1. Israaˈeela deriyaa gishshaa Xoossay doorido asa gidida dirijjitee awugee? (Ha huuphe yohuwaa doomettan deˈiya misiliyaa xeella.)

YIHOOWA asay ha wodiyan a ufayssiya ogiyan goynnees. Beni wode, Israaˈeela deriyaa asay Xoossay doorido asa. SHin eti kaddidosona. Yaatin, Yihooway Kiristtoosa kaalliyaageeta ooratta dere oottiis. Eti Yihoowa sunttan xeesettiya dirijjite gididosona. Yerusalaamee 70 M.Ln xayidaba gidikkonne, ha dirijjitee xayibeenna. (Luq. 21:20, 21) Ha wurssetta gallassan ooratta deree Yihoowa sunttan xeesettanawu darajjayettiis. Seexaanaa alamee muleera xayiyo wode he dirijjitee xayenna. (2 Xim. 3:1) Hegaa waatidi erana danddayiyoo?

2. Yesuusi ‘iita waayiyaabaa’ ay yootidee, qassi hegee waani doommanee?

² Yesuusi wodiyaa wurssettan hananabaa hagaadan giis: “Sa7ai merettoosappe hachchi gakkanaashin de7ibeennabainne qassi hagaappe sinttaukka mule de7enna iita waayee he wode de7ana.” (Maa. 24:3, 21) Yihooway alamiyaa worddo haymaanootiyaa xaaxa waaxiya “Gita Baabiloono” kawotettatu baggaara xayssiyo wode, iita waayee doommana. (Ajj. 17:3-5, 16) Hegaappe simmin aybi hananee?

3. Worddo haymaanootee xayi simmin, Yihoowa asaa bolli aybi hananee?

³ Worddo haymaanootee xayi simmin, Seexaanaynne a alamee Yihoowa ashkkaratu bolli denddana. Leemisuwawu, ‘Maagooga biittan deˈiya Googaabaa’ Geeshsha Maxaafay hagaadan gees: “Neeni, ne olanchchatinne nenaara de7iya daro kawotettati gotiyaadan denddana; intte shaaraadan, biittaa kammana.” Yihoowa Markkatussi wotaaddari baynna gishshawunne eti sarotettan deˈiyo gishshawu, eti sohuwaara qohettiyaaba milatoosona. SHin, eta bolli denddiyoogee wolqqaama bala!—Hiz. 38:1, 2, 9-12.

4, 5. Yihooway ba ashkkarata Seexaanay xayssanawu maliyo wode waatanee?

⁴ Xoossay ba asaa Seexaanay xayssanawu maliyo wode waatanee? Yihooway eta gishshaa kelttiyaa gelidi, i Ubbabaa Haariyaagaa gidiyoogaa bessana. Yihooway ba asaa bolli denddiyoobaa ba bolli denddiyoobadan xeellees. (Zakkaariyaasa 2:8 nabbaba.) Yaatiyo gishshawu, saluwan deˈiya nu Aaway nuna ashshanawu denddana. He wode Seexaanaa alamee ‘Ubbaappe Wolqqaama Xoossaa gita gallassaa’ olan xayana.—Ajj. 16:14, 16.

⁵ Armmageedoona xeelliyaagan Yihooway Ermmaasawu hagaadan giis: “GODAAYYO kawotettatuura mootoi de7ees. GODAI asa ubbaara pirddettana; i iitata bisuwau aattidi immana. Taani GODAI hagaa odaas.” Gujjidikka hagaadan giis: “Ubbaappe Wolqqaama GODAI, ‘Be7a, iitabai kawotettaappe kawotettau laalettees; sa7aa gaxaappe gaganttiya carkkoi denddees’ yaagees. He wodiyan GODAI woridoogeetu ahai, biittaa bollan ha gaxaappe hini gaxaa gakkanau laalettana. Etayyo yeekettenna, eta ahai shiiqenna woikko moogettenna. Eti biittan pito mala gidana.” (Erm. 25:31-33) Ha iita alamee Armmageedoonan xayana. Seexaanaa alamee xayana; shin Yihoowa dirijjitiyawu saˈaa baggay bashshaappe attana.

6, 7. (a) “Zawai bainna daro asaa” yarati awuppe yiyoonaa? (b) Xoossaa dirijjitee keehi dicciyoogaa bessiyaabay aybee?

⁶ Xoossaa dirijjitee bashshaappe attiyoynne saˈan aakkiyoy Xoossay nashshiyo suure asay he dirijjitiyaakko zuliyo gishshataassa. Geeshsha Maxaafay, “Godaa aifee xillotukko xeellees; qassi i ubba wode eta woosaa ezggees” yaagees. (1 PHe. 3:12) He xillotuppe amaridaageeti “daro waayiyaa waayidi” yiida “zawai bainna daro asaa.” (Ajj. 7:9, 14) Bashshaappe attiya he asati coo “daro asa” xalla gidennan, ‘zaway baynna daro asa.’ Neeni zaway baynna daro asaa yara gidada iita waayiyaappe attiyo wode neeyyo aybi siyettanaakko qoppa!

