1. Nuuni haggaazuwan asawu oottiyoobay maaddana danddayii? Leemisuwaa yoota. (Ha huuphe yohuwaa doomettan deˈiya misiliyaa xeella.)

AMARIDA layttappe kase Fiiji biittan Kiristtaane azinaynne machiyaa asaa Godaa Kahuwawu shoobboosona. Eti issi maccaasiyo i penggen haasayissishin iray bukkiyoogaa doommiis. Ishay ba macheera issi yanxxilan attidi, baagaa maccaaseessi immiis. He maccaasiyaa Godaa Kahuwaa bonchanawu bin eti keehippe ufayttidosona. Guyyeppe a baayyo eti yootidobaappe darobaa hassayennaagaa odaasu. SHin eti iyyo oottidoban maalaalettido gishshawu, Godaa Kahuwaa bonchanawu baasu. He loˈˈobawu gaaso gididabay aybee? He azinaynne machiyaa ubbasan erettiya kandduwaa maaraa kaallidoogaa.

2. Yesuusi yootido, ubbasan erettiya kandduwaa maaray aybee, qassi nuuni hegaa waatidi kaallana danddayiyoo?

² He kandduwaa maaray aybee? Hegee Yesuusi, “Hara asi intteyyo oottanau koyiyo ubbabaa inttekka asau oottite” yaagidi zorido zoriyaa. (Maa. 7:12) Nuuni he zoriyaa waatidi kaallana danddayiyoo? Naaˈˈubaa oottiyoogaana. Koyruwan, ‘Taani he ura gidiyaakko asay tawu waatanaadan koyiyaanaa?’ yaagidi nuna oychana koshshees. Naaˈˈanttuwan, neeyyo danddayettida ubban hara urawu hegaadan ootta.—1 Qor. 10:24.

3, 4. (a) Harata waati oyqqana koshshiyaakko Yesuusi yootidobay ammanuwan nunaara deˈiyaageetu xallaassi oottiyooba gidennay aybissakko qonccissa. (b) Nuuni ha huuphe yohuwan ay beˈanee?

 ³ Nuuni darotoo nu mala Kiristtaanetuyyo hegaadan oottoos. SHin Yesuusi nunaara ammanuwan deˈiyaageetu xallaassi hegaadan oottanaadan yootibeenna. I nuuni asaa ubbawu, qassi nu morkketussikka waatana koshshiyaakko yootido wode he maaraa odiis. (Luqaasa 6:27, 28, 31, 35 nabbaba.) Nuuni nu morkketuura gayttidaagan he maaraa kaallana koshshikko, daroti ‘merinaa deˈuwaa demmanawu suure wozanaa koshshay deˈiyoogeeta’ gidana danddayiya, nuuni mishiraachuwaa yootiyo asatuura gayttidaagan hegaappe aaruwan kaallana koshshees!—Oos. 13:48, NW.

⁴ Nuuni haggaaziyo wode akeekana koshshiya oyddu oyshata, hegeetikka Oona haasayissiyaanaa? Asaa awan haasayissiyaanaa? Asaa awude haasayissiyaanaa? Asaa waata haasayissana koshshii? yaagiyaageeta haˈˈi beˈana. Ha oyshati nuuni haasayissiyo asaa qofaa akeekidi, eta hanotaadan haasayissana mala maaddana danddayiyoogaa beˈana.—1 Qor. 9:19-23.

5. Nuna woygidi oychana danddayiyoo?

⁵ Haggaazuwan nuuni darotoo asaa huuphiyan huuphiyan haasayissoos. Asa ubbaa metoynne eti diccido hanotay dumma dumma. (2 Odi. 6:29) Issi urawu mishiraachuwaa yootiyo wode hagaadan gaada nena oycha: ‘Taani a gidiyaakko, i tana waati xeellanaadan koyiyaanaa? Issi uri tabaa erennan ta bolli pirddanaadan koyiyaanaa? Woy i tana loytti eranaadan koyiyaanaa?’ Hegaa mala oyshata nuna oychiyoogee nuuni haasayissiyo asaa eta hanotaadan hanotaadan oyqqanawu maaddana danddayees.

6, 7. Haggaazuwan nuuni haasayissiyo uri yiillotidaba milatikko waatana koshshii?

