1, 2. Kare biittan deˈiya daroti soo simmiyo wode eta aybi metana danddayii? (Ha huuphe yohuwaa doomettan deˈiya misiliyaa xeella.)

EDWARDA * giyo bitanee hagaadan giis: “Taani kare biittan oottiyo wode, tau loˈˈo oosoy deˈiyo gishshau daro damoozaa demmays. SHin Yihoowa Markkatuura Geeshsha Maxaafaa xannaˈiyoogaa doommada, taani oottana bessiyo gitabay deˈiyoogaa akeekaas; hegeekka, ta soo asau asatettan koshshiyaabaa xalla gidennan, ayyaanaabankka koshshiyaabaa kunttiyoogaa. Yaatiyo gishshau etakko soo simmaas.”—Efi. 6:4.

² Edwardoy ba soo asaakko simmido gishshau Yihooway ufayttidoogaa eriis. SHin hagaappe kasetiya huuphe yohuwan qonccida Marilinidan, Edwardoykka ba soo asaara deˈiya dabbotay moorettidaagaa minttana koshshees. Qassi guutta miishshan ba keettaayeesinne ba naatussi koshshiyaabaa kunttiyoogeekka a hirggissiyaaba. Yaatin, i hegau koshshiya miishshaa awuppe demmanee? Gubaaˈiyan deˈiyaageeti eta maaddanee?

3. Aaway woy aayyiyaa son baynnaagee naata waati qohii?

³ Edwardoy hagaadan giis: “Ta naatussi ta kaaletoynne siiqoy  koshshiyo wode taani eta sheneho giidoogaa akeekaas. Taani etaara issippe deˈenna gishshau, etau Geeshsha Maxaafaa taaarikiyaa nabbababeykke, etaara issippe woossaybeykke, eta qoommabeykkenne eta kaassabeykke.” (Zaa. 6:7) A bayra naˈiyaa Aanna hagaadan gaasu: “Nu aaway nunaara son baynnaagee taani hirgganaadan oottiis. I soo simmiyo wode, nuuni hassayiyoobay a meraanne cenggurssa xalla. I tana qoommiyo wode tana allaga asi qoommidobadan qoppaas.”

4. Aaway son baynnaagee i so asau huuphe gididi oottiyoobaa suure polennaadan waatidi diggii?

⁴ Aaway son baynnaba gidikko, i so asau huuphe gididi oottiyoobaa suure polana danddayenna. Edwardo maccaasiyaa Ruba hagaadan gaasu: “Taani aayokka aawakka gidada so asau koshshiya darobaa kuuyaydda deˈaas. Edwardoy soo simmido wode, taani ta azinau haarettiyoogaa wodha eqqada tamaaraas. Ubba haˈˈikka, ta azinay tanaara issippe deˈiyoogaa hassayana koshshiyo wodeti deˈoosona. (Efi. 5:22, 23) Edwardoy gujjidi hagaadan giis: “Naati issi issibaa oottanau bantta aayyiyo paqqadissiiddi takkidosona. Nuuni eta aawanne aayo gidiyo gishshau, naatuyyo issippetettan kuuyana koshshiyoogaa akeekida; qassi Kiristtaanetuppe koyettiya ogiyan sintta xeera gidada kaalettana koshshiyoogaa akeekaas.”

5. Issi aaway i baynnaagaappe denddidaagan so asaa bolli gakkida qohuwaa waati giigissidee, qassi hegee ayba anjjo demissidee?