⁷ Zaway baynna daro asaa yarati awuppe yiyoonaa? Eti issippe shiiqidoy Yesuusi ba qoncciyo wodiyaabaa kaseti yootido malaataappe issuwaa gaasuwaana. I, “Asa ubbau markka gidana mala, kawotettaa wonggeliyaa mishiraachchoi sa7a ubban odettana; hegaappe guyyiyan, wurssettai gakkana” yaagiis. (Maa. 24:14) Ha wurssetta gallassan, Xoossaa dirijjitee oottiyo waanna oosoy hagaa. Yihoowa Markkati saˈa ubban sabbakiyoonne tamaarissiyo gishshawu, miilooniyan qoodettiya asay Xoossawu “ayyaanaaninne tumatettan” goynniyoogaa tamaariis. (Yoh. 4:23, 24) Leemisuwawu, 2003ppe biidi 2012 gakkanaassi deˈiya tammu layttan 2,707,000ppe  dariya asay Xoossawu ba huuphiyaa geppidi xammaqettiis. Kumetta saˈan 7,900,000ppe dariya Yihoowa Markkatinne miilooniyan qoodettiya hara asati Godaa Kahuwaa Baalaa bonchanawu issippe shiiqoosona. ‘Dichiyay Xoossaa’ gidiyo gishshawu, nuuni qoodan ceeqettokko. (1 Qor. 3:5-7) SHin, zaway baynna daro asay layttan layttan dicciyoogee qoncce.

8. Ha wodiyan deˈiya Yihoowa dirijjitee dicciyoogaa bessiyaabi aybee?

⁸ Yihooway ba Markkata maaddiyo gishshawu, Xoossaa ashkkaratu qooday keehi dariis. (Isiyaasa 43:10-12 nabbaba.) He dichaabay kaallidi deˈiya hiraagan kaseti odettiis: “Intte giddon issi keettan de7iya qoodan guutta asata taani sha7issana; ubbaappe qoodan guuxxiyaageetakka gita kawotetta oottana. Taani GODAA; wodee gakkiyo wode, taani hagaa eesuwan polana.” (Isi. 60:22) Tiyettidaageetuppe attidaageeti issi wode “qoodan guutta,” shin tiyettida harati Xoossaa dirijjitiyan gujettin, eta qooday dariis. (Gal. 6:16) Aadhida layttatun Yihooway anjjido gishshawu, zaway baynna daro asaa qooday keehi dariis.

9. Xoossaa Qaalay yootiyo sinttappe yaana keha wodiyan deˈanawu nuuni ay oottana koshshii?

⁹ Nuuni tiyettida Kiristtaane gidin woy zaway baynna daro asaa yara gidin, Xoossaa Qaalay yootiyo sinttappe yaana keha wodiyan deˈana danddayoos. Gidoppe attin, nuuni yaatanawu Yihooway kessiyo maaraa naagana bessees. (Isi. 48:17, 18) Muuse Higgiyaa kaalliya Israaˈeelatu hanotaa qoppa. Asho gaytotettaa, zalˈˈiyaa, naata dichiyoogaa, asaa maara oyqqiyoogaanne hegaa malabaa xeelliyaagan Xoossay Israaˈeelatussi loˈˈo higgiyaa immidi eta naagiis; Higgee imettido issi gaasoy hegaa. (Kes. 20:14; Wog. 19:18, 35-37; Zaa. 6:6-9) Nuuni Xoossay kessido maaraa naagiyoogee hegaadan nunakka maaddiyo gishshawu, a sheniyaa poliyoogaa toohodan xeellokko. (1 Yohaannisa 5:3 nabbaba.) Israaˈeelata Higgee naagidoogaadan, nuuni Xoossaa Yihooway kessido higgiyaanne maaraa kaalliyoogee nuna naagiyoogaa xalla gidennan, nuuni ‘ammanuwan minnanaadan’ maaddees.—Tiitu 1:13, 14.

