Issoy issuwaa bonchchiya aqo laggeti maayettennabay merettiyo wodekka, issoy harawu qoppoosona. Ten Lesens tu Transform Yur Merej giyo maxaafay hagaadan gees: “Hegaa mala aqo laggeti issoy issuwaara maayettennabay merettiyo wode, bantta qofaa laammanawu eeno goosona. Ubba eti he maayettenna allaalliyaabaa issippe haasayoosona. Eti bantta aqo laggiyaa qofaa bonchchuwan ezggidi, bantta naaˈˈaa goˈˈawu qoppiyoogan issi issibaa aggi bayoosona.”

GEESHSHA MAXAAFAY YOOTIYO MAARAA: “Siiqoi . . . bana goˈˈiyaaba xallaa qoppenna.”—1 Qoronttoosa 13:4, 5, NW.

“Ta keettaayyiyo bonchchiyoogaa giyoogee taani O xoqqu ootta xeelliyoogaa, qassi O woy nu aqo deˈuwaa qohiya aybanne oottana koyennaagaa giyoogaa.”—Mayka.

Aqo laggeti issoy issuwaa bonchchennaba gidikko, eti haasayiyo wode issoy haraa borana, toochchana, ubba karana danddayoosona; xannaˈiyaageeti yootiyoogaadan he eeshshati aqo laggeti takkidi paraman shaahettanaagawu malaata.

“Azinay ba machchiyo boriyoogee, toochchiyoogee woy baceessiyoogee machchiyaa bana pattennabadan xeellanaadaaninne ba azinaa ammanennaadan oottees, qassi eta aqo deˈuwaa moorees.”—Bireyina.

NENA QORA

Issi saaminttan haasayiyoobaanne oottiyoobaa yigga. Yaatada nena hagaadan oychcha:

• ‘Ta aqo laggiyaa aapputoo boridanaa, qassi aapputoo nashshidanaa?’

• ‘Ta aqo laggiyaa bonchchiyoogaa bessiyaabaa ay oottidanaa?’

NE AQO LAGGIYAARA HAASAYA

• Bonchchettidabadan intteyyo siyettanaadan oottiya oosotinne qaalati awugeetee?

• Bonchchettibeennabadan intteyyo siyettanaadan oottiya oosotinne qaalati awugeetee?

MAADDIYA HARA QOFAA

• Neeni bonchchettana koyiyo heezzu ogeta xaafa. Ne aqo laggeekka hegaadan xaafanaadan ootta. Intte xaafidobaa laamerettidi hegaadan bonchchanawu malite.

• Ne aqo laggiyawu deˈiya, ne nashshiyo eeshshaa xaafa. Yaatada, neeni he eeshshaa ay keena nashshiyaakko ayyo woy iyyo yoota.

“Ta azinaa xoqqu oottada xeelliyoogaaninne I ufayttanaadan koyiyoogan, A nashshiyoogaa ta oottiyooban bessays. Hegee darotoo gitaban qoncciyaaba gidenna; guuttabaa oottiyoobankka tumuppe bonchchiyoogaa bessana danddayettees.”—Meegaano.

Waannabay, neeni bonchchiyaabadan qoppiyoogaa gidennan, ne aqo laggee bonchchettidabadan qoppiyoogaa.

GEESHSHA MAXAAFAY YOOTIYO MAARAA: “Maarotettaa, qaretaa, kehatettaa, intte huuphiyaa kaushshiyoogaa, ashkketettaanne danddayaa maayite.”—Qolasiyaasa 3:12.