Nuuni ‘Ubbawu Waati Zaarana’ Koshshii?
“Intte ubbau waati zaaranau bessiyaakko erana mala, intte haasayai ubba wode, siyanau [kehiyaagaa] . . . gidanau bessees.”—QOL. 4:6.
1, 2. (a) Loytti qoppidi oychiyo oyshaa goˈˈaa qonccissiya leemisuwaa yoota. (Ha huuphe yohuwaa doomettan deˈiya misiliyaa xeella.) (b) Metiya qofaa tobbanawu nuuni yayyana koshshennay aybissee?
DARO layttappe kase, issi michiyaa ammanenna ba azinaara issi galla Geeshsha Maxaafaabaa tobbawusu. I hegaappe kase coo bana Kiristtaane giya asa. Eti tobbishin, i azinay Sillaasiyan ammaniyoogaa yootiis. Sillaasiyaa timirttee aybakko i erennan aggana danddayiyoogaa a machiyaa akeekada, hiillan hagaadan gaada oychaasu: “Neeni Xoossaykka Xoossaa, Yesuusikka Xoossaa, geeshsha ayyaanaykka Xoossaa; shin heezzu Xoossa gidennan issi Xoossay deˈees gaada ammanay?” Azinay garamettidi, “CHii, taani hegaa ammanikke!” yaagiis. Hegaappe simmin, Xoossaabaa tumaa ufayssiyaabaa haasayidosona.
2 Hegee loytti qoppidi hiillan oychiyo oyshay keehi goˈˈiyoogaa bessees. Qassi Sillaasiyaa, siˈooliyaa tamaa woy Medhidaagee deˈiyoogaanne hegaa mala metiya qofaa tobbanawu nuuni yayyana koshshennaagaakka qonccissees. Nuuni Yihoowan ammanettikkonne i nuna loohissiyoobaa kaallikko, haasayissiyoogeetu wozanaa denttettana danddayiya ammanttiya zaaruwaa darotoo zaarana danddayoos. (Qol. 4:6) Hegaa mala qofaa tobbiyo wode gooba sabaaketi waatiyaakko ane beˈoos. Nuuni (1) issi uri ba qofaa yootanaadan oottiya oyshaa waatidi oychanaakko, (2) Geeshsha Maxaafaa qofaa akeekanaadan waatidi maaddanaakko, qassi (3) yootiyoobaa qonccissanawu leemisuwaa waatidi goˈettanaakko beˈana.
NEENI HAASAYISSIYO URI BA QOFAA YOOTANAADAN OYCHA
3, 4. Issi uri ammaniyoobaa eranawu oyshay keehi koshshiyoy aybissee? Leemisuwaa yoota.
3 Oyshay issi uri ammaniyoobaa nuuni eranaadan maaddana danddayees. Hegaa eriyoogee keehi koshshiyoy aybissee? Leemiso 18:13y, “Siyennan de7iiddi zaariyoogee, hegee he uraayyo eeyyatettanne yeella” yaagees. Issibaa xeelliyaagan Geeshsha Maxaafan deˈiya qofaa tobbanaappe kase, nuuni haasayissiyo uri ay ammaniyaakko erana koshshees. Hinkkoode, i mule ammanennabay worddo gidiyoogaa qonccissanawu daro wodiyaa wurssana danddayoos.—1 Qor. 9:26.
4 Issi uraara siˈooliyaabaa tobbiiddi deˈiyaabadan ane qoppoos. Siˈoolee taman xuuggiyo soho giidi ammaniyay ubba asaa gidenna. Siˈooliyan deˈiyoogee Xoossaa dabbo gidennaagaa bessees giidi issoti issoti qoppoosona. Yaatiyo gishshawu, “Siˈooliyaa xeelliyaagan asaa qofay dumma dumma gidiyo gishshawu, ne qofay aybakko yootuutii?” gaana danddayoos. Izaawu qofaa siyi simmidi, hegaa xeelliyaagan Geeshsha Maxaafay yootiyoobaa akeekanaadan a loytti maaddana danddayoos.