⁶ Leemisuwawu, ubbatoo siyanawu kehiyaanne ufayssiya ogiyan asaa haasayissanaadan Geeshsha Maxaafay zoriyoogaa Kiristtaaneti danddayettida ubban kaalloosona. (Qol. 4:6) Gidoppe attin, nuuni nagaraa laattido gishshawu, issi issitoo guyyeppe zilˈˈettiyoobaa haasayoos. (Yaaq. 3:2) Geella nuuyyo peeshshay iita gidido gishshawu issi urawu keha gidennabaa haasayikko, asay nuna qoppennan haasayiya uradan xeellanaadan koyokko. Izaawu nu hanotaa akeekanaadan koyoos. Nuunikka hegaadan haratu hanotaa akeekana koshshennee?

⁷ Haggaazuwan neeni haasayissiyo uri yiillotiyaaba milatikko, i hegaadan hanidoy aybissakko eranawu maliyoogee loˈˈo gidennee? Ooso keettan woy timirtte keettan a unˈˈettiyaabay gakkideeshsha? A iita harggee oyqqideeshsha? Darotoo, koyro yiillotida uri Yihoowa asay liiqo qaalaaninne bonchuwan haasayissiyo wode siyanawu ufayttees.—Lee. 15:1; 1 PHe. 3:15.

8. Nuuni mishiraachuwaa ‘ubba asawu’ yootana koshshiyoy aybissee?

⁸ Nuuni asa ubbawu sabbakoos. Leemisuwawu, aadhida amarida layttatun Wochiyo Keelan kaalli kaalli kiyiya, “Geeshsha Maxaafay Asay Laamettanaadan Oottees” giya huuphe yohuwan 60ppe dariya asaa deˈuwan hanidabay odettiis. He huuphe yohuwan etabay odettidoogeetuppe issoti issoti kase wuuqqiyaageeta, mattottiyaageeta, danobaa oottiyaageetuura zuppetiyaageeta woy jallissiya xalee amale gididoogeeta. Harati qassi kase polotikaa asa, haymaanootiyaa kaalettiyaageeta woy bantta ooso xallawu bichaariyaageeta. Issoti issoti shori baynnabaa oottiyaageeta. SHin eti ubbay mishiraachuwaa siyidi, Geeshsha Maxaafaa xannaˈidosona; qassi laamettidi tumaa ogiyaa kaallidosona. Yaatiyo gishshawu, nuuni issi issi asay Kawotettaa  mishiraachuwaa siyenna giidi mule qoppana koshshenna. (1 Qoronttoosa 6:9-11 nabbaba.) Nuuni ‘ubba asay’ mishiraachuwaa siyana danddayiyoogaa eroos.—1 Qor. 9:22.

9. Nuuni haratu keettaa bonchana koshshiyoy aybissee?

⁹ Nuuni haggaazuwan asaa haasayissiyoy awaanee? Darotoo eta son haasayissoos. (Maa. 10:11-13) Asay nu keettaanne nubaa bonchiyo wode ufayttoos. Ubbaa qassi, nu keettay nuussi keehippe koshshiyaaba. Nu keettay nuuni koyidobaa oottiyoonne woppu giidi deˈiyo soho gidanaadan koyoos. Nuuni sooppe soo biidi haggaaziyo wode, eta keettaa hegaadan bonchana koshshees.—Oos. 5:42.

10. Nuuni sabbakiyo wode harata yiilloyennaadan waanidi naagettana danddayiyoo?

¹⁰ Danobay darido ha wodiyan, erenna uri soo yiyo wode daro asay sirees. (2 Xim. 3:1-5) Nuuni eti siranaadan oottiyaabaa hanana koshshenna. Leemisuwawu, sooppe soo biidi haggaaziyo wode son asi xayikko, keettaawaa demmanawu xooˈiyaara soo xeellana woykko darkko biidi koyana danddayoos. Hegaadan oottiyoogee intte heeran asaa yiilloyiyaabee? Hegee shooron deˈiya asay ay qoppanaadan oottii? Nuuni ubba asawu loyttidi sabbakana koshshiyoogee tuma. (Oos. 10:42) Nuuni asay Xoossaabaa tumaa eranaadan maaddanawu wozanappe koyoos. (Roo. 1:14, 15) Gidikkokka, nu haggaazo moottan deˈiya asaa yiilloyana danddayiyaabaa aybanne oottanawu koyokko. Kiitettida PHawuloosi, “Nuuni nu oosuwaa ooninne boranaagaa koyokko; qassi onanne xubbanaagaa koyokko” yaagidi xaafiis. (2 Qor. 6:3) Nuuni nu moottan deˈiyaageetu keettaanne etabaa bonchiyo wode, nu eeshshay issoti issoti tumaa siyanaadan denttettana danddayees.—1 PHeexiroosa 2:12 nabbaba.

