Hayyanaa ne naatettaabaa nuussi yoota.

Taani 1943n Xaaliyan yelettaas. Ta aaway goshshanchchanne anaaxe gididi oottiyo issi guutta moottan ta ishanttuuranne michchonttuura diccaas. Nuna yelidaageeti nuuni Kaatolike haymaanootiyaa loytti kaallanaadan oottidi dichchidosona.

Neeni qeese gidanawu koyidoy aybissee?

Naatettan woosa keettan qeeseti tamaarissiyo wode siyiyoogaa keehippe dosays. Qeeseti qaddasiyoogaa siyiyoogeenne haymaanoote wogay tana keehi ufayssees. Yaatiyo gishshawu, qeese gidanawu keehippe koyaas. Tawu layttay 13 gidido wode, ta aayyiyaa attuma naati sinttappe qeese gidanawu yan aqidi tamaariyo timirtte keettaa tana gelissaasu.

Yan neeni tamaariyoobay Geeshsha Maxaafaa xannaˈiyoogaakka gujjii?

CHii. Tawu layttay 15 gidido wode, ta asttamaaretuppe issoy Wonggeliyaa, hegeekka Yesuusa deˈuwaabaanne A haggaazuwaabaa yootiya maxaafaa tawu immiis. Qassi taani he maxaafaa darotoo nabbabaas. Tawu layttay 18 gidido wode, waanna phaaphphaasee kaalettiyo, qeeseti loohiyo yuniversttiyan tamaaranawu Roome baas. Taani Laatinenne Giriike qaalaa, taarikiyaa, pilosoofiyaa, saykoloojiyaanne tiyoloojiyaa tamaaraas. Nuuni xiqiseta zaarettidi giyaabanne Woggaa gallassi Geeshsha Maxaafaappe nabbabettishin siyiyaaba gidikkokka, Geeshsha Maxaafaa mule xannaˈi erokko.

Neeni waanna gadaawa gidadasa. Hegee tamaarissiyoogaakka gujjii?

Ta waanna oosoy aysuwaara gayttidaba. SHin Naaˈˈantto Vaatikaane Gubaaˈee kessiyo wogaa tamaarissays.

Neeni woosa keettay tamaarissiyoobaa siriyoogaa doommidoy aybissee?

Heezzubay taani siranaadan oottiis. Woosa keettay polotikan gelees. Qeesetinne haymaanootiyaa kaalliyaageeti shori baynnabaa oottikkonne, coˈˈu gi xeelloosona. Qassi Kaatolike haymaanootee tamaarissiyo issi issibay likke milatenna. Leemisuwawu, siiqo Xoossay asay hayqqi simmin waatidi merinawu qaxxayii? Qassi, gozddaa qoodiiddi woosaa darotoo zaaretti zaaretti woossanaadan tumuppe Xoossay koyii? *

Yaatin ay oottadii?

Kaaletuwaa demmanawu yeekkaydda woossaas. Qassi mata wode Xaalettuwan birshshettida Kaatolike Geeshsha Maxaafaa shammada nabbabiyoogaa doommaas. Issi Woggaa galla guuran qiddaasiyaappe simmada maayuwaa qaarada kaqqishin naaˈˈu asati he timirtte keettaa yiidosona. Eti Yihoowa Markkata gidiyoogaa taayyo yootidosona. Nuuni Geeshsha Maxaafaabaanne tumu haymaanootiyaa shaakki erissiyaabaa xeelliyaagan an xaafettidaabaa, issi saatiyaappe dariya wodiyawu haasayida.

He asata xeelliyaagan ay qoppadii?

Eti ammaniyoobaa wozanappe yootiyoogaaninne Kaatolike Geeshsha Maxaafaappe metootennan xiqisiyaa kessiyoogan keehi maalaalettaas. Guyyeppe, Maariyo giyo hara Yihoowa Markkay tana oychchiyoogaa doommiis. I danddayanchchanne ammanettida asa; bukkin awaxxin, ubbatoo Qeera galla guuran heezzu saatiyan taakko yees.

Yihoowa Markkati neekko yiyoogaa hara qeeseti woygidonaa?

Nuuni tobbishin siyanaadan eta shoobbaas shin, Geeshsha Maxaafaa xannaˈanawu etappe ooninne koyibeenna. Gidoppe attin, ta xannaˈiyooban keehi ufayttaas. Taani keehi ufayssiyaabaa tamaaraas. Ta darotoo oychchada zaaruwaa demmabeenna, Xoossay iitatettaanne tuggaa coˈˈu giidoy aybissee? giyaagaa mala oyshatuyyo zaaruwaa demmaas.

Ne halaqati neeni Geeshsha Maxaafaa xannaˈiyoogaa agganaadan oottidonaa?

Taani 1975n, ta qofaa yootanawu darotoo Roome baas. Ta halaqati ta qofaa laamissanawu malidosona shin, etappe issoynne Geeshsha Maxaafaa goˈettibeenna. Wurssettan, Ichchashe 9, 1976n, hegaappe simmin taani Kaatolike gidennaagaa xaafada Roome kiittaas. Naaˈˈu gallassaappe guyyiyan, timirtte keettaappe kiyada baaburiyan tawu koyro gidida Yihoowa Markkatu shiiquwaa baas; hegee daro gubaaˈeti issippe shiiqiyo gita shiiqo. Ubbabay taani meezetidoogaappe keehi dumma! Dumma dumma qofaa tobbiyo wode eti ubbay haasayiyaagee yootiyoobaa Geeshsha Maxaafaappe kessidi kaalloosona.

Ha ubbabaa xeelliyaagan ne soo asaa qofay shin aybee?

Etappe daroti tana keehi eqettidosona. Gidoppe attin, ta ishanttuppe issoy Lombardi giyo huuphessa bagga Xaaliyaa haaruwan, Yihoowa Markkatuura xannaˈiiddi deˈiyoogaa siyaas. A oychchanawu yaa baas; yan deˈiya Yihoowa Markkati taani oosuwaanne deˈiyo sohuwaa demmanaadan maaddidosona. He laytti, Yihoowa Markka gidada xammaqettaas.

Neeni zilˈˈettiyoobi deˈii?

Aybinne baawa! Wurssettan, Xoossaakko keehi shiiqidabadan qoppays; taani abaa eriyoobay asa eraa woy woosa keettaa woga gidennan Geeshsha Maxaafay yootiyooba. Qassi taani harata ammanttiya hanotan wozanappe tamaarissana danddayays.