10. Nuuni Geeshsha Maxaafaa xannaˈanawunne So Asaa Goynuwaa omarssawu wodiyaa bazzana koshshiyoy aybissee?

¹⁰ Xoossaa dirijjitiyawu saˈaa baggay dumma dumma ogiyan sinttawu bees. Leemisuwawu, nuuni Geeshsha Maxaafaa tumaa ubbatoo kaseegaappe loytti akeekoos. “Xillotu ogee gallassai seetana gakkanaashin, gujji gujji poo7iya maallado xalqqiyaa mala” gidiyo gishshawu, yaatidoogee bessiyaaba. (Lee. 4:18) SHin hagaadan giidi oychana danddayoos: ‘Geeshsha Maxaafaa tumaabaa nuuni kaseegaappe loyttidi akeekidobaa kaalliyaanaa? Geeshsha Maxaafaa ubba galla nabbabiyaanaa? Nu xuufeta loyttada nabbabiyaanaa? Nu soo asay saaminttan saaminttan issippe goynnii?’ Nuuppe dariya baggay hageeta oottanawu metootennaba gidikkokka, yaatanawu wodiyaa bazzana koshshees. Geeshsha Maxaafay yootiyoobaa eriyoogee, hegaa kaalliyoogeenne ayyaanaaban dicciyoogee iita waayee keehi matido ha wodiyan keehippe koshshiyaaba!

11. Beni wode baalati waatidi maaddidonaa, qassi ha wodiyaa gubaaˈe shiiqotinne gita shiiqoti waati maaddiyoonaa?

¹¹ Yihoowa dirijjitee PHawuloosi yootido ha zoriyaa kaallanaadan nuna minttettees: “Issoi issuwaara waani siiqettanaakkonne  qassi lo77o oosuwaa waati oottanaakko, issoi issuwau qoppoos. Issooti issooti shiiquwaa meeze oottidi shiiqiyoogaadan, nuunikka issippe shiiqiyoogaa aggokko; shin Godaa gallassai matattiyoogaa intte be7iyo gishshau, issoi issuwaa minttettoos.” (Ibr. 10:24, 25) Layttan layttan bonchiyo baalatinne goynuwawu shiiqiyo hara shiiqoti Israaˈeelati ayyaanaaban minnanaadan oottidosona. Hegaa bollikka, Nahimiyaa wode Daase Baalaa bonchidoogaa mala dumma baalaa wodee ufayssiya wode. (Kes. 23:15, 16; Nah. 8:9-18) Nuunikka gubaaˈiyaa shiiquwaaninne gita shiiquwan hegaadan goˈettoos. Ayyaanaaban minnanawunne ufayttanawu he shiiqota loytti goˈettiyaageeta gidoos.—Tii. 2:2.

12. Kawotettaabaa yootiyoogaa nuuni waati xeellana bessii?

¹² Nuuni Xoossaa dirijjitiyaa yara gidiyo gishshawu, “Xoossaa wonggeliyaa mishiraachchuwaa yootiyoogan” ufayttoos. (Roo. 15:16) Ha geeshsha oosuwaa oottiyoogee nuuni ‘geeshsha Xoossaa’ Yihoowaara ‘issippe oottiyaageeta’ gidanaadan maaddees. (1 Qor. 3:9; 1 PHe. 1:15) Wonggeliyaa mishiraachuwaa yootiyoogee Yihoowa geeshsha sunttay bonchettanaadan oottees. Qassi ‘anjjettida Xoossaappe boncho wonggeliyaa hadaraa ekkiyoogee’ keehi gita maata.—1 Xim. 1:11.

13. Ayyaanaaban mino gidanawunne deˈuwaa dooranawu waatana koshshii?

¹³ Xoossay nuuni a baxuuxiyoogaaninne dumma dumma oosuwan a dirijjitiyaa maaddiyoogan ayyaanaaban minnidi deˈanaadan koyees. Muusee Israaˈeelatussi hagaadan giis: “Taani intte sinttan de7uwaanne haiquwaa, anjjuwaanne qanggettaa wottidoogau hachchi saluwaanne sa7aa intte bolli markkayana; simmi inttenne intte zaree de7uwan de7ana mala, de7uwaa doorite. GODAA intte Xoossaa siiqite; a qaalaa siyite, ayyo azazettite; aara ohettite. Hegaadan hanikko, GODAI kase intte maizza aawatuyyo, Abrahaamayyo, Yisaaqayyoonne Yaaqoobayyo immanau caaqqido biittan inttenne intte naati adussa laittaa de7ana.” (Zaa. 30:19, 20) Deˈuwaa doora. Yihoowa siiqa, qassi ubbatoo assinne a dirijjitiyawu ammanetta.

14. Xoossaa dirijjitiyawu saˈaa baggaa xeelliyaagan issi ishawu aybi siyettidee?

¹⁴ Xoossaa baxuuxidanne a dirijjitiyaara issippe hemettida Ishaa Pirays Hiyuzi hagaadan giis: “ Taani 1914ppe qiiba kasetiya wodiyaappe doommada Yihoowa halchuwaa erada hegaara maayettada deˈido gishshawu keehippe galatays . . . Taassi keehi koshshiyaabay, Yihoowa dirijjitiyaara matattada deˈiyoogaa. Kase ta deˈuwan beˈidobaappe asa qofan ammanettiyoogee bessennaba gidiyoogaa tamaaraas. Hegaa xeelliyaagan kuuyada, ammanettida dirijjitiyan deˈanawu qofaa qachaas. Issi uri Yihoowa sinttan sabettananne anjjettana danddayiyo hara ogee baawa.”

