YELIDAAGEETA MAADDIYAABAA
7: Kandduwaa Maaraa
HEGEE AYBEE?
Kandduwaa maaray issi uri ba deˈuwan kaallanawu dooriyoobaa. Leemisuwawu, neeni ubbaban ammanettiyaagaa gidanawu baaxetay? Yaatikko ne naati ammanettiyaageeta gidanaadan koyennan aggakka.
Kandduwaa maaray loˈˈo eeshshaarakka gayttidaba. Leemisuwawu loˈˈo eeshshay deˈiyo uri bessiyaabaa minnidi oottees, qassi haratuyyo qoppees; hegaa mala loˈˈo eeshshay issi uri naatettan meezetiyooba.
GEESHSHA MAXAAFAY YOOTIYO MAARAA: “Na7i waanidi de7ana bessiyaakko tamaarissa; yaatikko, i cimidikka hegaa aggenna.”—Leemiso 22:6.
SEERIYOOGEE KOSHSHIYO GAASUWAA
Tekinolojee aakkido ha wodiyan, kandduwaa maaray keehi koshshees. Kareno giyo aayyiyaa hagaadan gaasu: “Qohiyaabay moobayle malaban awudenne demmana danddayiyoobaa. Nu naati nu matan uttidi pokkobaa beˈana danddayoosona!”
GEESHSHA MAXAAFAY YOOTIYO MAARAA: ‘Wozannaama asi iitaa kehaa deˈuwaa daruwan shaakkees.’— Ibraawe 5:14.
Haratuyyo qoppiyoogee keehi koshshiyaabaa. Hegee hayyanaa, qassi galatays giyoogaanne haratuyyo qoppiyoogaa mala keehi metennaba gidana danddayees; ha wodiyan asay elektronike miishshaa dosiyoogaa keenaa asa dosenna gishshawu, hegaa mala loˈˈo eeshshay xayi xayi biis.
GEESHSHA MAXAAFAY YOOTIYO MAARAA: “Asi intteyyo oottanau intte dosiyoogaadan; haraukka hegaadan oottite.”—Luqaasa 6:31.
AY OOTTANA DANDDAYAY?
Intte kaalliyo kandduwaa maaraa yootite. Leemisuwawu, aqo oyqqanaappe kase mattumaa gayttiyoogee bala gidiyoogaa yelagatuyyo geeshshi yootikko, eti hegaappe haakkana danddayiyoogaa xinaatee bessees.
MAADDIYA HARA QOFAA: Matan hanidabaa yootiyoogan kandduwaa maarabaa tobbiyoogaa doommana danddayeeta. Leemisuwawu, asa woridoogaabaa oduwan siyikko, intte hagaadan gaana danddayeeta: “Issi issi asay ba hanqquwaa hegaadan bessiyoogee keehi azanttiyaaba. Asay hegaadan haniyoy aybissa gaada qoppay?”
“Naati aybi likkekko aybi balakko shaakki erana xayikko likke gididaba dooranawu metootana danddayoosona.”—Brandena.
Naati haratussi qoppanaadan taamarissite. Guutta naatikka “hayyanaa” qassi “galatays” giyoogaanne harata bonchchiyoogaa tamaarana danddayoosona. Parenting Wizawut Borders giyo maxaafay hagaadan gees: “Naati so asaa, timirtte keettaanne deretettaa yame gidiyoogaa akeekikko bantta xalla gidennan ubba asaa goˈˈiyaabaa oottanawu koyana danddayoosona.”
MAADDIYA HARA QOFAA: Intte naati harata maaddiyoogaa goˈˈaa akeekanaadan son giddon eta issi issibaa ootissite.
“Naati so giddon oottiyoogaa meezetikko, eti banttana danddayidi deˈiyo wode metootokkona. Aawatettaa kiyiyoogee eti meezetidoba gidana.”—Taro.