11. Harati nu wodiyaa bonchiyoode nuuni nashshiyoy aybissee?

¹¹ Nu giddon daroti darobaa oottoos. Nuuni ubbabaa polanawu, awugaa kaseyanaakko kuuyananne wodiyaa bazzana koshshees. (Efi. 5:16; Pili. 1:10) Nuuni halchidobaa issibaa gaasuwan polana xayikko, yiillotana danddayoos. Yaatiyo gishshawu, harati nu wodiyaa bonchidi, etaara takkanawu nuuyyo daro wodee deˈennan aggana danddayiyoogaa akeekiyo wode, hegaa keehippe nashshoos. Nuuni Yesuusi yootido, ubbasan erettiya kandduwaa maaraa hassayidi, mishiraachuwaa yootiyo asaa bonchiyoogaa waatidi bessana danddayiyoo?

12. Nu moottan deˈiya asawu injjetiya wodiyaa waatidi erana danddayiyoo?

¹² Nuuni keettaawaa haasayissanawu keehi injjetiya wodee awugaakko erana koshshees. Nu moottan darotoo asay son deˈiyoy awudee? Siyanawu etawu wodee deˈiyoy awudee? Nuuni haggaaziyo wodiyaa hanotaadan laammana koshshees. Issi issi heeran omarssan sooppe soo biyo wode asay siyees. Intte haggaaziyo heerankka hegaadaana gidikko, issi issitoo he saatiyan sooppe soo biidi sabbakana danddayeetii? (1 Qoronttoosa 10:24 nabbaba.) Nu moottan deˈiya asawu injjetiya wodiyan sabbakanawu nuuni oottiyoobaa Yihooway anjjanaagaa ammanettoos.

13. Keettaawaa waatidi bonchana danddayiyoo?

¹³ Issi ura waatidi bonchana danddayiyoo? Mishiraachuwaa siyanawu koyiya ura demmiyo wode loyttidi markkattana koshshikkokka, daro wodiyaa takkana bessenna. Keettaaway keehi koshshiyaabadan xeelliyoobaa he saatiyan oottanawu qoppi uttennan aggenna. I issibaa oottiiddi deˈiyoogaa yootikko, nu qofaa qanttan odanaagaa yootananne nu qaalaa naagana koshshees. (Maa. 5:37) Haasayaa wurssiyo wode, nuuni zaaretti gayttanawu injjetiya  wodee awudekko keettaawaa oychana koshshees. Aassiyaageetuppe issoti issoti, “Nenaara zaarettada gayttanawu koyays. Taani yaanaappe kase silkkiyaa dawaliyaakko woy moobayliyan kiitaa kiittiyaakko shin?” yaagiyoogee loˈˈo gidiyoogaa akeekidosona. Nuuni nu moottan deˈiya asawu injjetiya wodiyan sabbakikko, PHauloosa leemisuwaa kaalloos; i ‘daroti attana mala, eta ubbaa goˈˈaappe attin, ba huuphe goˈˈaa koyibeenna.’—1 Qor. 10:33.

14-16. (a) Nuuni biido gaasuwaa keettaawawu qonccissi yootana koshshiyoy aybissee? Leemisuwaa yoota. (b) Yuuyidi xomoosiya issi ishay asaa waatidi haasayissiyoogee loˈˈo gidiyoogaa akeekidee?

¹⁴ Ane hagaa qoppa; issi gallassi issi uri neessi silkkiyaa dawaliis, shin i oonakko erabaakka. I neeni erenna ura, shin neeni ay quma maanawu dosiyaakko oychees. Silkkiyaa dawaliday oonakko, qassi i tumuppe ay koyiyaakko qoppaasa. SHonggaara deˈiya qaalan aara guuttaa haasayana danddayikkonne, hegaappe simmin haasayanawu koyennan aggana danddayaasa. Hegaappe dumma ogiyan, silkkiyaa dawalida uri ba sunttaa, a oosoy asay bollawu maaddiya qumaa maanaadan zoriyoogaa gidiyoogaanne nena goˈˈiya issi issibaa yootanawu koyiyoogaa odidabadan qoppa. I yootiyoobaa loytta siyana danddayaasa. Issi uri babaa geeshshi yootidi nuna haasayissanaadan koyoos. Haggaazuwan asaa haasayissiyo wode waatidi hegaadan oottana danddayiyoo?