5. Issi uri issibaa ammaniyoy aybissakko nuuni eranawu oyshay waatidi maaddana danddayii?
5 Hiillan oychiyo oyshay issi uri issibaa aybissi ammaniyaakko nuuni eranaadan maaddana danddayees. Leemisuwawu, haggaazuwan haasayissiyo uri Xoossan ammanikke giikko shin? Sohuwaara, he uri hegaadan ammananaadan oottiday lodda laamiyaa woy hegaa mala qofaa giidi kuuyana danddayoos. (Maz. 10:4) SHin issi issi asay Xoossan ammaniyoogaa aggidoy bana woy hara uraa gakkin beˈido wolqqaama tuggaa gaasuwaana. Hegaa malabay eti Medhida siiqiya Xoossay deˈiyoogaa ammananawu metootanaadan oottana danddayees. Yaatiyo gishshawu, issi uri Xoossay deˈiyoogaa siriyoogaa yootikko, “Neeni beniisappekka hegaadan qoppay?” yaagidi oychana danddayoos. He uri hegaadan gidennaagaa yootikko, Xoossay deˈiyoogaa i siranaadan oottidabay deˈiyaakkonne oychana danddayoos. I yootiyoobay nuuni a ayyaanaaban loytti maaddiyo ogiyaa eranaadan maaddana danddayees.—Leemiso 20:5 nabbaba.
6. Nuuni oyshaa oychi simmidi waatana koshshii?
6 Nuuni oychi simmidi, he uri zaariyoobaa loytti siyananne a qofaa akeekana koshshees. Leemisuwawu, issi uri bana gakkida daafabay Medhida siiqiya Xoossay deˈiyoogaa siranaadan oottidoogaa yootana danddayees. Nuuni Xoossay deˈiyoogaa qonccissiyaabaa yootanaappe kase, he urawu qarettiyoogaanne nuna tuggay gakkiyoy aybisseeshsha gi qoppiyoogee bala gidennaagaa yootana koshshees. (Imb. 1:2, 3) Nuuni danddayaaninne siiquwan haasayissiyoogee i gujjidi eranawu koyanaadan denttettana danddayees. *
GEESHSHA MAXAAFAY YOOTIYOOBAA AKEEKANAADAN MAADDA
Nuuni haggaazuwan qara gidanaadan oottiyaabay aybee? (Mentto 7 xeella)
7. Nuuni haggaazuwan qara gidiyoogaa bessiyay aybee?
7 Geeshsha Maxaafay yootiyoobaa akeekanaadan asaa waati maaddana danddayiyaakko ane beˈoos. Nuuni haggaazuwan goˈettiyo waannabay Geeshsha Maxaafaa gidiyoogee qoncce. Geeshsha Maxaafay nuuni “kumettanne lo77o ooso ubbau” giigidaageeta gidanaadan maaddees. (2 Xim. 3:16, 17) Darotoo, nuuni haggaazuwan qara gidiyoogaa bessiyay daro xiqisiyaa nabbabiyoogaa gidennan, nabbabido xiqisiyaa qonccissiyoogan asay akeekanaadan maaddiyoogaa. (Oosuwaa 17:2, 3 nabbaba.) Hegaa qonccissanawu, kaalliya heezzu hanotaa beˈa.
8, 9. (a) Yesuusi Xoossaara issi likke giya uri akeekanaadan nuuni maaddana danddayiyo issi ogee aybee? (b) Ha qofaa akeekanaadan maaddanawu neeni goˈettido hara loˈˈo ogee aybee?
8 Hanota 1: Yesuusi Xoossaara issi likke gi ammaniya ura haggaazuwan haasayissoos. He qofaa akeekanaadan maaddanawu nuuni goˈettana danddayiyo xiqiseti awugeetee? He uri Yohaannisa 6:38n, Yesuusi, “Taani tana kiittidaagee koyiyoogaa oottanau saluwaappe yaasippe attin, ta koyiyoogaa oottanawu yabeikke” yaagidoogaa nabbabanaadan shoobbana danddayoos. He xiqisiyaa qonccissi simmidi, he urawu hagaadan gaana danddayoos: “Yesuusi Xoossaa gidikko, saluwaappe a kiittiday oonee? Kiittidaagee Yesuusappe darennee? Woni kiittiya uri kiitettiya urappe darennee?”