⁵ Edwardoy ba soo asaara deˈiya dabbotaanne eta ayyaanaaban minttanau bau danddayettida ubbabaa oottanau qofaa qachiis. “Taani yootiyoobaaninne oottiyooban ta naata tumaa loytta tamaarissanau halchaas; Yihoowa siiqays gaada etau yootiyoogaa xalla gidennan, hegaa oosuwan bessanau qoppaas” yaagiis. (1 Yoh. 3:18) Edwardoy ammanuwan oottidobaa Yihooway anjjidee? Aanna haagaadan gaasu: “I loˈˈo aawa gidanaunne nunaara zaarettidi siiquwan deˈanau baaxetiyoogaa beˈiyoogee nuna keehi maaddiis. I gubaaˈiyan aawatettaa ekkanau baaxetiyoogaakka beˈidi nuuni keehi ufayttida. Ha alamee nuna Yihoowappe haassanau maliis. SHin nuna yelidaageeti tumaa mintti oyqqidoogaa beˈidi, nuunikka etaagaadan oottanau koyida. Nu aaway nuna haranttuwaa aggidi beennaagaa yootiis; qassi i ba qaalaa naagiis. I zaarettidi biidaba gidiyaakko, taani haˈˈi Yihoowa dirijjitiyan deˈennan aggana danddayays.”

6. Naata yelida issoti issoti olaa wodiyan ay akeekidonaa?

⁶ Awurooppan amarida biittatun asatettau koshshiyaabaa demmana danddayettenna wode, he biittatun deˈiya Yihoowa Markkatu naati ufayttidi deˈidoogaa issi issi hanotay bessees. Aybissi giikko, aawatinne aayeti oosuwau baana danddayenna gishshau, son bantta naatuura xannaˈoosona, issippe wodiyaa aattoosonanne etaara haasayoosona. Hegaappe ay akeekiyoo? Naati miishshaappe woy imotaappe aattidi yelidaageeti banttanaara deˈanaadan koyoosona. Ee, Xoossaa Qaalay yootiyoogaadan, yelidaageeti bantta naatuura issippe wodiyaa aattiyaabanne eta tamaarissiyaaba gidikko, naati goˈettoosona.—Lee. 22:6.

7, 8. (a) Kare biittaappe soo simmida issoti issoti bala gididabaa ay oottiyoonaa? (b) Yelidaageeti bantta naatuura dabbotaa waati minttana danddayiyoonaa?

⁷ Kare biittaappe soo simmida issi issi aawatinne aayeti bantta naati eta kaseegaadan siiqennaagaa akeekidi, “Taani intteyyo gaada ubbabaa aggabayin intte galata xayiyoy aybissee?” gaana danddayoosona. SHin naati hegaadan hanidoy yelidaageeti eta aggidi biido gishshataassa gidana danddayees. Yaatin, yelidaageeti hegaa giigissanau ay oottana danddayiyoonaa?

⁸ Ne soo asaa qofaa loytta akeekanaunne neenikka etau qoppiyoogaa eti loytti akeekanau maaddana mala Yihoowakko woossa. Yaatada, so asaara haasayiyo wode neenikka mooridobi deˈiyoogaa ammana. Eti ne balaa atto gaanaadan oychiyoogeekka maaddana danddayees. Neeni ubbatoo hanotaa  loytttanau koyiyoogaa ne aqo laggeenne ne naati beˈiyo wode, neeni wozanappe baaxetiyoogaa eti akeekana. Neeni danddayancha, qassi hidootaa qanxxennaba gidikko, so asay zaarettidi nena siiqiyoogaanne bonchiyoogaa doommana danddayees.

9. Nu soo asau koshshiyaabaa kunttanau nuuni aquwau bichaarana koshshennay aybissee?

⁹ Cimida Kiristtaaneti banttau koshshiyaabaa kunttanau danddayennaba gidikko, naatinne naatu naati etau koshshiyaabaa kunttiyoogan ‘kushe zaaranaadan’ kiitettida PHauloosi yootiis. SHin i ubba Kiristtaaneti deˈuwau koshshiyaabay, hegeekka qumay, maayoynne keettay deˈikko hegee gidana giidi deˈanaadan minttettiis. SHin nuuni ishalo deˈo deˈanau woy sinttanau miishshaa dagayanau bichaarana koshshenna. (1 Ximootiyoosa 5:4, 8; 6:6-10 nabbaba.) Issi Kiristtaanee ‘baagettuyyo qoppanau’ woy koshshiyaabaa kunttanau ha aadhiya alamiyan duretidi deˈanau koyana koshshenna. (1 Yoh. 2:15-17) “Duretettaa siiqiyoogeenne” deˈuwau ‘hirggiyoogee’ Xoossay ehaana, xillotettay kumido ooratta alamiyan “tumu de7uwaa” mintti oyqqennaadan nu soo asaa diggana mala nuuni koyokko!—Mar. 4:19; Luq. 21:34-36; 1 Xim. 6:19.

