˈˈoban leemiso gidoosona.

SHin issi issi aawatinne aayoti banttappe koyettiyaabaa maara oottennaagee azzanttiyaaba. Hegaa giyoogee eta naati mule loˈˈo asa gidokkona giyoogee? CHii! Iita keettan diccida issota issota gujjin, gastta asati darotikka gidin, qoppiyaanne ammanettiya asa gidiyoogan maalaalissiya hanotan bantta deˈuwan laamettidosona. Mule laamettokkona giidi harati qoppiyoogeeta gujjin, amaridaageetubaa nuuni kaalliya huuphe yohuwan beˈana!