15. Geeshsha Maxaafaa qofaa akeekidobaa laammiyo wode nuuni waatana koshshiyaakko tamaarissiya Geeshsha Maxaafaa leemisoy awugee?

¹⁵ Nuuni Yihoowa sinttan nashettanawunne a anjjuwaa demmanawu, a dirijjitiyaa maaddananne Geeshsha Maxaafaa qofaa akeekidobaa laammiyo wode hegaa maayana bessees. Ane hagaa qoppa: Yesuusi hayqqi simmin, shaˈan qoodettiya Ayhuda Kiristtaaneti Muuse Higgiyawu mishettiyo gishshawu, hegaa kaalliyoogaa agganawu metootidosona. (Oos. 21:17-20) SHin, PHawuloosi Ibraawetussi xaafido dabddaabbee maaddido gishshawu, eti  ‘Yesuus Kiristtoosi naaˈˈanttennan issitoo yarshshido a ashuwaanappe’ attin, ‘higgee azaziyo yarshshuwan’ geeyibeennaagaa eridosona. (Ibr. 10:5-10) He Ayhuda Kiristtaanetuppe daroti PHawuloosa zoriyaa siyidi, bantta qofaa laammidosona. Xoossaa Qaalaabaa akeekidobaaninne nu haggaazuwan issi issibay laamettiyo wode, nuunikka minni xannaˈidi hegaa kaallana koshshees.

16. (a) Ooratta alamiyan deˈuwan ufayttanaadan oottana anjjoti awugeetee? (b) Neeni ooratta alamiyan ay demmanawu amottay?

¹⁶ Yihoowawunne a dirijjitiyawu ammanettidi deˈiya ubbay ubbatoo a anjjuwaa demmana. Ayyaanan tiyettida ammanettidaageeti Kiristtoosaara saluwan haariyo gita maataa demmana. (Roo. 8:16, 17) Nuuni saˈan deˈanawu hidootiyaageeta gidikko, Gannatiyan deˈanaagee ay keena ufayssiyaabaakko qoppa. Nuuni Yihoowa dirijjitiyaa yara gidiyo gishshawu, Xoossay ehaanawu qaalaa gelido ooratta alamiyaabaa ha wodiyan haratussi yootiyoogan keehi ufayttoos! (2 PHe. 3:13) Mazamure 37:11 yootiyoogaadan, “ashkketi biittaa laattana; eti sarotettaaninne duretettaani ufaittidi daana.” Asay “keettata keexxidi, etan de7ana”; qassi eti “bantta kushiyaa oosuwan ufaittana.” (Isi. 65:21, 22) Huqqunniyoogee, hiyyeesatettaynne namisay attana. (Maz. 72:13-16) Gita Baabiloona xayiyo gishshawu, hegaappe sinttawu oonanne cimmukku. (Ajj. 18:8, 21) Hayqqidaageeti denddana; yaatin etawu merinawu deˈiyo qaaday deˈana. (Isi. 25:8; Oos. 24:15) Banttana Yihoowawu geppida miilooniyan qoodettiyaageetussi ayba ufayssiya hidootay deˈii! Nuuni Geeshsha Maxaafay yootiyo he hidootaa demmanawu, ubbatoo ayyaanaaban minnananne Xoossaa dirijjitiyaara issippe sinttawu baana bessees.

17. Yihoowayyo goyniyoogaabaanne a dirijjitiyaabaa nuuni waati qoppana koshshii?

¹⁷ Ha alamee xayanawu keehi matido gishshawu, ammanuwan minnidi deˈiyaageetanne Xoossay goynuwawu giigissidobaa gishshawu a galatiyaageeta gidoos. Hegee kaallidi deˈiya mazamuriyaa yexxida Daawita qofaa mala. I hagaadan giis: “Taani GODAA issibaa oichchaas; taani hegaa koyaas; hegeenne, taani ta de7o laitta ubban GODAA keettan de7anaagaa; de7aidda, taani GODAA lo77otettaa be7anaagaanne a Beeta Maqidasiyan a koyanaagaa.” (Maz. 27:4) Nuuni ubbay Xoossaa baxuuxiyaageeta, a asaara issippe hemettiyaageetanne Yihoowa dirijjitiyaara ubbatoo sinttawu biyaageeta gidoos.