10. Acuwan gelennaagee aadhida eratetta gidiyoy aybissee?

¹⁰ Nuuyyo amarida miishshay koshshiyoogaa Yihooway erees. SHin miishshay Xoossaappe demmiyo aadhida eratettaadan nuna naagana danddayenna. (Era. 7:12; Luq. 12:15) Darotoo, oosuwau kare biitti biyoogee ay keena qohiyaakko daroti akeekokkona; qassi kare biitti biya ubbay miishsha demmees gaana danddayettenna. Ubba eta wolqqaama metoy gakkana danddayees. Daroti kaseegaappe aaruwaa acotidi bantta biitti simmoosona. Eti he acuwaa qanxxanau asau oottiyo gishshau, naxa gididi Yihoowau oottana danddayokkona. (Leemiso 22:7 nabbaba.) Yaatiyo gishshau, acuwan gelennaagee aadhida eratetta.

11. So asau koshshiyaabaanne hegau koshshiya miishshaa xaafi oyqqiyoogee waati maaddii?

¹¹ Edwardoy ba soo asaara deˈanau simmido wode, ba qofay polettanaadan bau deˈiya miishshaa suure oyqqana bessiyoogaa akeekiis. Inne a keettaayiyaa banttau keehi koshshiyaabaanne hegau koshshiya miishshaa xaafi oyqqidosona. Eti hegaa maaran kase daro miishshay deˈiyo wode shammiyoogaa keenaa shammana danddayokkona. SHin eti ubbay darin koshshennabaa shammennan agganau maayidosona. * Edwardoy daro miishshaa qanxxiyo timirtte keettaappe ba naata kessidi hegaappe guuxxiya miishshaa qanxxiyo loˈˈo timirtte keetti gelissiis. Eti Yihoowayyo issippe goynniyoogaa diggenna oosuwaa Edwardoy demmanaadan inne a soo asay woossidosona. Yihooway eta woosaa waati zaaridee?

12, 13. Issi aaway ba soo asau qoppidi ay oottidee, i injje deˈo deˈanau bichaarennan aggido gishshau Yihooway a waati anjjidee?

¹² Edwardoy hagaadan giis: “Koyro naaˈˈu layttaa metootidi deˈida. Tau deˈiya miishshay leddan leddan ciriis; taani oottada demmiyo guutta miishshay nuussi koshshiyaabaa shammanau gidenna; qassi taani keehi arggaacaas. SHin nuuni shiiquwaa beennan aggi erokko; qassi issippe haggaazoos.” Edwardoy ba soo asaappe shaahettidi amarida aginau woy layttau harasan takkanaadan oottiya oosuwaa oyqqanau haˈˈi mule qoppenna. Edwardoy, “Taani issi oosuwaa demmenna wode haraa oottanau dumma dumma oosuwaa oottiyoogaa mezetaas” yaagiis.

¹³ Edwardoy kase talˈˈido miishshaa leddan leddan qanxxiyo gishshau, he miishshaa dichay keehi gujjiis; qassi hegee au hara aco gidiis. Gidikkokka, Edwardoy ba soo asaara issippe Yihoowayyo goynnanau qoppidi hegaadan oottanau koyiis. Edwardoy hagaadan giis: “Haˈˈi ta damoozay kare biittan demmiyoogaara geeddarssiyo wode xeetaappe 10 kushe gidiyaagaappe guuxxikkonne, namisetti  erokko. ‘Yihoowa kushee qaammibeenna.’ Ubba nuuni aqinye gidanau qofaa qachida. Hegaappe simmin, miishshaara gayttidaban darin metootibeenna gishshaunne deˈossi koshshiyaabaa demmanau waayettibeenna gishshau maalaalettida.”—Isi. 59:1.

