Asay Bana Bonchchiyogaa Aggidoy Aybissee?
ASAY BANA BONCHCHIYOGEE KEEHI KOSHSHIYOY AYBISSEE?
Bana bonchchiya asay deˈuwan gakkiya metota minotettan genccana danddayees. Eti sohuwara hidootaa qanxxokkona.
-
Banttabaa loˈˈobaa qoppennaageeti azzanana, unˈˈettananne etawu qumaa miyo koshshay xayana danddayiyogaa issi xinaatee bessees. Qassi eti darotoo ushshaanne jallissiya xaliya bessenna ogiyan goˈettana danddayoosona.
-
Banttana bonchchiyageeti haratuura banttana geeddarssokkona, hegee eti metootennan haratuura sarotettan deˈanaadaaninne laggetettaa minttanaadan oottees. Hara baggaara, banttana bonchchennaageeti darotoo balaa qoroosona, hegee haratuura deˈiya dabbotettaa moorana danddayees.
-
Banttana bonchchiyageeti metoy gakkiyo wodekka minnidi genccoosona; eti bantta halchchuwa polennaadan xubbiyabati gaaso gidanaadan oottokkona. Hegaappe dumma ogiyan, banttana bonchchennaageeti darotoo guutta metota gitabadan xeelloosona. Hegee eti sohuwara hidootaa qanxxanaadan oottana danddayees.
AY OOTTANA DANDDAYAY?
Nena minttettiya laggeta doora. Nena bonchchiya, tumuppe ne sarotettaa koyiyanne nena minttettiya asatuura laggeta.
Harata maadda. Neeni neeyyo kushiya zaarana danddayennaageeta gujjin haratuyyo kehiyo wode, immiyogan beettiya tumu ufayssaa demmaasa. Neeni oottido loˈˈobaa ooninne erennaba gidikkokka, ufayttiyagaa gidaasa.
Ne naati banttana bonchchanaadan maadda. Hegaadan oottiyo issi ogee, eti danddayido keenan banttana gakkida metuwa banttarkka pagalanaadan oottiyogaana. Hegee naati metuwa gencciyogaa woy pagaliyogaa tamaaranaadan maaddees. He tamaaridobay eti naatettankka gasttiyo wodekka banttana bonchchiyageeta gidanaadan oottana.
YIHOOWA MARKKATI AY OOTTIIDDI DEˈIYONAA?
Yihoowa Markkatu shiiqotinne eti Geeshsha Maxaafaa xannaˈissiyogee asay bantta deˈuwa giiga oottanaadaaninne banttana bonchchanaadan maaddees.
NUUNI SAAMINTTAN SAAMINTTAN SHIIQIYO SHIIQOTA
Nuuni saaminttan saaminttan shiiqiyo shiiqotun, nuna bonchchiyo ogeta gujjin Geeshsha Maxaafaappe giigida haasayata siyoos. Nu shiiqoti miishsha qanxxissokkona, qassi hegeetun ooninne shiiqana danddayees. Leemisuwawu, nu shiiqotun neeni kaallidi deˈiyabata tamaarana:
-
Xoossay nena xoqqu ootti xeelliyo gaasuwa
-
Deˈuwawu tumu halchchuwa waati demmanaakko
-
Minonne duuxxenna laggetettaa waati medhdhanaakko
Qassi neeni “issoi issuwaassi issi mala” qofay deˈiyo tumu laggeta demmana.—1 Qoronttoosa 12:25, 26.
Nu shiiqotubaa gujjada eranawu, SHiiquwaa Addaraashan Oosettiyaabay Aybee? giya qantta biiduwa jw.org saytiyan koya.
NUUNI GEESHSHA MAXAAFAA TAMAARISSIYOGAA
Nuuni Merinawu Ufayttada Deˈa! giya maxaafaa goˈettidi miishsha qanxxissennan Geeshsha Maxaafaa xannaˈissoos. Ha maxaafan waanna qofaa oyqqida xiqiseti, qofaa qonccissiya gaasoti, qoppanaadan oottiya oyshati, denttettiya biidotinne loˈˈiya misileti deˈoosona. Geeshsha Maxaafaa xinaatee asay bana toochchennaadaaninne ba deˈuwa giiga oottanaadan maaddees.
Yihoowa Markkatuura Geeshsha Maxaafaa xannaˈiyogee nena waati maaddana danddayiyakko eranawu, Geeshsha Maxaafaa Xannaˈana Koshshiyoy Aybissee? giya qantta biiduwa jw.org saytiyan koya.
Hageeta Beꞌadii?
NUBAA
Geeshsha Maxaafaa Tamaaranawu Oychcha
Geeshsha Maxaafaabaa woy Yihoowa Markkatubaa loytta erana.
