Hagee kumetta saˈan pilggiyageetu citay carkkuwa hanotay laamettiyogaa xeelliyagan wurssettan kuuyido qofa. Neeni asawu qoppiya Medhdhidaagan ammaniyaba gidikko, eranchchati kuuyido ha qofay saˈay bana barkka qohuwappe giigissanaadan oottidi Xoossay medhdhidoogaa neeni hassayanaadan oottana danddayees.

Gidikkonne asay saˈaa keehi moorido gishshawu, saˈay barkka bana muleera giigissana danddayenna. Xoossay hegaa giigissanawu issibaa oottanaagaa nuuni ammanettana danddayiyoy aybissee?

Ha saˈay bashshaappe attanaagaanne ubba haa loˈˈanaagaa nuuni ammanettanaadan oottiya, saaxiniyan deˈiya xiqiseta akeeka.

• Ha saˈaa medhdhiday Xoossaa. “Xoossai salotanne sa7aa koiro medhdhiis.”—Doomettaabaa 1:1

• Ha saˈan deˈiya ubbabay Xoossaaba. “Sa7ainne sa7an kumidabai ubbai [Yihoowaba, NW].” a—Mazamure 24:1

• Xoossay ha saˈay bashshaappe attanaadan giigissidi medhdhiis. “Neeni sa7aa a baasuwaa bolli essadasa; i meri merinaukka qaaxxenna.”—Mazamure 104:5

• Deˈon deˈiyabati saˈan kaseppe haa loˈˈidi merinawu deˈanaagaa Xoossay qaalaa geliis. “GODAI, [biittaa] giigissidi oottidaagee, . . . asi de7anaadaanappe attin, biittaa coo medhdhibeenna.”—Isiyaasa 45:18

• Asay ha saˈan merinawu deˈanaagaa Xoossay qaalaa geliis. “Xilloti biittaa laattananne yan merinau de7ana.”—Mazamure 37:29

Xoossay asay saˈaa moorennan an ufayttidi deˈanaadan giigissiis. Asay yaaretidi oottido ha saˈaa mooriyabata, Xoossaa Yihooway ba keerido wodiyan xayssanaagaa Geeshsha Maxaafay yootees.—Ajjuutaa 11:18

Hegaappe simmin Xoossay ha saˈaa giiganne keehi loˈˈiya gannate oottanaagaa, qassi ba kushiya miccidi ‘paxa deˈiyageetu ubbaa amuwa alanaagaa’ Geeshsha Maxaafay yootees.—Mazamure 145:16