14, 15. Issi keettaa asay, ayyaanaabaappe miishshaa kaseyanaadan dabboti koyikko ay oottana danddayii, qassi nuuni loˈˈo leemiso gidiyaabaa oottiyoogee ay demissana danddayii?

¹⁴ Daro heeran asay ba dabbotuyyoonne laggetuyyo miishshaanne imotaa gishana koshshiyaabadan qoppees. Edwardoy hagaadan giis: “Hegee nu heeran meeze gididaba; qassi nuuni immiyoogan ufayttoos; shin ubbatoo hegaadan oottana danddayettenna. Taani ta soo asau ayyaanaaban koshshiyaabaa kunttiyoogaa aggennan, ta dabbotuyyo ta wolqqa keenaa immana danddayiyoogaa etau hiillan yootaas.”

¹⁵ Kare biittaappe simmidaageetanne kare biitti baana danddayiiddi so asaa aggidi baanau koyibeennaageeta eta miishshan maadettanau koyiya dabboti darotoo boroosona. Issi issi dabboti eta asa ixxiyaabadan xeelloosona. (Lee. 19:6, 7) Edwardo naˈiyaa Aanna hagaadan gaasu: “Nuuni miishshaa demmanau giidi ayyaanaabaa sheneho geennan aggiyo wode, nu dabbotuppe issoti issoti nuuni ayyaanaabaa keehi xoqqu oottidi xeelliyoogaa guyyeppe akeekana danddayoosona. SHin nuuni eti koyidoogaadan oottikko, hegaa waati akeekana danddayiyoonaa?”—1 PHeexiroosa 3:1, 2⁠ra gatta xeella.

16. (a) Issi uri ‘waatidi ba huuphiyaa cimmana’ danddayii? (Yaaq. 1:22) (b) Yihooway nuuni ay oottiyo wode anjjii?

¹⁶ Issi michiyaa ba azinaanne ba naata aggada dure biitti baada, yan deˈiya gubaaˈiyaa cimatuyyo hagaadan gaasu: “Taani hagau yaanaadan nuuni darobaa aggibayida. Ubba ta azinay gubaaˈe cima gididi oottiyo maataappe wodhiis. Hegaa gishshau, Yihooway tana hagan anjjanaagaa ammanettays.” Yihooway an ammanettidi kuuyiyoobaa ubba wode anjjees; shin a sheniyaara maayennabaa kuuyiyo wode, ubba qassi bessennaban gita maataa aggiyo wode waati anjjana danddayii?—Ibraawe 11:6; 1 Yohaannisa 5:13-15 nabbaba.

17. Nuuni issibaa kuuyanaappe kase Yihoowa kaaletuwaa koyana koshshiyoy aybissee, qassi waati koyana danddayiyoo?

¹⁷ Simmada zilˈˈettenna mala, issibaa  kuuyanaappe kase Yihoowa kaaletuwaa koya. I ba geeshsha ayyaanaa, aadhida eratettaanne kaaletuwaa immanaadan woossa. (2 Xim. 1:7) Nena hagaadan oycha: ‘Taani Yihoowayyo azazettana koyiyoy ayba hanotaanee? Yedetay gakkishinkka azazettanee?’ Yaatikko, kaseegaa keenaa injjetenna deˈuwaa deˈaydda au azazettanau koyay? (Luq. 14:33) Cimati maaddanaadan oychada, eti Geeshsha Maxaafaappe yootiyo zoriyaa kaalla. Yaatiyoogan, Yihooway nena maaddanau yootidobaa ammanettiyoogaa bessa. Cimati neeyyo kuuyana danddayokkona; shin sinttappe neeni keehi ufayttanaadan oottiyaabaa kuuyana mala nena maaddana danddayoosona.—2 Qor. 1:24.

