Haratuura Ne Laggetido Laggetaa Tekinolojee Waati Qohii?
Naaˈˈu asay haahuwan deˈiyaaba gidikkonne, kiitaa xaafiyoogan, imeeliyaa kiittiyoogan, interneetiyan dawaliyoogaaninne sooshal miidiyaa baggaara issoy issuwaara metootennan haasayana danddayees. Eti tekinolojiyaa maaddiya ogiyan goˈettoosona. SHin issi issi asati tekinolojiyaa goˈettiyo waanna gaasoy bantta laggetuura hassayanaassa. Hegaa mala asata kaallidi deˈiya metoti gakkana danddayoosona.
-
Eti bantta laggetuyyo qoppokkona.
-
Keehi boorasoosonanne azzanoosona.
-
Eti bantta laggetuyyo qoppiyoogaappe aaruwan banttawu qoppoosona.
NEENI ERANA KOSHSHIYAABAA
QARETTIYOOGAA
Nuuni haratuyyo qarettanawu koyikko etabaa qoppanawu wodiyaa bazzana koshshees. Nuuni daro kiitaa xaafiyoogan woy sooshal miidiyaa goˈettiyoogan daro saatiyaa wurssiyaaba gidikko, hegaadan oottiyoogee nuna metana danddayees.
Harati neessi daro kiitaa yeddiyaabaa gidikko, issi laggee kiittido kiitaa zaaranaageekka nena metana danddayees. Neeni metootida laggiyaa maaddiyoogaa aggada, he kiitata eesuwan zaaranawu qoppana danddayaasa.
QOPPANA KOSHSHIYAABAA: Neeni ne laggetuura haasayanawu tekinolojiyaa goˈettiyo wode etayyo keehi ‘qarettiyoogaa’ waata bessana danddayay?—1 PHEEXIROOSA 3:8.
SOOSHAL MIIDEE ASAY UNˈˈETTANAADAN OOTTANA DANDDAYEES
Asay sooshal miidiyaa goˈetti simmidi azzaniyoogaa issi issi eranchchati akeekidosona. Harati oottiyoobaa qonccissiya pootuwaa beˈiyoogee issi uri “ba wodiyaa coo wurssidabadan qoppanaadan” oottana danddayiyoogaa eranchchati akeekidosona.
Qassi, harati interneetiyan wottido loˈˈiya pootuwaa beˈiyoogee eti banttana he asatuura geeddarissidi banttabaa iitabaa qoppanaadan oottana danddayees. Sooshal miidee asay ba deˈuwan ubbatoo ufayttiyaaba milatissiyo gishshawu, nuuni ufayttennabadan qoppana danddayoos.
QOPPANA KOSHSHIYAABAA: Neeni sooshal miidiyaa goˈettiyo wode, haraatuura nena geeddarssiyoogan nebaa iitabaa qoppennaadan waana naagettana danddayay?—GALAATIYAA 6:4.
BA XALLAWU QOPPIYOOGAA
Issi asttamaariyaa ba tamaaretuppe amaridaageeti bantta xallawu qoppiyaageeta gidiyoogaanne banttawu issibaa immana danddayiyaageetu xallaara laggetanawu koyiyoogaa yootaasu. Hegaa mala uri I koyiyo wode xallan allaxxanawu goˈettiyo moobayledan ba laggeta xeellana danddayees.
QOPPANA KOSHSHIYAABAA: Neeni Intternneetiyan wottiyoobati ne annaacettiyoogaa woy bessiyaagaappe aaruwan nebaa qoppiyoogaa bessiyoonaa?—GALAATIYAA 5:26.
AY OOTTANA DANDDAYAY?
TEKINOLOJIYAA NEENI GOˈETTIYO OGIYAA QORA
Tekinolojee neeyyo goda gidennan ne ashkkara gidiyo wode, neeni ne laggetuura gayttanawu ubba qassi etaara laggetido laggetettaa minttanawukka nena maaddana.
GEESHSHA MAXAAFAY YOOTIYO MAARAA: “Siiqoi. . . uuzettenna.”—1 QORONTTOOSA 13:4, 5.
Neeni oottanawu koyido qofaa doora, woy ne qofaa xaafa.
-
Moobayliyan kiitaa xaafiyoogaappe woy emeeliyaa kiittiyoogaappe asaa haasayissanawu mala
-
Haratuura haasayiyo wode silkkiyaa goˈettoppa (woy cenggurssaa xayssa)
-
Sooshal miidiyaa goˈettiyoogan daro wodiyaa wurssoppa
-
Loytta ezgga
-
Metootida laggiyaa haasayissa