9 Hegaadankka, Yesuusi hayquwaappe denddi simmin Xoossay ay oottidaakko kiitettida PHawuloosi Piliphphisiyuusa 2:9n xaafidobaa nabbabana danddayoos. He xiqisee, “Xoossai a [Yesuusa] keehi Xoqqu xoqqu oottiis; qassi suntta ubbaappekka aadhdhiya xoqqa sunttaa ayyo immiis” yaagees. He uri ha xiqisiyaa akeekanaadan maaddanawu hagaadan gaana danddayoos: “Yesuusi hayqqanaappe kase Xoossaara issi likke gidikko, qassi guyyeppe Xoossay a keehi xoqqu xoqqu oottikko, hegee Yesuusi Xoossaappe aadhanaadan oottennee? SHin ooninne Xoossaappe aadhana danddayii?” He uri Xoossaa Qaalaa bonchiyaagaanne suure wozanay deˈiyoogaa gidikko, akeekanaadan hegaadan maaddiyoogee i he qofaa loytti pilgganaadan denttettana danddayees.—Oos. 17:11.
10. (a) Siˈooliyaa taman ammaniya uraa waatidi maaddana danddayiyoo? (b) Siˈooliyaa tamaabaa tobbanawu maaddiya neeni goˈettido hara loˈˈo ogee aybee?
10 Hanota 2: Haymaanootiyaa minttidi kaalliya uri iita asay siˈooliyaa taman merinawu qaxxayettenna giidi ammananawu metootees. I siˈooliyaa taman ammaniyoy iita asay ba iita oosuwan qaxxayettanaadan keehi koyiyo gishshataassa gidennan aggenna. Hegaadan qoppiya uri akeekanaadan waatidi maaddana danddayiyoo? Koyro iitati qaxxayettanaagaa yootana danddayoos. (2 Tas. 1:9) Yaatidi, nagaraa qixaatee hayquwaa gidiyoogaa bessiya, Doomettaabaa 2:16, 17n deˈiya xiqisiyaa i nabbabanaadan shoobbana danddayoos. Addaamee nagaraa oottido gishshawu, asaa naati ubbay appe nagara laattidi yelettidoogaa qonccissana danddayoos. (Roo. 5:12) SHin siˈooliyaa tamaa qixaatiyaabaa Xoossay aybanne yootibeennaagaa qonccissana danddayoos. Hegaappe simmidi, “Addaameenne Hewaana merinawu qaxxayettanaba gidikko, etawu hegaa kasetidi yootiyoogee bessiyaaba gidennee?” yaagidi oychana danddayoos. Yaatidi, Doomettaabaa 3:19 nabbabana danddayoos; he xiqisiyan eti nagaraa oottin imettida pirddaabay odettikkonne siˈooliyaa tamaabay aybinne odettibeenna. Addaamee baanawu simmanaagee odettiis. “Addaamee siˈooliyaa taman qaxxayettanaba gidikko, biittawu simmanaagaa awu yootiyoogee bessiyaabee?” yaagidi oychana danddayoos. Hagaa mala oyshay wozanay suure gidido uri ha allaalliyaa loytti qoppanaadan maaddana danddayees.
11. (a) Loˈˈo asay ubbay saluwaa bees gi ammaniya uray akeekanaadan maaddiyo issi ogee aybee? (b) Ha qofaa loytti akeekanaadan asaa waata maaddadii?