18. So asau koshshiyaabaa kunttana bessiyay oonee, shin harati eta awude maaddana danddayiyoonaa?

¹⁸ So asau huuphe gidiya uri ba soo asau galla galla koshshiyaabaa kunttanaadan Yihooway koyees. Hegaappe dummabaa oottanaadan asay zorikkokka, bantta aqo laggiyaanne naata aggidi harasaa beennan he koyettiyaabaa oottiyaageeta nuuni nashshananne etau woossana bessees. Qassi qoppennan daafabay gakkiyo wode woy eti sahettiyo wode, nuuni he ishantta siiqiyoogaanne etau qarettiyoogaa bessana danddayoos. (Gal. 6:2, 5; 1 PHe. 3:8) Eti keehi metootiyo wode etau miishshaa immana woy intte heeran eti ooso demmanaadan maaddana danddayay? Yaatikko, eti bantta soo asaa aggidi oosuwau hara biitti beenna mala maaddaasa.—Lee. 3:27, 28; 1 Yoh. 3:17.

19, 20. Kiristtaaneti Yihooway banttana maaddanaagaa ammanettana danddayiyoy aybissee?

¹⁹ Geeshsha Maxaafay hagaadan yaagidi nuna minttettiyaabaa yootees: “Miishsha siiqoppe inttena naagite; intteyyo de7iyaagee intteyyo gido. Aissi giikko, Xoossai ba huuphen, ‘Taani nena mulekka yeggikke woikko aggikke’ yaagiis. Hegaa gishshau, nuuni xalidi, ‘Godai tana maaddiyaagaa; taani yayyikke. Asi tana ai oottii?’ yaagoos.” (Ibr. 13:5, 6) Ha zoriyaa waatidi kaalliyoo?

²⁰ Dure gidenna biittan daro layttau gubaaˈe cima gididi oottida issi ishay hagaadan giis: “Asay darotoo Yihoowa Markkati keehi ufayttiyoogaa yootees. Ubba hiyyeesa gidida Yihoowa Markkatikka loytti maayiyoogaanne haratuppe boolimidi beettiyoogaa eti akeekoosona.” Hagee Xoossaa Kawotettaa kaseyiyaageeta xeelliyaagan Yesuusi yootidobaara maayiyaaba. (Maa. 6:28-30, 33) Ee, saluwan deˈiya Aaway Yihooway nena siiqees; qassi neeyyoonne ne naatuyyo kehabaa qoppees. “Ba kumetta wozanaappe GODAN ammanettiya asa minttettanau GODAA aifee sa7aa bollan ubbasaa xeellees.” (2 Odi. 16:9) So asaa deˈuwaaranne asatettau koshshiyaabaara gayttidabaaninne harabankka i azaziyoobay nuna goˈiyaagaa. Nuuni hegaa azazettiyo wode, a siiqiyoogaanne an ammanettiyoogaa bessoos. “Aissi giikko, nuuni Xoossaa siiqiyoogee a azazuwaa naagiyoogaa; a azazoikka deexo gidenna.”—1 Yoh. 5:3.

21, 22. Neeni Yihoowan ammanettanau murttidoy aybissee?

²¹ Edwardoy hagaadan giis: “Taani ta keettaayiyoonne ta naata aggada biido wodee issitoo aadhiichiis; shin taani hegaa ubba wode qoppaydda zilˈˈettikke. Kase tanaara oottiyaageetuppe daroti haˈˈi dure gidikkokka, ufayttokkona. Qassi eta son wolqqaama metoy deˈees. SHin nu soo asay keehi ufayttees! Nu biittan deˈiya hara ishantti hiyyeesa gidikkokka, eti ubba wode ayyaanaabaa kaseyiyoogaa beˈiyoogee tana ufayssees. Nuuni ubbay Yesuusi yootidobay tuma gidiyoogaa nu deˈuwan beˈida.”—Maatiyoosa 6:33 nabbaba.

²² Minnitenne xalite! Yihoowayyo azazettanaunne an ammanettanau murttite. Intte Yihoowa, aqo laggiyaanne naata siiqiyoogee, so asaa ayyaanaaban maaddanaadan intteyyo imettida oosuwaa polanaadan inttena denttetto. Hegaadan oottiyoogan, ‘Yihooway inttena maaddiyoogaa’ akeekeeta.