Asaa Coo Ixxiyoogee Merinawu Xayana
Miilooniyan qoodettiya asay ha maxeetiyan qonccida maarata oosuwan peeshshiisinne asaa coo ixxiyoogaa agganawu darobaa oottiis. SHin nuuni nu wolqqan asaa coo ixxiyoogaa muleera aggana danddayokko. Yaatin, asaa coo ixxiyoogee muleera xayanee?
Wottiyoobi Baynna Kawotettaa
Asaa kawotettati asaa coo ixxiyoogaa xayssana danddayibookkona. SHin asaa coo ixxiyoogaa xayssana danddayiya kawotetti deˈanee?
Issi kawotettay asaa coo ixxiyoogaa xayssanawu kaallidi deˈiyaageeta oottana koshshees
-
1. Asay bantta qofaa laammanawu koyanaadaaninne harata siiqanaadan denttettees.
-
2. Harati iita ogiyan oyqqin eta gakkida qohuwaa giigissees.
-
3. Ay ogiyankka asaa coo ixxenna kaalettiyaagee deˈana koshshees.
-
4. Asay ubbay issippetettan deˈanaadan oottees.
Xoossay hegaa mala kawotettaa essidoogaa Geeshsha Maxaafay yootees. Hegee “Xoossaa kawotettaa” geetettees.—Luqaasa 4:43.
He kawotettay oottanabaa beˈa.
1. Kandduwan Geeshsha Gidiyoogaa Tamaarissees
“Sa7an de7iya asai xillotettaa [tamaarana].”—ISIYAASA 26:9.
“Xillotettaa oosoi sarotetta gidana; xillotettaa aifeekka merinau woppatettanne ammanettidi de7iyoobaa gidana.”—ISIYAASA 32:17.
Ha xiqisiyaappe nuuni ay tamaariyoo? Xoossaa Kawotettay asaa likke gididabaa tamaarissana. Asay iitaanne kehaa, qassi suure pirddaanne geellaa pirddaa shaakkidi eriyo wode issoy issuwaa xeelliyo ogee laamettana. Asa ubbaa siiqiyoogee likkebaa gidiyoogaa ubbaykka akeekana.
2. Xoossaa Kawotettay Pirddaa Pacaa Xayssana
“Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna. Aissi giikko, ceegabai xayiis.”—AJJUUTAA 21:4.
Ha xiqisiyaappe nuuni ay tamaariyoo? Pirddaa pacaa gaasuwan gakkida tuggaa Xoossaa Kawotettay xayssana. Kase pirdda pacan qohettida uri hegaappe simmin lancciyaa uluwan oyqqenna.
3. Loytti Kaalettiyaagaa
“Ba aifee be7idoban coo pirddenna; woikko ba haittai siyidoban coo kuuyenna. SHin hiyyeesatuyyo i xilluwan pirddana; sa7an de7iya metootanchchatu yohuwaakka i suuretettan kuuyana.”—ISIYAASA 11:3, 4.
Ha xiqisiyaappe nuuni ay tamaariyoo? Saluwan deˈiya Xoossaa Kawotettawu Kawo gidida Yesuus Kiristtoosi suuretettaaninne asa asappe shaakkennan saˈaa haarana. Yesuusi issi deriyaa hara deriyaappe shaakkenna, qassi kumetta saˈan deˈiya asay A higgiyawu azazettanaadan oottana danddayees.
4. Issippetettaa
Xoossaa Kawotettay asay “qofan, siiquwan, wozanaaninne qofaa poluwan issuwaa” gidanaadan tamaarissees.—PILIPHPHISIYUUSA 2:2.
Ha xiqisiyaappe nuuni ay tamaariyoo? Xoossaa Kawotettan deˈiya asay issuwaa gidana giidi yootiyoogaa xalla gidenna. Eti issoy issuwaara wozanappe siiqettiyo gishshawu “poluwan issuwaa” gidana.
