Intternneetiyaa daro saatiyawu goˈettiya yelagata kaallidi deˈiya metoti gakkana danddayiyoogaa amaridaageeti akeekidosona.

• Eta moobayle etawu amale gidees.

• Intternneetiyan harati eta qohana.

• Eti koyennaba gidikkonne, pokkobaa bessiya misileta xeellana.

AMALIYAA

Intternneetiyan deˈiya issi issibatinne kaassati issi urawu amale gidanaadan giigissiyoobata. Rikliming Konverseshion giyo maxaafay hagaadan gees: “Nu silkkiyan deˈiya appilekeeshineti nu silkkiyaappe xayennaadan hanidi giigoosona.” Zalˈˈiyawu giigida appilekesheneta nuuni darotoo goˈettikko, hegaa giigissidaageeti daro woriyaa demmoosona.

QOPPANA KOSHSHIYAABAA: Intte naati bantta moobayliyaa bessiyaagaappe aaruwan goˈettiyaaba intteyyo milatii? Eti bantta wodiyaa loytti goˈettanaadan waati maaddana danddayeetii?—EFISOONA 5:15, 16.

INTTERNNEETIYAN HARATA QOHIYOOGAA

Issi issi asati intternneetiyaa iita ogiyan goˈettoosona, hegee eti harata qohanaadan oottana danddayees.

Amarida asati hayttatanawu koyiyo gishshawu, intternneetiyaa bessenna ogiyan goˈettoosona. Qassi issi uri gibiran shoobettibeennaagaa akeekiyaaba gidikko, qohettidabadan qoppana danddayees.

QOPPANA KOSHSHIYAABAA: Intte naati intternneetiyaa bessiyaagaadan goˈettiyoonaa? (Efisoona 4:31) Eti shoobettibeennaagaa akeekiyo wode keehi hanqqettiyoonaa?

POKKOBAA BESSIYA MISILETA

Intternneetiyan pokkobaa beˈiyoogee metennaba. Issi issi moobayleti yelidaageeti bantta naati beˈiyoobaa eranaadan maaddiyaaba gidikkonne, issi issitoo hegee oottenna gishshawu naati iitabaa beˈana danddayoosona.

Pokkobawu denttettiya kiitaa kiittiyoogee woy nabbabiyoogee higgiyan digettidaba. Pokkobaa bessiya, naatu misiliyaa haratussi kiittiya woy hegaa beˈiya naati issi issi biittaa higgiyaa maaraadan oyshettana danddayoosona.

QOPPANA KOSHSHIYAABAA: Pokkobawu denttettiya misileta intternneetiyan beˈanaadan woy yeddanaadan paacciyo paaciyaa intte naati eqettanaadan waati maaddana danddayeetii?—EFISOONA 5:3, 4.

INTTE NAATA LOOHISSITE

Tekinolojiyaa goˈettiyoogee naata waayissennaba gidikkonne, etawu maadoy koshshees. Intternneetiyaa waatidi maara goˈettanaakko naata loohissennan, eti goˈettanaadan paqqadiyoogee keehi qohiyoogaa issi maxaafay yootees.

Intte oottanawu koyido qofaa doorite, woy intte qofaa xaafite.

• Intte naˈi intternneetiyaa maara goˈettanaadan yootite

• Intte naati boorasennaadan maaddite

• Intternneetiyan qohiyaabaappe intte naata naaganawu inttiyo danddayettida ubbabaa oottite

• Intte naˈassi moobayle deˈikko, I hegaa aybawu goˈettiyaakko kaalli kaalli xeellite

• Gallassan gallassan ay keena wodiyaa goˈettanaakko kuuyite

• Naati bantta moobayliyaa asi baynnasan, ubba qassi qammi hiixa kifiliyan goˈettennaadan diggite

• So asay issippe qumaa miyo wode ooninne moobayliyaa goˈettennaadan higgiyaa kessite