Mati kiyida Wochiyo Keelaa maxeeteta loyttada nabbabadii? Yaatikko, kaallidi deˈiya oyshata zaarana danddayay?

Paasikaa dorssay Niisaana 14n ay saatiyan shuhettii?

Issi issi Geeshsha Maxaafaa birshshettati “omarssi lankkilankkiyaagan” shuhettana bessees goosona; hegee omarssan, lenkkiyo wode, hegeekka away wullidaba gidikkonne saˈay pooˈo deˈishiina giyoogaa. (Kes. 12:6)​—12/15, sinttaa 18-19.

Yelagati loˈˈobaa kuuyanawu Geeshsha Maxaafan deˈiya maarata awugeeta kaallana danddayiyoonaa?

Kaallidi deˈiya heezzu maarata: (1) Kasetidi Xoossaa Kawotettaanne a xillotettaa koyite. (Maa. 6:19-34) (2) Haratussi oottiyoogan ufayttite. (Oos. 20:35) (3) Yelagatettan Yihoowayyo haggaaziyoogan ufayttite. (Era. 12:1)—1/15, sinttaa 19-20.

Aadhida 1914ppe doommidi piriixiya oyddu paraasati aybaa leemisoo?

Bootta paraa toggida Yesuusi Seexaanaanne daydanttata saluwaappe oliis. Daama paraa toggidaagee asaa keehi qohida olaayyo leemiso. Amara paraa toggidaagee koshaayyo leemiso. Washalaala paraa toggidaagee miilooniyan qoodettiya asaa boshan worees. (Ajj. 6:2-8)—2/1, sinttaa 6-7.

‘Dorssaa bullachay’ awude bulashettanee? (Ajj. 19:7)

‘Dorssaa bullachay’ Kawuwaa Yesuus Kiristtoosi ba xoonuwaa poli simmin, hegeekka Gita Baabiloona xaya simmin, kaallidi qassi Armmageedoona olaappe simmin gidana.—2/15, sinttaa 10.

Koyro xeetu layttan deˈida Ayhudati Masiyaa ‘naagidoy’ aybissee? (Luq. 3:15)

Koyro xeetu layttan deˈida Ayhudati Daaneeli Masiyaabaa yootido hiraagaa nuuni akeekiyoogaadan akeekidosona gaana danddayokko. (Dane. 9:24-27) SHin issi kiitanchay dorssaa heemmiyaageetuyyo yootidobaa siyennan aggokkona woy hananabaa yootiya Haanna gacino naˈaa Yesuusa beeta maqidasiyan beˈido wode yootidobaa siyennan aggokkona. Qassi xoolinttiyaa qoodiya asati “Aihuda kawo gidanau yelettida na7ai awan” deˈiyaakko beˈanawu yiidosona. (Maa. 2:1, 2) Guyyeppe, Xammaqiya Yohaannisi Kiristtoosi matan yaanaagaa yootiis.—2/15, sinttaa 26-27.

Nuuni ‘Ee’ giidobaa ‘CHii’ geennaadan aybi maaddana danddayii? (2 Qor. 1:18)

Nu wolqqaappe bolla gididabay gakkiyo wode keeridobaa polennan aggana danddayoos. SHin nuuni issibaa polanawu qaalaa gelikko woy maacettikko, hegaa polanawu nuussi danddayettida ubbabaa oottana koshshees.—3/15, sinttaa 32.

Pokkobaa bessiyaabaa beˈanawu paacettiyo wode waanidi eqettana danddayiyoo?

Keehi maaddiya heezzubata: (1) Asho gaytotettaa amuwaa denttettiyaabaa beˈiyo wode sohuwaara nu ayfiyaa wora zaariyoogaa. (2) Loˈˈobaa qoppiyoogaaninne Xoossaakko woossiyoogan nu qofaa naagiyoogaa. (3) Pokkobaa bessiya pilmiyaappenne Weyb sayttiyaappe haakkiyoogaa.—4/1, sinttaa 10-12.

Issi Kiristtaanee miishsha demmanawu ba soo asaa aggidi hara biitti biyaaba gidikko ayba metoy merettana danddayii?

Yelidaageeti bantta naatuura issippe deˈennaba gidikko, naati qofaaninne kandduwan qohettana danddayoosona. Eti bantta aawaa (aayyiyo) lanccana danddayoosona. Qassi bantta aqo laggiyaappe haakkidi deˈiyaageeti wodiraa laammanawu paacettana danddayoosona.—4/15, sinttaa 19-20.

Iitabaa oottidi hayqqanaadan mittan kaqqido uraa suyliyaa asay menttiyoy aybissee?

Rooma asay iitabaa oottida issi issi asata mittan kaqqees. Ayhudati Yesuusa matan mittan kaqettida asatu suyliyaa menttanawau PHilaaxoosa woossidosona. Suyliyaa menttido uri shemppanawu metootees, qassi sohuwaara hayqqees. Hegaa gishshawu, kaqettido mittan a ahay aqenna. (Zaa. 21:22, 23)—5/1, sinttaa 11.

Nuuni haggaaziyo wode akeekana koshshiya oyddu oyshati awugeetee?

Eti oonee? Eta awan haasayissiyaanaa? Eta awude haasayissiyaanaa? Eta waata haasayissiyaanaa?—5/15, sinttaa 12-15.

Sijaaraa uyiyoogee ay keena iitabee?

Aadhida xeetu layttatun, sijaaraa uyiyo gaasuwan 100,000,000 asay hayqqiis. Qassi mata wodiyaappe doommidi, layttan layttan 6,000,000 gidiya asay hegaa gaasuwan hayqqees.—6/1, sinttaa 3.