Asay Harata Bonchchiyogaa Aggidoy Aybissee?
HARATA BONCHCHIYOGEE KEEHI KOSHSHIYOY AYBISSEE?
Harata bonchchiyogee unˈˈissiyabaynne iitabay yaa gujjennaadan oottees.
-
Geeshsha Maxaafaa leemisoy hagaadan gees: “Liiqo haasayai hanqquwaa zarbbissees; shin porddolla qaalai hanqquwaa denttettees.” (Leemiso 15:1) Bonchchennaagaa bessiya haasayaynne oosoy darotoo daafabaa kaalettees, hegee taman lambbaa gujjiyogaa mala.
-
Yesuusi, “Wozanan kumidabaappe doonay haasayees” yaagiis. (Maatiyosa 12:34) Bonchchennaagaa bessiya haasayay nu wozanan deˈiya iitabaa, hegeekka zariyan, yaran, biittan, woy diccido hanotan nuugaappe dummatiyageeta nuuni xeelliyo ogiya qonccissana danddayees.
Mata wode 28n biittatun 32,000ppe dariya asaa oychchido xinaatiyan, 65 kushe gidiyageeti asaa bonchchiyogee awudeegaappenne aaruwan guuxxidoogaa yootidosona.
AY OOTTANA DANDDAYAY?
Timirtte keettan woy ooso sohuwan gidin, neeni etaara qofan maayettennaba gidikkokka ubba asaa bonchcha. Intte maayettana danddayiyobata shaakka era. Hegee neeni amassaliyagaa woy harata mooranchchadan xeelliyagaa gidennaadan maaddana.
Harati neeyyo oottanaadan koyiyogaadan etawu ootta. Neeni haratuyyo qoppiyabanne bessiyabaa oottiyaba gidikko, etikka neeyyo hegaadan oottiyogee attenna.
Atto giyagaa gida. Issi uri haasayido woy oottido yiilloyiyabaa agga bayiyogan, I nena qohanawu koyidi oottibeennabadan qoppa.
YIHOOWA MARKKATI AY OOTTIIDDI DEˈIYONAA?
Yihoowa Markkati bantta deˈiyo heeraaninne ooso sohuwan harata bonchchiyogaa bessiyabaa oottoosona.
Nuuni miishsha qanxxissennan ubba asaa Geeshsha Maxaafaa tamaarissoos, gidikkonne harati nu ammanuwa woy qofaa kaallanaadan wolqqanttokko. Nuuni ammaniyobaa haratussi ‘ashkketettaaninne bonchchuwan’ yootiyogan, Geeshsha Maxaafaa zoriya oosuwan peeshshanawu baaxetoos.—1 PHeexiroosa 3:15; 2 Ximootiyoosa 2:24.
Nuuni asa asappe shaakkokko, qassi Geeshsha Maxaafay tamaarissiyobaa eranawu koyidi nu galchchaa shiiqota yiya, diccido hanotay dumma dumma gididoogeeta mokki ekkoos. Nuuni danddayanchcha gidanawunne ‘asa ubbaa bonchchanawu’ baaxetoos.—1 PHeexiroosa 2:17.
Nuuni deˈiyo biittaa kawotettaa sunttata bonchchoos. (Roome 13:1) Nuuni higgiyawu azazettoosinne giiraa giiroos. Nuuni polotikaaban ooyyonne exatennaba gidikkokka, polotikaara gayttidaagan harati bantta koyidobaa dooriyo maataa bonchchoos.