 ¹⁵ Daro moottan, nuuni biido gaasuwaa keettaawawu qonccissi yootana koshshees. Haasayissiyo uri erenna keehi koshshiyaabaa nuuni eriyoogee tuma; shin nu sunttaa yootennan, “Ha alamiyan deˈiya ay metonne neeni xayssana danddayiyaakko, awugaa xayssuutee?” yaaga oychada haasayissiyoogaa doommidabadan qoppa. Neeni hegaadan ga oychiyoy haasayissiyo ura qofaa erada Geeshsha Maxaafaappe yootanaassa gidiyoogee qoncce. Gidikkokka, keettaaway, “Hagee oonee, qassi tana hegaa aybissi oychii? I yootiyoobay aybee?” gi qoppana danddayees. Yaatiyo gishshawu, keettaaway ufayttidi nunaara haasayanaadan koyoos. (Pili. 2:3, 4) Waatidi ufayttanaadan oottana danddayiyoo?

¹⁶ Yuuyidi xomoosiya issi ishay kaallidi deˈiyaagaadan haasayissiyoogee loˈˈo gidiyoogaa akeekiis. Saroti simmidi, Tumaa Eranau Koyay? giya trakttiyaa keettaawaassi immidi hagaadan gees: “Hagaa heeran deˈiya ubbawu hachi hagaa immiiddi deˈoos. Daro asay oychiyo usuppun oyshaa zaaroy hagan deˈees. Hagee neegaa.” Etakko biido gaasuwaa eri simmidi daro asay pashkki giyoogaa he ishay yootiis. Asay hegaadan haniyo wode haasayissiyoogee metenna. Yuuyidi xomoosiya ishay, “Hageetuppe nena qofissida oyshi deˈii?” yaagidi keettaawaa oychees. Keettaaway issuwaa doorikko, ishay he trakttiyaa dooyidi Geeshsha Maxaafay he oyshaabaa woygiyaakko aara tobbees. Hinkkoode, haasayissiyo uri yeellatennaadan ishay issi oyshaa dooridi aara tobbees. Haasayaa doommiyo daro ogee deˈiyoogee tuma. Issi issi heeran, nuuni biido gaasuwaa yootanaappe kase heeraa wogaadan sarotana koshshees. Nu moottan deˈiya asay nuuni yootiyoobaa siyanaadan, eti dosiyo ogiyan haasayissana koshshiyoogaa akeekana bessees.

17. Ha huuphe yohuwan beˈidoogaadan, harati nuuyyo oottanaadan koyiyoobaa nuunikka etawu oottana danddayiyo issi issi ogee aybee?

¹⁷ Yaatin, harati nuuyyo oottanaadan koyiyoobaa nuunikka asawu oottanaadan Yesuusi zoridoogaa haggaazuwan kaallana danddayiyo issi issi ogee aybee? Nuuni haasayissiyo asaa a hanotaadan hanotaadan oyqqoos. Asaa keettaanne etabaa bonchoos. Asay son deˈiyo wodiyaaninne siyanawu ufayttiyo wodiyan haggaazanawu baaxetoos. Qassi nu moottan deˈiya asay siyanawu koyiyo ogiyan mishiraachuwaa yootoos.

18. Harati nuuyyo oottanaadan koyiyoobaa nu moottan deˈiyaageetussi oottiyoogee goˈˈiyoy aybiinee?

¹⁸ Asay nuussi oottanaadan koyiyoobaa nu haggaazo moottan deˈiyaageetussi oottiyoogee daro goˈˈees. Asawu kehanne qoppiyaageeta gidiyoogan, nu pooˈuwaa pooˈissoos, Geeshsha Maxaafaa maaray goˈˈiyoogaa loytti qonccissoosinne saluwan deˈiya nu Aawaa bonchissoos. (Maa. 5:16) Nuuni haasayissiyo hanotay asay tumaa siyanaadan oottana danddayees. (1 Xim. 4:16) Nuuni Kawotettaa mishiraachuwaa yootiyo asay siyin aggin, nu haggaazuwaa polanawu nuuyyo danddayettida ubbabaa oottiiddi deˈiyoogaa eriyoogan ufayttoos. (2 Xim. 4:5) Nuuni ubbay, “Taani wonggeliyaa anjjuwaa shaakkanau, wonggeliyaa gishshau, ubbabaa oottais” gi xaafida, kiitettida PHawuloosa leemisuwaa kaalliyaageeta gidoos. (1 Qor. 9:23) Hegaadan oottanawu, Yesuusi yootido, ubbasan erettiya kandduwaa maaraa muletoo kaalliyaageeta gidoos.