Nuuni iita ayfiyan xeelliyo asatuppe nuna shaakkikko, kaseegaappe aaruwan asaa coo ixxana danddayoos. Qassi nu mala asatuura xalla laggetikko, nu qofaa, nuussi siyettiyaabaanne nu oottiyoobaa xallay likke giidi qoppana danddayoos.

“Intte uluwaa aassi dooyidi bessite.”—2 QORONTTOOSA 6:13.

Ha xiqisiyaappe nuuni ay tamaariyoo? Nu “uluwaa” giya qaalay siiquwaa bessiyaaba gidana danddayees. Nuuni nunaara issi mala gidida asata xalla siiqikko, nu uluwaa dooyibookko. Nuuni he metuwaa xoonanawu, nuuppe dummatiya asatuura laggetanawu eeno gaana koshshees.

Nuuni harata loytti eranawu baaxetiyo wode, eti issibaa dumma ogiyan oottiyoy aybissakko akeekiyoogaa doommoos. Qassi nuuni eta loytti siiqiyoogaa doommiyo wode, eti dumma cita gidiyoogaa dogi aggoos. Nuuni eta xoqqu ootti xeelloosinne etawu qarettoos.

Nazari hanotaa beˈa. Issi wode A beteta coo ixxawusu. O maaddidabaa hagaadan yootaasu: “Taani etaara wodiyaa aattaasinne oosuwaa etaara oottaas. Eta citaa xeelliyaagan harati yootidobaappe muleera dumma gidida asatuura gayttaas. Wogan dummatiya asaara neeni laggetiyo wode, eti ubbay issi mala gidennaagaa akeekaasa; qassi eta loytta siiqaasanne eta ubbaa xoqqu ootta xeellaasa.”

Neegaappe dummatiya biittaappe, zariyaappe woy qaalaappe yiida asatuura haasayana danddayiyo ogiyaa koya. Kaallidi deˈiyaabata oottana danddayaasa

• Banttabaa amaridabaa neeyyo yootanaadan eta oychcha.

• Qumaa issippe maanawu eta shoobba.

• Bantta deˈuwaabaa eti neeyyo yootiyo wode loytta ezgga; qassi eti xoqqu ootti xeelliyoobaa akeekanawu mala.

Eta gakkidabaa neeni akeekanawu baaxetikko, eti hegaadan haniyoy aybissakko akeekana. Hegee neeni etanne eta citan deˈiya harata dosanaadan maaddana danddayees.