“YUURIKA!” Ha qaalaa birshshettay “Taani demmaas!” yaagiyoogaa. Amarkkan, Kaliforniyaa giyo sohuwan, 19tta xeetu layttan worqqaa bookkiyoosaa asay zuliyo wode, issi uri worqqaa demmidi hegaadan gees. SHin, CHarles Tez Raasilinne Geeshsha Maxaafaa Tamaare gidida a laggeti hegaappe keehi alˈˈo gidida Geeshsha Maxaafaa tumaa demmidosona. Qassi eti hegaa asawu yootanawu wozanappe koyidosona.

Gita kataman deˈiya miilooniyan qoodettiya asay Geeshsha Maxaafaa Tamaareti giigissido hosppun saate ekkiya “Meretaa Pooto Diraamaa” giyo pilimiyaa 1914n beˈiis. Geeshsha Maxaafaa qofay deˈiyo he pilimeenne an deˈiya garamissiya silimay, loˈˈiya misilee, qassi ufayssiya haasayaynne muuziqay meretay merettido wodiyaappe biidi Kiristtoosa SHaˈu Layttaa Haaruwaa wurssettaa gakkanaassi deˈiyaabaa bessees.—Ajj. 20:4. *

He wode guutta katamatuuninne gaxariyan deˈiyaageeti shin? Tumaa eranawu keehi koyiya ooninne siyennan attenna mala, Geeshsha Maxaafaa Tamaareti Naase 1914n “Yuurika Diraamaa” giigissidosona; hegee silimaa aggiigidi “Pooto Diraamaa” zaarettidi giigissido, issisaappe harasaa efaanawu metennaba. He wode dooridi goˈettanawu heezzu qommoy deˈees; ubbaykka daro qaalan giigiis: “Yuurika X” giyoogan duuqettida ubba haasayaynne muuziqay deˈees. “Yuurika Y” giyoogan duuqettida ubba haasayaynne loˈˈiya silimay deˈees. Qassi ‘Yuurika So Asaa Diraamay’ son goˈettanawu giigido gishshawu haasayaappe doorettidaageetinne mazamureti deˈoosona. Duuqettidabaa kaassiyoonne pilimiyaa bessiyo hirayso miishshaakka hegawu goˈettana danddayettees.

Geeshsha Maxaafaa Tamaareti pilimiyaa bessiyo miishshaanne wogga iskkiriiniyaa goˈettennan, ha pilimiyaa gaxariyan miishsha qanxxissennan asaa bessiyoogan, Kawotettaa mishiraachuwaa kase odettibeenna heeran yootana danddayoosona. Cenggurssa xallan giigida “Yuurika X” giyoogaa gallassikka qammikka asaa sissana danddayettees. Silimaa bessiyo “Yuurika Y” giyoogaa korinttee baynnan harabaa goˈettidi bessana danddayettees. Pinlandde qaalan giigida Wochiyo Keelay, “Ha misileta awaaninne bessana danddayoos” yaagiis. Hegee tumukka awaaninne bessana danddayiyooba!

Akeekancha gidida Geeshsha Maxaafaa Tamaareti gita tiyaatire keettaa keraa ekkiyoogaappe, timirtte keettaa, pirdda keettaa, baabure  xaabiyaanne asay deˈiyo gita keettaa wuygiyaa mala sohuwaa miishsha qanxxennan goˈettidosona. Daro sohuwan gootaraa miyyiyan bootta carqqiyaa kaqqidi giigissido “iskkiriiniyan” karen pilimiyaa bessidosona. Anteni Hambuki hagaadan giis: “Goshshanchati ayfiyaa miyo mittaa tokkido sohuwan uttanawu daro mittaa dooridoogaa bolli karen uttidi, asay he pilimiyaa beˈees.” “Yuurika” bessiya asati bantta miishshaa, maayuwaa, dunkkaaniyaanne qumaa kattiyoobaa paraa gaariyan caanoosona.

“Yuurika” beˈanawu heeraappe heeran amarida asaappe biidi xeetan qoodettiya asay shiiqees. Amarkkan 150 asay deˈiyo kataman issi timirtte keettan 400 asay hegaa beˈanawu shiiqiis. Hara heeran “Yuurika Diraamaa” beˈiyo sohuwaa gakkanaashin issoti issoti 8 kilo meetiriyaa hemettidosona. Siwidine biittan, SHarlot Alberg giyo michee guutta keettan shiiqida i shooroti duuqettidaagaa siyidi ‘keehi ufayttidosona.’ Awusttiraaliyan alˈˈo shuchaa bookkiyo sohuwan keehi haahosan deˈiya kataman 1,500 gidiya asay issi kutti beˈiis. Wochiyo Keelay naaˈˈantto xekka timirtte keettaaninne kolloojjiyan “profeeseretinne tamaareti misiliyaa beˈidi, qassi duuqettidabaa siyidi” ufayttidoogaa yootiis. He wode “Yuurika Diraamaa” pilime keettankka asay keehi dosees.

‘Yuurika Diraamay’ Geeshsha Maxaafaa Tamaareti citan xinaatiyaa doomissanaadan haasayaa shiishshiyaageeta kiittiyo “Klas Ekisttenshin Work” giyo oosuwawu keehi maaddiis. “Yuurika Diraamaa” woqqu asay beˈidaakko erettenna. Giigida ‘Diraamatuppe’ daruwaa asay darotoo beˈiis. SHin, 1915n “Diraamaa” bessiya 86 citatuppe bessidoogaa ubbatoo yootidaageeti 14 xalla. Qooday kumetta gidana xayikkonne, he laytti muleera issi miilooneppe dariya asay “Diraamaa” beˈidoogee qoncciis. Beˈidaageetuppe 30,000 gidiya asay Geeshsha Maxaafaa qofay deˈiyo xuufeta oychiis.

‘Yuurika Diraamay’ daro asay hassayennaba gidikkokka, Awusttiraaliyan Arjjenttiinankka, Tohossa Afirkkan British Ayli giyo haruurotunkka, Hindden Karibiyankka miilooniyan qoodettiyaageeti he dumma “Diraamaa” beˈennan aggokkona. Etappe daroti worqqaappe keehi alˈˈo gidida Geeshsha Maxaafaa tumaa demmido gishshawu, “Yuurika!” gaana danddayoosona.