11 Hanota 3: Loˈˈo asay ubbay saluwaa bees gi ammaniya ura haggaazuwan haasayissoos. Hegaadan ammaniyoogee izaawu Geeshsha Maxaafaa ba qofaadan birshshanaadan oottana danddayees. Leemisuwawu, nuuni Ajjuutaa 21:4 (nabbaba.) aara tobboos giidi qoppoos. Haasayissiyo uri ha xiqisiyan odettida anjjoy saluwan demmiyo deˈuwaa giidi qoppana danddayees. I qofaa akeekanaadan waatidi maaddana danddayiyoo? Qofaa qonccissiya hara xiqisiyaa goˈettiyoogaappe he xiqisiyan deˈiya qofaa loytti yootana danddayoos. He xiqisee, ‘Hagaappe sinttanawu hayqoy deˈenna’ yaagees. Issibay hagaappe sinttanawu deˈenna geetettikko, hegee koyro deˈiyoogaa i maayiyaakkonne oychana danddayoos. Hegaa maayiyoogaa yootana danddayees. Yaatidi, saluwan hayqoy kasekka deˈennaagaa, asay hayqqiyoy saˈaana gidiyoogaa qonccissana danddayoos. Yaatiyo gishshawu, Ajjuutaa 21:4y yootiyoy sinttappe ha saˈan demmiyo anjjuwaabaa gidana bessees.—Maz. 37:29
QOFAA QONCCISSANAWU LEEMISUWAA GOˈETTA
12. Yesuusi leemisuwaa goˈettidoy aybissee?
12 Yesuusi sabbakiyo wode, oyshaa oychiyoogaa xalla gidennan leemisuwaakka goˈettiis. (Maatiyoosa 13:34, 35 nabbaba.) Yesuusi yootido leemisoy i yootiyoobaa siyiyaageetu qofaa eranawu maaddiis. (Maa. 13:10-15) Qassi leemisoy Yesuusi yootidobay siyanawu ufayssiyaagaa gidanaadaaninne dogettennaadan oottiis. Nuuni tamaarissiyo wode leemisuwaa waatidi goˈettana danddayiyoo?
13. Xoossay Yesuusappe dariyoogaa waatidi qonccissana danddayiyoo?
13 Darotoo, akeekanawu metenna leemisuwaa goˈettiyoogee keehippe loˈˈo. Leemisuwawu, Xoossay Yesuusappe dariyoogaa qonccissiyo wode, kaallidi deˈiya qofaa goˈettana danddayoos. Xoossaykka Yesuusikka bantta dabbotaabaa yootiyo wode, so asaa dabbotaa leemisodan goˈettidoogaa odana danddayoos. Xoossay Yesuusi ba Naˈaa gidiyoogaa yootiis; qassi Yesuusi Xoossay ba Aawaa gidiyoogaa yootiis. (Luq. 3:21, 22; Yoh. 14:28) Kaallidi, “Naaˈˈu asay issi likke gidiyoogaa neeni taayyo yootanawu koyiyaakko, qofaa qonccissanawu so asaappe oonanne oona leemiso oottada goˈetuutee?” yaagidi, haasayissiyo ura oychana danddayoos. I ishantta woy michontta, ubba mentteta gaana danddayees. I hegaadan giyaaba gidikko, hegee loˈˈo leemiso gidiyoogaa yootana danddayoos. Yaatidi, hagaadan gaana danddayoos: “Neeninne taani ha leemisuwaa goˈettikko, yaatin Gita Asttamaaree Yesuusi he leemisuwaa goˈettenneeshin?” Hegaappe dumma ogiyan, i Xoossaa ba Aawaa giis. Yaatiyo gishshawu, Yesuusi Xoossay baappe dariyoogaanne baagaappe dariya maatay awu deˈiyoogaa qonccissiis.”
