HA SAˈAY BASHSHAAPPE ATTANEE?
Haattaa
HAATTI baynnan, ubba qassi uyanawu haniya haatti baynnan ha saˈan deˈoy deˈana danddayenna. Deˈon deˈiya mereta ubbaa giddon deˈiyabaappe dariya baggay haattaa. Qeeri abbay, shaafay, careenne biitta giddon deˈiya haattay asaynne mehee uyanawu, qassi kattaa waaruwawu goˈettanawu maaddees.
Nuussi Uyiyo Geeshsha Haattay Qaxuwatiyoy Aybissee?
Ha saˈaappe dariya baggay haattan kamettiis. Gidikkokka, Alamiya Carkkuwa Hanotaa Xannaˈiya Dirijjitee giidoogaadan, “ha saˈan deˈiya haattaappe uyanawunne goˈettanawu maaddiyay 0.5% xalaala.” Saˈan deˈon deˈiyabatussi koshshiya haattay hegaa keena guutta gidikkokka, hegaappekka dariya baggay moorettiis, woy koyiya asaa qooday daridoogaappenne carkkuwa hanotay laamettidoogaappe denddidaagan demmanawu metees. Eranchchati, sinttappe 30 layttaa giddon, ichchashu biiloone gidiya asay uyiyo haattaa demmana danddayennaagaa yootoosona.
Ha Saˈay Bashshaappe Attanaadan Giigidi Merettiis
Ha saˈay ubba wode asawu koshshiya gidiya haattay deˈanaadan giigidi merettiis. Biittay, haatta giddon deˈiya meretatinne awaa pooˈoy issippe haattaa geeshshoosona. Ha saˈay bashshaappe attanaadan giigidi merettidoogaa bessiya amarida naqaashata akeeka.
-
Haattaa mooriya darobata gaccidi digganawu biittay maaddana danddayees. Caretiya biittan, issi issi dozati naytroojiiniya, posporesiyanne guxune malabata woriya xaliya xayssiyogan erettoosona.
-
Haattay meretan waanidi iitabaappe geeyiyakko saynttistteti eridosona. Eesuwara goggiya haattay mooriyabatuppe geeyi geeyi bin, bakitereti he mooriyabata xayssoosona.
-
Goˈettanawu haniya haattaa giddon deˈiya kilam giyonne messil giyo meretati qohiya keemikaaleta guutta gallassaa giddon haattaa giddoppe xayssana danddayoosona; ubba, haattaa geeshshoosona giyo dozatuugaappekka aaruwan hegaadan oottana danddayoosona.
-
Ha saˈay haattaara gayttidaagan simmi simmi haniyabaa baggaara haattaa dagayees. Ha simmi simmi haniyabay, meretan polettiya harabatuura issippe, haattay saˈaa yuushuwappe harasaa beennaadan woy xayennaadan oottees.
Metuwa Pagalanawu Asay Ay Oottiiddi Deˈii?
Kaamiyappe xokkiya zaytiya giigissiyogaaninne qohiyabata bessiya ogiyan xayssiyogan haattaa pulttoy geeshsha gidanaadan maaddoos.
Eranchchati, ubba wode haattaa qoraphphidi goˈettanaadan zoroosona. Haattay keehi moorettiyogaa teqqanawu, kaamiyan deˈiya zaytee xokkikko sohuwara giigissanaadan, qassi goˈettibeenna xaliya woy qohiyabata haattan qolennaadan zoroosona.
Eranchchati, abbaa haattaappe maxiniya shaakkiyo, dissalineshin giyo malaaliya hiillaa demmidosona. Hegaa halchchoy goˈettanawu haniya daro haattay deˈanaadan oottanaassa.
Shin, haˈˈikka darobay koshshees. Abbaa haattaappe maxiniya shaakkiyo hiillawu daro miishshaynne wolqqay koshshiyo gishshawu, hegeekka metuwa pagaliya loˈˈo hiilla gidenna. Uyiyo haattaa waati naagana koshshiyakko Kawotettatu Issippetettay 2021n kessido iripporttee hagaadan gees: “Kumetta saˈan oosettiiddi deˈiyabaa haˈˈiigaappe naaˈˈu kushe gujjana koshshees.”
Saˈay Bashshaappe Attanaagaa Ammaniyo Gaasota—Geeshsha Maxaafay Woygii?
“Xoossai haattaa sa7aappe pude saluwaa efees; efiidi yan ira kessees. He irai shaaraappe kiyidi, asau daro bukkanaadan oottees.”—Iyyooba 36:26-28.
Xoossay saˈan deˈiya haattaa mooriyabaappe naaganawu meretan simmi simmi haniyabaa giigissiis.—Eranchchaa 1:7.
Hagaa qoppa: Medhdhidaagee ha saˈay ubbatoo haattaa geeshshanaadan oottidaba gidikko, I asay mooridobaa giigissanawu koyees, qassi yaatanawu awu wolqqay deˈees gi ammaniyogee bessiyaba gidennee? Sinttaa 15n, “Ha Saˈay Bashshaappe Attanaagaa Xoossay Qaalaa Geliis” giya huuphe yohuwa xeella.
