Loˈˈo asay tuggatiyoogee bessiyaaba milatenna. Issoti issoti oonanne tuggay gakkiyaaba gidikko, loˈˈo asa gidiyoogee koshshennaba goosona.

Asay ubbatoo hayqqeessinne zaarettidi yelettees giidi issi issi asay ammanees. Eti loˈˈobaa oottidaageeti loˈˈo deˈuwawu zaarettidi yelettana, qassi iitabaa oottidaageeti ubbatoo tuggatanawu zaarettidi yelettana yaagoosona. He ammanuwaa maaraadan, issi uri ha wodiyan loˈˈo asa gidikkonne, I “kase oottido” issibaa gishshawu tuggatana. SHin . . .

• Issi uri zaarettidi yelettiyo wode, kase oottidobaa hassayenna giidi qoppoos; yaatikko tuggatiyoogee ay maaddii?

• Nuuni kase oottidobaa gishshawu sahettikko woy daafabay gakkikko, nuuni haˈˈi payya gidanawunne daafabay gakkennaadan baaxetiyoy aybissee?

  GUJJADA ERA

  Xoossay Tuggaa Aybissi Coˈˈu Giidi Xeellii? giyo biiduwaa jw.org/wal saytiyaappe beˈa.

Tuggay Xoossaa qixaate gidenna.

SHin darotoo issi uri bessenna wodiyan bessennasan deˈido gishshawu hegaa malabay gakkana danddayees.

“Eesotiya wottanchchati ubba wode xoonokkona; woikko mino olanchchatikka ubba wode olan xoonokkona; woikko aadhdhida eranchchati ubba wode qumaa demmokkona; woikko cinccati ubba wode duretokkona; woikko tamaarida asati ubba wode sabettokkona. SHin ubbaikka qaadainne wodee oottoogaadan hanees.”—ERANCHCHAA 9:11.

Nuuni laattido nagaray tuggatanaadan oottees.

Darotoo asay “nagaraa” giyo qaalaa issi uri oottido iita oosuwawu goˈettees. SHin, asa ubbay, hegeekka loˈˈotikka iitatikka nagaraa laattidoogaa Geeshsha Maxaafay yootees.

“Taani yelettoosappekka tumu nagaranchcha; ta aayee uluwan biron attiyo wodeesappe doommadakka taani nagaranchcha.”—MAZAMURE 51:5.

Laattido nagaray asaa qohees.

Hegee nuna Medhdhidaagaara dabbotaa mooriyoogaa xalla gidennan, hara Xoossaa meretatuura sarotettan deˈennaadankka oottees. Hegee asa zare ubbay huuphiyan huuphiyankka citankka keehi tuggatanaadan oottiis.

“Taani lo77obaa oottanau dosishin, iitabaa oottiyoogee tau higge gidiyoogaa demmaas.”—ROOME 7:21.

‘Mereta ubbay issippe sahuwan oolees.’—ROOME 8:22.