14. Xoossay Seexaanay asaa siˈooliyaa taman qaxxayanaadan oottennaagaa bessiya leemisoy awugee?
14 Hara leemisuwaa akeeka. Issi issi asay siˈooliyaa tamaa “halaafee” Seexaanaa giidi qoppees. Xoossay Dabloosi asaa siˈooliyaa taman qaxxayanaadan oottiyaakko, hegee bessennaba gidiyoogaa yelidaageeti akeekanaadan issi leemisoy maaddana danddayees. Hagaadan gaana danddayoos: “Ne naˈay keehippe makkalancha gididabadaaninne iita gidida darobaa oottiyaabadan qoppa. Yaatin waatuutii?” He uri ba naˈaa seeranaagaa yootana danddayees. Naˈay iitabaa oottiyoogaa agganaadan maaddanawu i darotoo baaxetana danddayees. (Lee. 22:15) Hegaappe simmin, a maaddanawu oottido ubbabaa naˈay siyennan ixxikko a waatanaakko yelidaagaa oychana danddayoos. Daroti naˈay siyennan ixxikko a qaxxayanaappe attin aybanne oottana danddayennaagaa yootana danddayoosona. Hegaappe simmidi, “Issi iita uri ne naˈay keehippe makkalanaadan oottidoogaa eriyaakko waatuutii?” giidi oychana danddayoos. Yelidaageeti hegaa mala uraa bolli yiillotanaagee qoncce. Leemisuwaa qofaa qonccissanawu, “Issi iita uri ne naˈay makkalanaadan oottidoogaa eraydda, he uri ne naˈaa qaxxayanaadan awu yootuutii?” yaagidi, he naˈaa yelida ura oychana danddayoos. I chii, yootikke gaanaagee qoncce. Yaatiyo gishshawu, Seexaanay denttettin iitabaa oottida asaa Dabloosi bari huuphe qaxxayanaadan Xoossay oottennaagee qoncce!
UBBATOO BESSIYAAGAADAN QOPPA
15, 16. (a) Nuuni Kawotettaa mishiraachuwaa yootiyo asay ubbay siyana giidi qoppana koshshennay aybissee? (b) Nuuni tamaarissiyoogan qara gidanawu dumma eri koshshii? Qonccissa. (“ Oyshaa Zaaranawu Nuna Maaddiyaabaa.”) giya saaxiniyaakka xeella.)
15 Nuuni yootiyo Kawotettaa mishiraachuwaa siyanawu koyiyay ubba asaa gidennaagaa eroos. (Maa. 10:11-14) Nuuni loˈˈo oyshaa oychiyaaba, akeekanaadan maaddiyaabanne keehi loˈˈo leemisuwaa yootiyaaba gidikkokka, issoti issoti siyanawu koyokkona. Yesuusi saˈan deˈida ooppenne aadhiya Asttamaare gidikkokka, i tamaarissidobaakka ufayttidi siyidaageeti amaridaageeta!—Yoh. 6:66; 7:45-48.
16 Hara baggaara, nuuyyo dumma eri baynnabadan qoppikkokka, haggaazuwan qara gidana danddayoos. (Oosuwaa 4:13 nabbaba.) Xoossaa Qaalay “suure wozanaa koshshay deˈiyo” ubbay mishiraachuwaa ufayttidi siyana giidi nuuni ammananaadan oottiyaabaa yootees. (Oos. 13:48, NW) Yaatiyo gishshawu, nubaanne nuuni Kawotettaa mishiraachuwaa yootanawu koyiyoogeetubaa ubbatoo bessiyaagaadan qoppiyaageeta gidoos. Yihooway tamaarissiyoobay nunanne nuuni yootiyoobaa ufayttidi siyiyaageeta maaddanaagaa ammanettidi, hegaa loytti goˈettiyaageeta gidoos. (1 Xim. 4:16) Nuuni ‘ubbawu waati zaarana’ koshshiyaakko akeekanaadan Yihooway nuna maaddan danddayees. Nuuni haggaazuwan qara gidanaadan maaddiya, asawu qoppiyaagaabaanne kehiyoogaabaa kaallidi beˈana.
^ MENT. 6 Xiqimita 1, 2009 Wochiyo Keelan (Amaarattuwaa) “Medhidaagee Deˈiyoogaa Ammanana Danddayiyoo?” giya huuphe yohuwaa xeella.
